Cherrungel el ngara Chelsel Loba Mui el Blak el Reng
Bo dosmechokl er a roled alsekum eng kired e domes el bedul uchei loba klou el urunguled me a klaumerang. Bo de mui el “dechor er a chelsel” el blak a rengud el “ulsiseb.”
Sesei el rak er a memong e a ngelekel a ngelekam el redil a rirurt el mei er ngak el kmal ungil a rengul e millekoi el kmo, “Chedam, a kulsiseb a kldei el teng er a klekool er a soccer er chelechal sils!”
Ng kmal mlo ungil a renguk e millekoi el kmo, “Ng kmal ungil, e Sarah!”
A delal a ulemes er ngak e ulengelakel el melekoi el kmo, “A teng a mle teblong me a chimong.
Ng dimlak kuker el kmo ng techa mlo kats!
A klou el ongdibel a taem er a omelbedebek, chedaol ocholt, e a lebebil e ng taem er a lmuut el olterekokl.
Ngarngii a kombalii er a lengiil el blai lousbech er a teletael er a GPS lokedongall el kmo Diak Mriid. Sel tal bla mosisebii sel basio el kau a soam el mo er ngii e a lsekum e ke mecheuid e touchakl, e a ngor a diak le du el kmo, “Kebelung!” ng bai kmal ungil oto er a ngerel, e kmo, “Msemecheklii malehcub e mngedechii a rolem—e a le sebechem e Mobult.”
Chelsel a hong er a Ezekiel e kede choiuii tiakid el klebokel el yaksok:
“A le ngar ngii a mekngit el chad el mereko el meruul a klengit e olab a llechuk, e meruul a melemalt ma ungil tekoi e ng diak bo le mad; ng bai ulterekokl el mo ngar.
“Aike el rokui el klengit el bla ruul, a diak bo le mocholt er ngii.”1
Tia meral meang el yaksok, e ng di kirel mekedmokl a eru eltekoi e ng mo sebeched el nguu sel ongedei el yaksok. Mobult er a rokui; e moreked a rokui; e a rokui a mo mousubes. Tia ousbech er a mui el “blak el reng”!
Ng diak el kired el mo uai ngike le chad, el Wall Street Journal a ulechais el kirel el kmo, ng uldureklii a huto el mui er a udoud lobengkel a diak a ngakl er ngii el babier el mo er a Obis er a Tax er a Kabelment el kmo, “Alii IRS, a ngara chelsel tia el huto a udoud el kirel a belsek er a tax. Me a kedeb el tekingel kmo alsekum e ng ko er a uaia le ngesonges er a renguk e, ak mo odurokl a ngelsengesel ruriul.”2
Tia diak el ngii a teletael kired el ngar ngii! Ng diak el kired lorreked er sel medechel el uaia dechiis er a llemalt. A Rubak a mengerechir er a reng me a uldasou.3 Rokir el rengud! Sel demetecholb, e kede modulb el tal chad el olengchelel a yaksok er kid el mo mui el oltirakl er a Osobel, el diak louralmesils a rengud. Sel demui loba blak el reng e de “klekar,” e a Dios a meskid a klisichel e omekngeltengat er kid.4 E sel douralmesils malechub el di el tedocheb a blak el reng er kid, e kede metom er a bebil er a kmal chetengakl el klengeltengat er a babeluades.5
Betok el rak er a memong, e ak ngilteterir a re Scout el mo camp er a desert. A rebuik a milchiuaiu er a bita er a klou el ngau el bla lechemlii, e ngak el tara ungil loungerachel er a re Scout, a milchiuaiu er a btil a mlik. A bocha el tutau me ak bekiis el mo dengchokl e kumes, e ak di milsa chimo el Scout, el bo kuleker ngii el Paul, el uaia le mlak lungil mechiuaiu er a kesus. A kuleker ngii el kmo ng mlo ungil bad er a kesus, e ng dula el kmo, “Ng diak el sal.”
E a kuker ngii el kmo e ngera uchul, e ng millekoi el kmo, “Ak mlo mekerasm; e mlad a ngau.”
A kulenger el kmo, “Ng uaisei, a ngau el mo mad. Tial dukellem ng dimlak le mekekeald?”
Ng dimlak a nger.
E a tara er a re Scout a oldiu el melekoi el kmo, “Ng dimlak bad er a dukellel.”
Me a kuleker el mechas a renguk, “ E ngerang, e Paul?”
Ng mlo diak lolekoi— el telkib e ko er a merrengang e melkingang el kmo: “Ak, ulemdasou el kmo ng bai diak kumoket a beruk, me ng diak kuk bo kuluill er a tutau.”
Ng meral cheldecheduch: ng milngard er a kerasm el tal kesus le ngii el milasm el mengereomel er a di eim el bung a temel ureor. Kede locha mo omdasou, Ng meral kebelung! Ng techa el chad a meruul er a uia tiang? ” E ng di, kede meruul er ngii er a bek el taem er a lmuut el kengaol teletael. Kid, a dirrek, el diak el soad el meketii a dukelled er a chedaol tekoi sel sekum e ng diak dechoit a temed el ngara nglunguuch, mesuub, e meral blak a rengud loltirakl er a ebangkelio e ra bek el sisl; me ng diak di le mad a ngau e le merekong, ng dirrek el mo diak omecheliu er kid me a chedaol tekoi a mo ouralmesils er kid.
Sel le beot a rengud el kirel a telbieled, e ngercheled aikel mo telmellel ruriul. A Rubak a mla mellach er kid “el mo kerekikl e klekar el kired, e mo blak a rengud loltirakl a tekoi el melutk el kirel a diak a ulebengelel klengar.”6 E Ngii a millemolem el melekoi el kmo, “ a Rsechel a diak bo lomekbeches er kid aleskum e ng diak dorrenges er Ngii.”7
A mera er ngii, a bai beot a de cherrungel el ngara “chelsel” er a di de tedobech. Sel di el telkib er kid a ulsiseb malechub e ng diak de cherrungel el ngara chelsel, e ngar ngii, er a chelsel a katsudo er a Star Wars a teletael el diak el “melemalt er a chelsel.” Ng diak de tang lobengkel a Dios maleuaisei e kede cheroid er a teletael er a deureng.8A Isaiah millekoi el kmo:
“A remekngit a uaia meringel el daod, el diak bo lechelellakl, el di olab a mekikiongel me a dechudech.
“Ng Dios a millekoi el kmo, ng diak a budech, el mo er a remeruul a mekngit.”9
Kede ngeltengat, le ng diak el iior er a kmo kede ngar ker malechub e kede mlar el mei, e kid a diak desal cheroid er a Osobel, el millekoi el kmo: “A leuaisei, e ngike el ouchel a rengul e mei er ngak el uaia kekerei el ngalek, a ngii a bo knguu, e mo msa rengedel a Dios. Le tiaikid a uchul, e a kuldersii a klengar ngak, e mla lmuut el nguu a klengar ngak.”10
Sel dolemolem louchel a rengud e dultuil er a Rubak, e kede mo ngmai a klisiich sel dobult loba ngariou el reng me a klaumerang el uaia kekerei el ngalek, 11el mui er a llomes er a betok el teletael er a klengar. A Job a millekoi, “A melemalt a melemolem el ngara rael, e ngike el klikiid a chimal a mo mesisiich el mesisiich.”12 Ng Tennyson ngike el milluches el kmo, “A klisichek a di uaia klisichir a reteruich, le ngii el klikiid a renguk.”13 E a Rubak a mla mellach el kmo ng kired el mo dechor er a chedaol basio e diak demesim.”14
A ngelekam el sechal er a Justin a mlad er sera le teruich me a etiu a rekil el meketeketang el smecher er a oberaod el rakt. A cheldechedechal er a temel a sacrament ruchei er a bol secher, e nguluchais er a cheldecheduch el locha kmal mle klou a belkul mo er ngii el kirel a tal chedam me a ngeasek el ngelekel sechal el mlo er a stouang lolterau omotzia e milsa oteruul el tutu el mui er a eolt me ng ko er a teletelel a chad. Ngika el buik a tilikir tial tutu me ng kora meuitech e kuk lemuut el mo dechor. Ngika el chedam a uleker er a ngelekel el kmo ngera me ngika el tutuu el chad a di mo dechor. Ngika el buik a ko er a ulemdasou e mereko dula el kmo, “Ng diak kudengei. A kumdasou e ng locha ngii el dechor er a chelsel.” Alsekum e ng soad el mo “uldimukl er a chelsel,” e ng kired el mo “cherrungel el dechor er a chelsel,” er a ngii di el teletael.”15
Kede dechor er a chelsel sel sekum e ng klou a rengud e mengiil er a temel a Rubak el choroid malechub e ng meskid a klisiich loutekangel er a ringelel a klechad.16Aika el ringel a sebechel, rakt, chelitechut, secherel a bdelul, kodellel a betik er a rengud, me a lmuut el bebil er a ringel.
Kede dechor er a chelsel sel dosebechakl e dolngeseu er a rengesool. Kede dechor er a chelsel sel dosebechakl er a klemerang lomtok er a mekngit me a tekingel a beluulechad el ngii a di merael mo chachisois e bleketakl, el omekedong er a mekngit el kmo ngungil e a ungil a oleko ng mekngit17 e oltuub er a remelemalt le tir el melemalt.”18
A dechor er a chelsel el diak el iior er a ringel a sebechel tekoi le ngokiu a olisiich me a ongelaod er a Chedaol Reng me a diak a ulebengelel osenged el ngii chengelakl er a di osengel a chad. 19Sel klengar ruchei e kid a uleldiu er a deureng er a techall el demei er a beluulechad.20 Kede mle “mui el ngara chelsel” el rokui e mle semeriar er a uldesued el millilt el mo mesebechakl er a uldesuel a Demad er a Babelaudes. Me a chelechang e ng taem el bo dedechor e lmuut el mesebechakl er a moktek er Ngii!
A oketiu me a euid a rekil el demak a dirk ke mlad. Sera le kiei e a ngii di el chad loker ngii el kmo ng uangerang e ng blechoel longer el kmo “A denguu er a olkael er a 1 el mo er a 10, e ak locha ngara 25!” Mol muut er a taem el ngika el rubak a dikea el sebechel dechor malechub el dengchokl e merngela er ngii a mengedecheduch, e ng di a nger ngii a di mle osisiu. Ng mle blechoel el mesisiich er a chelsel.
A demak er a loketiu a rekil, e a ki mlara skozio me a kuleker ngii el kmo bo knguu a wheelchair lotekir. Ng dilu el kmo, “Ng diak, e Gary—becherei me sel bok cheuodel.” E sola dilchelii el kmo, “ E dirrek, alsekum ak mo mesaik el merael, e ng sebechek el remurt.” Me a lsekum e ng diak el sebeched el “ngara chelsel” er chelechal taem el dorael, eng locha kired el remurt; elocha kired el muut el sumecheklii a dorael er ngii. Ng locha dirrek el mo kired lobult. Nglocha kired el muut el kmal mo blak a rengud el mesuub, e blak a rengud el meluluuch, malechub e ke de kuk di mechei a bebil er a tekoi me luchul e bol sebeched el urrekodel er a ikel tekoi el meral meklou a belkul. Ng locha mo kired el choridid er a beluulechad me bol sebeched lurrekodel er a diak a ulebengelel. A demak a mle medengelii tiang.
Sera le ngara klsoldau er a Ongeru el Mekemad, e ng mla er ngii tirkel mlara sel klou e oberberk el blai21 el uleltuub a blekerdelel; e a teru er a le dak el chad er a diall, el Dale Maddox me a Don Davidson, a mlo medengei eng di dimlak loltuub er ngii. Te uleker, “Sabin, ngera me ke kmal ngodech er a rebek el chad? Ngarbab a llach el moltirakl e diak molim a rrom, diak molokou a dekool, diak molius, e ko er a di kellechakl e ungil a rengum.”
A ungil el uldesuir el kirel a demak a diak bol uaia ikel tir a mla mosisechakl el kirir a re Mormons, e a demak a mlo techellel losischekelterir e melecholb er tirka el teru le dilak el chad e ra diall. A rechad er a bill a Dale a kmal mlo kesib a rengrir e dilu er ngii el kmo alsekum e ng mo er tial Ikelesia e ng mo diak lobengkel a sechelil redil er a, Mary Olive, e ng di ngii e mlo kebetech ngii me a remisionari e miltecholb.
Bocha er a ulebongel er a mekemad, e a President Heber J. Grant a ulemekedong er a remisionari, luldimukl er a rebebil mle bechiil el chad. Sera 1946, ea Dale me a bechil, er a Mary Olive, a mlo ulterekokl el kmo a Dale a kirel mo er a mission e a bechil a mle dioll er a kot el ngelekir. A uriul eng mlo tetiu a rengelekir, el tedei el sechal me a telolem el redil. Tirka el tetiu el ngelekir a di mlo er a mission, e a Dale me a Mary Olive a ulekiuellir el mlo er a kldei el kakerous el mission. Betok el ngelekir a rengelekir me tem la mo er a mission. A teru er a rengelekir el sechal, e ra John me a Mathew Maddox, a chedal a Tabernacle Choir er chelechang, me a bechil a ngelekel a Mathew, er a Ryan. A telungalek er a Maddox a ngar ngii a dart me a okeua me a teuang e kmal ungil okesiu er a “cherrungel el ngara chelsel.”
Sera ki momes a babilengel a demak, e a ki milsa babilengel a Jennifer Richards, el ta er tirkel teim el redil el ngelekel a mle chad er a dial ngii me a demak, er a Don Davidson. Ng milluches el kmo: “A melemalt el klengar kau a ngilodech a klengar kemam. Ng meringel er kemam el mesa klengar kemam el diak ki mchedal a Ikelesia. A demak a mlad el mle semeriar er a ebangkelio e milasm loltirakl er ngii.”22
Ng meringel er kid el melebodeb er a klungel a klungiaol el dersta el chad ocholt. A demak me tirka el teru el chad er a diall a dimlak el kengei lorrenges er tirkel mla er sel meteteu el blai el uleltuub er tir.23 Te mle medengei el kmo ng bai kuk ungil a loltirakl er a Ulemeob er a loltirakl er a rechad.
A Apostol Paulus a milsaod er a sils er kid er sera le du er a Timoti el kmo, “a rebebil a mla obult el mo chemau a klsuul el teletael.”24 Ng betok a “klsuul el teletael” el deues er a beluulehcad er a chelechal sils. Ngara omelkingir tirkel tir a ngara meteteu el blai. 25Ng blechoel uaia lemocholt el kmo a mekngit lomeruul a di ungil sel sekum a rechad a mo cheroid er a ebangkelio. E a lebebil er a taem el mocholt er tirkel tir a diak el bol charm el mo “mui el ngara chelsel” e bai mo oltirakl er a di uldesuel a chad e omtok er a profet.
Kede ngeltengat, el medengei el kmo ngera mo ulebengelel el mo er a remelemalt. Sel de “mui lulsiseb,” e ng kired el mui el medengei el kmo a “ a a rokui el tekoi a dmak loureor el kirel a klungiolir tirkel betik a rengrir er a Dios.”26 A Elder Neal A. Maxwell a millekoi, “Lak ko medakt, di moruul a llemalt.”27
A demal a bechik a ulisechakl er a BYU e kmal mle soal sel tim er a football er a BYU e ng di dimlak el sebechel mo omes a klekool le ng kmal subek a rengul a bol make. E a tal ongasireng el tekoi a dilubech—ng mlo er ngii a VCR, me ng mlo sebechel di record aika el klekool. Sel sekum a BYU a mo kats e ng kmal ungil a rengul e ansing lomes, el mo er a ulebongel! E a lsekum e ng ko er a mlo er ngii a diak el melemalt el kelebsengir, malechub a metemall el chederir, malechub e ng ko er a sorir el mo make er a ulebongel, e ng dimlak bol sebek a rengul le ng mle medengei el kmo temo kats! Ng sebeched el kmo ng kmal mle “cherrungel osengel kirel a urungulel”!28
Me ngosisiu el mei er kid. Sel le blak a rengud, e ng sebeched el mo ansing el kmo ng di mo ungil besul a rokui el tekoi el kired er a ulebongel. A yaksok er a Rubak a klemerang. Tia diak el belkul a kmo ng mo beot malechub e ng diak bo lolai a rak, e ng di ng ua ikel lulluches a Paulus el kmo, “Ng dirkak a mad el mes, me a ding el remenges, me a dirkak el siseb er a rengul a chad, aikel tekoi el Dios a mla kudmokl el kirir tirkel betik a rengrir er ngii.”29
Rodam me a rodos, ng dirkak a ruebet er a klengit er a klukuk. Bo dosmechokl er a roled alsekum eng kired e domes el bedul uchei loba klou el urunguled me a klaumerang. Bo de mui el “dechor er a chelsel” el blak a rengud el “ulsiseb.” Bo de klikiid e lak de medakt el mesebechakl er a uldesuel a Demad er a Babeluades me a urerel a Jesus Kristo, el Osobeled. Ak sioning el kmo a Demad a kiei, ea Jesus a Kristo, ea moktel er a deureng a merang. Ak meluluuch ma ikel lungil klengeltenat er a Rubak lebo er kau, el loba ngklel a Jesus Kristo, amen.