Sel Lomelekoi loba Ebangkelio
A mesisiich el osisechakl a kmal klou a belkul el uchul omengeluolu er a ebangkelio er a re keblid, e ultuil er a blak el reng me a meringel el ureor.
Uriul er a kmokedong el General Authority, e ak millukl ngak me a telungalek er ngak er a Costa Rica el mei er a Salt Lake City el kirel a kot el urerek. Chelechal kngara Beluu er a Merikel, e a kmal mla mukngeltengat el mla oldingel er a rebetok el ungil chad er a kakerous el beluu me a teletael. Betok er tir, a uai ngak, el mlechell er a ikel beluu er a Latin America.
Ak mla mtebengar el kmo te betok er tirkel kot el cheroll er a rechad er a Sebangiol a ousbech er a tekoi er a Sebangiol sel longedecheduch e di medengei a sesei el tekoi er a Merikel. E tirkel ongeru el telcheroll, el tir a mlechell er a Beluu er a Merikel malechub e te di mle mekekerei e mei er a skuul er tiang, e kmal ungil melekoi a tekoi er a Merikel e telkib el meteteremokl e ra tekoi er a Sebangiol. E oumesingd, sel bocha er a ongedei el cheroll, e a tekoi er a Sebangiol, el ngii a kmal tekingir a ruchelir,a remiid.1
A denguu er a tekoi er a omelekoi, e tia okedongall el kmo ng mla “remiid el omelekoi.” A omelekoi a remiid sel sekum a telungalek a melukl el mo er a tara basio el sel tekingir a diak el mesisiich. Tia diak di ldubech el mo er a rechad er a Sebangiol ng dirrek el dubech el mora obdois el rechad er a beluulechad el sel tekingir a mutechei er a kuk beches el omelekoi.2 A Nephi, el profet er a chelsel a Babier er a Mormon, a dirrek el silebek a rengul a riid a tekingir er a lorech er tir el melukl el mei er a beluu er a telbiil. A Nephi a meluches el kmo, “Le ng, lemesel a Dios a uchul e ng kiram lolab aika el record, me luchule a rengelekam er a tara klebesei bo lodengelii a tekingir a redemerir.”3
E ng di a Nephi a dirrek el silebek a rengul a riid a kuk tara omelekoi. Sel kuk tara bades, e ng melekoi el kmo, “E dirrekel bol sebecham locholt er tir aike el tekoi el mla medung er a ngerir a rokui el chedaol profet, el mlo er tir lokiu a Chedaol Reng me a klisichel a Dios, er a uchelel a beluulechad, el me lmuut er chelechal taem.”4
Ak mtebengar a klaisisiu er a omengeluolu er sel meral tekinged me a omengeloulou er a tekingel ebangkelio er a Jesus Kristo er a klengar kid.
Chelechal sils e sel kumtab, e ng soak el diak di bo kusaod el kirel a ulterekokl el omelekoi er a beluulechad ng bai soak el dirrek el mo mesaod er a diak a ulebengelel omelekoi el ngii a kired el mengeloulou er ngii er a rekeblid me ng diak el riid. Ak melekoi el kirel omelekoi5 er a ebangkelio er a Jesus Kristo. Sel kdu ng “omelekoi er a ebangkelio,” e ak mesaod aikel rokui el osischeklir a reprofet, me a blekongesenges er kid el kirel aike el osisechakl, e oltirakl a melemalt el uldelid el teletael.
Ak mo smaod a edei el teletael e ng sebeched el mengeluolu er tia el omelekoi.
A kot: Lmuut el Mo Blak a Rengud e mo Kerekikl el kirel a Delengchekled
Chelsel a Doctrine and Covenants, e a Rubak a siotai er a rebetok el chetengakl el chedal a Ikelesia luldimukl er ngii a Newel K. Whitney, el mo sumechokl a chelsel a delengcheklir. A Rubak a millekoi el kmo, “Kau el mesiungek er a Newel K. Whitney … a kirel mechokl, e mo sumecheklii a telungalek er ngii, e mo omes me luut el mo blak a rengrir e bol kerekikl er a delengcheklel, el blechoel meluluuch, le lak e ng mo mengubet er a deruchellel.”6
A tara tekoi el uchul e a omelekoi a remiid a sel sekum a roungalek a diak el choit a temir lolisechakl er a rengelkir a tekingir. Ng diak le klebech a didolekoier ngii er a rekeblirir el merekong. Alsekum a roungalek a semeriar el mengeluolu er a tekingir, e ng kirel mosisechakl. A omesuub a mla chotii el kmo sel sekum a roungalek a blak a rengrir el mengeluolu er a tekingir e ng mo ungil.7 Me a leuaisei e ngera el rael er a blak el reng a dousbech er ngii el mengeloulou er a tekingel ebangkelio.
A Elder David A. Bednar er a Chelechad er a Teruich me a teru el Apostol a ulemeklatk el kmo a “mechitechut el osischeklel ebangkelio er a blai” a kot el mesisiich el uchul a telmellel a telcheroll er a telungalek er a chelsel a Ikelesia.8
A leuaisei e ng sebeched el kmo a mesisiich el osisechakl a kot el klou a belkul el omengeluolu er a ebangkelio er a rekeblid, e ultuil er a blak el reng er kid.
Ng betok el taem el bla de mongit a dersta el chad me a telungalek el mo mesuub chedaol llechukl.9Betok el telungalek el meruul er tiang a mukngeltengat er a bek el sils er a chachisois el kltalreng me a ungil deleuill lobengkel a Rubak.
Me ng oingerang e a omesubel chedaol llechukl a omuchel? Ng omuchel sel sekum a roungalek a nguu chedaol llechukl er a chimorir, e oba beltik el reng, e siotai er a telungalek el mo kldibel e dmak el mesuub. Ng meringel a domes er tia el teletael er a omesuub el mocholt er a ngii di el teletael.
Rechedam me a rechedil, la ko metom er a ika el meklou el klengeltengat. Lak mongiil elmo er sel dikea rolel!
Ongerung: Mesisiich el Okesiu er a Blai
A tal chad semmong er a omelekoi el chad a milluches el kmo a sel mongeluolu er a omelekoi, e ng “kirem el mekereklii tia el omelekoiel mo er a rengelekem.” 10Kede “mekereklii a omelekoi” sel sekum a osischekled me a omerelled a chatter el dmak loureor.
Sera kngeasek e ak ulureor er a kombalii er a demak sel lak a skuul. Sel kot el ker el demak a blechoel loker ngii sel knguu a ududek a kmo: “Ngera ke mo meruul loba ududem?”
Ak mle medengelii a nger e blechoel longer el kmo: “Harau a tengetengek e koreomel el kirel a mission.”
Uriul er a bla kureor lobengkel el kmeed el eai el rak, e di onger osisiu el keril, e a demak omdesua el kmo ng mla osischeklak el kirel a ongeltacher. Sel ngii a dimlak lesang a kmo ngak a silubii a klou el belkul tial osisechakl er a chelsel di tal sandei. Msall e kuchais er kemiu el kmo ak milkerang e subii tia el osisechakl.
Uriul er a bebil er a teletael el melutk el kirel a mekemad er a Central America, e a siobai er a demak a mle tsuburer. A re mle kmeed eru el dart el chad loureor el mo er ngii a di mlo teim el chad loungerachel a mesil el ulureor er a blil a mlai er a blimam sel bol usbechall. A tara klebesei er tiaikid el kmal meringel el taem, e a kulerrenges er a rechad er a blik el mesoad el kirel a kmo te harau ongeltacher malechub e te mechar a kelir a rengalek.
A bocha el Sandei e a kulkiuellel a demak lomes el kmo ng mo mekerang. Uriul er a mitelengam er a Ikelesia, e ak milsang el nguu a huto e loiia tengetengel er a chelsel. Tia di telkib er a suobel. E a ker el millemolem el ngara uldesuek a kmo chelecha ngera ki mo mengang.
Ng dirk tutau er a Kot el Ureor, e a rebebil chad a milengod er a chesmerel a blimam. Sera knguu a chesimer, e te uleker er a demak. Me a kulleker ngii, me tia er a lemei, e tirka el chad el mle oldingel a millekoi er ngii er a orechudel el ureor el kirel kedmekill. Te dilu er ngii el kmo tia el ureor a kmal orechudel me ng sorir el di ma harau er ngii. Tiaikid el sils e ak silubii a klou el belkul osisechakl er a ongeltacher me a klengeltengat lokiuellel.
Chelsel a Beches el Renged, e a Rubak a mesaod el kirel okesiu. Ng dmu el kmo, “Chelecha, e ak kmal, dmu er kemiu el kmo, A Ngalek a diak el sebechel meruul a ngerang, ng di meruul aikel lomes er a demal meruul” le ikel tekoi loruul, a dirrek el osisiu el tekoi el bo loruul a ngelekel.”11
Ng diak el klebech a di dosaod el mo er a rengeleked a klou el ultutelel a chebechiil er a templo, olsengerenger, me a omengull er a Chedaol sils. Ng kirir el meskid el chemoit a temed el blechoel el mo e ra templo. Ng kirir el mesa blak el reng er kid el blechoel lolsengerenger 12 e mengull er a Chedaol sils. Alsekum e a rengeasek el ngeleked a diak el sebechir lolsengerenger er a temel eru el blengur, e diak el sebechir el blechoel mesuub chedaol llechukl, e diak el sebechir el mekodir a TV me lak lomes a klekool a le Sandei, e a omomdasou e ngar ngii a chedaol klisichir lodngakl ongetikaik er tial meringel el beluulechad er a chelechal sils, luldimukl ongetikaik er a osengel a deleboes?
Ongedei: Uldelid el Omeruul
A dirrek le tara teletael e a omelekoi a sebechel mengodech malechub e ng remiid a sel sekum a bebil er a omelekoi me a uldelid el siukang a soiseb el mo obengkel sel ngii a tekinged.13
Sera uchelel a mla moluut el Ikelesia, e a Rubak a mle siotai er a rebetok el chetengakl el chedal a Ikelesia el mo sumechokl a delengcheklir. Ng ulemuchel el mesaod a eru el teletael el uchul e ng sebeched el metob er a llomes me a klemerang er a rekeblid: “A mekngit sel lemeie nguu a llomes me a klemerang, el mo cheroid, le ng diak molngesenges, a rengelekel a chad, me a dirrek el uldelid el siukang er a redemmiu.”14
Se de telungalek, e ng kired el mengeroid aikel uldelid el siukang el ngii a uchul e ng mo diak dongull er a Chedaol sils malechub e donguiu chedaol llechukl me a nglunguuch er a rekelblid. Ng kired el chosimer aikel chesimer el uchul osengel a deleboes me a ngii di el mekngit. A bo doldechelak a uldelid el teletael er a beluulechad er chelechal sils eng kired lousbech chedaol llechukl me a tekingir a reprofet er chelechal taem lolisechakl er a rengeleked el kirel a chedaol teletelir, moktek er a klengar tir, me a chedaol urerel a Jesus Kristo.
Ulebongel
Chelsel chedaol llechukl, e kede metik a bebil er a okesiu er a mla “remiid lomelekoi.”15 El uaia:
“Chelecha e ng mlar ngii a rebetok er a ikal merael mei el telcheroll el dimlak lodengei aikel tekingel a King Benjamin, le te kma mle mekekerei el ngalek er sel taem er a longedecheduch el mo er a rechedal; e dimlak loumerang a uldelid el teletael er a redemerir. …
“Me tiaikid el diak loumeranger tir a uchul e ng dimlak lodengei a tekingel a Dios;e mle medecherecher a rengrir .”16
Tiaikid el merael mei el telcheroll, e a ebangkelio a mle ngodech lomelekoi er tir. Ng uaisei el omengeluolu er sel kmal tekinged a le bebil er a taem e ng merael a mondai el kirel, e ng di sel denguu er a chelsel a uldasou er a mo suobele ng diak a mondai el kirel a kngtil a doridii a osisechakl er a ebangkelio er a rekeblid.
Kid el ngelekel a Dios, a diak decherrungel el chad e melasm el mesuub er a cherrungel lomelekoi.17 Ng di uaia chedil el chubechub el mo er a rengelekel, e a Demad er a Babeluades a klou a rengul el kirel a telitur me a cheleuid er kid. Ng mekreos er a rengul e ungil medengei aikel ongtid el mo er ngii, el meral ngara rengud, el di uaia sal ungil llechukl el tekoi. Ng dmeu a rengul rongesii a kot el tekoi er a ebangkelio el kid a dulii. Ngii olisechakl er kid loba cherrungel el beltik el reng.
Ng diak a ngii di el klungiaol er tial klengar, el kmal klou a belkul, el mo mengaisisiu el uai sel doridii a ebangkelio er a telungalek er kid.18Ng klaumerang er ngak el kmo a Chedam er a Babeluades bo lomekngeltengat er kid er a blak el reng er kid el mo urrekodel er a Tekingel, el mo lmuut er sel desal kmal mla mo meduch lousbech er ngii, el ngii a di mla tekinged ruchei. El ngara ngklel a Jesus Kristo, amen.