Ma Jesus a Ulemes er Ngii e mle Betik a Rengul er Ngii

Kesai el rrak ra mla memong e ak mlo kedong, ma bechik ra Jacqui, el mo mtebechel er a Washington Spokane Mission. Aki mlo er tial lureor ra omesiou e dektam e semeriar ersel ngerachel e loureor lobengterir a re betok el smiich el ngeasek el missionariis. Te kakerous a le tilobed er ngii e mle mereched el mlo ua ngelekem el sechal ma redil.

Meng ngoumesind er tir a mle ungil ra ngerchelir, a re bebil a metarbecheserir el melebedebek a ngarbab el tekoi el kirel a ngerechelir. Ak medengelii a ta el missionnarii el melekoi er ngak, “President, ngak a kuk diak el soak a rechad.” E a re bebil a dilu er ngak el diak a klemeriar reng er tir e loltirakl a ikal meringel el lechul a kle missiionarii. Ak mle bekikl e melebedebek el ngera ki mo rullii el ngmodech a rengrir tirkel derta el missionarii el direkak el subii el ua sel deurreng sel doltirakl a tekoi.

A tara klebesei me kumekall er a klebokel el sers el ngara ked ra oleochel ra Washington-Idaho, e a kulerenges er a cheldecheduch el ngara Beches el Renged. Ma kurenges ersel cheldechedechal ngkel merau el ngeasek el chad el mlo ra Osobel el luleker ra kmong ngera rellii e nguu a diak a ulebengelel klengar, e ak ngiluu a di mle kiul duum e tmolech el locholt er chelechal taem eng elduib ra uldesuek.

Uriul ra ak rengesii a Jesus el melekl a ikel llach meng ngkel ngeasek el chad e longer el kmong mla tirakl a ikel rokui ra le kekerei, e ak kurenges er a Osobel mekekokil el lolsisechakl: “A ta el tekoi el diak er kau: … moterau a rokui er kau, e …. mei, … moltirakl er ngak.”¹ Engdi sel ilsir a renguk, lek bai rirenges a kelolem el tekoi ruchei ra ikel bades el direkak a ta el blak renges malechub e blak chuiu. Ng rengud eng mildechel mora chedaol lechukl. Ng meang el tekoi a blo kudengelii el chemotang.

A ikang ngera el kelolem el tekoi el kmal tmolech a belkul? Morenges e momes alsekum meng sebechem el tmang a ikal beot el tekoi, el diak kede betik ra ngidil tekoi ra ebangkelio engdi ngara Ebangkelio ra Markus:

“E ngii a merma imong el loreched … e uleker er ngii, Ungil Sensei, ngera sel bok rellii eng mo sebechek el nguu a diak a ulebengelel klengar?

“Ma Jesus a dilu er ngii, …

“Kau a medengei a llach el kmo, Lak bo le melaok a rengum, Lak bo momekoad, Lak bo morechorech, Lak bo molekoi a telingaol el kirel a chad, Lak bo mongeblad, Bo mongull ra demam ma delam.

“Me ngii el chad a dilu … , Sensei, a ikal rokui el llach a di kuleltirakl er sera kngalek el mer chelechang.

“Ma Jesus a ulemes er ngii e mle betik a rengul er ngii, e dilu el kmo, Kau ousbech er a kmal di ta el tekoi: morael, bo moterau a ikel rokui el ngar ngii er kau, e mngai a ikel udoud el mesterir a re mechebuul, me bo merau er medal a Dios: e mei, mnguu a chelengelem, e moltirakl er ngak.”²

“Ma Jesus a ulemes er ngii e mle betik a rengul er ngii.”

Me ser ak renges a ikal tekoi, eng mlo mellomes a renguk el mesa Rubak er kid el chelelakl eulemes er ngkal ngeasek el chad. Ulemes—el ua lomes el tmolech el merael mora elsel a rengul, e mesa klungiolel ma klisichel, e dirrek el melchesuar ra klou lulsbechelel.

E ngikaikid el beot el tekoi, el—Jesus a betik a rengul er ngii. Ng melchesuar ra klou beltik el reng ma klechubechub el kirel ngkal lungil ngeasek el chad, ele ngtiakid el beltik el reng, eokiu tiakid el beltik el reng, e a Jesus a ulengit a lmuut el betok er ngii. A kumes ra kmo ng kora ua ngerang ngikal ngeasek el chad ra lileuekl ra imis el mesisiich el beltik el reng e losisiu el taem e bla le mongit elmo meruul ra tekoi el meral meringel el mocha olterau a rokui el kloklel el ngai udoud el mesterir a re mechebuul.

E seikid el taem, e ak mlo medengei el diak el dil rengrir a re bebil ra re missionaries el kirel mengodech. Ma renguk el dirrek. A ker a diak el “Meng mekerang a checherd a rengul el mission president a le semecheklii a metarbechesul el missionarii meng moungil?” A ker a bai, “Ak mekerang a bok mui ra beltik el reng ra Kristo, ma missionarii a melchesuar ra beltkil a rengul a Dios elmo rengii lokiu er ngak e soal el moungil?” E mekerang a kumes er tir lokiu sel losisiu el teletael el ua Jesus ra lomes er ngkel merau el ngeasek el chad, e lomes er tir ra kmo te meral ua techang e sebecherir elmo ua techang, ra bai di kuk ikel loruul ma diak el longetmokl? Ak mekerang e mo ua Jesus?

“Ma Jesus a ulemes er ngii e mle betik a rengul er ngii.”

E seikid el mong, esel kaseues ngak ma missionarii el metarbechesul loltirakl a bebil ra tekoi, e a elsel a renguk e ak mesang a kedung el sechal ng redil el mlo uedikel er a soal meng mle mesiou. E solang eng sebechek kung el kmu tekoi el loba delmedemk el reng ra roungalk el kmo:³ “Elder malechub eng Sister, alsekum eng diak betik a renguk er kau, eng diak kumekereu a mo dubech ra mission er kau. Engdi ng betik a renguk er kau, eleng betik a renguk er kau, e ak kumekereu ra kmo kemo techang. Mak siotai er kau elmo melodech a ikel tekoi el meringel er kau e mo ngkel Rubak a soal a bom uai ngii.”

Sel bekl el taem el bo kumes er tir el missioinariis, e a kot ak meluluuch el kirel a sengk er a beltik el reng me bol sebechek el dongcheterir el elder ma sister el ua Rubak sel lomes er tir.

Nguchei ra ongdibel, sel sekum a Sister Palmer me ngak a mla outkeu ra re bekl el missionarii el lou derta er tir, e ak molmuk e omes a elsul a mederir, e lomes er tir—ng cheldecheduch el diak a medung—el diak el mochib, mak mlo mui ra klou el beltik el reng el kirir tirkal kesiokel el ngelekel a Dios.

Ak siluub a betok el losisechakl el ngildechii a klengar er ngak e lokiu tial mle rengak loeak a Ongeteruich el bliongel ra Markus bliongel 10. A ikakid a euang er a ikel losisechakl el kumerang elmo ngosukid:

1. Mesel dosuub el mesterir a rebebil el ua Rubak sel lomes er tir ra bai kuk dil losenged, e a beltkil a rengud el mortir a mukerool e dirrek elmo soad el lolngeseu er tir. Kede mes a klisichir eldi tir e diak el lolchesuar. Mesel doba beltik el reng ra Kristo eng diak a dekted el kmung a tekoi, e le “erungel el beltik el reng a oridii a dakt.”⁴E kid a melmolm, el medengei el kmo tirkel kmal meringel a dou beltik el reng el mortir, e a kot el lousbech er a beltik el reng.

2. Ngdiak a osisechakl malechub eng omesuub el meketmokl lokiu a checherd malechub eng ngasech el reng, e a reng a diak el mengodech sel lak el ngarngii a beltik el reng. Ma ngerecheled a blo doungalk, sensei malechub e kede mereder, a meral losisechskl a di dubech ersel blekeradel er a klaumerang ra bai ultelchakl. A re keblid a kirel blehoel el selbechakl el basio ra rengeleked—ngdiak el basio ra ueldikel.

3. A beltik el reng a diak el kired el lomecheuech er ngii ra ngalk, sechelid, malechub eng chedad a blol lak el ketmokl a soad. Kid a diak ke dodengelii a dilubech elmo er ngkel merau el ngeasek el chad ruriul ra lorael e lou mekikngit el reng, engdi ak medengei el Jesus a milemolm el betik a rengul er ngii molmuut ra le ngiltii a ngodech el rael. Altang nguriul ra le klungal chad, eng miles a kloklel el diak a belkul, meng dilbedebekii e mlo uedikel ra ta el mengasireng el blekeradel ra Rubak e lulemes er ngii, ou beltik ele reng el morngii, e siotai er ngii elmo tirakl er Ngii.

4. Leng Ngii betik a rengul er kid, a Rubak mengelchiil a betok el ngar kid. Alsekum eng ngariou a rengud, e kede outkeu ra siotai ra Rubak elmo uchel a rengud, e mo melnget, e mo mesiou e lolechotel sel erungel el beltik el reng er Ngii el me rekid. Leng diak el ngerang, a mo uchel a dirrek el siotai el nguu sel klebokel el sengk er a klausubes ma buedech. Maleuasei, “lak ke moltngakl … sel lolach a Rubak, e bo mesaol sel le cheklau: Leng ngkel le betik a rengul er ngii a Rubak a le semecheklii.”⁵

Rodam ma rodos, chelechang ra ngidil taem el molchesuar el mongit elmo meruul ra meringel el tekoi—e mchitii a mekngit el blekerdelem malechub eng elitechetum, bom iikl a tekingel a beluulechad, mobes er a soam el tekoi leng Chedaol sils, mousubes ra chad el mlo mekngit er kau—momdasu er a Rubak ellomes er kau, e betik a rengul er kau, e siotai er kau me mobult e moltirakl er Ngii.E moureng a sulel el betik a rengul er kau el limis meng siotai er kau me mluut el meleketek.

A kuchais ra Osebeled, el Jesus Kristo, e omes el bedul medad el morsel sils sel le ngai imal el mechulid, e lomes er kid el liueklid loba sel erungel el beltik el reng er Ngii. Loba ngklel a Jesus Kristo, amen.