Mo Chemau a Dios el Diak Demesim

Rodam me a rodos, ng soak lomuchel er a cheldechedechak er a chelecha el sils louchais el kmo ak medengei el kmo a President Thomas S. Monson a profet er a Dios er a chelecha el taem. A re counselor er ngii er a First Presidency me a Reteruich me a teru el Apostol a, meral, profet, rechad er a ues, me a ocholt. Tir a omtechei er a Rubak el Jesus Kristo e ngarngii a lemeltir louchais er a uldesuel me a soal el mocholt el mo er tir. A kuchais el kmo kede mo ngara selbechakl a doltirakl a tekingir. A Rubak omekellomes er tir me lomeketakl el melisiich a klaumera er kid er a Chedam er a Babeluades me a Ngelekel, el Jesus Kristo, me a Tngkaireng er Ngii me luchul e lak demesim sel bo dechebangel a ringel er a chelecha el sils.

Chelsel a Babier er a Mormon e kede menguiu el kirel a chad el Ammon a ngklel el tilobed er a beluu er a Zarahemla el mo er a beluu er a Lehi-Nephi el mlo osiik er a rodam er ngii. Tiaikid e ng miltik er a King Limhi me a rechedal, el mle kelebus er a re Lamanites. A A King Limhi a mlo semeriar el kirel a tekoi le dilung a Ammon el kirir a rechad el mlara Zarahemla. A rengul a mlo mui er a deureng me ng milngideb er a rechedal er bita er a templo e melkinga el kmo:

“Ng kirir el mo ngara deureng, e otilii a klaumera er tir er a Dios. . …

A King Limhi a dilu er tir el kmo alsekum e te obult el mo er a Rubak loba blak el reng, , … e mo blak a rengrir el mesiou er Ngii, e Ngii a mo ultuil er a sel Ngii a soal, e otebedemiu er a ringel.” ¹

A klaumerang er a rechedal a King Limhi a kmal mlo mesisiich lokiu a tekingel a Ammon me te siliseb er a telbiil lobengkel a Dios el mesiou er Ngii e oltirakl a Llechul, el diak el iior er a meringel el klengar le bla er a chelsel. Ngokiu a klaumera er tir, e ng mlo sebechir el kudmeklii a uldasu mel a chiis el lak el lobdechemer a re Lamanites. .²

Rodam ma rodos, a kulengit me molbedebek er sel klou a belkul el ongit el King Limhi a ulelengit er ngii er a rechedal e mongaisisiu er ngii el mei er kid. Ng dilu el kmo: “Bekiis e bom, ngara deureng, e motilii a klaumera er kemiu er a Dios.” Me ngullab aikaikid el tekoi, e a Limhi a ulelengit er a rechedal el mo omes el mo er a mederir lultuil er a klaumerang; e bol bechei a dektir e bo loba blak el reng lokiu a klaumerang; e lak el mesim a klaumerang er tir er a Dios el diak el iior er a teletael el tir a ngara chelsel.

A klengar er a beluulechad a taem er a skeng el kid a mo metutk el kmo kede mo meruul aikel rokui el tekoi el Rubak el Dios er kid a dmu er kid.³ Tia kired el kmal mo ultuil er a mesisiich el klaumerang er a Kristo luldimukl aikel meringel el taem. Ng kirel mo blak a rengud el melemolem el merael debul uchei el mesisiich el ngara klaumerang er a Kristo, loltirakl er a Chedaol Reng, e oumerang el kmo a Dios a mo sobecheklid er a ikel kid ousbech. ⁴

Mocha er a ulebongel er a urerel er a beluulechad, ruchei er a le mengai el mo mechesimer, e a Osobel a ulsisechakl er a rulbengkel el kmo: “Ko mo chelbangel ongarm er a beluulechad: e ng di bom ngara deureng; le ak mla mo mesisiich er a beluulechad.”⁵

Ka dolbedebek el telkib el taem—a Jesus Kristo, el Di Chimong el Sechal Ngelekel a Chedam, a dimlak a kngtil chad e mlo mesisiich er a rokui el ongetikaik, ringel, ongarm, me a olibesongel er a beluulechad. Ng mlo mengerngars a rsechel er a Gethsemane; e Ngii a mlo er a klou el ringel el diak a ngii di el ngera el klisiich el smodii el ringel. Ngii a mlo chellungel a rokui el ringel me a secher el kired. E Ngii a dechor el kldmokl el ngosukid— ngoseuir a dersta me a dersta er kid— er a bek el berraod. Ngokiu a klengar Ngii, me a ongarm, me a kodall, me a Okiis er a kodall, e Ngii a chirroid a rokui el olibesongel el kirel a deureng me a budech el mei er kid er tia el beluulechad. A klungiolel a tngkaireng er Ngii a mo er tirkel rokui el kongei er Ngii e mo mechei a klengar tir e mo oltirakl er Ngii me tirkel meral chedal.⁶ A leuaisei, e sel dultuil er a klaumerang er a Jesus Kristo me a Tngkaireng er Ngii, e kede mo mesisiich, e a berraod el dolab a mo kebekakl, e okiu Ngii e kede mo mesisiich er a beluulechad.

Rodam me a rodos, sel dolbedebek el kirel a kilisich me a urunguled el sebeched el ngmai er a Osobel, ngarngii a uchul meng kired el temat, s e ngara deureng, e omakes el bedul uchei el diak ke de mesim. “leng ngkel lolengit lultuil er a klaumerang, e diak el mesim. Le ngike el mesmesim a uaia chedesaoch el di oltirakl er a eolt. … El eru uldesuel chad el diak lulterekokl a teletelel.”⁷

A King Limhi a dirrek el milngelechel, Mobult elmo ra Rubak loba mui el reng,…mosiou er ngii loba rokui el blak el reng, e sel bom uaisei, , e ngii, a mo oltirakl er sel soal a rengul, a sobecheklau er a ringel.”⁸

Ka morrenges a tekingel Osobel el melekoi er kid el kmo:

“Lak bo louedikel a rengmiu: di moumerang er a Dios, e dirrek el moumerang er ngak. …

“A le betik a rengmiu er ngak, e moltirakl a llechuk. …

Ngike el lolab a llechuk, e oltirakl, a ngii a betik a rengul er ngak: e ngike el betik a rengul er ngak a dirrek el Chedam a mo betik a rengul er ngii, me ngak a mo betik a renguk er ngii, me ak mo chemolt er ngii.”⁹

A Dios omekngeltengat er kid lultuil er a klaumera er kid.¹⁰ A klaumerang a uchul a moktek er a klengar lobengkel chedaol moktek ma osenged el kirel a ulebongel.. A klaumerang a bedochel el llach el lultuil er a omeruul lokiu a blak el reng. Ng klou a belkul, el klisiich el mocholt lokiu a ungil blekerdeled me a blak el reng er kid el meruul aikel rokui el Dios me a Jesus Kristo olengit er kid el mo meruul. Ng rullid el mo ngara nglunguuch lolengit a ulekerael er a Dios e mo ngara omeruul el ansing el kmo kede meruul loltirakl er sel Ngii a soal.

Betok el rak er a memong er a kusiou el merredel er a mission, e ak ngiluu okedong er a dengua er a rechad loungalek er a ta er a mle misionari louchais el kirel a kodellel a ochedal. Ak dobedebekii, tial meringel el taem, el ngak me ngika el misionari a milsaod el kirel a klebokel el uldesuel a Dios el kirir a Rengelekel e mekera tial klemedengei a le chelodii a rengul.

Ng uaisei el mle mechas a rengul e mekngit a rengul el kirel tial ongarm, e ng di ngika el misionari—lokiu a lengelelel me a klaumera er ngii er a Dios —a mle tmeu a rengul el kirel a klengar er a ochedal. Ng uluchais el kirel a klou el klaumera er ngii er a chubechub er a Rubak . Ng millekoi, el kmo ng melemolem el ngara mission lultuil er a klaumerang me a blak el reng er ngii me bol sebechel mo ngmai aikel klengeltengat el Dios a mla kudmokl el kirel me a telungalek er ngii. Chelsel tiaikid el taem, e ngika el blak a rengul misionari a ulebult el bedul a Dios, e dilemii a klaumera er ngii er Ngii, e silsichii a blak el reng er ngii el mo mesiou er a Rubak loba klaumerang ma blakel reng.

Rodam ma rodos, alsekum a klaumera er kid a diak el delalem er a Dios me a kelmeriar reng er kid el mesiou er Ngii, e a ikel meringel el tekoi el dubech er tial klengar a sebechel rullid el mo omelchesiu el chellungel er a klou el berraod; e luchul e ng sebechel mo mechitechut a rengud e loltirakl er a ebangkelio. A lak a klaumerang, e ng sebechel mo diak dutab aikel moktek er a Dios el kirel aikel tekoi el mo dubech er a klengar kid ruriul.¹¹

Chelsel aikaikid el taem er a ongarm, e a cherarou— el ngii a blechoel di omdidm— a melasem e lousbech a di uldesuel a chad el mengesuseu er kid. Ng melasem el meruul er kid el mo oumerang el kmo ng diak a belkul a doltirakl osisechakl er a ebangkelio. Kulengit e bo modengei el kmo a di uldesuel a chad a “diak lultuil er a Chedaol Reng er a Dios: le ng klebelung el tekoi er a rengul.”¹² Molbedebek el kmo a Diablong [a] cherreuel a Dios, e [ngii] a melemolem lomtok er ngii, e mengesuseu er [kid] el mo er a klengit, e meruul a bek el klengit .”¹³ Ng diak el kired el mecherei me longeblad er kid; le a debecherei, e ng mo mechitechut a klaumera er kid e mo diak a klisiched el ngmai a klengeltengat er a Dios.

Alsekum e ng blak a rengud e diak demesim er a klaumerang, e a Rubak a mo choisois a sebeched el remuul tekoi el ngoriakl er a ikel ringel er a klengar. Ng mo sebeched el choroid a mekngit el uldasou e mo mesisiich, el ngosechekl, er a ikel olibesongel, el domdasou e ng diak el sebeched el ngoriakl er ngii. Tiaikid sel uchul e a rechedal a King Limhi a mlo sebechir el chemiis er a kelebus er a re Lamanites.

Rodam ma rodos, A kulengit me bo e bo multuil er a klaumera er kemiu er Ngii me a osischeklir a re profet er Ngii . A kulengit me bo momekbeches a telbiliu lobengkel a Dios, el mo blak a rengmiu el mesiou er Ngii, el diak el iior er a meringel el klengar el om ngarngii. A kuchais el kmo ngokiu a klisichel a diak el mesim el klaumera er kemiu er a Kristo, e ko mo mimokl er a kelebsengel a klengit, me a rraureng, diak loumerang, me a klengit el reng, me a ringel; e mo sebechiu el ngmai a ikel rokui el mla metib el klengeltengat er a ou beltik el reng el Demad ra Babeluades.

A kuchais el kmo a Dios a meral ngarngii. Ngii a ngar. Ngii a betik a rengul er kid. Ngii orrenges a nglunguched er a ikel taem el de ngara deureng me a ikel taem el de ngara rraureng, klengit el reng, me a sebek reng. A kuchais el kmo a Jesus Kristo a Osobel e Osobelel er a beluulechad. Ngii e a Osebeled.

Ak moi chosmerii a cheldechedechak er chelechal sils lolab a tekoi er a chelsel a chelitakl el kmo “Not Now but in the Coming Years,”

Aika el tekoi a kdung el ngara chedaol ngklel a Jesus Kristo, amen.