E Tiaikid a Diak a Ulebengelel Klengar

Kemiu a rengeasek el sechelik, ng seebched lomuchel el mo medengelii a Dios lokiu a nglunguuch.

On April 7, 1829, e a lluich me a eru rekil el Oliver Cowdery a ulemuchel er a urerel el melchesel a lluich me a edei a rekil el Joseph Smith. Tirka mle ngeasek—el di uai kau me ngak. A Oliver a uleker er a Dios el kirel a Oluut me a urerel er a chelsel. A nger, el mlei er ngii a ulekiu tiakid el chedaol ocholt:

A tekoi el mlo er a Oliver Cowdery a kmo ke mla oker er a Rubak tia el osisiu el ker e a Rubak a mla onger ngii. …

A Rubak a ulemeklatk er a Oliver el kmo ng diak a ngii di el chad ng di tal Dios a medengei a ngara uldesuel me a ngara rengul. ….

… Alsekum a Oliver a soal a lmuut el sioning, e ng kirel mo dobedebekii sel kesus el ngi a lilangel er a rengul el mo er a Rubak. …

A Rubak a ulemeklatk er a Oliver el kmo Ngii a mla msa budech er a uldesuel …  Ng diak a ngodech el ngarbab el sioning le nguu ng di sel sioning el mlara Dios.³

Sel moluluuch loba klaumerang, e k emo melchesuar a beltik el reng er a Dios le Chedaol Reng er Ngii a mo mengedecheduch er a regnum Me ng diak el iior er a kmo ke sabisi malechub e ng diak lulterekokl omomelchesiu a le bebil er a taem, e ng di kau a diak di el kau el tang. A Dios a kmal medengelkau, Me sel moluluuch, e kau a merael mo Medengelii.

Sel mosuub chedaol llechukl, e ng diak di mosuub el kirel Osobel, ke dirrek el kmal mo momedengelii Osobel.

Sera April 1985, e a Elder Bruce R. McConkie a milngedecheduch er a klou el ongdibel—er a di chelsel a teruich me a edei el klebesei ruchei er a lemad. Ng mlo rokir a cheldechedechal loba tiakid el klaumerang:

“Ngak a ta er a sioning er ngii, e a ikal merael mei sils e ak mo melchesiu aikal ultil a deel er a chimal me a ochil e mo dikims ochil er a iuechel a medak.

“E ng di uchei er sel taem e ng diak a lmuut el ngera el bo kudengei ng di sel klemedengei er ngak er chelechang el kmo ngii a Mesisiich el Ngelekel a Dios, e ngii a Osobeled e Olsobel er kid, e a diak a ulebengelel klengar a mei lokiu a tngakireng er ngii.”⁴

Kid el rirngesii a Elder McConkie el mengedecheduch er seikid el taem a diak dobes er sel ngii a lulmelchesiu er ngii. Sera bocha lomuchel er a cheldechedechal, e ng ulechotii el kmo ngera uchul me a sioning er ngii a kmal mesisiich. Ng dilu el kmo:

“Sel kusaod aikal ongasireng el tekoi e a kmal di ousbech a tekingek, e ng di kom locha mo omdasou el kmo a kusbech a tekoi er a chedaol llechukl. …

“Ng klemerang el rebebil a mle kot el dmu ikal tekoi, e ng di chelecha e ng mla mo tekingek, le Chedaol Reng er a Dios a mla sioning el mei er ngak el kmo ng klemerang, me chelechang e ng di ngii me el Rubak a mle kot el ocholt el mei er ngak. Ak mla rongesii oto er a ngerel e medengei a tekingel.”⁵

Me sel mosuub e molbedebek a chedaol llechukl, e ke rongesii a ngerel a Dios, e mo medengei a Tekingel, e mo Medengelii. A Dios a mo ocholt a diak a ulebengelel klemrang er Ngii le ko er kau. E a ikal suobel me a osisechakl a mo tebedechel a klechad er kau e mo chemolt er kau el cahd.

Ongingil omesubel chedaol llechukl, e ng dirrek el klou a belkul a mosuub chedaol llechukl el telungalek.

Chelsel a blimam e ng mle somam a rengelekam a losuub e lotebengar a ngerel Chedaol Reng. A ki oumerang el kmo tia mlo uaisei le kemam el milsuub er a Babier er a Mormon er a bek el sils el telungalek. A klaumera er kemam a mlo mesisiich sel ki mosaod aikal chedaol el klemerang.

A omesubel chedaol llechukl a mo rolel a Chedaol Reng el msa dersta er kid a suobel. Sel mosuub chedaol llechukl er a bek el sils, a di el kau el tang malechub a om telungalek, e ko meduch el mtebengar a ngerel a Chedaol Reng e merael mo medengelii a Dios.

Ongingil a nglunguuch me a omesubel chedaol llechukl, e ng kired el mo meruul a soal a Dios.

A Osobel a kot el ngaruchei lokesiu el mei er kid. Ng millekoi el kmo, “Ak mlara babeluades el me metengel, el diak kuruul a soak, ak meruul a doal ngike el ngii a uldureklak.”⁶

A mla mekiis er a kodall el Osobel er a bol dum er a re Nephites, e ng millekoi el kmo, “Ngak a, a llomes e klengar er a beluulechad; e mla ngilmii sel mecheuached el Chedam a ngiluu el meskak, e mla kobkellii a Chedam el mla chemol a kngtil a beluulechad, el ngii a ringel el mle soal a Chedam ak bo er ngii er a uchelel a rokui el tekoi.”⁷

Kau me ngak a meruul a soal a Chedam sel dongull a telbiled, e doltirakl a llach, e dosiou er a Dios me a rebebil.

A bechik, er a Rhonda, me ngak a di diul rechad er a blimam a di hutsu el chad—el locha di uaia rechad er a blimiu. E ng di a tara tekoi el kmal soak er a rechad er a blimam a sel blak el reng er tir el mesiou er a Dios, e ulisechakl er kemam el mo meruul osisiu.

A demal me a delal a Rhonda er a dirk le tela el rak el bechiil, e a lluich me a edei a rekil demal a mlokedong el mo mesiou el misionari. Ng mlo cheroid er a ngeasek el bechil me a eru rekil el ngelekir el redil. E a bechil a mokedong el mo mesiou lobengkel er a ikel medechel el euid el buil er a mission er ngii e mecherei—a ngelekir me a rechederir omekeroul er ngii.

Sesei el rak rirul, el mla mo teua rengelekir, e te millukl el mo er a Missoula, Montana, me a demal bol sebechel mo er a skuul er a daingak. E ng di, te di mla risei el sesei el buil e a President Spencer W. Kimball me a Elder Mark E. Petersen a omekedong er a demal a bechik el mo kot el merredel er a dirk mlo er ngii el stake er a Missoula. Ng dirk mle okedei me a eua rekil. A uldesuel kirel a skull er a daingak a mlo medechel e ngii a ulsiik el mo meruul er a soal a Rubak —ng diak el sel soal.

A demak me a delak a mla mesiou el oureor er a templo el betok er a oekdei el rak—A demak a mle merengede, ea delak a oureor er a chedaol ruoll. Te dirrek el mla mesiou er a kleim el kakerous el mission—er a Riverside, California; Ulaanbaatar, Mongolia; Nairobi, Kenya; me a Nauvoo Illinois Temple; me a Monterrey Mexico Temple. Sera le ngara Mexico e tem le meringel loureor el mesuub er a beches el omelekoi, el dimlak el beot er tirkal mocha okai a rekrir. E ng di tir a ulsiik el mo meruul a soal a Rubak e diak losiik er sel soal a rengrir er a klengar.

Mo er tirkel blak a rengrir el Uriul-klebesei el Santo er a beluulechad el rokir, e a klmuut el dmu tekoi le dilung a Rubak el mo er a profet Nephi, el ngelekel a Helaman: “Ke ngeltengat, … le iakel tekoi el kau a mla remuul … el diak moba saik … , [le kau] a dimlak mosiik er a soal a regnum, ke ulsiik er a soak, e oltirakl a llechuk.”⁸

Me sel kid osiik el mo meruul a soal a Dios lokiu a blak el reng el omesiunged el mo er Ngii me a rebebil, e kede melchesuar el ungil a rengul e kid a merael mo ungil medengelii.

A Osobel ouchais er kid el kmo sel kot el bedochel el rael el mo medengelii a Dios a sel bo de uai Ngii. Ngii a ulsisechakl el kmo: “A leuaisei, e ngera el teletael er a chad a kiriu el mo uai ngii? A kmal dmu er kemiu el kmo, ko mo uai ngak.”⁹

A klikiid el klengar a klou a belkul alsekum e ked emo uai Ngii. Ngii a mla melekoi el kmo ng kired el mo klikiid. Ng kirel mo klikiid a rengud, me a chimad me bo luchul e Ngii bo longikiid er kid.”¹⁰ Me a uchelel tial teletael el mo uai Ngii a, ouchel reng e nguu a klausubes, e Ngii a kmikiid a rengud.

A mo ngosukid sel dorael bedul a Chedam, e a Rubak a milskid tiakid el yaksok: A bek el chad el mo cheroid er a kngtil e mei er Ngii, e omekedong er a Ngklel, e oltirakl a Tekingel, e oltirakl a Llechul a mo mesa medal e mo medengei el kmo ng kmal Ngii.”¹¹

Ngokiu a klaumera er kid er a Tngakireng er Ngii, e a Osobel a mengikiid er kid, omekungil er kid, e rullid el mo medengeii lokiu sel bo de uai Ngii. A Mormon a ulisechakl el kmo, “Moluluuch el mo er a Chedam lolab a rokui el klisichel a regnum, … me bom sechal [me a redil] el ngelekel a Dios; me sel lemei e kid a mo uai ngii.”¹² Sel dolasm el mo uaia Dios, e Ngii lmuut el rullid el ngodech er sel di mla klengar kid.

Sel ngosukid sel dolasm, e a Dios a mla meskid a remelmalt el chad. Ng soak louchais er a uldesuek el kirel a chiming, el Elder Neal A. Maxwell. Ng mle blechoel melasm loltirakl er a soal a Chedam e blak a rengul el melasm lomekesiu er a Dios.

Ng kmeed el lluich el rak er a memong, e ng uluchais er ngak a lulmelchesiu ruriul er a lemoterekokl el smecher er a kasinoma. Ng dilu er ngak el kmo, “Ng soak lulsiseb er a chelsel a tim, er tiaikid el [kuk bita el beluu] malechub e sel bitang. Ng diak el soak el mo dengchokl er a tkul. Ng soak lulsiseb er a chelsel tial ureor.”¹³

Aikel tela el sandei ruriul, e ng dimlak el soal lolengit er a Dios me lomekungil er ngii; ng di mle soal loltirakl er a soal a Dios. A bechil, er a Colleen, a milketeklii el mo er ngii el kmo a lengelel a Jesus er a le ngara Sers er a Gethsemane a mle “A di lungil, e mcheridii tial ringel el ngara ngak.” Tiaikid a chimol taem el Osobel a millekoi el kmo, “E ng di diak el sel soak, ng bai sel soam bol motirakl.”¹⁴ Ng milngelechel er a Elder Maxwell el mo omekesiu er a okesiul Osobel e bo lolengit a ngesou, esola motireklii sel soal a Dios, me ng mlo uaisei.¹⁵

Uriul er a kemanget, e meringel el ukeruul le blo er ngii el kmeed el tal rak, e ng meral mlo mesisiich e liluut el “mocha oureor.” Ng liluut el mesiou el euid el rak.

Ng mla er ngii a bebil er a urerek lobengkel er a ikel uriul rak. Ak milchesuar a blekokeuii, klechubechub, me a beltik el reng er ngii. Ak milsa mesisiich el chedaol blekerdelel er a ringel le bla er ngii me a melemolem el omesiungel er a lolasm lomekesiu er a Osobel.

Ngike el kot el ngarbab el okesiu, el mei er kid el rokui, a Rubak el Osobeled, el Jesus Kristo, el dilu el kmo, “Ngak a rael, e klemerang, e klengar: ng diak a chad el mo er a Chedam, a lak lokiu ngak.”¹⁶ “Mei e moltirakl er ngak.”¹⁷

Kemiu el ngeasek el odam me a odos er ngak, a mo medengelii a Dios a siokel er a rokir el klengar kid. “E tiaikid a diak a ulebengelel klengar, me[kid] bo dodengelii … a di chiming el meral Dios, me a Jesus Kristo, el [Chedam] a mla odureklii.”¹⁸

A Profet Joseph a mengelechel er kid el mo melemolem er tial ureor. Ng dilu el kmo ng kirel mo meduch a rengud, e melemolem el mo er a ulebongel!”¹⁹

A Dios a medengelkau e siotai er kau el mo Medengelii .. Moluluuch el mo er a Chedam, mosuub chedaol llechukl, mosiik el mo meruul a soal a Dios, molasm lomekesiu er a Osobel, e momekesiu er a remelmalt el chad. Sel bom uaisei, e ke merael mo medengelii a Dios me a Jesus Kristo, e mo ngu a diak a ulebengelel klengar. Tiaikid a siotai er ngak le ko er kau ngak el mla moterekokl el sioning er Tir. Te kiei. Te betik a rengrir er kau. A kuuchai a ikang el ngara ngklel a Jesus Kristo, amen.