Mlokedong el mo er a Ureor

Bek el rak e ng betok ra teruch ma tacher el telael el ngeasek el sechal me a redil, ma betok el remeklou el bechiil el chad, a semerial el mengiil er a tokubets el babier el ngara Salt Lake City. A llechukl er a chelsel tial babier a di merko el ngodechii ng kal chad el tial babier a mo er ngii, ma dirrek el chedal tial telungalek ma rebetok el bebil er a rechad. Me sel lenguu, e te mekengii el mekekokterir malechub e te orrechel el semerial el mesodel er ngii. A omengiuel tial tokubets el babier a blekeradl el diak a tang me lobes er ngii.

Tia el babier a blel saing er ngii a President er a Ikelesia er a Jesus Kristo er a Uriul-klebesel el Santo, e a ikel kot el teblong el llechukl a uatiakid. “Kau a mla mokedong el mo mesiou el misionari er a Ikelesia er a Jesus Kristo er a Uriul-klebesei el Santo. Ke mla mengilt el mo mesiou er a ______ Mission.”

Kulengit me motebengar el sel kot el llechukl a okedong el mo mesiou el cherrungel misionari er a mla moluut el Ikelesia er a Rubak. Sel ongerung el llechukl a melekoi er mla mengilt el mo oureor el mora ngellitel el basio me a mission. Sel klou a belkul el klekakerous er a ika el eru el llechukl a klou a belkul kired el mo ungil medengelii.

A teletael el ngarngii er a Ikelesia, e kede blechoel mesaod el kirel a mla mokedong el mo mesiou er a beluu el reua Argentina, Poland, Korea, me a Merikel. E ng di a misionari a diak el mokedong el mora basio; ng bai, ngii a mlokedong el mo mesiou. El di uaia ikel lullekoi a Rubak el lokiuj Profet Joseph Smith er sera 1829, el kmo “alsekum e ng soam el mo mesiou ra Dios e kau a mla mokedong el mora ureor.”²

A ikel bek el okedong me a telutk el ureror, malechub a mo lmuut el metelutk ruriul, a kekka er a ocholt el mora mesiungel a Rubak. A okedong el mo oureor a ngara Dios el mei lokiu a President er a Ikelesia. A ngerachel el mora ta er a ikal betok er a 400 el mission el ngarngii el meliuekl er a beluulechad a mlara Dios el mei lokiu a chedal a Teruich me a Terung el Apostol, el ouedikel ultuil er a ngerachel el ngiluu er a ngar el profet er a Rubak. A sengk er a reng er a omlaoch me a ocholt a ngarngii er a rokui el okedong er a mission me a ngerachel.

A Section 80 er a Doctrine and Covenants a rekord er a okedong er a omesiou el mora Stephen Burnett el ngiluu lokiu a Prophet Joseph Smith er sera 1832. A omesubel tial okedong el mora Brother Burnett a sebechel ngosukid el mo (1) ungil medengelii a klekakerous er a ngeiul “okedong el mora ureor” el missionary ma “mengilt el mo oureor” er a tara basio (2) mo mui er a saul el kirel sel chedaol el telutk el ngerchelel a derta er kid el mo omerk er a ebangkelio.

A kot el bades 1 er tial bliongel a mokedong el mo mesiou; A Rubak a mla kmu er a mesiungel er a Stephen Burnett el mo er a beluulechad el mo omerk er ebangkelio el mora bek el chad el tir a sebecherir el rongesii.”³

E sel domes, e a ongeru el bades 2 ouchais er a Brother Burnett el kirel a mla metutk el mo obengkel el misionari: Me a Rubak a dilu el kmo “a lsekum e ng soam a le ngarngii obengkem, e ak meskau a mesiungek el Eden Smith.”^{4 4}

A ongedei el bades a olecholt er sel borngii tirka el terul misionary e oureor: A Rubak a kmo a Stephen Burnette a “kirel mo omerk er a ebangkelio, er a diluches malechub a dimes, el mora ongos malechub a ngebard, ngii di el tang, leng diak a mo metemall.”⁵

Ng diak kuumera ersel tekoi el “ngii di el tang,” lousbech er ngii a Rubak er tial bades, tia ouchais el kmo Ngii a diak lomekerreu er a bo loureor er ngii a mesiungel. Ng bai, Ngii a kmal omekerreu. Eng di uchul tial berkel ebangkelio a urerel a Rubak, e Ngii a omekllomes, omekrael, omecheliu, er a remla nguu a ngerachel el mesiungel. Me a misionari sel lolasem el meral mo klikiid e meral sebechel dongu er a chimal e mora ikel sebecherir el kudmeklii sel ngerchelir, e okor e nguu a ngesou el mla er Ngii eng “diak a mo metemall” ra le ngarngii e mesiou. Altang e a tara suobel el Osobel a olsisechakl er ngii el mei er kid el ngar tial ocholt a kmo a ngerachel el mo oureor er a tara basio a klou a belkul e klou a ultutelel e ng di ng ongerung el mo er a okedong el mo mesiou.

Sel oingingil el bades a meskid a meklou a ultutelel el kirel a misionari el olab. Ma Rubak a dilu el kmo “ng kirir el mo ouchais a tekoi el tir a mla remenges, e merall oumerang, e medengei el kmo ng klemerang.”⁶

Sel ulebong el bades a omeklatk er a Brother Burnett me a kid el rokui el kirel tial okedong el mo mesiou el meral mo dubech: A Rubak a kmo “sel oderchelel el mora Stephen Burnette a meral mla er a Rubak, e Ngii a ulmekedong er ngii, e Ngii a Osobelel, el dita el Jesus Kristo. Amen.”⁷

Bebil er kemiu a locha di kemiu el loker el kmo ngera uchul me ak millilt el mesaod lokiu ongdibel er a priesthood er tial klou el ongdibel tial ual kltukl el klekakerous er a mlokedong el mo oureor me a mukngerachel el mo oureor. A nger er ngak el mo er tial ker a bleketakl: a kudengei el blak mosisecheklak er ngii a kmo a ikal osisechakl a diak lungil medengei a rebetok el chedal a Ikelesia.

A kot el klou luchul e ak mo mesaod er tial tekoi a ikiu a ikel blak suub er a ikal betok el rak el kirel a sebekreng, bekikl, berraod ra uldesu el betok el misionari omelchesiu el tir a liluut el metutk lokiu a kakerous el moktek el mora kakerous el basio er a ureor er sera losiou. A ikal lemuut el melutk sel bebil e ng kmal kirel mekedmokl le ikang a kmal di iior er a duubech el tekoi ma omeruul el reua bkais chemrungel me a telemall, omekmeoud ma ringelel omelai el visa, uldikel ra kabelment, omekdubech er a mo beseches el mission ma rechedal, malechub a merael mo ngodech el ulsbechellel a beluulechad el meliuekl el kirel a ureor er a berkel ebangkelio.⁸

A misionari sel luut el metutk el kuk mora ngodech el basio er a ureor, e sel teletelel tiang a kmal di osisiu el mo er sel mle kot el miltutk el ngerachel el mlo er ngii. A rechedal a Chelechad er a Teruich me a Terung a mo melai a llomes me a ulekrael el mo mengedmokl a ikal rokui el ngerachel el luut el mo melutk.

Ak dirke milengedecheduch er a kedung el chad el mle ouchais el merngak a mla er a rengul. Chelsel tial miting, e ak kmal dirke silodii a klekakerous er a mokedong el mora ureor ma a metutk el mo oureor. Ngika el ungil chad a urrekedii chimak el mad el langel e dilu el kmo, “A tekoi el blam ngesukak el suub er chelechang a mla nguu a berraod er a uluk el kulebang el betok er a okedei el rak. Se er ak ngeasek el misionari, e ak mle kot el mlo oureor er a South America. E ng di dimlak el sebechel el nguu a visa, me a urerek a mle mengodech el mo beluu era Merikel. A ikal betok el rak e ak millebedebek el kmo ngera meng dimlak el sebechek el mora basio el ngak a mlokedong el mong. Chelecha e ak mla mo medengei el kmo ak mlokedong el mo oureor el dimlak mokedong el mora basio. Ng diak el sebechel el smodii el merkau sel klemedengei er tial tekoi blal relii el merngak.”

Ak mlo mekngit a renguk er ngikal ungil chad. Sera kulsisechakl a ikal beot losisechakl el merkii a beluulechad, e te betok el chad a mla chocholt el merngak a osisiu el tekoi el di uai ngikal chad el kulsaod er ngii. Me ak a mesaod er tial tekoi er chelechang e le ng diak el kirel a tal chedal tial Ikelesia el urrekodel er tial diak a ultutelel el berraod lokiu a diak lodengei el tekoi, rrau el rengl, ringel, malechub a berraod er a ngerchelel el mo oureor.

A Rubak a dilu er a Stephen Burnette el kmo “ng kirel mo omerk er a ebangkelio, er a diluches malechub a dimes, el mora ongos malechub a ngebard, ngii di el tang, leng diak a mo metemall.” ⁹ Me sel momdasu a ikal tekoi er tial bades e bekengii a rengum, e a kuureng e meluluuch el kmo ke mo olengit er a Chedaol Reng meng mo ngmai el mo medechel er a chelsel a rengum a ikal klemedengei, omekungil, me a omengerrungel el kau a ousbech.

A tara tekoi el uchul e ak mle mukrael el mo mesaod er tial tekoi a ikel blekeradel el ngak a siliseb er ngii er sera ku mesterir a remisionari a le borngii. Mo er tirka el Teruich me a Terung, e ng diak a ngodech el sebechel losingch a meral ngarngii lomaoch el ocholt er a uriul-klebesei el ngii a lmuut el mesisiich er sel dosiik e omiich a tekoi lokiu a urungulel a Rubak sel doruul a ngercheled el melutk aikel borngii a remisionari el mo er a basio el bo loureor er ngii. Ak sioning el kmo a Osobel a medengei e ungil mesterir a rederta er kid “tang ma tang” ma ngklel a derta er kid.

Chelcha e ng soak el mo smodii a telkib er a beot e ng di blechoel el diak desang el tebedechel a omengedmokl el kirel a okedong el mora ureor.

Kldei el tmak el tekoi a chochotii a teletael er a omengedmeklir me a ongesecheklir a rengelekel a Dios:priesthood, templo, mission. Bebil ra taem e sel de chedil ma chedam, sechelei, ma chedal a Ikelesia, e kede kmal diomes el kirel omengedmeklel a misionari el ngeasek el sechal me ng sebeched el ua dechoit a ikel bebil er a meklou a ultutelel bakes er tial rael er a telbiil el kmal kirel mekedmokl ruchei er a lomuchel el mesiou el misionari. A oureor el missionari a mera el ta er a klou a ultutelel e ng di ng diak el ngii a kot el klou a ultutelel er a okedecherul a mesisiich el dodai er a klengar el kirel chedaol ulekeroul me a omesiou. A priesthood me a klengeltengat er a templo, el ngii el teblong a oeak uchei er a mora telutk el basio er a ureor, ng dirrek el meklou a ultutelel el mo omekduch e melisiich er kid ra tekingel a reng er a klengar er kid el rokir.

Ngeasek el sechal, sel moltaut a ngerchelem e mongull er a Aaronic Priesthood, malechub e sel ngariou el priesthood, e kau a mengedmokl el mo melai e oltaut er a yaksok me a telbiil er a Melchizedek Priesthood, malechub e ng ngarbab el priesthood.¹⁰A klikiid el chad a kot el klou a ultutelel el kirel a ngeiul a ngarbab el priesthood. A kemanget el omesiou lokiu a priesthood a ngar medam. Mongedmokl er chelechang el blechoel el meruul a meklou a ultutelel el omesiou. Kulengit mem subii el mo soam e melemolem el klikiid. Bom klikiid. E dim klikiid.

Uriul er a lenguu a Melchizedek Priesthood me a okedong el mo mesiou, e a ngeasek el chad a sebechel mo bleiull er a klisiich¹¹ lokiu a telbiil me a ruoll er a chedaol templo. A mora templo me a obang a reng er a templo er a rengum oak uchei er a ungil omesiou el cherrungel misionari. A klikiid a di chimong el kot el klou a ultutelel el usbechall el kirel a ngeiul a klengeltengat er a templo el mora ngeasek el chad me a rokui el chedal a Ikelesia. Me sel mkiei loltirakl er a kerbil a ebangkelio, e ng sebechem el soiseb er a blil a Rubak e meruul a chedaol ruoll er a klengar er kau el ngeasek. A soam me a klemedengei er kau er a ruoll er a templo a mo smisichau e omekngeltengat er kau er a klengar er kau el rokir. A kulengit e bo mosuub el mo soam e molemolem el klikiid. Bom klikiid. E dim klikiid.

Te betok el ngeasek el sechal ma redil a olab a kedeb a temel a temple recommend. Me sel moba a Aaronic Priesthood e ke mo osiik a ngklir a rebebil er kau e mo nguu a techolb chelid e mo olterkokl er tir er a templo. A melemolem el oba temple recommend a olechotel a klikiid, e a omesiou er a rebebil er a templo a klou a ultutelel el tebedechel a omengedmokl el kirel a Melchizedek Priesthood.

Ngeasek el chad, a derta er kemiu a misionari er chelechang. Iliuekl er kemiu, el bek el sils, a resechelimiu me a re tonari el tir a diak lodengelii a klemerang ele ng diak lodengei el kmo te mo osiik er ngi er ker.”¹² Me sel mukrael er a Chedaol Reng, eng sebechem el ouchais a chedaol tekoi, mengemedaol, meluches el ngii a mo olecholt er a resechelim a klemerang er a mla moluut el ebangkelio. Ng diak a belkul ma lechub eng kirem el mengiil er a tekoi er a okedong el mo meral ulsiseb er a urerel a klemisionari.

Mesel le nguu a klengeltenak er a priesthood, templo, me a mission “el tmak el di tang … el ngara Kristo”¹³ lokiu a ungil blekeradel er a reng, uldasu, me a bedengel a ngeasek el misionari, a sebechel el nguu tial urreor.¹⁴ A duch er ngii a meral mo klou el mo sebechel nguu a ngerachel el mo omtechei er a Rubak el Jesus Kristo. A chedeaol klisiich el uldekial a omengull er a priesthood me a telbiil er a templo, e nguu a klisichel a kledios”¹⁵ lokiu a ruoll er a priesthood,¹⁶ chemoit a sulel meiou, e omerk er a diak el ngemed el ebangkelio el mora rengelekel a Dios a rulii a ngeasek el chad el mo “mesisiich e diak el mesim er a klaumerang”¹⁷ e “ngarngii a risel el ulkeroul el ngara [Kristo].”¹⁸

Ngar a chelsel a rekeblid me a Ikelesia, e ng kired el mesa ungil olkael el kirel a ikal edei el tekoi el mla ra Rubak el ngii a doltirakl el kirel a omengedmeklel me a ongesecheklel a remekedung el ngelekel a Dios el sechal: priesthood, templo, mission. A ikal edei a kired el soad e melemolem el klikiid. Bom klikiid. E dim klikiid.

Betik er a renguk el rodam, ak yaksok el kmo sel chedaol sengk er a ocholt a mo obengkem er a okedong el mo oureor el omerk er a ebangkelio me a telutk el ngerachel el mora basio malechub eng betok el basio er a ureror. Me sel blak a rengum er chelecha el mengedmikl lokiu a priesthood me a omesiou er a templo, e a sioning er kau er a Rubak el meral ngar a mo mesisiich. A belkil a rengum el mo er Ngii me a urerel a mo mui er a rengum. Me sel bom subii el soam el kedung, e kau a mo sebechem el mesisiich el dongu er a chimal a Rubak el mo omekngeltengat e mesiou er a rebetok el chad.

Ungil a renguk, el sioning el kmo a Demad er a Babeluade me a Betik ra Rengul el Ngelekel, el Jesus Kristo, a ngar. Sel mo mesiou el kirir a ta er a kot el klou el klengeltengat el kid a sebeched el nguu. A ika kuuchais el ngara chedaol el ngkel a Rubak el Jesus Krsto, amen.