Osisebii a Klisichel a Jesus Kristo er a Klengar Kid

Rodam me a rodos er ngak, kede kiei er a kot elmeringel el taem. Olibesongel, me a mondai, me a ringel el di iliuekl er kid. Aika el meringel el taem a mleues ruchei lokiu a Osobel . Ngii a ulemeklatk er kid el k mo sel sils er kid e a cherarou a mo muchel a ultok er a rengrir a rechad e mengesuseu er tir el mo cheroid.¹ E ng di a Demad er a Babeluades a kmal dimlak er a rengul a mechikid me di de ngara rraureng er a mondai er kid me a beluu el di kid el tang.

Beltik el reng er a Dios el mo er a beluulechad a uchul e Ngii a uldureklii a Di Chimong el Ngelekel Sechal²el me ngosukid.³ E Ngii el Ngelekel, er a Jesus Kristo, a tilngetengii a klengar Ngii el kired. Me luchul e bol ngarngii a techelled el ngmai a klisichel a Dios— el ngii el klisiich a klebech el kirel a berraod, olibesongel, me a ongetikaik er chelechal taem.⁴ Chelechal sils e ng soak el mo mengedecheduch el kirel a kmo kede mekerang e osisebii er a kelngar kid sel klisichel a Rubak e Mastang er kid el, Jesus Kristo.

Kede omuchel el kired el mesuub er Ngii.⁵“Ng diak el sebeched el mo suobel el di diak dodengei a ngerang.”⁶ Sel lorael mo mui a kelmedengei er kid er a urerel me a klengar Osobel⁷—e ng merael mo mui a klemedengei er kid er a Osischeklel⁸me a ikel Ngii a riruul el kired— e sola seikid e kid a mo medengei el kmo Ngiia sebechel meskid a klisiich el kid ousbech er a klengar kid.

Sera uchelel chelechal rak, e a kullengit er a rengeasek er aIkelesia el mo chemoit a sesei er a temir er a bek el sandei el mo mesuub aikel rokui el Jesus a dilung e riruul el ngii a lelchukl er a chelsel chedaol llechukl.⁹ A kullengit er tir el momesuub aikel bades el ngii a kirel a Jesus Kristo el ngara chelsel a Topical Guide e bol ruul el mo uchul a moktek er a omesubir er a ebangkelio.¹⁰

Ak milsterir tial tekoi el ngak el dirrek el mla kongei el mo meruul er ngii. Ak milnguiu e loiia tengetang er a ikel bek el bades el kirel a Jesus Kristo, el llechukl er cheungel aikel okeim me a kleuid el tekoi el ngara chelsel a Topical Guide.¹¹ Sera bok merek er tial teletael, e a bechik a uleker el kmo ngerang rirellii er ngak. Ak dilu er ngii el kmo, “Ak mla mongodech el chad!”

Ak ulmelchesiu el muut el kmal mesisiich loltirakl er Ngii er sera kluut el menguiu er a Babier er a Mormon er a tekingel Osobel el kirel a Urerel er a beluulechad. Ngii a millekoi:

“Ak mlei er a beluulechad el me meruul a soal a Demak, le Demak a uldureklak.

“E a Demak a uldureklak me bok modars er a kerus.”¹²

Kid el Uriul-klebesei el Santo, a omekedong er a Urerel el kmo Tngakireng er a Jesus Kristo, el ngii a uchul e a Okiis er a kodall a klemerang el mei er kid el rokui me a diak a ulebengelel klengar a mo sebechel mo er tirkel tir ouchel a rengrir er a kngterir e ngmai e oltirakl aikel meklou a belkul chedaol ruoll me a telbiil.

Ng ko er a olngesonges el osisechakl sel sekum e kede mesaod el kirel a tngakireng er a Rubak el di ousbech a mekedeb el tekoi, el uaia “Tngakireng” malechub a “sel klisichel a Tngakireng” malechub a “oltirakl er a Tngakireng” malechub a “mo mesisiich lokiu a Tngakireng.” Aika el tekoi a sebechel ngodechii a klaumera er kid el ng uaia domes er tial teletael dilubech el ngii le ko er a iileakl er a Chedam er a Babeluades me a Ngelekel Sechal, er a Jesus Kristo.

Chelsel a klou el diak a ulebengelel moktek er a Chedam, e ng Osobel a ngii a mlo er a ringel. Ng Osobel a ngii a kildoked a lechetel a kodall. Ng Osobel a ngii a uldersii a klengar ngii el kirel a kngtid me a telmelled e siluld lultuil er a ouchel el reng er kid. Ng Osobel a ngii a silbecheklid er a kodall er a tech me a kodall er a reng.

Ng diak a ko er a di bechachau el teletael lokedongall el “Tngakireng” el dultuil er ngii el kirel a ngeso, omekungil er kid, ousubes er kid, malechub a klisiich el dousbech. A Jesus Kristo a ngii a uchul a rokui. A chedaol tekoi el uaia Tngakireng me a Okiis er a kodalla smaod a riruul Osobel, loltirakl er a moktek er a Chedam, me luchul e bo de kiei lultuil er a urunguled er tial klengar e bol sebeched el nguu a diak a ulebengelel klengar ruriul. A tngakireng er a Osobel—el ngii a ngaruchei er a chelsel a reksi er a beluuelchad—a mo ungil keleuadel e moureng a saul el kirel sel sekum e kede bleketakl lochotii el mo er Ngii.

A klou el belkul a urerel a Osobel a mloterekokl lokiu a Profet Joseph Smith, el ngii a mle mesisiich el melekoi el kmo “a kot el ngarbab el osisechakl er a klechelid er kid a klaumerang er a Reapostol me a Reprofet, el kirel a Jesus Kristo, el kmo Ngii a mlo er a kodall, e mlo er a debull, e milkiis er a ongedei er a klebesei, e ngilasech el mo er a babeluades; e a rokui el tekoi el kirel a kelchelid er kid a di tebedechel tiang.”¹³

Ng tiaikid el tekingel a Profet a mle uchul a blak el reng er a reteruich me a teim el profet, chad er a ues, me a ocholt el mo otebedii e saing er a klaumera er tire a mo ng meng erul telael el rekil a cherellel a Rubak. Tial mla mo llechukl er a reksi el klaumerang a okedongall el kmo “Ngar el Kristo.”¹⁴ Betok el chedal a ikelesia a mla momedengelii tial klemerang. E a rebebil a diak el sal medengei el kmo ngarngii. Me sel mosiik el muut el mo medengei a betok el kirel a Jesus Kristo, e ak mengelechel er kemiu el mo mesuub er a “Ngar el Kristo.”

Sel dechoit a temed el mesuub el kirel Osobel me a tngkaireng er Ngii, e kede mossimel el kirel a kmo ngerang el mo uchul e kede nguu a Klisichel: kede melilt el mo oumerang er Ngii e oltirakl er Ngii.

A remeral loltirakl er a Jesus Kristo a blak a rengrir el mo ngodech er a rebek el chad, e ouchais, e ngodech er a rechad el ngara beluulechad. Te diak el motuub, e blak a rengrir, e diak el medakt. Ak silubii tial tekoi er a omerollek el mo er a Mexico, el blo kebetech ngak me a rechad er a kabelment me a remengeteklel a bebil er a kelchelid. Tir el rokui el ulureng a sulek er a blak el reng er a rechedal a ikelesia lomecheliu e mengeluolu a mesisiich el chebechiil me a telungalek er a rekebelurir.

Ng diak el beot el tekoi sel bo deuaisei el mesisiich loltirakl. A moktek er ngii a kirel ultuil er a Osobel me a ebangkelio er Ngii. Ng ultuil er a duch el reng er a uldasou sel dolasm lomes el bedul Ngii er a bek el uldesued.¹⁵ E ng di sel bo deuaisei, e a dekted me a rrau reng er kid a mo cheroid.¹⁶

Ak dirk rirenges chisel a diak dektel el ngeasek el Laurel. Ng mlongit el mo er a klaiuengader lomtechei er a skulel lobengkel a bebil er a high skuul er a osisiu el kesus el blal tibir el mo er a miting er a stake er a Relief Society. Sera bocha lodengei e ng ouchisang er a roungerachel a klekool el kmo ng kirel mereched el merael er a temel a klekool el mo er a kmal klou a belkul miting, e te dilu er ngii el kmo ng mo diak lousekool alsekum e ng mereched el merael.

Me ng milkera ngika el ngeasek el uriul-klebesei el Laurel? Ng ultireklii a blak el reng er ngii el mo er a miting er a Relief Society, e mlo uaisei, el tilobed er a klekool. Sera loker ngii, e ng dilu el kmo, “ A Ikelesia a lmuut el klou a belkul, adang ng diak?”

A klaumera er kid er a Jesus Kristo a orremelid el mo remuul aikel ngii a diak deruul tekoi. A klaumerang el rullid me kede mo meruul a meskid a Klisichel.

Kede dirrek el choisisii a klisichel Osobel er a klengar kid sel doruul a chedaol telbiil e doltirakl aikal telbiil. A telbiled a rongedid el mo er Ngii e meskid a klisichel a keldios. Me kid el blak a rengud el oltirakl, a ouchela rengud er a kngtid e oltirakl er Ngii el mo nguu a techolbechelid. Kede merael er a rolel a telbiil el mo ngmai ikel muut el meklou a belkul chedaol ruoll.¹⁷ E mereng a saul, le moktek er a Dios a mesterir a klengeltengat tirkel dim la ucheled el mla mad e dimlak a techellir el ngmai er a le ngara beluulechad.¹⁸

A roltirakl a telbiil el sechal me a redil osiik a teletael el diak el rebet er a klengit me ng diak a ngii di el ngerang el mo melenget er a rolir el kirel klisichel Osobel. A tal blak a rengul redil bechiil e oungalek a dirk milluches el k mo: “Aika meringel e cheliseksikd el taem. Kede ngeltengat el mui a klemedengei er kid el kirel a uldasou er a mo suobel me a ulekrael er a reprofet, me a reaspotol, me a roungerachel el ngosukid el mo er a selbechakl. Aki mla torbengii a kse er kemam lorenges a rasio a le tutau. E chelechang, e kede orrenges a cheldecheduch er a klou el ongdibel er a dengue er kid er a bek el tutau sel ki mongedmokl er kemam el kirel a kuk tara sils.

A tara teletael el kirel a ngeiul a klisichel Osobel er a klengar kid a sel dolengit el mo er Ngii. Tia ousbech er a blak el reng, me a duch el reng.

siasing/Llecheklel

Redil el merutech er a resel a bilel a Osobel

Kom lotkii sel cheldecheduch er a biblia el kirel ngike el redil el mlara ringel el teruich me a eru el rak el kirel a chelitechetul, e omekrur el mondai er ngii?¹⁹ Ng milasm er a klaumera er ngii er a Osobel, e millekoi el kmo, “Omko ak di rutechii a bilel, e ak mo ungil.”²⁰

Ngika el mui er a klaumerang, e ultebechel el redil a dim le kirel muut el telkib el smisichii a rengul me bol sebechel ngii a Klisichel. A bedengel el mlo mesisiich a olengchelel a rengul el dirrek el mlo mesisiich.

Betok er a kid a mla lmangel er a chelsel a rengud e melekoi a uaia tekingel ngika el redil: “Omko ng sebechek el muut el melasm er a tekingel a reng el mo kmeed e nguu a klisichel Osobel el mei er a klengar ngak, e ak locha mo seebchek el sumechklii a ringel el ngak a ngara chelsel. Ak mo medengei el kmo ak mekerang. E morngii a klisichek el kudmeklii.”

Sel modersau el kirel a klisichel a Rubak er a klengar kau loba osisiu el teletael el uaia chad el rosengang me ngoltoir er a telil, e a klisichel a Jesus Kristo a mei er kau. A Osobel sel lodengei el kmo ng meral ngarngii er a regnum a mei er Ngii—sel sekum e Ngii omelchesiu el kmo ke semeriar er a regnum el nguu a klisichel el mei er a klengar—kau e kemo mukrael er a Chedaol reng el mo mui el medengei el kmo ke mekerang.²¹

Sel moutekangel el kirel a ngii di el ngera el dirkak a tal mrellii, e a Klisichel a mo mekekau ²² Seikid e kau a mo medengelii a dmolech el belkul a tekoi er sel chelitakl el kmo “The Spirit of God”:

A ebangkelio er a Jesus Kristo a mui er a Klisichel, el ngii a medechel el mo er tirkel meral ngarngii er a rengrir osiik el redil me a sechal ngelekel a Dios. Ng klaumerang er ngak el kmo sel dosiseb a klisichel er a klengar kid, e Ngii me a kid a mo ngara deureng.²⁴

Me ngak el tara tokubets el sioning er Ngii. E ak mchisii el kmo a Dios a ngar! A Jesus a Kristo! A Ikelesia er Ngii a mla moluut el mei er a beluulechad! A profet er a Dios el ngara beluulechad er chelechal sils a President Thomas S. Monson, el ngii a kuldubech er ngii loba renguk el rokir. A kuchais aikang e ochotii a beltkil a renguk me a klengeltengat er ngak el mo er a dersta me a dersta er kemiu, el ngara chedaol ngklel a Jesus Kristol, amen.