“Budech er Ngak Ak Beskemiu”

Rodos er ngak, kede mla mukngeltengat er a Chedaol Reng er a Dios er chelechal kesus. A chelitakl me a klumech a mla smisiich a klaumera er kid e choisisii a blak el reng er kid el mo oltirakl a chedaol telbiil el bla deruul lobengkel a oubeltik el reng el Demad er a Babeluades. Kede mla melchesuar a chelisois el beltik el reng er kid el mo er a Rubak el Jesus Kristo er kid e mereng a saul el kirel a meang el sengk er a tngakireng er Ngii.

A klemechek er chelechal kesus a beot. Kede mla melchesuar a budech er chelechal kesus. Kid el rokui el soad el melchesuar tial budech, e ra chelsel a telungalek er kid, me tirkel chad el ngara bita er kid. A Rubak a mle yaksok er a budech el mo er a roltirakl er Ngii er a bocha el temel merael. Ngii a mla rullii osisiu el yaksok el mei er kid. E ng di Ngii a dilu el kmo Ngii a mo meskid a budech er sel Teletelel, ng diak el teletelel a beluulechad. Ngii a msodii a teletelel a lomeskid a budech:

“E gn di a Ongelaod, el Chedaol Reng, el Chedam a mo odureklii el ngara ngklek, e mo olisechakl er kemiu a rokui el tekoi, e omeklatk er kemiu a rokui el tekoi, el ngak a mla dmu er kemiu.

“A budech ak beskemiu, budech er ngak ak beskemiu: ng diak el beluulechad a meskemiu, ngak a meskemiu. Lak louedikel a rengmiu, e lak bo medakt” (Johanes 14:26–27).

A rengelekel a Mosiah el sechal a mle ousbech er a sengk er a budech er a lorael mo olisechakl er a re Lamanites. Me ng telkib el sebek reng lulebang er a bocha lodengelii a berredel a urerir, e te miluluuch el kirel a ngesou. Me a “Rubak a uleldingel er tir loba Chedaol Reng er ngii, e dilu er tir el kmo: Bom chelellakl. Me te mlo kellechakl” (Alma 17:10; dirrek el mesa Alma 26:27).

Ngarngii a taem, e ko mosiik er a budech sel bom chau a betook el tekoi me a betook el olibesongel. A rengelekel a Mosiah a silubii aikel ulsisechakl a Rubak el mo ra Moroni. Ng ulekrael el mei er kid el rokui: “A chad a lemei er ngak e ak mo ocholt aike el chelitechetul. Ak msa chad a chelitechetul me luchul e bo loba ngariou el reng; e a chubechub er ngak a medeel el kirir tirkel rokui el [tir] oba ngariou el reng er medak; le alsekum e tem o ngariou a rengrir er medak, e oumerang er ngak, e ak mo mult a chelitecheterir el mo klisichir” (Ether 12:27).

A Moroni a millekoi el kmo sera “renges aika el tekoi,” e ng mlo “kellechakl a rengul” (Ether 12:29). A kureng meng dirrek el ongelaod leko er kemiu. Tirkel diak leues a chelitecheterir a diak el sebechir el ngoriakl. A klemedengei er kau el kirel a chelitechetum a klengeltengat, le ng rullau me ke melemolem el ngariou a rengum e rullau me ke blechoel lobult el mo er a Osobel. A Chedaol Reng a diak di longelaod, ng dirrek el uchul e a Tngkaireng a mo oureor el melodech a teletelem. Seikid e a chelitechetum a mo klisichem.

Ngarngii a taem e a klauemra er kau a mo er a skeng er a Diablong; tia dubech el mo er a rokui el oltirakl er a Jesus Kristo. A mo sobecheklau er a ika el odechelakl a sel murrekodel er a Chedaol Reng el kldemem. Ng mo mengedecheduch a budech er a rengum. Ng mo mengelechel er kau el mo ultuil er a klaumera e merael e omakes el mo ruchei. E Ngii a mo mekletkau er a ikel taem el blo momelchesiu er a llomes me a beltik el reng er a Jesus Kristo.

A omelbedebek a tara kot el mekreos el sengk el Chedaol Reng a sebechel meskau. Ng mo “omeklatk er kemiu a rokiu el tekoi, el [Rubak a mla] dmu er kemiu” (Johanes 14:26). Tial uelklatk a sebechel mei el nger er a nglunguchem, a lechub a ruoll er a priesthood el bla mnguu, malechub e ng oterkeklel a klaumera er kau, malechub a taem el milsa chimal a Dios lomekrael er a klengar kau. A lechub a tara taem el mo mousbech a ngesou, e a Chedaol Reng a mo mekletkau aikel mulmelchesiu er tial miting er chelechang. Nglunguchek me bol uaisei.

A tara uleklatk el Chedaol Reng a mekletkak el kirel a sel kesus er a temel chedaol belsoil er a betook el rak er a memong er a chelse a tumum el blai, er a beluu er a Innsbruck, Austria. Tial tumum a mla er a cheungel a rolel a kzia. Ng dimlak el betook el chad a mlarngii, el di dengchokl a kerrekar el kingall. Betok er tir a mle redil, bebil el tir a ngeasek e a rebebil a meklou el redil. Ak milsterir el mlo kaidelengelangel er a lorous er a chedaol belsoil er tirkal di kesai el chad el kldibel. Ak mlo melchesuar a beltik el reng er a Osobel el mo er tirkel Santo, me tir me tem lo melchesuar. E ng a ongasireng el tekoi el kultebengar a llomes el milkekii a chelsel tial tumum el blai, el milskemam a budech. Ng mle klebesei e dimak a mado, e ng di tial tumum el blai a mle mellomes a chelsel el di uaia le subeleb a sils.

A llomes er a Chedaol Reng a mlarngii er sel kesus. E a mado el siliseb er ngii a llomes a ikel ngariou el rengrir tirka el Santo, el tir a merema er a Rubak losiik a klausubes er a kngterir e tibir el mo blechoel melbedebek er Ngii. Ng dimlak le meringel a bo dolbedebek er Ngii me a Tngakireng er Ngii er a ikel rak luleak kuriul. Tiaikid el sils e sel yaksok el ngar chelsel a nglunguuch er a chedaol belsoil el kmo a Chedaol Reng a mo obengked a mlo tmaut el milskemam a llomes me a budech.

Me ak di uai kemiu, el mereng a saul er a betok el teletael el Rubak a mla odengelak lokiu a Ongelaod er a taem el kusbech ongelaod. E ng di a Demad er a Babeluades a diak di lolatk el kirel ongeloded ng dirrek el melatk el kirel a omerolled. A “Ongelaod” a di tara teletael el Chedaol Reng a kleuadel er a chelsel chedaol llechukl. Tiakid a chimong: “A Chedaol Reng a dirrek el kleuadel el kmo ng sel Reng el mekrolid elmo meruul a ungil, e kid a mla mosisechakl el mo otilii a klaumera er kid er Ngii (D&C 11:12). E oumesingd, el ikel ungil el Ngii a mekrolau el mo er ngii a uldimukl olngeseu er a tara chad el mo nguu ongelaod er a Dios.

Ngultuil er a Llemesel, e a Rubak a mla ngoikemiu el mo er a chelechad me a kakerous el klas er a chelsel a Ikelesia er Ngii. Ng mla kudmeklii tiang el mo mengisois a klisichiu el meruul a ungil. Chelsel aika el chelechad, e ko moba tokubets el ngerachel el mo mesiou er a rebebil el Kirel. Okesiul tiang, alsekum e ke ngeasek el dil, e ke locha mla mongit er a bisop malechub a oungerachel er a Young Women el mo ngoseuir a Laurel el ngii a mla mo “diak el sal mesisiich.” Ke locha ungil medengelii e a bisop malechub a oungerachel er a Young Women a diak el sal ungil medengelii. Ke locha medengei el kmo ng diak el sal ungil a delengcheklel malechub e lungil er a skuul malechub e ngii lerung. A roungerachel er kau a locha diak el sal medengelii a uchul e te ulengit er kau el mo olngeseu er ngii, e ng di a Rubak a medengei, e Ngii a orrurt er tia el ureor lokiu odebechel Chedaol Reng er Ngii.

A klungiaol mo chemolt lokiu a blak el reng er kemiu a ousbech er a ngeldechel a rengum me a rengrir— e tiang a ultuil er a Chedaol reng. Ngii a mo mekrolau el mo mesa ngike el diak el sal mesisiich er a Laurel el uaia Rubak a lomes er ngii. A Rubak a medengelii a ngara chelsel a rengul me a ngra chelsel a regnum, e Ngii a medengei el sebechel mengodech a rengud. Ngii a sebechel lodngelau loba Chedaol Reng er Ngii el mo uchul a ngariou el reng, klausubes, me a beltik el reng.

Tiaikid el Chedaol Reng a sebechel meskau a tekoi, me a omeruul, me a kllou el reng el mo er a ngii di el mengkar a sib me ng mo siotai er a ngelekel a sib el me teloi er tir. A Ngii a sebechel rmeutech a rengrir tirkel ngara klas er a Laurel el mo kaubeltik el reng e mengemedaol er ngike el mla remiid el sib, me sel luut el mei e ng omelchesiu el mla me remei.

A klisichiu el mo dmak el ngelekel a Dios el redil e meruul a ungil a ultuil, kmal klou el ultuil, er a kltalreng me a beltik el reng er a delongeliu. Tiaikid a tara sengk el mei lokiu Chedaol Reng.

A Alma mle medengelii tiang. Seikid a uchul e ngullengit er a rechedal el kmo “Ng diak el kirel morngii a ultok er a delongelir, ng bai kirir loba ta lomeruul, me a tal klaumerang me a tal techolbechelid, me a rengrir a selemosem er a kltalreng me a beltik el reng el mo er a ta me a tang” (Mosiah 18:21).

A kltalreng a klou a belkul dobang el kirel a Chedaol Reng er a ikel klas er kid me a telungalek e rkid. E ng di ko medengei, el uai ngak, tial kltalreng a meringel a dobang. Ng kired loba Chedaol Reng el kldemed el mok a medad e osarch a rengud.

Ak dobedebkii, a tara taem el kilderii a locha euid malechub e ngeai a rekil ngelekek el sechal el milchesokl el kmal merengul er a bet er ngii el soal tomellii. Ak ulmelchesiu el mlo seselk a renguk, e mle soak a le chelellakl a blai. Ak di silseuii er a ongelngelel a kiderii el mo er bab me a medemam a soal mo kasiuekl.

E a Chedaol Reng a mekletk er a ikakid el tekoi. Ng mle chelellakl el ngor e ng di kmal silbechii er a renguk: “Ngika kmal ungil buik.” Ak milkekokak el mekedecherur er a bet e mocha olengit a klausubes er ngii.

E chelecha e ng mla mo klou el chad el Chedaol Reng a ngosukak el mesa er a chelsel a mereko el okeua el rak. Ak meral loureng a saul el Rubak a silbecheklak er a mekngit lomeruul luldureklii Chedaol Reng el ngosukak el mesa ngelekel a Dios el uai Ngii sel lomes er ngii.

A kltalreng el dosiik er ngii er a telungalek er kid me a chelsel a Ikelesia a mei sel dekengei er a Chedaol Reng me longetikaik er kid sel domes er a ta me a tang— me a dirrek el uldesued el kirel a ta me a tang. A Chedaol Reng omes loba klikiid el beltik el reng er a Kristo. Ka morrenges aika el tekoi el Mormon ousbech el smodii a bliochel el beltik el reng. Ka molbedebek aikel taem el blo molchesuar:

“A bliochel el beltik el reng a kemanget el chuarm, e bekokeuii, e diak el mechechei, e diak el ngarbab a rengul, diak di lomdasou er ngii, diak el bekesengasech a rengul, diak lomdasou a mekngit, diak el deu a rengul er a mekngit e bai dmeu a rengul er a klemerang, outekangel a rokui el tekoi, oumerang a rokui el tekoi, e oureng a rokui el tekoi, e outekangel el mo er a ulebongel.

“A leuaisei, e odam [odos] er ngak, a lak a bliochel el beltik el reng er kemiu, e ng diak mngerang, le bliochel el beltik el reng a diak lengemed. A leuaisei, e bo murrekodel er a beltik el reng, el ngii a kot el ngarbab er a rokui, le rokui el tekoi a mo nguemed—

“E ng di a bliochel el beltik el reng a klikiid el beltik el reng er a Kristo, e outekangel el mora ulebongel, e ngike el mo nguu er a uriul klebesei, a kmal mo klungiolel.

“A leuaisei, e rodam me a [rodos] er ngak, moluluuch el mo er a Chedam loba rokir el klisichel a rengum, me bo mui er tiaikid el beltik el reng, el ngii a mla mesterir tirkel rokui el meral oltirakl er a Ngelekel, el Jesus Kristo; me bom ngelekel a Dios el [redil]; me sel bel dum e bo deuai ngii, le kede mo mesang el ngii; me bo le ngarngii a urunguled; e bo de klikiid el uai ngii el klikiid” (Moroni 7:45–48).

Tiaikid a moktek loba Chedam er a Babeluades el kiriru, kemiu el mekreos el Ngelekel redil. Ng locha uaia le cheroid el moktek, e ng di sel osengel el kirel, e kemiu a diak ko msal cheroid. A leuaisei, e Ngii oldingel er kemiu loba Chedaol Reng er Ngii el mengelaod er kemiu, e melisiich er kemiu, e omekellomes er kemiu me ko moutekangel.

Ak meskemiu a meral sioning er ngak el kmo a Chedam a medengelkemiu medengei a omousbech me a ngkliu e betik a renugl er kemiu, e remenges a nglunguchiu. A Oubeltik el reng el Ngelekel a siotai er kemiu el mei er Ngii. E Tir a mo odureklii Chedaol Reng el mo obengkemiu er a blak el reng er kemiu el mesiou er a rebebil el Kirir.

Ngokiu a Tngakireng er a Jesus Kristo, e a Chedaol Reng a mo mengikiid e omekbeches e rkid. Seikid a kau a mo melchesuar a budech el Osobel a mle yaksok el mo mesterir tirkel loltirakl er Ngii. E tiaikid el budech a meskid a urunguled me a llomes me a beltik el reng er a Chedam er a Babeluades me a Oubeltik el reng el Ngelekel, el ngii omtebechel er tial Rengedel el ngara beluulechad lokiu ocholt el mo er a ngara el profet er Ngii. Aika kuchais el ngara ngklel a Jesus Kristo, amen.