“Morael Lobengkek”

Betik er a renguk el rodam ra priesthood, a moktek er chelechang a diuul mo lmuut el lomeklatk er kemiu, e mo smisichemiu, er a urreriu ra priesthood. Ngokiu a bebil ra teletael, e ngosisiu el morsel el kumes el ua Osobel er a bol kebetech ngii me a merau el kekerei chad el luleker, “Ng ngeral ungil tekoi a bo krellii e ak mo nguu a diak a ulebengelel klengar?” (mesa Mateus 19:16). Altang e ke mle er tial longdibel, el ua ngikal ngeasek el chad el mlora Osobel, el melebedebek el kmo a urrerem a ungil. E osisiu el taem, e ke locha melchesuar el ngarngii a lmuut el ketmekill—ng locha obdois! Nglunguchek me bol sebechek lochotii a kengei er a Rubak er a ikel ngii a bla mruul, e dirrek lochotii a telkib er sel ngii a sebechem el kudmeklii, lultuil er a ngeso er Ngii, el muut el mo telkib el chedaol el kirel a chedaol priesthood er Ngii.

Ngkel merau el ngeasek el chad a lulengit er ngii me loterau a rokui el kloklel e bo loltirakl er a Osobel; a omerael elmo re medam a locha diak el bol uaisei, engdi ngmo ngeiul a teletael el bom charm. Ngidil tang, e a kureng ma tekingek lak el bol relau el “[merael] el mekngit a rengum,” el ua ngkel ngeasek el chad. (mesa Mateus 19:20–22 .) Ak bai melatk, me ko “merael el ngara deurreng” (D&C 84:105)) le kau el soam el ngoriakl e omdasou el kmo ng sebechem.

Meng uaisei, eng bleketakl el dolchesuar a bebil ra ngesengesed sel domes a ikel Rubak a mla mekedong er kid elmo meruul. E a klemerang, a ulekum meke subedak el kmo kungil el melchesuar el sebechem el toketek a ngerchelem ra priesthood, e ak mo bekikl el kmo kau a diak ke modengei. Eng di domes, alsekum ke silbedak el kmo ke melchesuar el kora soam el kimer le tial lureor a kuk kmal cheroid er a decham, e seikid e ngak a soak el ngosukau elmo medengelii el mekerang a Rubak a le teketekii el smisichii ngkel loba priesthood er Ngii el kutmokl a tekoi el direkak a ta el di tir el ruul.

Tiang a kmal klemerang er a ngerchelek eldi ua kau ra ngerchelem. Ngdiak er kid a sebechel er tial lureor ra priesthood, el rullii el lungil, eldi ngii lultuil ra lemsel ma dechal. E le tiang a diak el lurrered—ngurellel a Rubak. Ma dita el rael el bo dungil sel dultuil er Ngii, a blem beches el mlo kedong el diakon el mlungerachel el loba telkib el klisichel a reng ra chedaol lureor ra sakrament; malechub e koldingel ra re telungalk el mlodurch er a Rubak elmo ou beltik el reng e mesiou el mora tir el diak ke modenterir el diak el kora sorir a mou beltikel reng e mosiou er tir; malechub eng chedam el medengei el kmo kau e a omtebechel er a blai e lokiu a lemalt, engdi ke locha oumededenger el meruul er ngii, e a taem a di merael mo diak, le tirkel ngalk a meklungang ma beluulechad a kora chetiteuokel e ktekudel.

Mal sekum e ke melchesuar el loberedang, e mesang el kmo ngungil a belkul. Ngochotii el kmo ke melchesuar sel beredel a klaumerang ra Dios el ngar kau. Ng belkul a kmo ngarngii er kau a telkib el klemedengei er kau el kmo a priesthood ng ua ngerang.

Ngarngii el derta el chad ra beluulechad a medengelii a uai tial tekoi. Molmuut er tirkel sebecherir el masech a klebokel el belkul a tekoi meng diak el sal metebengii tiang. Ngarngii a bebil ra chedaol lechukl el, lokiu sel klisichel a Reng e lolab el kmiis a rengud meke de mesa sel chedaol priesthood. A ikakid a bebil er ngii el bades:

“A klisichel ma ngerchelel a … Melchizedek Priesthood, a olab a kengei ra rokui el klengeltengat ra reng ra ikelesia—

“Morngii a lemelted elmo medengei a ikel berotel el tekoi ra rengedel a babeluades, meng ngobok a chesimer ra babeluades el me rekid, e ngara cheldelel sel klou longdibel ma ikelesia er ngkel Lucheled, e tmeu a rengud lobengterir el ngar bita ra Dios el Chedam, ma Jesus el mengkerengel sel beches el telbiil.

“A klisichel ma ngerechelel sel … Aaronic Priesthood, a oba kengei ra re mengkar el anghel” (D&C 107:18–20).

“A ikel chedaol lureor [ra priesthood], e a klisichel a lemalt e bleketakl.  …

“Le lak tiang eng diak a chad el sebechel mesa medal a Dios, el Chedam, e ngar” (D&C 84:20, 22) ).

“Tial ngarbab el priesthood a klebechel e loltirakl ra Ngelekel a [Dios], e klebechel el ngara dodai ra beluulechad; el tara belkul, ngdiak a uchelel a sils malechub eng ngulebengelel a rrak, el keltmokl ra diak a ulebengelel el mora diak a ulebengelel, loltirakl a rokui el tekoi el di lodengei” (Alma 13:7).

“A rokui el chad el milchedaol e loltirakl er tial klisiich ma okedong a ngarngii a klisichir, lokiu a klaumerang, el torakl a rois, e mingii a daob, e loriid a ralm, e otobed er a rolel;

“E mutek a ngerrir a re soldau ra beluu, e mingii a chutem, e mrideterir a re bek el cheldebechel, e dechor ra medal a Dios; e kutmokl a rokui el tekoi lotireklii a urungulel, loltirakl ra klisichel, el mechem a llach ma klisiich; e tiang el lokiu a Ngelekel a Dios ra uchelel ruchei ra lobeob a beluulechad” (Joseph Smith Translation, Genesis 14:30–31[er a Bible appendix]).

A tara rael el donger er tial longasireng e ulekrael el blekerdelel a klisichel a priesthood a sel di kid el kmul kmo tia diak el kired el tekoi. A tara rolel el donger sel blak a rengud el loker ra rengud el kmo: Ngarngii a ta el bla kulchesuar ra tungelel a babeluades lobok el kirek? Ng sebechel a chad e lousbech er sel tekoi “mengkar el anghel” el smodii a urrelel a priesthood el kubang? A kubang sel klisichel a “lemalt el mora klengar” ra re kusiou er tir? Ngarngii a taem e blak bridii a rois, mutek a ngerir a re soldau, mriditerir a cheldebechel, mechem a klisiich ra beluulechad—el dil blel belkul a tekoi—mek ketmeklii a soal a Dios?

Sel domtab el uaisei eng blechoel meskid sel reng el kmo kid a sebeched el kutmokl a lmuut el betok el lurrelel a Rubak. Ngurungulek mel beskau a reng el kmo ke soam el mo meruul a lmuut el betok—el lolengit elmo mui el loureor er a ongasireng lurrelel a Rubak. A ikaikid el reng e a kot el bakes el merael elmo ua tirkel chad el losemechokl er tir tial lureor ra priesthood.

Sel tara bakes a ulecholt er sel cheldecheduch ra delongelel a Jehovah ma Enoch. Kede medengelii a Enoch el mlo mesisiich el profet el kiltmeklii a Zion ra elsel a klou e luldikel. Engdi uchei ra le bol mesisiich el profet, e a Enoch a milsang el “kekerei el buik, …metitur el mengedecheduch, el di chetitir a re bek el chad (Moses 6:31). Mrenges a ikal tekingel a Rubak lousbech el melisiich er a Enoch. A ikang a dirrek el tekingel lekor er kau el mla mokedong elmo mesiou el mora re bebil le koba priesthood:

“Ma Rubak a melekoi el mora Enoch: Morael mong e moruul a blak duu er kau, e diak a chad el tomelau. Bekengii a ngerem, leng mo rengii, e lek meskau a bo molokoi, le rokui el tech a ngara imak, e ngak a mo meruul loltirakl er a soak. …

“Mesang a Reng er ngak a obengkem, maleuaisei a rokui tekingem a bok semechokl; e a rois a mo imiis er kau, ma omeuachel a mengodech a rolel; e kau a mo telkakl er ngak, e ngak a ultuil er kau; ma le uaisei e morael lobengkek” (Moses 6:32, 34).

Rodam, kid el mlo mechedaol el mora priesthood a blel siotai er kid a Rubak el merael Lobengkel. E ngera belkul tial merael lobengkel? Ng belkul a kmo kede meruul a ikel loruul, mesiou el ua Ngii sel losiou. Nguletngakl a soal me lomekngeltengat ra re ngesool, mesei e a dolasem er ngii. Ng mle ultab osengel er tirkel chad el diak el ngara belsachel e meleuauech, e tiang meke de melasem er ngii. Ng mle bekeu el louchais engdi ngulbeltik el reng ra klemerang el llach el Ngii a ngilai ra Demal, e dimlak a sorir, me kid meng kired el uaisei. Ngii a milekoi el mora rokiu el chad, “Me rengak” (Mateus 11:28), e kid a dmu ra re bekl el chad, “Be re Ngii.” Mesel doba priesthood, e kede omtechei er Ngii. Kede mesiou el diak el kired ng kirel. Ngdiak ke dolekoi a tekinged ng tekingel. A rechad el dosiou er tir a mo medengelii lungil le kid el mesiou.

Sel recheded el kongei ra siotai ra Rubak el “Morael lobengkek,” e a blekerdelel a omesiungel a priesthood el dobang a mengodech. Ng di kiul ersel taem el ngoriakl e klebechel engdi ng dirrek elmo beot el meketmokl, le kid el medengei el kmo ngarngii a obengked. Ak milchesuar er tial klisiich sera President Thomas  S. Monson lomor imal ra bteluk ra etui rrak ra memong e lomekngeltengat er ngak ra kumuchel el mesiou er tial ngerchelek er chelechang. Elsel sel klengeltengat, eng dilu a ikakid el tekingel Osobel: “E ngkel ngoikau, meng ngak mak ngar sei, lek mong ruchei er kau, ak ngara klisichem ma klitechetum, e a Reng er ngak a medechel ra elsel a rengum, e a re anghel er ngak a meliuekl er kau, el sobecheklau” (D&C 84:88).

Ak blechoel lultuil er seikid el telbiil el betok el taem, e ngak a mla mesang el tmaut ra betok el rolel ra ikal rekik e lokeuid ma eru el rrak ra omesiungel a priesthood. Ng dilubech sera ak direke ngiluu a Aaronic Priesthood el ngerchelek a merous er a sakrament. Ng dektek leng mekngit ak mecheuid, e ak mlora rikl ra ikelesia ruchei ra miting ra lomuchel e meringel el meluluuch ma Dios el ngesukak. Meng mlei a nger. Ak milchesuar el kmo a Rubak a obengkek. Ak milchesiu er Ngii lou merang er ngak, mak mlo mlechesiu lou merang ra ngerechelek er a Urrelel.

Ng liluut el dubech er sera kusiou el bishop. Ak ngiluu a dengua ra redil el rirellii a klou el chelibirukel e chelechang eng chelbangel er a meringel el tekoi. Me sera kuldingel er ngii, e ak melchesuar el medengelii a nger el kirel a mondelngel, engdi ak dirrek el mesisiich el melchesuar el diak el kirek el louchais er ngii—ng kirel di ngii elmo medengelii. A tekingek elmo rengii a mle “A kumerang el Dios a mouchais er kau ra bo moruul er ngii alsekum e kolengit er Ngii.” A uriul eng nguluchais el kmo ngulengit er Ngii, e Ngii a silbedii.

E a kuk tara taem, er a kbisop, e a dengua a mlei— el mlara rebulis. Te silbedak el kmo a chetelaol el chad a mla nguu a mlil el toreklii a chelsel a bank. Ngkal mlo rau a rengul el chad ra lesa a bulis el loba boes el kirel, eng ngululdiu, “Lak momoes! Ngak a Mormon!”

Ngkal chetelaol el chad a blo ki modengelii el chedal tial ikelesia, e direke miltecholb. Mak dengchokl el mengiil er ngii ra obis er ngak, el melib a tekoi el bok dung er ngii el rullii me louchel a rengul ra uchul eng mla tomelii a telbilel e mekrengii a Ikelesia. Engdi tia ra ak dengchokl e lomes er ngii, e ak rongesii a ngor ra uldesuek el melekoi, “Ak mechikau meke mesang el ua kumes er ngii.” Ng seikid, el telkib el taem, e a osengek er ngii a milngodech. Ng dimlak kisang a etetelaol el ngeasek el chad ng bai beches, e mellomes, e melmalt el ngelekel a Dios. Ak di mle kiul melchesuar ra beltik el reng ra Rubak el bedul ngii. Seikid el ues a ngildechii a cheldechedechemam. Ng dirrek el ngildechak.

Ak siluub a meklou el losisechakl ra ikal blekeradel sel kurael lobengkel a Rubak el meruul a urrelel. Ng soak el louchais a keldei er ngii tekoi e lekor kemiu. A kot a kmo a Dios a mesang e molngeseu molmuut er ngkel kot el beches e kekerei el diakon. Ngdiak el kirem el lomdasu el kmo ke kmal kekerei malechub eng diak a ultutelem elmo re Ngii meng diak el lesekau ma siungem el moruul loba Ngklel.

A ongerung el losisechakl a kmo a urrelel a Rubak a diak el dil losaod a mondai; ngo mtebechel er a rechad. Mesel morael lobengkel el mesiou ra priesthood, e ke mo metik el bebil ra taem e a ikel kora bedochel el rael a diak el soal a Rubak leng diak el besterir a rechad a techal mel mukerool. Alsekum me korenges, e Ngii a osisecheklau ra ikel teletelel. Molbedebek el kmo a urrelel a Dios ma klebkelel a diak eldi doruret er a ungil el chelechad; ng “mo oterkeklii el diak el luut a kodall e nguu diak a ulebengellel klengar a chad” (Moses 1:39). Tiakid, e a uchul, eng moktek el Ngii a msa ngerachel er a priesthood er Ngii el me rekid a re ngarngii a ngesengesed e siotai er kid el mengetmokl a Urrelel. A mo klungioled a Ngerchelel!

Chelechang esel longedei e losisechakl: A merael lobengkel a Osobel el mesiou ra priesthood a mo ngodechii osengem sel momes ra bebil. Ngii a mo osisecheklau lomes er tir lokiu osengel, el belkul a kmo komes el ngelakl ra ikrir el bedul a elsel a rengrir (mesa 1 Samuel 16:7). Tia rolel a Osobel a mlo sebechel mesa Simeon el diak el dil lodikel el chad er a omenged engdi ng Petrus, el mlo mesisiich el mengeteklel a Ikelesia er Ngii ra ngar medad el taem. (mesa Lukas 5:1–11).Tia e a mle rael eng sebechel mesa Zacchaeus el diak el dil cheblad el chad er a tax ra osengir a re bebil engdi ng melmalt, e ultebechel el ngelekel a Abraham (mesa Lukas 19:1–9). Alsekum e ke merael lobengkel el kemanget el taem, e kemo mesuub e lomes ra rokui el chad el ngelekel a Dios el mui a klisichir, el diak el ior ra telemelir ra mla memong. E alsekum e ke melmolm lobengkel Osobel el merael, e ke mekdebechii a tara sengk el Ngii obang—ngmo sebechem el ngosuterir a rechad el mes a ikeikid el klisichir e mo ouchel a kengterir.

Betik er a renguk el rodam ra priesthood, ngokiu a betok el teletael, e kid a kor tirkel teru el mesiungel el milrael ra rael el mora Emmaus ersel kot el sils ra Basqua. Ng mle tutau ra Okisel a Kodall, e di mlak el kleuadel ra rengrir a kmo ngera a okisel a kodall malechub eng ngera belkul. Tulumerang el “kmo a [Jesus ra Nazareth] a kirel losebelii a Israel,” engdi te mle “meoud a rengrir elmo oumerang” a bek el tekoi el chedaol lechukl a ulsisechakl el kirel a okiis er a kodall. Me tia ra lorael el tmak e te melasem el merech er ngii tekoi, e a “Jesus a merael lolkedang, e mlo er tir. Engdi a mederir a mle blutek meng dimlak el dengchii” (mesa Lukas 24:13–32).

A kuchais el kmo sel dorael er tial lomesiungel a priesthood, e a Osobel el Jesus Kristo a obengked, le tiang a rolel, ngomerolel. A lemsel a okiu medad, e a re angel er Ngii a meliuekl er kid. Kede locha molngesonges ra mui el klaudengei ra kmo ngerang a priesthood malechub eng mekerang a dousebch er ngii el uai Ngii. Engdi alsekum kede ungil lomtab ra ikel tokubets el taem el rengud a mo “mengengeald” (Lukas 24:32), e a osenged obok, e kid a mesa klisichel ra klengar er kid ma dosiou. A kuchais el kmo kede mo sioning er Ngii e moungil loureor lobengkel e mesiou er Ngii er tial klou lureor el lolsobel ra rengelekel a Dios. “Kede mekerang e medengelii a masta el direkak a ta el dosiou er ngii, el diak ke dodengelii, e de eroid er a uldesuel ma moktek er a rengul?” (Mosiah 5:13). A Jesus Kristo a Masta er kid. Tiang a Ikelesia er Ngii. Ng priesthood er Ngii el dobang. Ngurungulek mede rokui el melilt el merael e lobengkel e mo medengei el kmo ngua ngerang sel lorael lobengked.

Ak meral sioning el kmo a Jesus a Kristo, el milkiis er a kodall el Rubak er kid. A kuchais er kemiu el kmo a priesthood el Ngii a mla nguu loterkeklii er kid a klisiich el melekoi e meruul a Urerel. Kid a ngelekel a oubeltik el reng el Chedam er a Babeluades el onger a nglunguched e odureklii Chedaol Reng el mo melisiich er kid er a ikel bek el ngercheled er a priesthood el kid a ngeltengat el ngmai. A Joseph Smith a milsa Chedam ma Ngalk. Ngii a ngilai a kiis ra priesthood el mla moiuid el mora President Thomas S. Monson, lolab er chelechal sils. Ak melekoi loba ngklel a Jesus Kristo, amen.