Ew Mochenin Neim

Arap ngeni ipuku ier a no, ew famini seni Oregon ra kukkunou non Indiana—a nap seni 2,000 (3,200 km) mwain towawan—nupwen a moruk senir nour we konak, Bobbie. Ewe famini a fokkun nuokus ne kutta ewe konak ekis meinisin nge rese kuna. Bobbie ese tongeni pwa.

Ra netipechou, ra niwin ngeni imwer, ew me ew mwain ra towaweno seni nour we konak mi chen.

Wonu maram mwirin, ewe famini a fokkun mairu ren ar kuna Bobbie nukun asamer we non Oregon. “A nimengaw, kichuchu, pechen a fokkun tatakis—[a] nikinikin pwe a fetan unusen towawan we…anamon chok.”¹ Porousen Bobbie we awuru ekiekin aramas non unusen Merika, iwe a winiti Bobbie ewe Konak mi Amwarar.

Bobbie esap chok i emon man a aosukosuka saintis pokiten ar sineochu aaner me sinei ifan imwer. Ekkoch watten chochon nipisipiskon ra mwokut 3,000 mwain (4,800 km} iteiten ier ngeni neni mi fich ngenir ar repwe manau. Pwapwan neset ra sai ngeni epekin ewe Pacific Ocean seni Indonesia ngeni esopun California. Raw ra no seni ekkewe konik mi pat non nesopun ennefen me eor ngeni nukanapan pwan niwinsefan. Nge eni a kon amwarar, ekkewe kukkun machang ra chang seni ewe Artic Circle ngeni Antarctica me niwin sefan iteiten ier, ukukun 60,000 mwain(97,000 km).

Nupwen saintis ra kaeo ei nikinik mi amwarar, ra eis ekkei kapsaeis usun “Ifa usun ra sinei ian repwe no ia?” me “Ifa usun ew me ew tappin man ra keao ei nikinik?”

Nupwen ua annea usun ei pochokunen nikinik non man, ua kan ekieki, “Epwe tufich pwe aramas mi pwan wor rer ei mochen—ew mettochun emwen non kich, ika oupwe mut ngeniei upwe eita ngeni ena—ewe a emwenir ngeni imwer non nang?”

Ua nuku pwe meinisin mwan, fefin, me semirit ra fen mefi ewe kokon seni nang non ekkoch fansoun non manauer. Non kich mi wor ew mochenin ach sipwe no epekin ewe pwonupwon me kamochuno Semach me Inach non Nang ekkewe kich mi akkom sinei me aucheanir.

Ekkoch ina repwe aukano me fori ar resap kon mefi ei mochen. Nge ekkewe resap aukano ei mochen non ir ra tongeni poputa won ew sai mi echipwer—ew sai mi amwarar ngeni neni non nang.

Ewe poraus mi amwarar an Ewe Mwichefenin Jises Kraist ren Aramas mi Pin non Fansoun Soponon pwe Kot I Semach, pwe I a tongei kich, me mi wor ew aan ne niwin sefan ngeni I.

Kot a Kokkoruk

Kot mi sinei om ekiek, om netipechou, me om watten apinukunuk. Kot mi sinei usun ekkewe chommong fansoun ka kutta I. Ekkewe chommong fansoun ka mefi pwapwa ese much. Ekkewe chommong fansoun ka kechiw anamon. Ekkewe chommong fansoun ka mefi nipwakingaw, osukosuk, ika song.

Nge inamo, ese nifinifin met ka fen fori—ika ka fen turuno, kese fetoch, ka mefi tipechou, tipengaw, emon a kiringaw ngonuk, ika ka feiengaw—kopwe sinei pwe kose anamon. Kot mi chok kokkoruk.

Ewe Chon Amanau a eitau Poun ngonuk. Iwe, usun a fori ngeni ekkewe chon attaw ekkewe ra uta won oroppanen ewe Setin Galilee me nom, ren tong esemuch a apasa ngenikemi: “Oupwe feito fiti ei.”²

Ika oupwe rongorong ngeni I, I epwe kapas ngeni kemi non ei ran.

Nupwen oua poputa ne fetan won ewe aanen chon kuno—nupwen oua poputa ne feino ngeni Semach won Nang—mi wor och mettoch non ami epwe apungano pwe oua fen rongorong ewe kokko an ewe Chon Amanau me awena netipemi ngeni ewe saram. Epwe urenikemi pwe oua nom won ewe aan mi pung, me oua niwin ngeni imwemi.

Seni nepoputan fansoun, noun Kot soufos ra fen pesei aramas non fansoun kewe ne “rongesich ngeni I o apwonueta an kewe annuk meinisin ra makketiw non ei pukkun annuk. Oupwe kunu ngeni I seni unusen netipemi.”³

Ekkewe pukefel ra aitikich chommongun popun pwata sipwe fori ei.

Ikenai, upwe awora ru popun pwata sipwe kun ngeni ewe Samon.

Aewin, manuemi epwe murino.

Aruwan, Kot epwe aea ami ne aochueno manauen ekkoch.

Ua pwarata pwe nupwen sia fiti ika soposopono won ei sai mi amwarar a emwen ngeni Kot, manauach epwe murino.

Esap wewen pwe sisap chiwen mefi netipechou non manauach. Kich mi sinei usun chon tapweno mwirin Kraist mi tupwen ra weri riaffou me pungungaw—Jises Kraist pwisin a riaffou nap seni kich. Usun chok Kot a “etinatiw ewe akkar won aramas mi ngaw o aramas mi och,” A pwan mutata fitikoko ne sotuni ewe mi pung me ewe ese pung.⁴Ennetin, fan ekkoch usun manauach a kon weires pokiten sia achocho ne manaueni ach nuku.

Apw, ami tapweno mwirin ewe Chon Amanau esap awesano ami kewe sossot meinisin. Nge inamo, epwe asueno ekkewe eppet nefinemi me ewe aninis Sememi won Nang a mochen ngeni kemi. I epwe nonnom remi. I epwe emweni ami foffor. I epwe fetan remi me epwe pwan mwarei kemi nupwen mettoch mi auchea ngeni kemi a fokkun watte.

Oupwe mefi tekian uwan ewe Ngun: “tong, pwapwa, kinamwe, engino, umoumoch, manauoch, [me] nikitu.”⁵

Ekkei uwan ngun rese feito seni pisekisekin fonufan, fetanoch, ika asesserin feioch. Ra feito seni ach tapweno mwirin ewe Chon Amanau, me ra tongeni anisi kich fansoun ach weri sossot mi weires.

Ekkewe akkei me fitikokon ei manau won fonufan ra tongeni enniwa me anuokusu kich, nge ekkewe ra awena netiper ngeni Kot repwe pwenino ren An kinamwe. Ar pwapwa esap kukununo. Resap nikitino ika monnukuno.

“Kopwe apinukunuku ewe Samol ren unusen netipom:” ekkewe pukefel ra aitikich, “kosap apinukunuku met ka ekieki pwe ka sinei. Kopwe chechemeni ewe Samol non mettoch meinisin ka fori iwe epwe pwar ngonuk ewe aan mi pung.”⁶

Ekkewe ra aneasochis ngeni ewe koko non netiper me kutta Kot, ekkewe ra iotek, nuku, me fetan won ewe aan ewe Chon Amanau mi ammonata—ika mwo ra turuno won ewe aan fan ekkoch—repwe angei aurour mi ennet pwe “mettoch meinisin repwe forfengen fan iten ochur.”⁷

Pun Kot “a apochokunata ekkewe mi apwangapwang me pekus.”⁸

“Ina mo ika emon aramas mi wenechar a turuno fan chommong, nge epwe chok pwaata sefan.”⁹

Me ewe Samon non An kirekiroch a eisini,

ka mochen mefi pwapwa esemuch?

Ka mochen mefi non netipom ewe kinamwe a awora mirit?¹⁰

Iwe akunnu ngunum ngeni ewe saram.

Poputani om pwisin sai mi murino ngeni imwom.

Nupwen ka fori, manauom epwe murino, pwapwa, me epwe kan namwot.

Non om sai ne niwinsefan ngeni Semach won Nang kopwe apareni pwe ei sai esap chok usun om ekiekin pwisin manauom. Apw, ei aan epwe ennetin emwenuk om kopwe ew feioch me non manauen noun Kot kewe ekkoch semirit—pwiumi me fefinemi. Me ewe mettoch mi och usun ei sai pwe ka angang ngeni Kot, iwe nupwen ka tumunu me anisi ne efeiochu manauen chiechiom, kopwe kuna fetanochun manauom, non napanap kose tongeni aneanei.

Meni kosap ekieki pwe en mi namot; meni kosap ekieki pwe en ew feioch me non manauen emon. Fan chommong, nupwen sia pwisin nenengenikich, sia chok kuna aukukuch me ach apwangapwang. Sipwe ekieki pwe sipwe och mettoch mi “nap” ren an Kot epwe aea kich—sipwe kon tipachem, kon pisekisek, kon itefouno, kon angoch, kon tupwon. Feioch resap feito pokiten ami tufich nge pokiten met oua finata. Iwe ewe Koten ekkewe fonufan epwe angang non en me senuk, epwe anapano om achocho fan iten An kewe popun.

An we angang a fetanoch fansoun meinisin won ei auchean nongonong: “Pwe seni kukkun mettoch a feito mettoch mi watte.”¹¹

Nupwen an Paul mak ngeni ekkewe Souneng non Corinth, a kuna pwe chommong me neir ekkewe memper ikewe repwe nom non pekin mirit me ren chon fonufan. Nge ena ese namot, pokiten “Kot seni non netipan a finata minne fonufan a ekieki mi namwot muan pwe epwe asawa ekkewe aramas mi tipachem.”¹²

Ewe uron an Kot angang a ureno ren aramas ra ekieki pwe ir mi nipwakingaw. Nge ra chok angang tekison, anongonong won ewe chenin Kot me An pwon: Pwe pour epwe Poun, me I epwe ar eppet… , me repwe fiu pwaracho fan Itan iwe I epwe tumunur.”¹³

Ewe summer a keran no am we famini a tufich ne churi ekkoch neni ren pekin Uruon ei Mwichefen non otiwen Merika. Non ew napanap mi auchea, aua efisi sefani uruon ena fansoun. Aramas ua anneani chommong usur—aramas usun Martin Harris, Oliver Cowdery, me Thomas B. Marsh—ra wesen fis ngeniei nupwen aua fetan ikewe ra fetan ie me ekipwichi ekkewe angangen fangeno ra fori ne aueta ewe Muun Kot.

Mi chommong napanaper mi och minne a mut ngenir ar repwe awora aninis mi auchea ngeni ewe Niwinsefaniton ewe Mwichefenin Jises Kraist. Nge ir pwan aramas, apwangapwang, me rese unusoch—usun chok en me ngang. Ekkoch rese tipew ngeni ewe Soufos Joseph Smith me ra rikino seni ewe Mwichefen. Mwirin, chommong me nein ekkewe pwan chok aramas a ekkesiwin netiper, ra etekisoner, o ra chiechi ngeni ekkewe Souneng sefan.

Eni epwe wor rech ewe mochenin apungu ekkei mwan me ekkoch usur. Eni sipwe apasa, “Usap tongeni nikano ewe Soufos Joseph.”

Meni epwe ennet, sise kon sinei met usun ach sipwe nonnom non ewe fansoun, non ekkewe napanap. Apw, rese unusoch, nge mi murino ach sinei pwe Kot mi chok aea ir. Mi sinei ar pochokun me apwangapwang, me a ngenir ewe tufich mi sokono ne awora ew uwokisin kon ngeni ewe Niwinsefanito.

Mi murino ach sinei, ina mwo kich sise unusoch, ika netipach ra kunnu ngeni Kot, I epwe kisaseu me kirekiroch me aea kich fan iten An kewe popun.

Ekkewe ra tongei me angang ngeni Kot me aramas, me aninis non tekison me mwasangasang non An angang, repwe kuna mettoch mi amwarar epwe fis non manauer me non manauen ekkewe ra tonger.

Tufich mi nikinikin kapung epwe sukuno.

Chon nang repwe feino me mwer me amonata ewe aan.

Nge inamo ese nifinifin wisom non neniom we ika non ewe Mwichefen, Kot epwe aea en ika ka mochen. I epwe anapano om mochen mi wenechar me siwini ekkewe foffor ka fotuki ngeni kinikin uwa mi murino.

Kich, emon me emon, “chon ekis me chon susufetan”¹⁴non ei fonufan. Non chommong napanap, sia towaweno seni imwach. Nge esap wewen pwe sipwe mefi morukeno ika anamon.

Semach won Nang mi achengicheng a fen ngeni kich ewe Saramen Kraist. Iwe anonnonun non emon me emon kich, ew echimw seni nang a pesei kich ne akunu mesach me netipach ngeni I nupwen sia sai sefan ngeni imwach nang.

Ei mi auchea oupwe achocho. Ouse tongeni tikeri ikewe ika ouse achocho oupwe kaeo usun I, weweiti me aea An aurour, me ipweno ew me ew.

Apw, manau esap usun och mettoch sia fori me nukun ach sisap ekiek.

Kose tongeni kopwe epias won ekkewe konikin manau me nuku pwe ewe no epwe uweiukeno ian ka mochen kopwe no ia non fansoun mwom. Ach winiti chon kunon Kot mi auchea sipwe fiti ach mochen ne nikitu nupwen mi namwot.

Ese wor emon epwe nemeni om pwisin sai. Ewe Chon Amanau epwe anisi kemi me amonnata ewe aan me mwemi, nge ewe nikitu ne tapweno mwirin I me aneasochisi An kewe annuk epwe feito seni kemi. Ina pwisin wisom, om chok tufich.

Iei om mokutukut kopwe fori mi amwarar.

Ausening ngeni kokkon ami Chon Amanau.

Tapweno mwirin I

Ewe Samon a forata Ewe Mwichefenin Jises Kraist ren Aramas mi Pin non Fansoun Soponon ne anisi kemi non ei pwon ne angang ngeni Kot me aramas. Ewe popun pwe epwe pesei, aiti, seikata, me amwasanga. Ei Mwichefen mi amwarar a awora tufich fan itemi ne aea kirekiroch, anisi ekkoch, me asofosefani me apwonueta pwon mi pin. A fis pwe epwe afeiochu manauemi me amurinou imwemi, neniemi, me muu.

Feito, fitikich me nuku ewe Samon. Awora om angangoch ngeni An angang mi amwarar. Anisi ekkoch, pesei, echikara, me anisi ekkewe ra mochen mefi me mochen imwach non nang. Sipwe chufengen non ei sai ngeni neniach nang.

Ewe kapas allim ew porousen apinukunuk, pwapwa mi amwarar. Ina ewe aan a emwenikicheno non imwach.

Nupwen sia unusen etiwa ewe kapas allim non nuku me angang, iteiten ran me awa, sipwe mareno ekis ngeni ach Kot. Manauach epwe murino, iwe ewe Samon epwe aea kich non napanap mi amwarar ne afeiochu ekkoch me apwonueta An kewe popun esemuch. Ua pwarata usun ei o ua anomu ai feioch remi non iten Jises Kraist, amen.