Arap ngeni Kot me Forsefani met mi Ta

Mi auchea sipwe sopweno ne anapano ach mirit usun me aneasochisi Semach won Nang. Nefinach ngeni I mi fochofoch. Kich noun semirit mi achengicheng, iwe ena esap siwin. Ifa usun sipwe ennetin etiwa An tingor ne arap ngeni I pwe sipwe pwapwaiti ekkewe feioch A mochen epwe ngenikich me non ei manau me pwan non ewe manau mwirin ach mano?

Ewe Samon a apasa ngeni chon Israel me nom o a pwan apasa ngeni kich ikenai, “Ami aramasen Israel, ua tongei kemi fansoun meinisin, iwe ua sopweno ne pwar ngeni kemi ai tong ese much.”¹ A kapas usun ita ewe Sam, A apasa ngenikich, Pwata ewe Sam epwe erenikich ach sipwe arap ngeni I, o I epwe nonnom rech pwe sipwe tufichin fetan ren I.² Mi naf ach nuku I pwe sipwe nonnom non I me fetan ren I?

Sia nom won fonufan pwe sipwe marita me kaeo, me ewe sokkun marita me kaeo mi auchea mi nom nonn ach sipwe weweiti nefinach ren Semach won Nang me Jises Kraist. Nupwen sia weweiti nefinach Rer, epwe awora ach tipachem, tong, ewe mochen ne anisi ekkoch.

“A wor ach sekening ne kaeo mettoch meinisin Kot a pwarata usun pwisin I.”³ Mi namwot sipwe weweiti pwe Kot ewe Sam mi annuku Noun we, Jises Kraist, ne forata fonufan pwe sipwe tongeni kaeo, pwe Semach won Nang a fangeno Noun we ne riaffou me moni ach tipispwe epwe amanaua kich, me ewe manamanen pristut an ewe Sam o pwan pwe ewe ennetin Mwichefen an ewe Nau mi tongeni nom won fonufan ikenai ne efeiochukich. Oua tongeni mefi ewe tong mi aureno ei kokkot fan itan ach pwapwa me fefeita? Mi namwot sipwe sinei pwe kokkotun manau ese much an Semach won Nang pwe sipwe anneasochisi ekkewe annuk me foffor mi pin an ewe kapas allim o angei manau ese much pwe sipwe tongeni winiti usun Kot.⁴ Iei ewe ennetin pwapwa ese much Semach won Nang mi awora ngeni kich. Ese pwan wor met mi nap seni ei pwapwa.

Ach sossot mi tongeni ariki kich seni ei aanen pwapwa. Sia tongeni pwisin aimukicheno seni Kot ika sia mut ngeni sossot an epwe osukosuka nge ese fen emweni kich ne fotopukutiw me iotek.

Ekkei kapas mi afatta pwe sipwe apungano met mi wesen auchea ngenikich non manauach.

Pwii kana, met mi auchea ngenikemi? Met mi fochofoch me remi? Ewe mettoch mi auchea ngeni ewe Sam pwe sipwe kaeo usun I, atekisona netipach, o anapano ach anneasochisi I non manauach. A mochen sipwe siwini ach namanamtekia ngeni aninisoch, ach niuokus ngeni nuku. Ekkewe mettoch mi auchea repwe weires ngeni kich.

Iei,chok, ren ach nipwakingaw, pwe ewe Sam a tingorei kich ach sipwe tong nupwen ach tongei ekkoch mi weires, anisi ekkoch nupwen sia tawengau, me omusano ekkewe mi weires ach sipwe omusano tipisir. Ifa usun? Ifa usun sipwe fori? Sipwe tingor aninnis seni Semach won Nang, non itan Noun we, o sipwe angang usun A mochen nap seni ach pwisin mochen mi maicha.

Sasing

Picherun Konik

Ua esinna ai namanam tekia nupwen Preseten Ezra Taft Benson a kapas won ach nimeti netipach.⁶ Ua ekieki pwe ngang ua chok ew picherun konik. Ifa usun ai upwe aturau nimengauan namanam tekia seni ai we picherun konik? Ai echimwakich pwisin pwe sipwe tipetekison o tongei ekkoch mi mwan menusmwan, me namwotungau. Tipisich kewe me ach namanam tekia mi ataieno nefinach ren are aimuno kich seni ewe popun tong meinisin, Semach won Nang.

Ewe Achasefanin ewe Chon Amanau chok mi tongeni animenimokicheno seni ach kewe tipis.

Sia mochen Semach won Nang epwe pwenni kich ren An tong me emwen, iwe sia ekieki usun netipan akkom o sipwe tingor ren Kraist ren unusan netipach an epwe nipenanong konik mi nimoch non ach kewe picher. Akkom epwe ekkis me ekkis, nge non ach kutta, tingor, me aneasochisi, epwe feito non manauach. Ei konikin manau epwe aurekicheno, o sipwe uren An tong, me sipwe pwan tongeni anisi ekkoch pwe repwe kuna aninnis, apinukunuk, me tong. Nupwen ngunuch kewe repwe nimoch, nefinach kewe repwe chikarata.

Ach sipwe nemeni ach pwisin mochen mi namwot pwe sipwe taweoch ne fori ewe kokkot ese much an Kot. Ewe Chon Amanau, ewe mi kapas fan iten ewe Sam, a tingorei kich “arap ngeniei o upwe arap ngeni kemi.”⁷ Ach arap ngeni Kot a tongeni wewen pwe sipwe kaeo usun An ennet me ren ekkewe pukefel, ausening ngeni ekkewe kapasen fon seni ekkewe soufos, o achocho ne kaeo usun I.

Kich mi weweiti pwe a wor an Kraist manaman ne anisi kich ne arap ngeni ewe Sam pwan ngeni emon me emon kich? Me ren manamanen ewe Ngun mi Fel, A tongeni awewei auchean nefinach kewe ren ekkoch.

Emon sensen Sukunen Kinter a ereniei usun ew manaman a fis non an asukkuna an we klasin anuon 11 ierir. Emon neir upwe eita ngeni Jimmy mi soun akkanaemon chok. Non ew Raninifen, ewe sense a mefi pwe epwe nikitano ewe nesen a ammonata o epwe apasa pwata i a tongei Jimmy. A fos usun an kinisou ngeni me an nuku non ewe anuon. Ewe sense a pwan ereni ekkewe ekkoch chon sukun ar repwe apasa met ra sani usun i. Nupwen emon me emon ekkewe chon sukun ra ereni Jimmy pwata ra ingeiti, ewe at a porotiw mokuran o a sur chenun mesan kewe. Ewe sense me ekkewe chon sukun ra arap ngeni Jimmy. Tong ennet, mi pwa non pung, mi awora apinukunuk non ekkoch. Ua eita ngeni ei “forsefannin met mi ta.”

Manauach me mwen ach uputiw, naman, a efisi ach tipe ngeni ennetin, nomotamen tong me ikkei won fonufan. Sia forata pwe sipwe awora tong me angei tong, me ewe tong mi anonnon a eto nupwen kich sia ew ren Kot. Ewe Puken Mormon a peseikich pwe sipwe “ siwini nonnomun inisich ngeni i me ren ewe achasefanin Kraist.”⁸

Isaiah a kapas usun ekkewe mi nukuchar ne manaueni ewe annukun echikifel o ra winiti chon forsefannin met mi ta fan itan mwirimwirir kewe. Isaiah mi pwon pwe ekkewe ir repwe “ausefanita won chok ekkewe nongonong mi fen tano.”⁹ Non ei sokkun napanap, ewe Chon Amanau a forsefanni ewe sampas nefinan kich me Semach won Nang. I, me ren An achasefan, a awora ach tufich ne angei an Kot manaman o nupwen sia angei ena tong sipwe tongeni forsefanni ekkewe “nongonong mi fen tano” non manauach kewe. Ach apochokuna nefinach kewe ren ekkewe ir mi pwenni kich mi namwot sipwe angei tong an ewe Sam pachengeni ach nikitano ach pwisin mochen me niuokus.

Non ew pwin me nom, am me emon aramasei ause tipew fengen non pekin muu. A muttir ne pwari pwata ai kewe kapas mi mwan, o pwan ekkoch non am famini ra pwan rong met a apasa ngeni ei. Ua mefi pwe ukan tiparoch o use sinei och mettoch—naman a kan pung. Non ena pwinin ua fotopukutiw ai upwe iotek, ua kan muttir ne awewe ngeni Semach won Nang ai weires pokiten aramasei we! Ua kan akkamuch ne fos. Naman ua kouno ekkis non ai fos, pwe ewe Ngun mi Fel a tufichin fos ngeni ei pun, amairun, ua pwan apasa, “Ka mochen upwe tongei i.” Tongei i? Ua sopweno ai iotek, o ua apasa, “Ifa usun upwe tongei i? Use ekieki ngang mi sani. Netipei mi kan song o ua pwan memefengau. Use tongeni tongei.”

Iwe, ennetin ren aninnis seni ewe Ngun, a wor ai ekiek minefo o ua apasa, “Nge en ka tongei i, Semei won Nang. Ka tongeni nifang ngeniei ekkis om tong ngeni i—pwe upwe pwan tongeni tongei i?” Netipei mi song a kan pweteteno, netipei a poputa ne siwin o ua poputa ne kuna ochun ei emon. Ua poputa ne kuna auchean neminewe usun Semach won Nang a fen kuna. Isaiah a makkei, “Ewe Samon epwe ne finitano me echikara ekkewe kinas a fen ngeni noun kewe aramas.”¹⁰

Ekkis me ekkis nefinem we a kanefengen. Nge ikamwo ese etiwa pwe netipei mi kan siwin, ua kaeo pwe Semach won Nang epwe anisi kich ne tongei ekkewe minne aururun sise tongeni tongei ika sipwe chok tingor ren an aninnis. Ewe Achasefanin ewe Chon Amanau mi ewe popun ewe tong ennet an Semach won Nang mi tongeni tori kich. Mi namwot sipwe etiwa me fetan non ei tong pwe sipwe tongeni pwari ewe tong ennet ngeni aramas meinisin.

Nupwen sia kunnu netipach ngeni ewe Sam me ewe Nau, sipwe siwini manauach—ese nifinifin ika nonnomuch ese pwan siwini. Sipwe arap ngeni Semach won Nang o sipwe mefi An etiwa ach kewe foffor ne achocho ne winiti noun Kraist kewe chon kuno. Ach finioch, nipwakoch, me nuku repwe napano.

Mormon a erenikich ach sipwe iotek ren unusen netipach fan itan ei tong epwe nom woch seni ewe popun—Semach won Nang.¹¹ Non ena fansoun sipwe winiti chon forsefanni met mi ta non pekin nefinach ngeni aramas.

An Semach tong ese much mi tou rech, ne emweni kich ngeni An ning me pwapwa sefan. A fangeno Noun we Anaemon, Jises Kraist, pwe epwe forsefanni met mi ta nefinach me I. Ach chusefan ren Semach won Nang mi wesen wewe ngeni tong me ach popun ese much. Mi namwot sipwe weweiti nefinach ren I pwe sipwe kaeo met mi ennetin auchea, pwe sipwe tong usun An tong o marita o winiti usun chok I. Ua pwarata pwe nefinach ren Semach won Nang me ach Chon Amanau mi ennetin auchea ngeni Ir o pwan ngeni kich. Non itan Jises Kraist, amen.