Aucheanap

Atun ai ua no Sierra Leone non West Africa, ua fiti ew mwich emon meinapen Kinterin steik a wisen atetten. Mariama a atetteni ei mwich ren tong, chen, me tipepochokun iwe ua ekieki pwe a emon chon ei Mwichefen minen nom. Nge Mariama a chok keran choni ewe mwichefen.

Pwin kukun a choni ewe Mwichefen o a tingorei Mariama an epwe fiti pwe repwe fiti asukunen Fan. Ewe afanafan a men ku netipan Mariama. Ewe afanafan nesenin ewe annukun nimenimoch. Atingor pwe ekkewe misineri repwe pwan aiti ekkoch usun ewe nesen me mwirin a mwitir ne angei ew kapasen pwarata usun ewe Soufos Joseph Smith. A paptais non 2014[ru ngerou engon me ruanu], me noun ewe nengin a paptais non ewe maram. Ekieki, ekkewe ru nongonong ra emweni Mariama an epwe siwin ewe annukun nimenimoch me ewe Soufos Joseph Smith, ekkei ru mettoch ei fonufan a ekieki pwe mi nusmwan, minen nom, are weires. Nge Mariama a pwarata pwe i mi usun emon nisong a sani ika uwesiti ewe tinen tengki. A apasa, “Nupwen ua kuna ewe kapas allim, ua pwan kunaei.” A kuna pwisin auchean me non nongonongen ewe kapas allim. Auchean pwe i emon noun Kot a pwa ngeni me ren ewe Ngun mi Fel.

Iei sipwe churi ekkewe pwipwi chon Singh seni India. Renu, ewe emon mi nom peniemwan, ewe aewin nein ekkei nimon pwipwi a choni ewe mwichefen, a apasa:

“Me mwen ai ua poputa ne kaeo usun ewe Mwichefen, use pwisin mefi pwe ngang mi auchea. Ngang chok emon me nein chommong aramas, me aramasei me ai oreni rese aitiei pwe ngang mi unusen auchea. Nupwen ua kaeo ewe kapas allim me kaeo pwe ngang emon noun Samach won Nang, a ekkesiwini manauei. Ua mwitir ne mefi pwe ngang mi unusen auchea—Kot mi pwisin foriei o a fori Nguni me manauei ren auchean me popun.

“Me mwen ai ua manaueni ewe kapas allim, ua kan achocho ne afata ngeni aramas pwe ngang mi auchea. Nge nupwen ua kaeo ewe ennet, pwe ngang emon noun Kot, ese namwot upwe afata ngeni ekkoch pwe ngang mi auchea. Ua pwisin sinei pwe ngang mi auchea. … Ousap ekkieki pwe ese wor namotemi.”

Preseten Thomas S. Monson a unusan afata ei ren an apasa ekkei: “Auchean ngunun emon a pwapwano ren an kofich ne winiti usun Kot.”¹

Non ekkei ran ua feioch ai ua churi pwan emon fopun mi pwan weweiti ei ennet. Itan Taiana. Ua churi non Primary Children’s Hospital non Salt Lake City. Taiana a fiti mwichen engon me ew non high school nupwen a uri cancer. A fiu ngeni an ei semwen non 18 [engon me wanu] maram me mwen an a mano non ekkei wiik. Taiana a ur ren saram me tong. A itefouno me a chem ren an emenimen me nonomun inisin “an eitieta me ruofoch outunapan ne pwarata pwe mi murino.” Nupwen ekkoch ra eisini,, “Pwata pwe en, Taiana?” a penueni, “Pwata esap fen ngang?” Taiana a achocho ne winiti usun an we Chon Angasano, ewe a men unusen tongei. Non am chufengen, ua sinei pwe Taiana a weweti usun auchean manauan. Mi sinei pwe i emon noun Kot a esenipato an kinamwe me tipepochun ne churi sokun osukosuk mi weires non manauan non eu aan mi murino a fori.

Mariama, Renu, me Taiana ra ait ngeni kich pwe ewe Ngun epwe ennetata ngeni pwisin kich meinisin ach aucheanap mi pin. Ren ami ennetin sinei pwe ami noun Kot nengin epwe ekkesiwini meinisin kinikinin manauemi me emweni ewe aninnis oua fori iteitan ran. Preseten Spencer W. Kimball a awewein non ekkei kapas mi amwarar:

“Kot i Sememi. A tongekemi. I me inemi me nang ra aucheanikemi napseni ami tufichin weweiti. … Ami mi pwisin sokono. Emon pwisin, mi afor seni ewe sinenap ese much mi awora ngenikemi ami pungun angei manau ese much.

“Ousap wanong tipemwaramwar non ekiekimi ren usun pwisin aucheami. Ewe popunapan kokkotun ewe kapas allim mi fis pwe ami kofichin tori unusan ami tufich, ina ewe fefeita esemuch me ewe tufichin winiti usun Kot.”²

Etiwaei ai upwe afata sokofesenin ekkei ru kapas mi manaman: auchea me nimenimoch.. Ekkei ru kapas rese nenne gengen. Wewen auchea mi Pin pwe sipwe aucheanikich usun chok Samach won Nang a aucheanikich, esap usun ewe fonufan a aucheanikich. Aucheach a kefin me mwen sia etiw fonufan. “An Kot tong esap much me epwe nikitu feinfeinno.”³

Nge, nimenimoch a anongonong won ach anneasochis. Ika sia tipis, sia ekisatiw ach nimenimoch, nge sisap tongeni ekisatiw aucheach. Sia sopweno ne aier me achocho ach sipwe usun Jises ren aucheach ese siwin. Usun met Preseten Brigham Young a aitikich: “Ewe kisikis, ewe ngun mi wesewesen apwangapwang won fonufan  … mi auchea nap seni fonufan.”⁴ Ikamwo met a fis, kich mi chok auchea fan mesan Samach won Nang.

Ikamwo ei ennet mi amwarar, fitemon kich mi osukosuk, fan ekkoch, ren ekiek ika memmef mi ngau usun pwisin kich? Ngang emon. A mecheres sipwe tup ren. Setan ewe semenapen mwaken meinisin, wesen non pekin chofona usun ach namanam me popun mi pin. Ach ekiekingau usuch ese anisikich. Nge a fen epetikich. Usun chok met sia fen kakaeo, “Ese wor emon mi tongeni ouwesikemi pwe oupwe mefi apwangapwang ika ouse etiwa.”⁵ Sia tongeni kouno ne apwungu ach nipwakingau ren an pwan emon nipwakoch. “Ach apwungukich ren manauan pwan emon a sonani ach pwapwa.”⁶

Nge sokonon, ewe Samon mi ennetata ngenikich pwe nupwen ach ekiek mi pin, I epwe efeiochu kich ren tipepochokun ,ewe chok tipepochokun ach sipwe wesewesen sinei ochukich. Ese fen wor fansoun mi namwot seni iei pwe sipwe apwonueta An kapas nupwen A apasa pwe ika sipwe chok etiwanong nimoch non ach ekiek fansoun menisin pwe ach tipepochokun epwe pochokun fan mesan Kot; me … ewe Ngun mi Fel epwe chiechioch ngenikich.”⁷

Ewe Samon a pwan pwarata ei ennet ngeni ewe Soufos Joseph Smith: “I mi angei och me ren Kot, i epwe aucheani pwe me ren Kot; me mutata pwe epwe pwapwa pwe i mi nimoch me auchea fan mesan Kot pwe epwe angei feioch.”⁸ Nupwen sia mefi ewe Ngun, usun met ei wokisin a awewei, sia esina pwe met sia mefi a eto me ren Samach won Nang. Sia pwarata me mwareiti I ren an efeiochu kich. Sipwe pwan pwapwa pwe sia apungano pwe sia nimoch ach sipwe angei feioch.

Anchangei pwe ami mi anneani ekkewe pukfel non ew sosoran me ewe Ngun a mwongungu ngenikemi pwe met oua anneani mi ennet. Ami mi tongeni tepereni ewe Ngun me mefi pwapwa iwe oua mefi An tong me oua nimoch pwe oupwe angei?

Ami kana inenap, ita oua fotupuku unukun noumi ruanu ierin nupwen an ani iotekin nepwin. Ew memmef mi ku kemi nupwen oua ausening. Oua mefi pwichikar me kinamwe. Ewe memmef mi chok moch, nge oua tepereni pwe ami, mo nom non ena atun, pungun nimenimoch pwe oupwe angei. Ese fan chomong, pwe sipwe, angei waten manaman mi pin non manauach; nge fan ekkoch sia tongeni rorongorong ekkewe mwongugu mi ngar an ewe Ngun mi Fel, iwe mi ennetata aucheach mi pin.

Ewe Samon a awewei nefinen aucheach me An we achasefan mi nap nupwen A apasa:

“Sipwe chechemeni pwe ngun a fokkun auchea fan mesan Kot;

Ewe Samon ach Chon Amanau a riafou ren manon inis me metekin aramas meinisin pwe aramas meinisin repwe tongeni aier o feito ren I.”⁹

Pwi kana, fan itan met I a fori fanitach, “sia fofo ngeni I ren tong.”¹⁰ I a apasa, “Semei a tinieito pwe upwe irapengesino won ewe irapenges; iwe mwirin ai ua fen irapengesino won ewe irapenges, pwe upwe tongeni amerato aramas meinisin ngeniei.”¹¹

King Benjamin a pwan awewengenikich ei fofofengen nefinach me ach Chon Amanau : “Iwe nengeni, i epwe engino ngeni sossot, me metekin inis, echik, kaka, me apwangapwang, pwan mwo nap seni met aramas repwe tongeni engino ngeni, tiwenon chok repwe mano ren; pun nengeni, cha a suk seni mononan meinisin, epwe fokkun napanap an riaffou.”¹² fan iten ach tipis. Ena riaffou me niwinin ena riaffou epwe aura netipach ren tong me kinisou. Elter Paul E. Koelliker a aitikich, “Nupwen sia wau ekkewe osukosuk mi weitikicheno ngeni fonufan me aea ach pungun finata pwe sipwe kuta I, sia suki netipach ngeni ewe manamanen nang mi amerakicheno ngeni I.”¹³ Ika ewe tong sia mefi ren ewe Samon me pwan met I a fori fan itach mi nap seni ach pochokun sia fangano ngeni apwangapwang, tipemwaramwar, are oreni mi ngau, iwe i epwe anisikich ach sipwe pworacho ngeni ekkewe mi eriafou non manauach. I a angasakicheno seni pwisin kich.

Upwe afatasefani: ika ewe sosotun fonufan a pochokun seni ach apinukunuk me nuku non ewe Chon Amanau , iwe sosotun fonufan epwe akufukich iteitan. Ika sia fini pwe sipwe chok ekkieki usun ach ekiekingau me ach tipemwaramwar, me sise kamwochunuk won ewe Chon Amanau, a pwan eweiresi kich ach sipwe mefi mongungun ewe Ngun mi Fel.

Pwi kana, sisap osukosuk rech ika kich ion! Inamwo a mecheres pwe sipwe chipwang ren ach souneng nap seni ach achocho ne chechemeni me amwochu aucheach me nang, sise tongeni etiwa ena sosotun fonufan non ekkei fansoun soponon. Amo kich fefin “sipwe nikitu non Kraist; … amwo Kraist epwe [chunakicheta], me amwo an riaffou me mano, … me an umoumoch me engino, me ewe apinukunukun an ning me manau esemuch, repwe nonnom non [ach ekiek] feinfeino chok.”¹⁴ usun an Ach chon Amanau chunakicheta won ewe chuk mi tekia, sia tongeni kuna ochu esap chok ita ren kich ion pwe sia pwan kan ngeni Ii nap seni met sia anchangei. Non itan Jises Kraist mi pin, amen.