Pwon mi Napanap me Auchea
An Semach won Nang we pwon mi naoanap pachenong ekkewe pwon mi pin, ekkewe annuk pwisin,
Ew weires napanap kich meinisin mi kuna iteitan ran pwe sisap mutata pwe ekkewe aurekin fonufan mi onnusumwani ach fansoun me pechekun pwe sia nikiti ekkewe mettoch ese much akon auchea.1 A men mecheres an epwe rukuno seni ach sipwe chechemeni me nennengeni wisach non pekin souleng fan itan chommomgun mettoch sia fori me fitikokon ach angang iteiten ran. Fan ekkoch sia sotuni ne awesano chommong mettoch nge sia nemenano met ewe sia angang ngeni me pwata sia achocho ngeni ach sipwe awesano.
Ewe Aposel Peter a achema ngenikich pwe noun Jises Kraist kewe chon kuno, “Pokiten an umoumoch mi napanap a ngeni kich meinisin non pekin manau me nikinikin Kot, me ren an ewe sinenap I ewe a kokori kich ngeni ning me nimenimoch:
“Non ei napanap a fen ngenikich ekkewe pwon mi napanap me auchea: iwe non ekkei oupwe angei ewe napanap mi pin, iwe oupwe tongeni su seni ewe feiengauan mochenia mi ngau won fonufan.”2
Ai ei afanafan a apechekuna auchean ekkewe pwon mi napanap me auchea Peter a achechema ngeni kich ia sipwene no ia non ei manau pwan pwata. Upwe pwan porous usun popun ewe ranin Sabbath, ewe tempel mi pin, me imwach pwe repwe anisikich ach sipwe chechemeni ekkei pwon mi pin me auchea.
U kan iotek pwe ewe Ngun mi Fel epwe aitikich meinisin non ach sia ekipwichi ekkei kapas mi ennet o auchea.
Nikinikich mi Pin
An Samach won Nang kokotun pwapwa mi nap mi fiti ekkewe nongonong, angang mi pin, me ekkewe pwon mi napanap o auchea mi fis pwe ach tufichin angei ewe nikinikin mi pin. An kokkot a awewe ngenikich ach nikinikin esemuch me ewe an ia sipwene fetan won ne kaeo, ekkesiwin, marita , me muchunon nom ren I feinfeno.
Usun a fen wewetiw me non “An ewe Famini: Esinesin ngeni ei Fonufan”:
“Meinisin aramas—mwan me fefin—mi för non nikinikin Kot. Emon me emon mi emon ngun mi achengicheng noun emon sam me in me won nang, me, usun chok, emon me emon a pusin wor fetanin napanapan me tufichin napanapan. …
“Non fansoun me mwen ei manau, ngunun at me nengin ra sinei me ra pin ngeni Kot pwe I Semer we Ese Much me ra etiwa An kokkot non minne Noun kewe semirit ra tongeni angei eu inis me kaeo me won ei fonufan me fefeita ngeni ar repwe unusoch me ra tongeni weri manau ese much.”3
Kot a pwon ngeni Noun kewe pwe ika ra apwonueta ekkewe nongonongun An kokkot me ewe minen apiru an Noun we Achengicheng, anneasochisi ekkewe annuk, me nikitu tori nesoponon, iwe fan itan an ewe Chon Angasano a Amanauakich, repwe weri i= manau ese much, ewe nifang napanap nein an Kot.”4 kewe nifang meinisin.
Upsefanin Ngun
Sia weweochuti ekkewe pwon mi napanap me auchea me sia poputa ne angei ewe nikinikin mi pin ren ach sia etiwa ewe koko an ewe Samon ngeni ning me nimenimoch. Usun met Peter a awewei, ren ei koko a pwonueta me non ach achocho ne su seni ewe feiengauan mochenia mi ngau won fonufan.
Ren ach sia nikitu netipetekison ren nuku non ewe Chon Amanau, iwe fan itan An Achasefan o me ren ewe manamanen ewe Ngun mi Fel, “minne a fis ew siwin watte non kich, are non netipach, iwe ese chiwen wor ach mochenin fori mi ngaw, nge sipwe sopweno ne fori mi och.”5 Sia “upusefan; ewer, uputiw me ren Kot, siwin seni ach ekiekin mochenin fonufan me ach nikinikin turutiw , ngeni ew nikinikin wenechar, repwe ngaseno me ren Kot.”6 “Nupwen emon epwe nonom non Kraist, iwe epwe ii emon mi sofo. Ewe minen nom a wesino, nge ewe minafo a wareto.”7
Ussun ew unusen ekesiwi non nikinikich napengeni ese chok mwitir fis ika fen fis chok fan ew. Usun chok ewe Chon Amanau a fori, sise angei unusan me akkomw, nge sia pwan angei ekis me ekis ewe chen.”8 “Pun nengeni, iei anon ewe Samon Kot: Upwe ngeni ekkewe noun aramas kinikinin kapas won kinikinin kapas, annuk won annuk, iei ekis me pwan ina ekis; iwe ra feioch ir ekkewe ra rongorongoch ngeni ai kewe annuk, me ausening ngeni ai aurour, pun repwe kaeo mirit.”9
Angangen pristut me pwon mi pin ra fokkun namwot non ei angangen upsefanin ngun; pwan ekkewe Kot a finata pwe sipwe angei An kewe pwon mi napanap o auchea. Angang mi pin sia angei non nimenimoch me chechemeni iteitan mi etufichikich minne ewe manamanen ewe nikinikin Kot mi tongeni pupunong non manauach. Pwon mi pin minne sia achifoua non nukuchar me chechemeni iteitan mi awora popun me apungunon ekkewe feioch non ei manau pwan non manau ese much.
Awewe chok, Kot mi pwon ngeni kich, anongonong won ach nukuchar, chiechien ewe aunumonun chon ewe Unumon non Kot, ewe Ngun mi Fel,10 pwe me ren ewe Achasefanin Jises Kraist sia tongeni angei o chemeni omusomusan ach kewe tipis fansoun meinisin,11 pwe sipwe kuna kinamwe me won ei fonufan,12 pwe ewe Chon Amanau a epichi seinin mano me a okufu ewe peias,13 me ekkewe famini ra tongeni nom fengen iei me non fansoun ese much.
Ewer sia tongeni weweiti, pwe sise tongeni anneani ika wesewesen weweiti meinisin ekkewe pwon mi napanap me auchea Samach won Nang mi fang ngeni Noun kewe. Nge, ikamwo ren chok ekkei fitu feioch mi pwon ua apworausa ngenikich repwe fis pwe sipwe “ur ren amwararan”14 me porotiw me pin ngeni ewe Sam”15 non itan Jises Kraist.
Chechemeni ekkewe Pwon
Preseten Lorenzo Snow a auroura ngenikich, “Sia mwitir ne nemenano popunapan manau, ina ewe popun Samach won Nang a tinakichetiw ikkei ach sipwe weri manau, me apwonueta ewe koko mi pin minne Kot mi kokori kich ngeni; me, iwe, ita ururun sise pworacho ngeni ekkewe kukun osukosuk … , nge napangeni sia pwisin mut ngenikich ach sipwe atekisonakich ngeni fonufan me sise angei ewe aninisin nang Kot mi awora, minne mi tongeni etufichikich ach sipwe pworacho ngeni [ekkewe osukosuk].”16
Ewe rannin Sabbath me ewe tempel mi pin ikei ekkei ru popunapan aninisin nang Kot mi awora fan itan repwe anisikich ach sipwe pwata seni weiresin me feingauan fonufan. Akkomwan usun sipwe ekkieki pwe popunapan ach pinini ewe ranin Sabbath me feino non tempel mi nom fan ew itenap nge mi sokkono. Nge ngang ua nuku pwe popun me auchean a chok nenne me ra angangfengen ne apechekunakich non pekin ngun ren emon me emon me non imwach kewe.
Ewe Ranin Sabbath
Mwirin an Kot a fori mettoch meinisin, A asoso non ewe efisuan ran me a annuku pwe ew ran iteitan wiik epwe fis pwe fansoun asoso pwe epwe anisi aramas ar repwe chechemeni I.17 Ewe ranin Sabbath ina an Kot fansoun, ew fansoun mi pin mi kefin ngeni ach sipwe pin ngeni I me chechemeni an kewe pwon mi napanap o auchea.
Ewe Samon mi annuku ekkewe Souleng non ei fansoun:
“Ewe Samon a annuku pwe iei ewe fansoun pwe sipwe anapano ach nimenimoch seni fonufan, iwe sipwe tonong non ewe imwen iotek me asorata ach sakramen non an ran mi pin;
“Ewe ranin Sabbath mi kefin pwe sipwe asoso seni ach angang, me asorata ach pin ngeni ewe Emon mi Tekia.”18
Iwe, non ewe ranin Sabbath sia pin ngeni ewe Sam fan itan ewe Nau ren ach fiti angang mi pin me kaeo usun, angei, chechemeni, me asofo sefanni pwon mi pin. Non an ran mi pin, ach ekiek, fofor, me napanap ir mi esinesin ngeni Kot me fis pwe pisekin pwaratan ach tong ngeni I.19
Kapach pwan ew popunen ewe ranin Sabbath pwe sipwe sacheta seni mettochun fonufan ngeni ekkewe feiochun manau ese much. Sia tou non ei fansoun mi pin seni ach kewe foforun manauach mi tawengau, me sia tongeni “nenengi Kot me manau”20 ren ach angei o chechemeni ekkewe pwon mi napanap me auchea minne sia tongeni angei ewe nikinikin mi pin.
Ewe Tempel mi Pin
Ewe Samon mi chok akkannuku ngeni Noun kewe pwe repwe kauta tempel, neni mi pin ia ekkewe Souleng mi nimoch repwe tongeni fori mokutukutun ewe kapas allim mi pin me angang mi pin fan asengesir pwisin me pwan fan asengesin ekkewe mi fen mano. Tempel ekkewe nenien pin mi napanap. Ew tempel mi wesewesen imwan ewe Samon, ew neni mi pin mi pwisin kefin fan itan ach pin ngeni Kot me angei me chechemeni An kewe pwon mi napanap o auchea.
Ewe Samon mi annuku ekkewe Souleng non ei fansoun, “Pwe repwe emwichafengeniir; amonnata mettoch meinisin mi namwot; me kauta ew imw, imwan iotek, ew imwen echikipin, ew imwen nuku , ew imwen kaeo, ew imwen ning, ew imwen tetenoch, ew imwen Kot.”21 Ewe nongonongun ach pin non tempel pwe sipwe fiti angang mi pin me kaeo usun, angei, me chehemeni pwon mi pin. Ach ekiek, fofor, me ufouf mi sokono me non ewe tempel seni pwan ekkoch neni sia nonnom non.
Ew popunapan ewe tempel pwe sipwe sacheta seni mettochun fonufan ngeni ekkewe feiochun manau ese much. Sia tou non ei fansoun mi kukun seni mwokutukutun fonufan sia oreni, sia tongeni “nenengi Kot me manau”22 ren ach angei me chechemeni an kewe pwon mi napanap me auchea minne sia tongeni angei ewe nikinikin mi pin.
Chechemeni pwe ewe ranin Sabbath me ewe tempel, ew me ew, ew fansoun mi pin me pwan ew neni mi pin mi pwisin kefin fan itan ach sipwe pin ngeni Kot me angei me chechemeni An kewe pwon mi napanap me auchea ngeni Noun kewe. Pun Kot mi awora, ekkewe popun mi auchean ekkei popunapen aninnis mi pin mi nonno chok: pwe repwe pechekun me anapano me awateno ach nengeni won Samach won Nang, Noun we Anaemon, ewe Ngun mi fel, me ekkewe pwonen feioch mi fiti ekkewe angang me pwon mi pin an ewe Chon Amanau kapas allim mi niwinsefan.
Imwach
Auchean, ew imw epwe chufengen ren fansoun me neni mi napanap ikkeweia aramas me famini ra chechemeni ochu an Kot kewe pwon mi napanap me auchea. Ach sipwe tou seni imwach ren ach sipwe nonnom non mwichen Raninfel me tonong non ewe neni mi pin ewe tempel mi namwot ngeni kich nge ese naf. Ren chok ach sipwe uwei ewe ngun me pechekun mi fiti ekkan fofor mi pin atun ach sia niwin ngeni imwach sia tongeni sopweino ach nenengeni ekkewe popunapan ei manau me pworacho ngeni ekkewe feiengauan fonufan. Iwe usun ach fansoun Sabbath me non tempel mi pisekin pwaratan ngun mi aurakich pwisin me ach famini me imwach ren achechemen met sia kaeo iteitan, ren nonnomun me manamanen ewe Ngun mi Fel, ren soponon me anononun ekkesiwin ngeni ewe Samon Jises Kraist, me ren “unusochun saramen apinukunuk”23 non an Kot kewe pwon ese much.
Ewe ranin sabath me ewe tempel ra tongeni anisikich ne fori non imwach “ew aan mi fokkun echipwer”24 ren ach sia “ochufengeni forian kewe meinisin non nang me won fonufan fan nemenien Kraist.”25 Met sia fori non imwach ren An fansoun mi pin me ren met sia kaeo non Nenian mi pin mi namwot pwe sipwe angei ewe nikinikin mi pin.
Pwon me Kapasen Pwarata
A mecheres pwe ekkewe foffor sia óreni me ekkewe osukosukan ei manau mi echipwang repwe okufukich. Annut, mongo, ufouf, angang, urumot, taiso, me chommong ekkewe mokutukutun iteitan ran mi namwot me auchea. Nge muchunon, met sia winiti a anongonong won ach sinei me tipew ngeni ach kaeo seni ewe Sam, ewe Nau, me ewe Ngun mi Fel; esap chok niwinin ach fofori iteitan ranin manauach.
Ewe kapas allim a fokkun aucheanap seni echo taropwe mi ateteni tichikin foforuch; nge, ina fen ew amwararen kokkotun ennet mi “foroch”26 me tete fengen, minan an epwe anisikich ach sipwe winiti usun Samach won Nang me ewe Samon Jises Kraist, ekkewe chon angei ewe nikinikin mi pin. Ennetin, sia chununo “ren osukosuk mi nusmwan”27 nupwen ei kapas ennet mi pin o napanap mi fatangaueno non mesach ren ekiekin, osukosukan, me chipwangan ewe fonufan.
Nupwen sia mirit me tingor ngeni ewe Ngun mi Fel epwe emwenikich,28 ua pwon pwe I epwe aitikich met mi pung. “I epwe pwarata usun Kraist, me asarama ach ekiek ren kunon ngang”29 ren ach sia achocho ne apwonueta popun manauach ese much me angei ewe nikinikin mi pin.
Ua pwarata pwe ekkewe pwon mi napanap o auchea mi fiti ach kewe angang me pwon mi pin ir mi fat. The Lord has so declared:
Ua ngeni kemi kapasen emwen ren epwe ifa usun om kopwe mwokutukut fan mesei, pwe epwe emwenuk ngeni manau ese much.
“Ngang, ewe Samon, ua kapas nupwen kopwe fori met ua apasa; nge nupwe kose fori met ua apasa, iwe ese wo rai pwon ngonuk.”30
Ua pwarata pwe Samach won Nang mi manau me I ewe chon fori ewe kokkotun manau ese much. Jises Kraist i Noun we Anaemon, ach Chon Angasano me Chon Amanau. Mi manau. Me ua pwarata pwe an ewe Sam kokkot me pwon, an ewe Chon Amanau Achasefan, me chiechin ewe ngun mi fel mi etufichi “kinamwe non ei fonufan me manau ese much non ewe fonufan epwe feito.”31 Ren ekkei ua pwarata non itan mi pin ewe Samon Jises Kraist, amen.