Oupwe Tong Fengen. Ussun Chok Ngang Ua Tongei Kemi

“Tong mi eu memmefin chen, etenek me achengicheng. Ewe Achesefanin Jises Kraist ena eu awewe ussun an Kot tong fan iten Noun kewe aramas.”² “Pun God a fakkun tongei chon fonufan,” John a makei, “ina minne a fangeno Noun we anamon, pun iteiten arams mi nuku i resap mano nge repwe kuna manau ese much.”³ “An emon tongen Kot me aramas ena eu napanapen emon noun Jises Kraist kewe chon kaeo.”⁴

Fitu ier me nom, nupwen noun nei we mwanichi, Jose, a ruanu ierin, a urumot ren punuei. Nupwen ra takier me urumot fengen, noun noum we a kapas eis ngeni, “Mama chi, en mi tongeiei?”

A punueni, “Ewer, Jose, ua tongek.”

Iwe a pwan kapas eis: “Ifa usun ka sinei pwe ka tongeiei?”

A awewe mefian me a pwan aporausa mettoch meinisin a fen fori fan itan me met epwe fori fan itan.

Mwirin punuei a pwan ani ewe chok kapas eis ngeni Jose, pwan fiti ei kaps eis: “Ifa usun ka sinei pwe ka tongeiei?”

A punueni ren nimenimoch, a apasa, “ua tongek pun ua mefi non netipei.” An Jose angangen tong ngeni inan chinap won ena ran me fansoun meinisin a pwarata pwe tong mi foffor fiti memmef mi anonnon.

King Benjamin a aiti pwe, “Iwe nengeni, ua erenikemi ekkei mettoch pwe oupwe tongeni kaeo mirit; pwe oupwe tongeni kaeo pwe nupwen oua angang ngeni chiechiemi aramas oua chok angang ngeni ami Kot.”⁵

Non ei fonufan mi uren riafou fan itan  chommong mettoch, ach tinano eu text ren och niosun mesen emon mi emenimen are ach pacheta och sasing fiti ekkewe kapas “Ua tongek” mi och me auchea. Nge mi auchea pwe chommong me neich sipwe nikitano ach kewe fon em ren pouch me pechach, sipwe anisi ekkewe mi osupwang. Ika tong ese fiti angang a usun nuku ese fiti fofor; a ennetin mano.

Ewe ennetin tongen Kraist, minne tong ennet,⁶ ese chok amokutu kich ach sipwe foffor me angang nge a pwan awora pochokun ach sipwe omusomus, ese nifinifin met a fis. Upwe aporausa och mettoch a efeiochu me siwini manauei. Ted me Sharon, ir seman me inan Cooper, me ir mi pwan nom iei, ra mut ngeniei ai upwe aporausa met a fis ngeni nour famini tiw ier me nom. Upwe aporausa met a fis seni met Ted, seman Cooper a kuna:

August 21, 2008, ena ewe aewin ranin sukun, me unumon pwin Cooper mi watte, Ivan, Garret, me Logan, ir ra witi war bus. Cooper mi chok ruanu ierin, me a wani wan pisiken; punuei, Sharon, a chok fetan.

Punuei a nom won epekin ewe aan me a ereni Cooper an epwe feito. Non ewe chok fansoun, efoch taraku ese mwitir a kun me a ku Cooper.

Ua angei eu kokko seni emon chienan a apasa pwe efoch taraku a ku Cooper. Ua mwitir sai ngeni ewe nenien bus ai upwe kuna i. Cooper a kokon won ewe fetin, a osuosuk an ngasangas, nge use kuna feingau.

Ua fotupukutiw unukun Cooper me ua apasa kapasen pesepes usun “Epwe och. Kopwe pochokun.” Non ena fansoun emon souemwenin pris mi nap, itan Nathan, a pwa ren punuan. Punuan a era am aupwe efeiochu Cooper ren ewe pristut. Aua eseta poum won mokuran Cooper. Use chechemeni met ua apasa non ewe efeioch, nge ua ennetin chechemeni ekkewe aramas unukum, me non ena fansoun ua sinei pwe Cooper epwe mano.

Cooper a fiti enikapter ngeni ewe piowing nge, ennet, a mano. Ua mefi pwe Semei won Nang a ereniei pwe ai fansounen tumunu Cooper won fonufan a wes mi iei Epwe wisin tumunu i.

Non ewe piowing am aua tufichin nonnom ren Cooper. Ekkewe chon puing ra ammonata i am aupwe tufichin komoch i me apasa am kapasen feino me ra mut ngeni kem am aupwe nonnom ren i me komoch i, ukkun met aua mochen.

Non am niwiniti imwen, punuei mi urun netipengau, me ngang am aua nennefengen me poputa ne kakapas usun ewe at a wisen wawa ewe taraku. Ause sinei i, inamo pwe ese nom touau me a nom non am wart.

Ewe ran mwirin me fakkun weires fan iten nupwen am meinisin mi uren netipengau. Ua fotupukutiw me iotek eu iotek mi kon ennet napseni ua fen fori me nom. Ua tingorei Semei won Nang non iten ai Chon Amanau an epwe angei seniei ai netipengau. I a fori.

Mwirin won ena ran emon chon aninis seni am presetenin steik a efisata eu mwich pwe am aupwe chufengen ren ewe at—ewe chon wawa ewe taraku—me inan me seman non imwan. Ngang me Sharon am aua witiwit pwe ewe at me seman me inan repwe war. Nupwen ewe asam a suk, ina atun aua keran kunaer. Ai we pisop a apasa ngenei, “Feino ngeni i.” Ngang me Sharon aua turufi i fengen. Aua kechu fengen ren fansoun nangatam. Aua ereni i pwe aua sinei met a fis mi eniseringau.

Mi amwarar ngeniei me Sharon, pwe aua mefi met aua mefi me met aua chuwen mefi. Ren an Kot umoumoch, aua tongeni fiti ewe aan mi nap, ewe aan mi och, ewe chok aan, me tongei ai anuon mi murrino.

Am aua ennetin chiechi ngeni ei at me an famini non ekkewe ier. Am aua fiti i non ekkewe mettoch mi auchea non manauan. Aua pwan fiti i ngeni ewe tempel nupwen a ammonata ngeni an angangen misineri.⁷

Pwi me fefinei, Ted a ennetin sinei pwe Semach won Nang a tongeikich. A sinei pwe ach tufichin in omusa emon, me awesano an chou non ei napanap, mi ngar usun chok ach pwisin angei omusomus. Ei ngar a feito seni ach appiru ach Nenien Appiru mi nap. Non ewe Puken Mormon, Alma a apasa ekkei mettoch usun ewe Chon Amanau: “Iwe i epwe feino, epwe engino ngeni metek me riaffou me sokopaten sossot meinisin; iwe ei epwe fis pwe ewe kapas epwe tongeni pwonueta minne ra fen apasa pwe i epwe wata won inisin ekkewe metek me semwenin noun kewe aramas.”⁸

Pwi me fefinei, ei porausen ennetin tong me omusomus mi amwarar. Kich, usun chok, mi pwan tongeni angei pwapwa nupwen sia angang ngeni me omusa aramas. Georgy, pwan emon noun nei we, a sou apasa, “Kich mi met sokkun famini?” Me a ponueni, “Kich mi eu famini mi pwapwa!”

Preseten Thomas  S. Monson a pesei ngeni kich, ren an apasa: “Sipwe nenengeni manauach me finata ach sipwe tapweno mwirin an ewe Chon Amanau nenien appiru ren ach sipwe kirokiroch, uren tong, me tong ennet.”⁹

Ua sinei pwe Semach won Nang me Noun we, Jises Kraist, ra tongei kich me ra mochen anisikich ach sipwe foffor nupwen sia tong fengen usun Ra tongei kich. Me ua sinei pwe ren ach angang ngeni me omusa aramas ren ennetin tong, sipwe chikar me angei pochokun. Me ua apasa ekkei mettoch fan iten Jises Kraist, amen.