Kuna an ewe Samon Nukunuk me an Om Famini Nukunuk
Mwan ien mei wor “unusech non manawer” iir mwan sipwe nuku—pwe nuku a for won unusech.
Pwii kana, meni esap wor ew kapasen sufon sipwe angei me ren ewe Samon nukun ach sinei pwe a nuku pwe sipwe chon uwei ewe pristut mi tupwon me sam me pupunu mi murinno.
Ew mettoch mi fat: ach kuna an ewe Samon nukunuk mi ew feioch a feito ren ach ennetin achocho. Nukunuk ina ew feioch mi nongonong won ach anneasochis. Ach kuna an ewe Samon nuku a feito seni ach apwonueta ach pwon mi pin sia fori konikin papatais me non ewe tempel mi pin. Ika sia apwonueta ach kewe pwon ngeni ewe Samon, an nuku non kich a feita.
Ua tongei kewe wokisin non pukefel minen noom me minen ikenai mei wor ewe kapas “wenecharen netip” nupwen a awewe nikinin emon mi tupwon.1 Wenechar ika ese wenechar a nom nukanapan nikinikin emon. Mwan ir mi “wenecharen netiper” sia nuku ir—pun nuku a nongonong won wenechar. Iwe, ika sia mochen an ewe Samon nuku kich, sipwe achocho ne weweiti ei nongonong me manuaeni.
Ren emon mwan mi wenechar wewen om mochen, me om foffor, mi nimoch me tupwon non unusan manauom, mwen aramas pwan non monomon. Ren finiach meinisin, sia anapano an Kot nukukich ika kukununo. Ei mettoch mi fat ren wisach mi pin ren sam me pupunu.
Ren sam me pupunu, sia angei pesepes mi pin seni nouch soufosun ikenai, soun kuna, me soun pwarata non ewe taropwe itan “Ewe Famini: Ew Esinesin ngeni Fonufan.” Ei taropwe a aitkich(1) “ekkewe sam repwe wisen nemeni ar kewe famini non tong me wenewen,” (2) Sam “ra wisen awora met mi namot ren manau;” me (3) ekkewe sam repwe wisen tumunu ar kewe famini.2
Ika sipwe kuna an Kot nuku, sipwe apwonueta ekkei unungat wisach mi pin ngeni ach famini non napanapan an ach Samon fofor. Usun mi pwan mak non ewe esinesinen famini, napanapan foforun ewe Samon sia apwonueta ekkei wis ren punuach “pwe ir mi chok nonnofengen. 3Me rei, wewen pwe sise finata mettoch mi auchea non pekin ekkei wis ika sise tipeu fengen ren punuach.
Ewe aewin kinikinen ach sai pwe sipwe kuna an ewe Samon nukunuk pwe sipwe akkom nuku non I. Ewe soufos Nifai a pwarata usun ei sokkun achocho non an iotek: “O Samon, ua fen apinukunuk non en, iwe upwe wanong ai apinukunuk non en tori feinfeino chok. Usap tongeni pungutiw ai we apinukunuk non poun futuk.” 4 Nifai a ennetin achocho ngeni netipan ewe Samon. Fiti an apasapwe epwe “fori ekkewe mettoch ewe Samon a annuku,” Nifai a pwan tiniken non an achocho neforiwisan, mi esinepato ren an apasa: “Usun ewe Samon mi manau, me usun kich mi manau, sisap feitiw ngeni samach we non ewe fonu pon tori ach sipwe apwonueta ekkewe mettoch minne ewe Samon a annuku ngenikich.” .”5
Pun Nifai akaewin a nuku non Kot, Kot a pwan nuku non Nifai. Ewe Samon a efeiochu i ren ewe Ngun mi Fel minne a efeiochu manauan, manauan an famini, me manauan noun kewe aramas. Pokiten Nifai a emwenir ren tong me wenechar me a tumunuochu an famini me noun aramas, a makkei, “aua nonnom non ewe napanapen pwapwa.” 6
Ren ai upwe pwan awewe an emon fefin ekiek ren ei poraus, ua tingorei nei kewe nengin ra pupunu repwe anisiei. Ua eis ika repwe ereniei ew ika ru mettoch usun met ra ekkieki ren auchean nukunuk me non ar apupunu me non ar famini. Iei ekiekin nei kewe Lara Harris me Christina Hansen.
Aewin, Lara: “Ew mettoch mi kan auchea ngeniei pwe ua sinei pwe nupwen punuei a an angang itetan ran, i mi finata ekkewe mettoch mi pwarata an sufon me tong ngeniei. Ika sia nukufengenikem non ei napanap, mi awora kinamwe non imwach, ikkeweia sia pwapwa fengen ne tumunu am famini fengen.”
Iei anon Christina: “Nuku non emon mi fakkun auchea. Ika ese wor nuku, a wor niuokus me tipemwaremwar. Me rei, ew ekkewe feioch mi nap a feito seni ai ua tongeni nuku non punuei mi kinamwe—ewe kinamwen ekiek pwe I a fori met a apasa epwe fori. Nuku a awora kinamwe, tong, me ew neni ia tong a watteno ia.
Lara me Christina rese kuna met ewe emon a fen makei. A men amairu pwe ir me ruemon ra pwisin ekkieki usun ewe feiochun kinamwe non imwer a nongonong won ar repwe tufichin nuku non punuer. Usun ren met anon nei kewe mi afata, sia sinei pwe nuku mi fakkun auchea non ach sipwe kauta imwach won nongonongen Kraist.
Ua pwan pwapwa ne tongeni kuna ena sokkun nongonong won Kraist non imwei ikkeweia semei a sufoniti an pristut me a angei an unusan ewe famini nuku pokiten “ewe wenechar non neitpan.” 7 Upwe pwan apasa ew porausen nekukkuni mi aitikich usun nomotaman feioch minne emon sam mi weweiti me manaueni ewe nongonongen nuku mi kauta won wenechar mei tongeni awora ngeni an famini.
Nupwen ngang mi chok kukkun, semei a poputani an angang mi kan fori mwasinin angang. Ei angang a mina me wanong mwasinin angang non unusan fonufan.
Nupwen uwa nomw non mitten skun, semei a mochen pwe upwe kaeo angang. A pwan mochen pwe upwe kaeo ngeni ewe pisnis seni pwopwutan tori a wateno. Aewin ai sekining pwe upwe otot me peinitii kewe kinikin won ewe imw ewe pwau ngeni aramas.
Nupwen ua poputa ai fiti aiskun, ua sekita upwe angang non nenian ekkewe chon for. Ua poputa ne kaeo ifa usun upwe aneani ekkewe taropwen kokkot me aea ekkewe mwasinin for mecha. Mwirin ai sochungio seni aiskun, ua fiti unefersiti me poputa ai angangen misineri. Mwirin ua niwin me misineri, ua pwan niwiniti ai angang. Mi namwot upwe kut nei moni ngeni ai upwe no sukun.
Ew ran mwirin ua wes me misineri, ua angang non ewe nenien angang nupwen semei a koriei ngeni an we ofes me tingorei ika upwe sani pwe upwe fiti won an saien angang ngeni Los Angeles. Iei semei a keran tingorei upwe fiti won saien angang. I a mochen upwe tupunifetannei an pisnis.
Mwen aua sai, a ammonaeita ren ekis poraus usun ei chon kamo aupwe churi. Aewin, ewe chon kamo ir ew pisnis mi nom ekis meinisin. Oruan, ir mi mochen aochuno ar kewe mwasin non ar kewe nenienangang for pwe repwe nipwakoch. Aunungatin, am ause mo anisir ren ar kewe mwasin tori ikenai. Me saingon, ewe meinap mi wisen moni mettoch a korikemito pwe aupwe poraus won niwinin ar kewe minafen prochek. Ei mwich a awora ew tufich mi nafo me auchea ngeni am we pisnis.
Mwirin aua tori Los Angeles, am me semei aua no churi ewe meinap non an we hotel. Aewin mettoch pwe aupwe poraus usun tichikin nikinikin ekkewe mwasin ita repwe moni. Oruan am poraus usun ewe kokkot, pekin postal me ranin ekkewe mwasin repwe war. Me saingon aua pworaus won fite niwinin ekkewe mwasin, tetenin am etipew, me pungun am aua angang fengen. Iei atun ua ekis mairu ren ekkewe poraus.
Ei meinap a awewe ngenikem pwe niwinin am kokkkotun amomo a kukkun seni ekkewe pwan ekkoch ra mochen amomo pisekir. Mwirin, mairun, i a pwari aukukkun ewe kokkkotun amomon ewe mi ekkis akomwen aua wanong am kokkkot. I a tingor ika aua mochen forsefani am kokkkotun amomo me eniwinanong. A mochen pwe niwin epwe kanengeni aukukun ewe pwan ew kokkotun amomo. A awewe pwe epewe aimuni mon ewe minen nom me ewe minafo me epwe ineti esap ngenikem me esap ngeni i. A apungano an kokkkot ren an apasa pwe meinisin repwe win. Am aupwe win pun epwe awatteno niwinim pun a watte seni ewe kokkkot akkomw. An we pisinis epwe win pun repwe moni me ren ewe mi akota pwe kukkun. Me, ewer, i a pwisin win pun a angei pwisin niwinin fan iten i a wisan for ei etipew.
A ngenikem ew porun postal ia aupwe tinano noun moni me ia. Mwirin unusan ewe poraus, a nengeni semei me eisini, “Sia tipeu fengen?” Ua mairu, me semei a uta, kapong ngeni, me ereni pwe aupwap ponueni.
Mwirin aua no seni ewe mwich, aua tota wamewe, me semei a kunu ngeni me eisiniei, “Iwe, met ka ekieki sipwene fori?”
Ua ponueni ren ai use nuku pwe aupwe tipeu ren met a mochen
Semei a eis, “Kese ekieki pwe mei wor ach sekening ngeni nouch kewe chon angang ne awora nafochun angang ngeniir?”
Nupwen ua ekieki usun an kapas eis o me mwen upwe ponueni, a ponueni an pwisin kapas eis. A apasa, “Ausening, Rick, ika ka tipeu ren an emon tingorun mwaken ika amomono om wenechar, mi fakkun weires kopwe angeisefanni. Kete fori, esap fan ew chok.”
Popun ua awewe met a fis pun use mo monukano met semei a aitiei won ena akkaewin saien am angang. Ua awewe met a fis ne pwarata aukukkun pochokkun mi nom rech kich sam. Oua tongeni kuna ai ua nukunuk non semei pokiten ewe wenechar non netipan. A manaueni ekkewe nongonong non manauan ren inei, noun kewe, pwan meinisin a churi.
Pwii kana, ai iotek non ei pwinin pwe sipwe akkom nuku non ewe Samon, usun Nifai a pwarata, pwe ren wenechar non netipach ewe Samon epwe pwan nuku Kich, me pwan punuach me nouch kewe. Ika sipwe weweiti me manueni ei nongonongen nuku mi kau won wenechar, sipwe wenechar ngeni ach pwon mi pin. Sipwe pwan sopweochu non emwenien ach famini non tong me fofforoch, awora met mi namwot ngeni manau, me tumunuochu ach famini seni ngauen ei fonufan. Usun ekkei mettoch ua pwarata non iten Jises Kraist, amen.