ການໄດ້ຮັບຄວາມໄວ້ວາງໃຈຈາກພຣະຜູ້ເປັນເຈົ້າ ແລະ ຄອບຄົວຂອງທ່ານ
ບັນດາຜູ້ຊາຍທີ່ມີ “ຄວາມຊື່ສັດຂອງໃຈ” ຄືຜູ້ຊາຍທີ່ໜ້າໄວ້ວາງໃຈໄດ້—ເພາະວ່າຄວາມໄວ້ວາງໃຈນັ້ນ ຖືກສ້າງຂຶ້ນ ເທິງຄວາມຊື່ສັດ.
ອ້າຍນ້ອງທັງຫລາຍ, ບາງທີອາດຈະບໍ່ມີການຊົມເຊີຍຍິ່ງໃຫຍ່ໃດໆ ທີ່ເຮົາໄດ້ຮັບຈາກພຣະຜູ້ເປັນເຈົ້າ ຫລາຍໄປກວ່າ ທີ່ຈະຮູ້ວ່າ ພຣະອົງໄວ້ວາງພຣະໄທໃນຕົວເຮົາ ວ່າເປັນຜູ້ດຳລົງຖານະປະໂລຫິດທີ່ມີຄ່າຄວນ ແລະ ເປັນສາມີ ແລະ ພໍ່ທີ່ດີ.
ສິ່ງໜຶ່ງທີ່ແນ່ນອນຄື: ການໄດ້ຮັບຄວາມໄວ້ວາງໃຈຈາກພຣະຜູ້ເປັນເຈົ້ານັ້ນ ເປັນພອນທີ່ມາຈາກ ຄວາມພະຍາຍາມ ຢ່າງພາກພຽນທີ່ສຸດຂອງເຮົາ. ຄວາມໄວ້ວາງໃຈເປັນພອນ ທີ່ອີງຕາມຄວາມເຊື່ອຟັງຕໍ່ກົດຂອງພຣະເຈົ້າ. ການໄດ້ຮັບຄວາມໄວ້ວາງໃຈຈາກພຣະຜູ້ເປັນເຈົ້າຈະມີມາ ເພາະເປັນຜົນຂອງການເປັນຄົນຈິງໃຈ ຕໍ່ພັນທະສັນຍາ ທີ່ເຮົາໄດ້ເຮັດຢູ່ໃນອ່າງນ້ຳແຫ່ງການບັບຕິສະມາ ແລະ ໃນພຣະວິຫານສັກສິດ. ເມື່ອເຮົາຮັກສາຄຳສັນຍາຂອງເຮົາ ທີ່ເຮັດກັບພຣະຜູ້ເປັນເຈົ້າ, ຄວາມໄວ້ວາງພຣະໄທຂອງພຣະອົງ ທີ່ມີໃນເຮົາຈະເພີ່ມທະວີຂຶ້ນ.
ຂ້າພະເຈົ້າມັກພຣະຄຳພີທັງໃນສະໄໝບູຮານ ແລະ ຍຸກສະໄໝໃໝ່ ທີ່ໃຊ້ສຳນວນທີ່ວ່າ “ຄວາມຊື່ສັດຂອງໃຈ” ເມື່ອບັນຍາຍເຖິງບຸກຄະລິກລັກສະນະຂອງຜູ້ຄົນທີ່ຊອບທຳ.1 ຄວາມຊື່ສັດ ຫລື ການຂາດຄວາມຊື່ສັດ ເປັນແກ່ນສານພື້ນຖານຂອງບຸກຄະລິກລັກສະນະຂອງຄົນເຮົາ. ບັນດາຜູ້ຊາຍທີ່ມີ “ຄວາມຊື່ສັດຂອງໃຈ” ຄືຜູ້ຊາຍທີ່ໜ້າໄວ້ວາງໃຈໄດ້—ເພາະວ່າຄວາມໄວ້ວາງໃຈນັ້ນ ຖືກສ້າງຂຶ້ນ ເທິງຄວາມຊື່ສັດ.
ການເປັນຜູ້ຊາຍທີ່ມີຄວາມຊື່ສັດໝາຍຄວາມວ່າ ຄວາມເຈດຕະນາຂອງທ່ານ, ພ້ອມທັງການກະທຳຂອງທ່ານນັ້ນແມ່ນ ບໍລິສຸດ ແລະ ຊອບທຳໃນທຸກໆດ້ານຂອງຊີວິດຂອງທ່ານ, ທັງໃນຊີວິດທາງສັງຄົມ ແລະ ສ່ວນຕົວ. ດ້ວຍການຕັດສິນໃຈແຕ່ລະຢ່າງທີ່ເຮົາເຮັດ, ເຮົາຈະໄດ້ຮັບຄວາມໄວ້ວາງໃຈຈາກພຣະເຈົ້າຫລາຍຂຶ້ນ ຫລື ວ່າຄວາມໄວ້ວາງໃຈຈາກພຣະອົງຈະລົດນ້ອຍຖອຍລົງໄປ. ຫລັກທຳນີ້ອາດຖືກສະແດງອອກໃຫ້ປະຈັກຢ່າງແຈ້ງຊັດ ໃນໜ້າທີ່ມອບໝາຍທີ່ສູງສົ່ງຂອງເຮົາ ໃນຖານະທີ່ເປັນສາມີ ແລະ ພໍ່.
ໃນຖານະທີ່ເປັນສາມີ ແລະ ພໍ່, ເຮົາໄດ້ຮັບໜ້າທີ່ມອບໝາຍອັນສູງສົ່ງຈາກສາດສະດາ, ຜູ້ພະຍາກອນ ແລະ ຜູ້ເປີດເຜີຍໃນຍຸກສະໄໝໃໝ່ ຢູ່ໃນເອກະສານທີ່ມີຊື່ວ່າ “ຄອບຄົວ: ການປະກາດຕໍ່ໂລກ.” ເອກະສານສະບັບນີ້ສອນເຮົາວ່າ, (1) “ເປັນຜູ້ນຳພາຄອບຄົວຂອງຕົນດ້ວຍຄວາມຮັກ ແລະ ດ້ວຍຄວາມຊອບທຳ,” (2) ພໍ່ “ມີໜ້າທີ່ຮັບຜິດຊອບທີ່ຈະຈັດຫາສິ່ງທີ່ຈຳເປັນຕ່າງໆ,” ແລະ (3) ພໍ່ມີໜ້າທີ່ຮັບຜິດຊອບທີ່ຈະປົກປັກຮັກສາຄອບຄົວຂອງຕົນ.2
ເພື່ອວ່າເຮົາຈະໄດ້ຮັບຄວາມໄວ້ວາງໃຈຈາກພຣະເຈົ້າ, ເຮົາຕ້ອງສຳເລັດໜ້າທີ່ຮັບຜິດຊອບທີ່ໄດ້ຮັບມອບໝາຍສາມຢ່າງ ຕໍ່ຄອບຄົວຂອງເຮົາໃນວິທີທາງຂອງພຣະຜູ້ເປັນເຈົ້າ. ຕາມທີ່ໄດ້ກ່າວຕໍ່ໄປຢູ່ໃນເອກະສານ ປະກາດກ່ຽວກັບຄອບຄົວ, ວິທີທາງຂອງພຣະຜູ້ເປັນເຈົ້າຄື ທີ່ຈະບັນລຸໜ້າທີ່ມອບໝາຍເຫລົ່ານີ້ ກັບພັນລະຍາຂອງເຮົາ ໃນຖານະ ຫຸ້ນສ່ວນທີ່ເທົ່າທຽມກັນ.”3 ສຳລັບຂ້າພະເຈົ້າ, ນີ້ໝາຍຄວາມວ່າເຮົາຈະບໍ່ຕັດສິນໃຈເຮັດທີ່ສຳຄັນໃດໆ ກ່ຽວກັບໜ້າທີ່ຮັບຜິດຊອບ ສາມຢ່າງນີ້ ປາດສະຈາກການເປັນນ້ຳໜຶ່ງໃຈດຽວທັງໝົດກັບພັນລະຍາຂອງເຮົາ.
ຂັ້ນຕອນທຳອິດໃນການສະແຫວງຫາຂອງເຮົາ ທີ່ຈະໄດ້ຮັບຄວາມໄວ້ວາງໃຈຈາກພຣະຜູ້ເປັນເຈົ້າ ແມ່ນທີ່ຈະວາງຄວາມໄວ້ວາງໃຈຂອງເຮົາໄວ້ໃນພຣະອົງ. ນີໄຟເປັນພະຍານອີກຄົນໜຶ່ງເມື່ອເພິ່ນໄດ້ປະກາດວ່າ, “ໂອ້ ພຣະອົງເຈົ້າເອີຍ, ຂ້ານ້ອຍໄວ້ວາງໃຈໃນພຣະອົງ, ແລະ ຂ້ານ້ອຍຈະໄວ້ວາງໃຈໃນພຣະອົງຕະຫລອດໄປ.” ຂ້ານ້ອຍຈະບໍ່ວາງຄວາມໄວ້ວາງໃຈຂອງຂ້ານ້ອຍໄວ້ໃນແຂນຂອງມະນຸດ.”4 ນີໄຟໄດ້ໃຫ້ຄຳໝັ້ນສັນຍາຢ່າງເຕັມທີ່ ທີ່ຈະເຮັດຕາມພຣະປະສົງຂອງພຣະຜູ້ເປັນເຈົ້າ. ນອກເໜືອໄປຈາກ ການເວົ້າ ວ່າເພິ່ນຈະ “ເຮັດສິ່ງທີ່ພຣະຜູ້ເປັນເຈົ້າໄດ້ບັນຊາ,” ແລ້ວ ນີໄຟ ກໍແນ່ວແນ່ບໍ່ຫວັ່ນໄຫວຕໍ່ຄຳໝັ້ນສັນຍາຂອງເພິ່ນທີ່ຈະ ສຳເລັດ ການມອບໝາຍຂອງເພິ່ນ ຕາມທີ່ຖືກສະແດງໃຫ້ເຫັນຢູ່ໃນຖ້ອຍຄຳນີ້ວ່າ: “ຕາບໃດທີ່ພຣະຜູ້ເປັນເຈົ້າຊົງພຣະຊົນຢູ່ ແລະ ຕາບໃດທີ່ພວກເຮົາຍັງມີຊີວິດຢູ່, ພວກເຮົາຈະບໍ່ລົງໄປຫາບິດາຂອງພວກເຮົາໃນຖິ່ນແຫ້ງແລ້ງກັນດານ ຈົນກວ່າຈະສຳເລັດໃນສິ່ງທີ່ພຣະຜູ້ເປັນເຈົ້າບັນຊາພວກເຮົາ.”5
ເປັນເພາະນີໄຟໄດ້ໄວ້ວາງໃຈໃນພຣະເຈົ້າກ່ອນ, ແລ້ວພຣະເຈົ້າຈຶ່ງໄດ້ໄວ້ວາງພຣະໄທໃນນີໄຟ. ພຣະຜູ້ເປັນເຈົ້າໄດ້ປະທານພອນໃຫ້ເພິ່ນດ້ວຍການຖອກເທພຣະວິນຍານຢ່າງຫລວງຫລາຍລົງມາ ທີ່ໄດ້ເປັນພອນໃຫ້ແກ່ຊີວິດຂອງເພິ່ນ, ຄອບຄົວຂອງເພິ່ນ, ແລະ ຊີວິດຂອງຜູ້ຄົນຂອງເພິ່ນ. ເປັນເພາະນີໄຟໄດ້ນຳພາດ້ວຍຄວາມຮັກ ແລະ ຄວາມຊອບທຳ ແລະ ໄດ້ຈັດຫາໃຫ້ ແລະ ປົກປັກຮັກສາຄອບຄົວ ແລະ ຜູ້ຄົນຂອງເພິ່ນ, ເພິ່ນບັນທຶກໄວ້ວ່າ, ”ພວກເຮົາມີຊີວິດຢູ່ຕາມທາງແຫ່ງຄວາມສຸກ.6
ເພື່ອຈະໄດ້ເປັນຕົວແທນທັດສະນະຂອງຜູ້ຍິງໃນຫົວຂໍ້ນີ້, ຂ້າພະເຈົ້າໄດ້ຖາມລູກສາວຂອງຂ້າພະເຈົ້າ ຜູ້ແຕ່ງງານແລ້ວສອງຄົນ ຂ້າພະເຈົ້າໄດ້ຖາມ ຖ້າຫາກວ່າເຂົາເຈົ້າຈະໃຫ້ຄຳຕອບຈັກໜຶ່ງ ຫລື ສອງປະໂຫຍກ ວ່າຄວາມສຳຄັນຂອງຄວາມໄວ້ວາງໃຈ ມີຜົນກະທົບແນວໃດໃນຊີວິດແຕ່ງງານ ແລະ ຄອບຄົວຂອງເຂົາເຈົ້າ. ຕໍ່ໄປນີ້ຄືຄວາມຄິດເຫັນຂອງ ນາງລາຣາ ແຮວຣິສ ແລະ ນາງ ຄຣິດສະຕີນ້າ ແຮນເຊັນ.
ທຳອິດ, ນາງລາຣາ ກ່າວວ່າ: “ໜຶ່ງໃນສິ່ງທີ່ສຳຄັນທີ່ສຸດສຳລັບລູກແລ້ວຄື ຂະນະທີ່ສາມີຂອງລູກດຳລົງຊີວິດປະຈຳວັນຂອງລາວ, ລາວເລືອກເຮັດສິ່ງທີ່ສະແດງຄວາມເຄົາລົບ ແລະ ຄວາມຮັກທີ່ມີຕໍ່ລູກ. ເມື່ອພວກເຮົາສາມາດໄວ້ວາງໃຈກັນແລະກັນໃນວິທີທາງນີ້, ມັນຈະນຳຄວາມສະຫງົບມາສູ່ບ້ານເຮືອນຂອງພວກເຮົາ, ບ່ອນທີ່ພວກເຮົາສາມາດມີຄວາມຊື່ນຊົມນຳການລ້ຽງດູຄອບຄົວຂອງພວກເຮົານຳກັນ.”
ຕໍ່ໄປນີ້ຄືຄວາມຄິດເຫັນຂອງນາງຄຣິດສະຕີນ້າ: “ການມີຄວາມໄວ້ວາງໃຈໃນຄົນໃດຄົນໜຶ່ງ ກໍຄ້າຍຄືກັນກັບ ການມີສັດທາໃນຕົວຄົນນັ້ນ. ປາດສະຈາກຄວາມໄວ້ວາງໃຈ ແລະ ສັດທານັ້ນ, ຈະມີແຕ່ຄວາມຢ້ານກົວ ແລະ ຄວາມສົງໃສ. ສຳລັບລູກແລ້ວ, ພອນທີ່ຍິ່ງໃຫຍ່ຢ່າງໜຶ່ງທີ່ມາຈາກຄວາມສາມາດໄວ້ວາງໃຈສາມີຂອງລູກຢ່າງເຕັມທີ່ ຄື ຄວາມສະຫງົບສຸກ—ຄວາມສະຫງົບທາງຈິດໃຈ ເພາະຮູ້ວ່າລາວເຮັດໃນສິ່ງທີ່ລາວເວົ້າວ່າລາວຈະເຮັດແທ້ໆ. ຄວາມໄວ້ວາງໃຈນຳຄວາມສະຫງົບ, ຄວາມຮັກ, ແລະ ບັນຍາກາດມາ ບ່ອນທີ່ຄວາມຮັກນັ້ນຈະເຕີບຕົວໄດ້ມາໃຫ້ເຮົາ.”
ນາງລາຣາ ແລະ ນາງຄຣິດສະຕີນ້າ ບໍ່ເຄີຍໄດ້ເຫັນສິ່ງທີ່ອີກຝ່າຍໜຶ່ງໄດ້ຂຽນ. ມັນເປັນເລື່ອງທີ່ໜ້າສົນໃຈສຳລັບຂ້າພະເຈົ້າ ທີ່ທັງສອງຄົນໄດ້ເຫັນວ່າພອນແຫ່ງຄວາມສະຫງົບຢູ່ໃນບ້ານ ຂອງພວກນາງນັ້ນ ເປັນຜົນທີ່ຕາມມາໂດຍກົງ ຂອງການມີສາມີທີ່ພວກນາງໄວ້ວາງໃຈໄດ້. ດັ່ງທີ່ຕົວຢ່າງຂອງລູກສາວຂອງຂ້າພະເຈົ້າໄດ້ສະແດງໃຫ້ເຫັນ, ຫລັກທຳແຫ່ງຄວາມໄວ້ວາງໃຈ ມີບົດບາດທີ່ສຳຄັນຫລາຍທີ່ສຸດ ໃນການພັດທະນາຂອງບ້ານເຮືອນທີ່ມີພຣະຄຣິດເປັນຈຸດໃຈກາງ.
ຂ້າພະເຈົ້າໄດ້ຊື່ນຊົມກັບບັນຍາກາດທີ່ມີພຣະຄຣິດເປັນຈຸດໃຈກາງອັນດຽວກັນນັ້ນ ຕອນຂ້າພະເຈົ້າໄດ້ເຕີບໂຕຢູ່ໃນບ້ານເຮືອນ ບ່ອນທີ່ພໍ່ໃຫ້ກຽດຖານະປະໂລຫິດຂອງເພິ່ນ ແລະ ໄດ້ຮັບການໄວ້ວາງໃຈຈາກຄອບຄົວທຸກຄົນ ເພາະ “ຄວາມຊື່ສັດຂອງໃຈເພິ່ນ.”7 ຂ້າພະເຈົ້າຂໍແບ່ງປັນປະສັບການຢ່າງໜຶ່ງຈາກໄວລຸ້ນຂອງຂ້າພະເຈົ້າ ທີ່ສະແດງໃຫ້ເຫັນຜົນກະທົບທີ່ດີ ແລະ ທີ່ທົນທານ ທີ່ພໍ່ຄົນໜຶ່ງຜູ້ທີ່ເຂົ້າໃຈ ແລະ ດຳລົງຊີວິດຕາມຫລັກທຳແຫ່ງການໄວ້ວາງໃຈ ທີ່ຖືກສ້າງຂຶ້ນຢູ່ເທິງ ຄວາມຊື່ສັດ ສາມາດມີຕໍ່ຄອບຄົວຂອງເພິ່ນ.
ຕອນຂ້າພະເຈົ້າຍັງນ້ອຍໆ, ພໍ່ຂອງຂ້າພະເຈົ້າໄດ້ສ້າງຕັ້ງບໍລິສັດທີ່ຜະລິດເຄື່ອງຈັກອັດຕະໂນມັດ ໃນໂຮງງານໂດຍສະເພາະ. ທຸລະກິດນີ້ໄດ້ອອກແບບ, ປະກອບ ແລະ ຕິດຕັ້ງສາຍພານຜະລິດຕະພັນອັດຕະໂນມັດຕະຫລອດທົ່ວໂລກ.
ຕອນຂ້າພະເຈົ້າຮຽນຢູ່ມັດທະຍົມ, ພໍ່ຂອງຂ້າພະເຈົ້າຢາກໃຫ້ຂ້າພະເຈົ້າຮຽນເຮັດວຽກ. ເພິ່ນຍັງຢາກໃຫ້ຂ້າພະເຈົ້າຮຽນຮູ້ເລື່ອງທຸລະກິດນີ້ຈາກຈຸດເລີ່ມຕົ້ນເລີຍ. ວຽກທຳອິດຂອງຂ້າພະເຈົ້າແມ່ນການບົວລະບັດສະຖານທີ່ ແລະ ທາສີບ່ອນທີ່ລັບຕາຂອງຜູ້ຄົນທົ່ວໄປ.
ຕອນຢູ່ມັດທະຍົມຊັ້ນປາຍ, ຂ້າພະເຈົ້າຖືກເລື່ອນຊັ້ນໃຫ້ເຮັດວຽກຮັກສາຄວາມສະອາດພື້ນຂອງໂຮງງານ. ຂ້າພະເຈົ້າໄດ້ເລີ່ມຮຽນວິທີອ່ານແມ່ພິມ ແລະ ຄວບຄຸມເຄື່ອງຈັກຜະລິດເຫລັກໜັກໆນັ້ນ. ຫລັງຈາກຈົບໂຮງຮຽນມັດທະຍົມ, ຂ້າພະເຈົ້າໄດ້ໄປຮຽນຕໍ່ທີ່ມະຫາວິທະຍາໄລ ແລະ ແລ້ວໄດ້ໄປເຜີຍແຜ່ສາດສະໜາ. ຫລັງຈາກຈົບຈາກການເຜີຍແຜ່ແລ້ວ ຂ້າພະເຈົ້າໄດ້ກັບໄປເຮັດວຽກຢູ່ໂຮງງານນັ້ນທັນທີ. ຂ້າພະເຈົ້າຕ້ອງເກັບທ້ອນເງິນສຳລັບຄ່າໃຊ້ຈ່າຍໂຮງຮຽນໃນປີຕໍ່ໄປ.
ມື້ໜຶ່ງບໍ່ດົນຫລັງຈາກການເຜີຍແຜ່ຂອງຂ້າພະເຈົ້າ, ຂ້າພະເຈົ້າໄດ້ເຮັດວຽກຢູ່ທີ່ໂຮງງານ ເມື່ອພໍ່ໄດ້ເອີ້ນຂ້າພະເຈົ້າເຂົ້າໄປທີ່ຫ້ອງການຂອງເພິ່ນ ແລະ ເພິ່ນໄດ້ຖາມ ຖ້າຫາກວ່າຂ້າພະເຈົ້າຢາກໄປເຮັດທຸລະກິດກັບເພິ່ນຢູ່ເມືອງລອສ໌ ແອນຈະລິຊ ຫລືບໍ່. ນີ້ເປັນເທື່ອທຳອິດທີ່ພໍ່ຂອງຂ້າພະເຈົ້າໄດ້ຊວນຂ້າພະເຈົ້າໄປເຮັດທຸລະກິດກັບເພິ່ນ. ແທ້ຈິງແລ້ວ ເພິ່ນໄດ້ປ່ອຍໃຫ້ຂ້າພະເຈົ້າອອກໄປທາງນອກເພື່ອຊ່ວຍເປັນຜູ້ຕາງໜ້າຂອງບໍລິສັດ.
ກ່ອນພວກເຮົາໄດ້ອອກເດີນທາງ, ເພິ່ນໄດ້ຕຽມຂ້າພະເຈົ້າ ດ້ວຍລາຍລະອຽດບາງຢ່າງກ່ຽວກັບວ່າທີ່ລູກຄ້າຄົນໃໝ່ ໃນອະນາຄົດ. ທຳອິດ, ລູກຄ້ານັ້ນກໍເປັນບໍລິສັດລະດັບສາກົນຂອງຫລາຍໆປະເທດ. ສອງ, ເຂົາເຈົ້າຈະຍົກລະດັບສາຍພານຜະລິດຕະພັນຕະຫລອດທົ່ວໂລກ ດ້ວຍເທັກໂນໂລຈີອັດຕະໂນມັດທີ່ລ່າສຸດ. ສາມ, ບໍລິສັດຂອງເຮົາບໍ່ເຄີຍໃຫ້ບໍລິການທາງດ້ານວິສະວະກອນອອກແບບ ຫລື ເລື່ອງເທັກໂນໂລຈີມາກ່ອນ. ແລະ ທ້າຍສຸດ, ຜູ້ບໍລິຫານຊັ້ນສູງຂອງບໍລິສັດທີ່ຄວບຄຸມການຊື້ຂາຍໄດ້ຮຽກຮ້ອງການປະຊຸມນີ້ ເພື່ອທົບທວນລາຄາປະມູນ ຂອງໂຄງການສ້າງໃໝ່. ການປະຊຸມເທື່ອນີ້ເປັນໂອກາດໃໝ່ທີ່ສຳຄັນຫລາຍສຳລັບບໍລິສັດຂອງພວກເຮົາ.
ຫລັງຈາກໄດ້ໄປເຖິງ ລອສ໌ ແອນຈະລິຊ ແລ້ວ, ພໍ່ຂອງຂ້າພະເຈົ້າ ແລະ ຂ້າພະເຈົ້າໄດ້ໄປປະຊຸມຢູ່ທີ່ໂຮງແຮມຂອງຜູ້ບໍລິຫານ. ລາຍການທຳອິດຂອງການປະຊຸມຄື ທີ່ຈະສົນທະນາ ແລະ ວິເຄາະຂໍ້ກຳນົດຂອງການອອກແບບຂອງໂຄງການນີ້. ຂໍ້ສົນທະນາທີ່ກ່ຽວຂ້ອງຂັ້ນຕໍ່ໄປແມ່ນລາຍລະອຽດຂອງການດຳເນີນວຽກ, ຮ່ວມທັງການເຄື່ອນໄຫວ ແລະ ວັນທີທີ່ຈະສົ່ງຜະລິດຕະພັນທີ່ສຳເລັດອອກໃຫ້ໄດ້. ສະຫລຸບທ້າຍຂອງລາຍການແມ່ນກ່ຽວກັບລາຄາ, ເຫດຜົນ ແລະ ເງື່ອນໄຂ. ຕອນນີ້ແຫລະເປັນຕອນທີ່ທຸກສິ່ງເປັນໜ້າສົນໃຈ.
ຜູ້ບໍລິຫານຄົນນີ້ໄດ້ອະທິບາຍໃຫ້ພວກເຮົາຮູ້ວ່າ ລາຄາຂອງພວກເຮົາແມ່ນຕ່ຳທີ່ສຸດໃນບັນດາການປະມູນຄ່າທັງໝົດ ທີ່ຖືກສົ່ງເຂົ້າມາປະມູນ. ຕາມຄວາມສົງໃສ, ແລ້ວເພິ່ນໄດ້ບອກລາຄາຂອງບໍລິສັດທີ່ປະມູນລາຄາຕ່ຳອັນດັບສອງໃຫ້ພວກເຮົາຊາບ. ແລ້ວເພິ່ນໄດ້ຖາມພວກເຮົາ ຖ້າຫາກວ່າພວກເຮົາຈະຮັບເອົາຂໍ້ສະເໜີຂອງພວກເຮົາຄືນໄປ ແລະ ສົ່ງມັນເຂົ້າມາປະມູນລາຄາອີກ. ເພິ່ນໄດ້ບອກວ່າລາຄາຂອງພວກເຮົາຄວນເຂົ້າມາຕ່ຳກວ່າຜູ້ປະມູນລາຄາທີ່ສູງສຸດໜ້ອຍໜຶ່ງ. ແລ້ວເພິ່ນໄດ້ອະທິບາຍວ່າພວກເຮົາຈະແບ່ງຈຳນວນເງິນທີ່ໄດ້ມາກັບເພິ່ນ 50-50. ເພິ່ນໄດ້ໃຫ້ຂໍ້ແກ້ຕົວໂດຍການກ່າວວ່າທຸກຄົນຊະນະ. ບໍລິສັດຂອງພວກເຮົາຈະຊະນະເພາະວ່າພວກເຮົາຈະມີລາຍໄດ້ຫລາຍກວ່າທີ່ພວກເຮົາ ໄດ້ປະມູນລາຄາໃນຕອນຕົ້ນ. ບໍລິສັດຂອງເພິ່ນຈະຊະນະເພາະວ່າເຂົາເຈົ້າຍັງຈະໄດ້ດຳເນີນທຸລະກິດນຳຜູ້ທີ່ປະມູນລາຄາທີ່ຕ່ຳທີ່ສຸດ. ແລະ ແນ່ນອນວ່າ, ເພິ່ນຈະຊະນະໂດຍການໄດ້ສ່ວນແບ່ງ ເພາະເພິ່ນເປັນຜູ້ທີ່ເຈລະຈາໃຫ້ຂໍ້ຕົກລົງນີ້ຖືກລົງເອີ່ຍດ້ວຍດີ.
ແລ້ວເພິ່ນກໍໄດ້ເອົາທີ່ຢູ່ໃຫ້ພວກເຮົາ ບ່ອນທີ່ພວກເຮົາຈະສົ່ງ ເງິນໄປໃຫ້ເພິ່ນ. ຫລັງຈາກທຸກສິ່ງທັງໝົດນີ້, ເພິ່ນໄດ້ຫລຽວເບິ່ງພໍ່ຂອງຂ້າພະເຈົ້າ ແລະ ໄດ້ຖາມວ່າ, “ສະນັ້ນ, ພວກເຮົາຍອມຮັບຂໍ້ຕົກລົງນຳກັນບໍ?” ຂ້າພະເຈົ້າປະຫລາດໃຈ ເພາະພໍ່ຂອງຂ້າພະເຈົ້າໄດ້ລຸກຂຶ້ນ, ຈັບມືກັບຊາຍຄົນນັ້ນ ແລະ ບອກເພິ່ນວ່າ ແລ້ວພວກເຮົາຈະຕິດຕໍ່ຫາເພິ່ນຄືນ.
ຫລັງຈາກອອກຈາກການປະຊຸມແລ້ວ, ພວກເຮົາໄດ້ກັບຂຶ້ນລົດເຊົ່າ, ແລະ ພໍ່ຂອງຂ້າພະເຈົ້າໄດ້ຫັນໜ້າມາຫາຂ້າພະເຈົ້າ ແລະ ໄດ້ຖາມວ່າ, “ເອີ້, ລູກຄິດວ່າ ພວກເຮົາຄວນເຮັດແນວໃດ?”
ຂ້າພະເຈົ້າໄດ້ຕອບເພິ່ນວ່າ ຂ້າພະເຈົ້າຄິດວ່າ ພວກເຮົາບໍ່ຄວນຍອມຮັບຂໍ້ສະເໜີນັ້ນ.
ແລ້ວພໍ່ໄດ້ຖາມວ່າ, “ລູກບໍ່ຄິດວ່າພວກເຮົາມີໜ້າທີ່ຮັບຜິດຊອບຕໍ່ພະນັກງານຂອງພວກເຮົາທຸກຄົນ ທີ່ຈະຮັກສາວຽກງານໄວ້ໃຫ້ເຂົາເຈົ້າເຮັດບໍ?”
ຂະນະທີ່ຂ້າພະເຈົ້າຄິດໄຕ່ຕອງຄຳຖາມຂອງເພິ່ນ ແລະ ກ່ອນທີ່ໃຫ້ຄຳຕອບ, ເພິ່ນໄດ້ຕອບຄຳຖາມຂອງເພິ່ນເອງ. ເພິ່ນໄດ້ກ່າວວ່າ, “ຣິກ, ຟັງພໍ່ໃຫ້ດີເດີ້ລູກ, ເມື່ອລູກຍອມຮັບສິນບົນ ຫລື ສົມຍອມຕໍ່ຄວາມຊື່ສັດຂອງລູກ ເທື່ອໜຶ່ງແລ້ວ, ມັນເປັນເລື່ອງຍາກທີ່ຈະໄດ້ສິ່ງນັ້ນຄືນມາ. ຢ່າເຮັດແບບນັ້ນຈັກເທື່ອເດີ້ລູກ, ຢ່າເຮັດແມ່ນແຕ່ເທື່ອດຽວ.”
ຄວາມຈິງທີ່ຂ້າພະເຈົ້າແບ່ງປັນປະສົບການນີ້ ກໍໝາຍຄວາມວ່າ ຂ້າພະເຈົ້າບໍ່ເຄີຍລືມສິ່ງທີ່ພໍ່ຂອງຂ້າພະເຈົ້າ ໄດ້ສອນຂ້າພະເຈົ້າ ໃນຕອນເດີນທາງໄປດຳເນີນທຸລະກິດກັບເພິ່ນ ເທື່ອທຳອິດນັ້ນ. ຂ້າພະເຈົ້າແບ່ງປັນປະສົບການນີ້ ເພື່ອສະແດງໃຫ້ເຫັນອິດທິພົນທີ່ທົນທານທີ່ເຮົາມີໃນຖານະທີ່ເປັນພໍ່. ທ່ານສາມາດວາດພາບໄດ້ເຖິງຄວາມໄວ້ວາງໃຈທີ່ຂ້າພະເຈົ້າມີໃນຕົວພໍ່ຂອງຂ້າພະເຈົ້າ ເພາະຄວາມຊື່ສັດຂອງໃຈເພິ່ນ. ເພິ່ນໄດ້ດຳລົງຊີວິດຕາມຫລັກທຳດຽວກັນນີ້ ໃນຊີວິດສ່ວນຕົວກັບແມ່ຂອງຂ້າພະເຈົ້າ, ກັບລູກໆຂອງເພິ່ນ, ແລະ ກັບທຸກໆຄົນທີ່ເພິ່ນຄົບຫາສະມາຄົມດ້ວຍ.
ອ້າຍນ້ອງທັງຫລາຍ, ຂ້າພະເຈົ້າອະທິຖານໃນຄ່ຳຄືນນີ້ວ່າ ກ່ອນອື່ນໝົດ ເຮົາຈະໄວ້ວາງໃຈໃນພຣະຜູ້ເປັນເຈົ້າ, ດັ່ງທີ່ ນີໄຟ ໄດ້ເປັນຕົວຢ່າງໃຫ້ແກ່ເຮົາ, ແລະ ແລ້ວ, ຜ່ານຄວາມຊື່ສັດຂອງໃຈເຮົາ ເຮົາອາດຈະໄດ້ຮັບຄວາມໄວ້ວາງໃຈຈາກພຣະຜູ້ເປັນເຈົ້າ, ພ້ອມທັງຄວາມໄວ້ວາງໃຈຈາກພັນລະຍາ ແລະ ລູກໆຂອງເຮົານຳອີກ. ເມື່ອເຮົາເຂົ້າໃຈ ແລະ ນຳໃຊ້ຫລັກທຳສັກສິດແຫ່ງການໄວ້ວາງໃຈສ້າງຂຶ້ນຢູ່ເທິງຄວາມຊື່ສັດ, ເຮົາຈະຈິງໃຈຕໍ່ພັນທະສັນຍາສັກສິດຂອງເຮົາ. ເຮົາຍັງຈະໄດ້ຮັບຜົນສຳເລັດໃນການນຳພາ ໃນຄອບຄົວຂອງເຮົາ ດ້ວຍຄວາມຮັກ ແລະ ຄວາມຊອບທຳ, ການຈັດຫາສິ່ງທີ່ຈຳເປັນຕ່າງໆ, ແລະ ປົກປັກຮັກສາຄອບຄົວຂອງເຮົາຈາກຄວາມຊົ່ວຮ້າຍຂອງໂລກ. ຂ້າພະເຈົ້າເປັນພະຍານເຖິງຄວາມຈິງເຫລົ່ານີ້ດ້ວຍຄວາມຖ່ອມຕົວ ໃນພຣະນາມຂອງພຣະເຢຊູຄຣິດ, ອາແມນ.