ສຸລິຍະຄາດທາງວິນຍານ
ຢ່າປ່ອຍໃຫ້ສິ່ງລົບກວນໃນຊີວິດ ປິດບັງແສງສະຫວ່າງຈາກສະຫວັນ.
ໃນວັນທີ 21 ເດືອນສິງຫາ ຂອງປີນີ້, ເຫດການທີ່ບໍ່ຄ່ອຍມີ ສອງຢ່າງໄດ້ເກີດຂຶ້ນ ຊຶ່ງສ້າງຄວາມສົນໃຈໃຫ້ແກ່ຜູ້ຄົນເປັນຈຳນວນຫລວງຫລາຍຕະຫລອດທົ່ວໂລກ. ສິ່ງທຳອິດແມ່ນການສະຫລອງວັນເກີດຄົບຮອບ 90 ປີ ຂອງສາດສະດາທີ່ຮັກແພງຂອງພວກເຮົາ, ປະທານທອມມັສ ແອັສ ມອນສັນ. ໃນເວລານັ້ນ, ຂ້າພະເຈົ້າໄດ້ຖືກມອບໝາຍໃຫ້ໄປເຮັດພາລະກິດຢູ່ໃນເຂດປາຊີຟິກ ແລະ ດີໃຈຫລາຍທີ່ໄພ່ພົນຢູ່ປະເທດອົດສະຕາລີ, ວານູອາຕູ, ນິວຊີແລນ, ແລະ ຝຣັ່ງໂປລີເນເຊຍ ບໍ່ພຽງແຕ່ຮູ້ຈັກເຖິງວັນເກີດຂອງເພິ່ນເທົ່ານັ້ນ, ແຕ່ເຂົາເຈົ້າຍັງໄດ້ສະຫລອງດ້ວຍຄວາມປິຕິຍິນດີນຳອີກ. ຂ້າພະເຈົ້າຮູ້ສຶກໂຊກດີຫລາຍທີ່ໄດ້ຮ່ວມສະແດງສັດທາ ແລະ ຄວາມຮັກ ກັບເຂົາເຈົ້າ ຕໍ່ວິລະບຸລຸດທີ່ຍິ່ງໃຫຍ່ຄົນນີ້. ຊ່າງເປັນການດົນໃຈແທ້ໆ ທີ່ໄດ້ເຫັນຄວາມສຳພັນລະຫວ່າງໄພ່ພົນຍຸກສຸດທ້າຍ ກັບສາດສະດາຂອງເຂົາເຈົ້າ.
ແນ່ນອນ, ປະທານມອນສັນ, ໂດຍທີ່ຮູ້ເຖິງຄວາມປາດຖະໜາຂອງຄົນເຫລົ່ານັ້ນ ທີ່ຢາກອວຍພອນວັນເກີດຂອງເພິ່ນ: ຂອງຂວັນທີ່ເພິ່ນຢາກໄດ້ສຳລັບວັນເກີດແມ່ນ: “ໃຫ້ຊອກຫາບາງຄົນທີ່ກຳລັງມີບັນຫາ ຫລື ເປົ່າປ່ຽວດຽວດາຍ ແລະ ເຮັດບາງສິ່ງໃຫ້ກັບເຂົາເຈົ້າ. ຂ້າພະເຈົ້າຂໍພຽງເທົ່ານັ້ນ.”1 ພວກເຮົາຮັກທ່ານ ແລະ ສະໜັບສະໜູນທ່ານ, ປະທານມອນສັນ.
ສຸລິຍະຄາດ
ສິ່ງທີ່ບໍ່ຄ່ອຍມີອີກຢ່າງໜຶ່ງ ໄດ້ເກີດຂຶ້ນໃນມື້ດຽວກັນ ແລະ ໄດ້ສ້າງຄວາມສົນໃຈໃຫ້ແກ່ຜູ້ຄົນຫລາຍລ້ານຄົນທົ່ວໂລກ ແມ່ນສຸລິຍະຄາດເຕັມດວງ. ນີ້ແມ່ນເທື່ອທຳອິດທີ່ມີສຸລິຍະຄາດຂ້າມສະຫະລັດ ໃນ 99 ປີ.2 ທ່ານເຄີຍເຫັນສຸລິຍະຄາດບໍ? ບາງທີ ຂ້າພະເຈົ້າຄວນບັນຍາຍກ່ຽວກັບເລື່ອງນີ້ຢ່າງລະອຽດ.
ສຸລິຍະຄາດເຕັມດວງ ແມ່ນເຫດການທີ່ ດວງເດືອນຍ້າຍໄປຢູ່ທາງກາງ ລະຫວ່າງໂລກ ແລະ ດວງຕາເວັນ, ປິດແສງເກືອບທັງໝົດ ຈາກດວງຕາເວັນ.3 ຄວາມຈິງທີ່ສິ່ງນີ້ເກີດຂຶ້ນ ເຮັດໃຫ້ຂ້າພະເຈົ້າພິສະຫວົງ. ຖ້າຫາກທ່ານວາດພາບເຫັນດວງຕາເວັນ ໃຫຍ່ເທົ່າກັບກົງລໍ້ລົດຖີບ, ດວງເດືອນ, ເມື່ອປຽບທຽບ, ກໍໃຫຍ່ເທົ່າກັບກ້ອນຫີນນ້ອຍ.
ມັນເປັນໄປໄດ້ແນວໃດທີ່ແຫລ່ງໃຫ້ຄວາມອົບອຸ່ນ, ແສງສະຫວ່າງ, ແລະ ຊີວິດ ຖືກປິດບັງເກືອບໝົດ ໄວ້ໂດຍບາງສິ່ງທີ່ນ້ອຍກວ່າຕັ້ງຫລາຍເທົ່າ.
ເຖິງແມ່ນວ່າ ດວງຕາເວັນຈະໃຫຍ່ກວ່າດວງເດືອນ 400 ເທົ່າ, ມັນກໍຍັງໄກຈາກແຜ່ນດິນໂລກ 400 ເທົ່າ.4 ຈາກທັດສະນະຂອງໂລກແລ້ວ, ດວງເດືອນ ແລະ ດວງຕາເວັນ ຈຶ່ງເບິ່ງຄືວ່າ ໃຫຍ່ສ່ຳກັນ. ເມື່ອທັງສອງໜ່ວຍມາຢູ່ຈຸດດຽວກັນ, ເບິ່ງຄືວ່າ ດວງເດືອນປິດບັງດວງຕາເວັນທັງດວງໄວ້. ໝູ່ເພື່ອນ ແລະ ຄອບຄົວຂອງຂ້າພະເຈົ້າ ຜູ້ຢູ່ໃນບ່ອນທີ່ເຫັນສຸລິຍະຄາດເຕັມດວງ ໄດ້ບອກວ່າແສງສະຫວ່າງໄດ້ຖືກປິດບັງໄວ້ໂດຍຄວາມມືດ, ແລະ ດວງດາວກໍໄດ້ປະກົດຂຶ້ນ, ແລະ ນົກກໍເຊົາຮ້ອງ. ອາກາດກໍເຍືອກເຢັນ ເພາະອຸນຫະພູມຕອນສຸລິຍະຄາດ ອາດຕ່ຳລົງຫລາຍກວ່າ 20 ອົງສາ ຟາເຣັນຮາຍ (11 ອົງສາ ແຊວຊຽດ).5
ເຂົາເຈົ້າໄດ້ບອກເຖິງຄວາມພິສະຫວົງ, ຄວາມປະຫລາດໃຈ, ແລະ ຄວາມກັງວົນ, ໂດຍທີ່ຮູ້ເຖິງສິ່ງອັນຕະລາຍທີ່ເກີດຈາກສຸລິຍະຄາດ. ເຖິງຢ່າງໃດກໍຕາມ, ເຂົາເຈົ້າໄດ້ມີຄວາມລະມັດລະວັງ ເພື່ອປ້ອງກັນຕາບໍ່ໃຫ້ບອດ ຫລື “ສຸລິຍະຄາດທາງຕາ” ລະຫວ່າງທີ່ສຸລິຍະຄາດ. ເຂົາເຈົ້າໄດ້ຮັບການປ້ອງກັນ ເພາະໃຊ້ແວ່ນຕາສະເພາະສຸລິຍະຄາດ ຊຶ່ງມີແວ່ນພິເສດ ເພື່ອປ້ອງກັນຕາບໍ່ໃຫ້ຖືກທຳລາຍ.
ການປຽບທຽບ
ຄືກັນກັບດວງເດືອນໜ່ວຍນ້ອຍສາມາດບັງດວງຕາເວັນທີ່ໃຫຍ່ໂຕ, ປິດບັງແສງສະຫວ່າງ ແລະ ຄວາມອົບອຸ່ນຂອງມັນໄດ້, ສຸລິຍະຄາດ ທາງວິນຍານ ກໍສາມາດເກີດຂຶ້ນໄດ້ ເມື່ອເຮົາປ່ອຍໃຫ້ສິ່ງເລັກໆນ້ອຍໆ ທີ່ໜ້າລຳຄານ ມາສະກັດກັ້ນ—ສິ່ງທີ່ເຮົາປະເຊີນໃນແຕ່ລະວັນ—ມາໃກ້ເຮົາ ຈົນມັນປິດບັງແສງສະຫວ່າງທີ່ຈາດຈ້າ, ຮຸ່ງເຫລື້ອມ, ແລະ ອົບອຸ່ນຂອງພຣະເຢຊູຄຣິດ ແລະ ພຣະກິດຕິຄຸນຂອງພຣະອົງໄດ້.
ແອວເດີ ນຽວ ເອ ແມ໊ກສະແວວ ໄດ້ໃຊ້ການປຽບທຽບນີ້ຢ່າງກວ້າງໄກ ເມື່ອເພິ່ນກ່າວວ່າ: “ແມ່ນແຕ່ບາງສິ່ງນ້ອຍເທົ່າກັບຫົວໂປ້ມື, ຖ້າຫາກເອົາມັນໄປແປະໃກ້ຕາ, ມັນສາມາດປິດຕາ ຈົນບໍ່ສາມາດຫລຽວເຫັນດວງຕາເວັນທີ່ໃຫຍ່ໂຕໄດ້. ແຕ່ດວງຕາເວັນກໍຍັງຢູ່ທີ່ນັ້ນ. ມະນຸດຕາບອດເອງ. ເມື່ອເຮົາດຶງສິ່ງອື່ນໃຫ້ເຂົ້າໃກ້ເຮົາ, ໃຫ້ມັນມີຄວາມສຳຄັນກວ່າ ມັນຈະບັງສະຫວັນໄວ້.”6
ເຫັນໄດ້ຢ່າງແຈ່ມແຈ້ງວ່າ, ບໍ່ມີໃຜໃນພວກເຮົາຢາກຖືກປິດບັງຈາກສະຫວັນ ຫລື ປ່ອຍໃຫ້ສຸລິຍະຄາດທາງວິນຍານເກີດຂຶ້ນໃນຊີວິດຂອງເຮົາ. ຂ້າພະເຈົ້າຂໍແບ່ງປັນຄວາມຄິດທີ່ອາດຊ່ວຍເຮົາຫລີກເວັ້ນຈາກການຖືກທຳລາຍທາງວິນຍານໄປຕະຫລອດໄດ້.
ແວ່ນຕາພຣະກິດຕິຄຸນ: ເອົາໃຈໃສ່ກັບທັດສະນະຂອງພຣະກິດຕິຄຸນ
ທ່ານຈື່ຄຳເວົ້າຂອງຂ້າພະເຈົ້າກ່ຽວກັບແວ່ນຕາພິເສດທີ່ຜູ້ຄົນໃຊ້ເພື່ອປ້ອງກັນຕາ ຕອນສຸລິຍະຄາດໄດ້ບໍ ເພື່ອບໍ່ໃຫ້ຕາໄດ້ຮັບອັນຕະລາຍ ຫລື ບອດໄດ້? ການຫລຽວເບິ່ງສຸລິຍະຄາດທາງວິນຍານ ຜ່ານແວ່ນຕາປ້ອງກັນ ແລະ ອ່ອນໂຍນ ຂອງພຣະວິນຍານ ຈະຊ່ວຍເຮົາໃຫ້ເຫັນທັດສະນະຂອງພຣະກິດຕິຄຸນ, ດັ່ງນັ້ນ ຈຶ່ງປ້ອງກັນເຮົາຈາກຄວາມບອດທາງວິນຍານໄດ້.
ໃຫ້ເຮົາມາເບິ່ງຈັກສອງສາມຕົວຢ່າງ. ດ້ວຍຖ້ອຍຄຳຂອງສາດສະດາ ໃນໃຈຂອງເຮົາ ແລະ ມີພຣະວິນຍານບໍລິສຸດເປັນທີ່ປຶກສາຂອງເຮົາ, ເຮົາສາມາດຫລຽວເບິ່ງແສງສະຫວ່າງຂອງສະຫວັນທີ່ຖືກບັງໄວ້ ດ້ວຍ “ແວ່ນຕາພຣະກິດຕິຄຸນ,” ເພື່ອຫລີກເວັ້ນຈາກສຸລິຍະຄາດທາງວິນຍານ.
ສະນັ້ນ ເຮົາຈະໃສ່ແວ່ນຕາພຣະກິດຕິຄຸນດ້ວຍວິທີໃດ? ຕໍ່ໄປນີ້ເປັນບາງຕົວຢ່າງ: ແວ່ນຕາພຣະກິດຕິຄຸນ ບອກເຮົາວ່າ ພຣະຜູ້ເປັນເຈົ້າປະສົງໃຫ້ເຮົາຮັບສິນລະລຶກທຸກອາທິດ ແລະ ວ່າພຣະອົງປະສົງໃຫ້ເຮົາສຶກສາພຣະຄຳພີ ແລະ ອະທິຖານທຸກວັນ. ແວ່ນຕາພຣະກິດຕິຄຸນຍັງບອກເຮົາວ່າ ຊາຕານຈະລໍ້ລວງເຮົາບໍ່ໃຫ້ເຮັດ. ເຮົາຮູ້ວ່າ ຊາຕານມີຈຸດປະສົງທີ່ຈະເອົາອຳເພີໃຈຂອງເຮົາໄປ ຜ່ານການກີດກັນແລະ ການລໍ້ລວງຂອງໂລກ. ແມ່ນແຕ່ໃນສະໄໝຂອງໂຢບ, ບາງທີຫລາຍຄົນກໍໄດ້ປະສົບກັບສຸລິຍະຄາດທາງວິນຍານ, ຊຶ່ງບອກວ່າ “ເຖິງແມ່ນກາງເວັນ ພວກເຂົາກໍງົມຢູ່ໃນຄວາມມືດ.”7
ອ້າຍເອື້ອຍນ້ອງທັງຫລາຍ, ເມື່ອຂ້າພະເຈົ້າກ່າວເຖິງການຫລຽວເບິ່ງດ້ວຍແວ່ນຕາພຣະກິດຕິຄຸນ, ຂໍໃຫ້ທ່ານຮູ້ວ່າ ຂ້າພະເຈົ້າບໍ່ໄດ້ແນະນຳໃຫ້ເຮົາປະຕິເສດຄວາມຮູ້ ຫລື ບໍ່ສົນທະນາກ່ຽວກັບການທ້າທາຍທີ່ເຮົາປະເຊີນຢູ່ ຫລື ໃຫ້ເຮົາເດີນໄປຢ່າງມີຄວາມສຸກທີ່ສຸດກັບຄວາມບໍ່ມີຄວາມຮູ້ເຖິງ ກັບດັກ ແລະ ສິ່ງຊົ່ວຮ້າຍທີ່ສັດຕູໄດ້ວາງໄວ້ຢູ່ຕໍ່ໜ້າເຮົາ. ຂ້າພະເຈົ້າບໍ່ໄດ້ກ່າວເຖິງການໃສ່ຜ້າມັດຕາ—ແຕ່ກົງກັນຂ້າມ. ຂ້າພະເຈົ້າແນະນຳວ່າ ເຮົາຕ້ອງຫລຽວເບິ່ງການທ້າທາຍ ຜ່ານແວ່ນຕາພຣະກິດຕິຄຸນ. ແອວເດີ ດາລິນ ເອັຈ ໂອກສ໌ ໄດ້ສັງເກດວ່າ “ທັດສະນະຄື ຄວາມສາມາດທີ່ຈະຫລຽວເຫັນຂໍ້ມູນທັງໝົດທີ່ກ່ຽວພັນກັນ ໃນຄວາມສຳພັນທີ່ມີຄວາມໝາຍ.”8 ທັດສະນະຂອງພຣະກິດຕິຄຸນ ຊ່ວຍເຮົາໃຫ້ສາມາດຫລຽວເຫັນພາບແຫ່ງນິລັນດອນ.
ເມື່ອທ່ານໃສ່ ແວ່ນຕາພຣະກິດຕິຄຸນ, ທ່ານຈະເຫັນທັດສະນະທີ່ກວ້າງໄກ, ແຈ່ມແຈ້ງ, ແລະ ວິໄສທັດໃນວິທີທີ່ທ່ານຄິດກ່ຽວກັບລຳດັບຄວາມສຳຄັນ, ບັນຫາ, ການລໍ້ລວງ, ແລະ ແມ່ນແຕ່ຄວາມຜິດພາດຂອງທ່ານ. ທ່ານຈະເຫັນແສງທີ່ແຈ້ງກວ່າທີ່ທ່ານຫລຽວບໍ່ເຫັນປາດສະຈາກແວ່ນຕາ.
ກົງກັນຂ້າມ, ບໍ່ພຽງແຕ່ສິ່ງບໍ່ດີເທົ່ານັ້ນທີ່ເປັນສຸລິຍະຄາດທາງວິນຍານຂອງເຮົາ. ສ່ວນຫລາຍແລ້ວ ຄວາມພະຍາຍາມທີ່ໜ້າຍ້ອງຍໍ ແລະ ໃນທາງດີ ທີ່ເຮົາອຸທິດຕົນກັບມັນ ກໍສາມາດເຂົ້າມາໃກ້ເຮົາ ຈົນວ່າມັນບັງແສງສະຫວ່າງຂອງພຣະກິດຕິຄຸນຈົນໝົດສິ້ນ ແລະ ນຳຄວາມມືດມາໃຫ້. ສິ່ງອັນຕະລາຍ ຫລື ສິ່ງກີດກັນເຫລົ່ານີ້ ອາດຮ່ວມດ້ວຍການສຶກສາ ແລະ ຄວາມຮັ່ງມີ, ອຳນາດ ແລະ ອິດທິພົນ, ຄວາມທະເຍີທະຍານ, ແມ່ນແຕ່ພອນສະຫວັນ ແລະ ຂອງປະທານ.
ປະທານດີເດີ ແອັຟ ອຸກດອບ ໄດ້ສອນວ່າ “ຄຸນນະທຳໃດໆກໍຕາມ ຖ້າຫາກເຮັດເກີນຄວນກໍຈະກາຍເປັນບາບໄດ້. … ຈະມີຊ່ວງເວລາທີ່ຄວາມສຳເລັດ ແລະ ຄວາມທະເຍີທະຍານຈະກາຍເປັນອຸປະສັກ.”9
ຂ້າພະເຈົ້າຂໍກ່າວເຖິງຕົວຢ່າງອື່ນອີກຢ່າງລະອຽດ ທີ່ສາມາດຫລີກເວັ້ນສະຖານະການສຸລິຍະຄາດທາງວິນຍານຂອງເຮົາໄດ້.
ສື່ສານມວນຊົນ
ສອງສາມເດືອນຜ່ານມານີ້ ຂ້າພະເຈົ້າໄດ້ກ່າວປາໄສຢູ່ກອງປະຊຸມສະຕີ ທີ່ມະຫາວິທະຍາໄລ ບຣິກຳ ຢັງ.10 ຂ້າພະເຈົ້າໄດ້ບັນຍາຍກ່ຽວກັບ ເທັກໂນໂລຈີ ຮ່ວມທັງ ສື່ສານມວນຊົນ ທີ່ຂະຫຍາຍ “ຄວາມຮູ້ເລື່ອງຂອງພຣະຜູ້ຊ່ວຍໃຫ້ລອດ … ແຜ່ໄປທົ່ວທຸກປະຊາຊາດ, ທຸກຕະກຸນ, ທຸກພາສາ,ແລະ ທຸກຜູ້ຄົນທັງປວງ.”11 ເທັກໂນໂລຈີເຫລົ່ານີ້ ແມ່ນຮ່ວມດ້ວຍເວບໄຊ້ຂອງສາດສະໜາຈັກ ເຊັ່ນ LDS.org ແລະ Mormon.org; ອັບພລິເຄຊັນ ໃນມືຖື ດັ່ງເຊັ່ນ ຫໍສະໝຸດພຣະກິດຕິຄຸນ, ຊ້ອງ Mormon, ເຄື່ອງມື LDS, ແລະ ຮ່າງລຳດັບຄອບຄົວ; ແລະ ແທ່ນສື່ສານມວນຊົນ ຮ່ວມທັງ Facebook, Instagram, Twitter, ແລະ Pinterest. ແທ່ນສື່ສານມວນຊົນເຫລົ່ານີ້ ໄດ້ຂະຫຍາຍອອກຢ່າງກວ້າງຂວາງ ໂດຍມີຜູ້ຄົນຫລາຍລ້ານຄົນກົດ ມັກຊອບ, ແບ່ງປັນ, ເບິ່ງ, ສົນທະນາ, ແລະ ປັກຕິດ ແລະ ໄດ້ຜົນຫລາຍ ແລະ ມີປະສິດທິພາບ ໃນການແບ່ງປັນພຣະກິດຕິຄຸນໃຫ້ກັບຄອບຄົວ, ໝູ່ເພື່ອນ, ແລະ ຄົນທີ່ເຮົາພົບປະສັງສັນ.
ເຖິງຢ່າງໃດກໍຕາມ, ການໃຊ້ເທັກໂນໂລຈີນີ້ ໃນທາງທີ່ມີຄຸນນະທຳ ແລະ ຖືກຕ້ອງ ກໍຍັງມີການສ່ຽງຢູ່ ທີ່ກ່ຽວພັນກັບການຖືກດຶງດູດໃຫ້ເຂົ້າໃກ້ມັນຫລາຍເກີນໄປ, ສາມາດກໍ່ໃຫ້ເກີດສຸລິຍະຄາດທາງວິນຍານແລະບັງແສງສັກກະຍະພາບ ແລະ ສາມາດບັງແສງສະຫວ່າງ ແລະ ຄວາມອົບອຸ່ນຂອງພຣະກິດຕິຄຸນໄດ້.
ການໃຊ້ສື່ສານມວນຊົນ, ອັບພລິເຄຊັນ ໃນມືຖື, ແລະ ເກມຕ່າງໆ ສາມາດກິນເວລາຫລາຍ ແລະ ລົດການພົວພັນໜ້າຕໍ່ໜ້າລົງໄດ້. ການສູນເສຍການຕິດຕໍ່ສ່ວນຕົວ ສາມາດກະທົບກະເທືອນກັບການແຕ່ງງານ, ເຂົ້າມາແທນການເຮັດສິ່ງທີ່ເປັນທາງວິນຍານ, ແລະ ກີດກັນການພັດທະນາຄວາມຊຳນານເລື່ອງການສື່ສານໃນສັງຄົມ, ໂດຍສະເພາະໃນກຸ່ມຊາວໜຸ່ມ.
ການສ່ຽງສອງຢ່າງທີ່ກ່ຽວພັນກັບການສື່ສານມວນຊົນແມ່ນ ຮູບພາບໃນອຸດົມຄະຕິ ແລະ ການປຽບທຽບຕົວເອງໃສ່ກັບຄົນອື່ນ.
ຮູບທີ່ເຫັນຢູ່ໃນສື່ສານມວນຊົນຫລາຍໃບ (ຖ້າບໍ່ແມ່ນໝົດທຸກໃບ) ເບິ່ງຄືວ່າ ງາມທີ່ສຸດ—ສ່ວນຫລາຍແລ້ວ ມັນບໍ່ເປັນຄວາມຈິງ. ເຮົາທຸກຄົນກໍເຄີຍເຫັນຮູບເຮືອນທີ່ຕົບແຕ່ງຢ່າງຫລູຫລາ, ສະຖານທີ່ໄປທ່ຽວທີ່ສວຍງາມ, ຮູບຖ່າຍເອງທີ່ຍິ້ມສວຍ, ອາຫານທີ່ຕຽມຢ່າງປານີດ, ແລະ ຫຸ່ນທີ່ບໍ່ສາມາດເປັນໄປໄດ້.
ນີ້ເດ, ຍົກຕົວຢ່າງ, ແມ່ນຮູບທີ່ທ່ານອາດເຄີຍເຫັນຢູ່ໃນໜ້າຂອງຄົນອື່ນໃນສື່ສານມວນຊົນ. ແຕ່ມັນບໍ່ສະແດງໃຫ້ເຫັນພາບ ລວມ ເຖິງສິ່ງທີ່ເກີດຂຶ້ນ ແທ້ໆ ໃນຊີວິດຈິງ.
ການປຽບທຽບຊີວິດທຳມະດາຂອງຕົວເຮົາເອງ ໃສ່ກັບຮູບຂອງຄົນອື່ນທີ່ດັດແປງຈົນສຸດຂີດແລ້ວ, ໃສ່ກັບຊີວິດຂອງຄົນອື່ນທີ່ເບິ່ງຄືວ່າສົມບູນແບບຢູ່ໃນສື່ສານມວນຊົນ, ອາດພາໃຫ້ເຮົາຮູ້ສຶກທໍ້ຖອຍໃຈ, ອິດສາ, ແລະ ແມ່ນແຕ່ລົ້ມເຫລວ ຄືກັບວ່າເຮົາພາດມັນໄປ ໃນຊີວິດນີ້.
ຄົນໜຶ່ງຜູ້ໄດ້ສະແດງຮູບຂອງຕົນເອງຢ່າງຫລວງຫລາຍ, ບາງເທື່ອ ຫລາຍອັນເພື່ອຕະຫລົກ, ໄດ້ເວົ້າວ່າ, “ການມີຄວາມສຸກຈະມີຜົນປະໂຫຍດຫຍັງ ຖ້າຫາກເຮົາບໍ່ໂຄສະນາ?”12
ດັ່ງທີ່ ຊິດສະເຕີ ບອນນີ ແອວ ໂອສະກາສັນ ໄດ້ເຕືອນເຮົາ ມື້ເຊົ້ານີ້ວ່າ ຄວາມສຳເລັດຜົນໃນຊີວິດ ບໍ່ໄດ້ມາຈາກການມີຄົນກົດ ມັກຊອບ ຫລາຍຂະໜາດໃດ ຫລື ເຮົາມີໝູ່ເພື່ອນ ຫລື ຜູ້ຕິດຕາມ ຢູ່ໃນສື່ສານມວນຊົນຫລາຍຂະໜາດໃດ. ແຕ່ຄວາມສຸກມາຈາກ ການຕິດຕໍ່ກັບຄົນອື່ນຢ່າງມີຄວາມໝາຍ ແລະ ຕື່ມເຕີມແສງສະຫວ່າງໃຫ້ຊີວິດຂອງເຂົາເຈົ້າ.
ຫວັງວ່າເຮົາຈະສາມາດຮຽນຮູ້ໃຫ້ເປັນຄົນທີ່ແທ້ຈິງຫລາຍຂຶ້ນ, ພົບເຫັນເລື່ອງຕະຫລົກຫລາຍກວ່າເກົ່າ, ແລະ ປະສົບກັບຄວາມທໍ້ຖອຍໃຈໜ້ອຍລົງ ເມື່ອເຮົາເຫັນຮູບພາບໃນອຸດົມຄະຕິ ແລະ ສ່ວນຫລາຍຈະພາໃຫ້ເຮົາປຽບທຽບດ້ວຍຄວາມອ່ອນໃຈ.
ການປຽບທຽບບໍ່ໄດ້ເກີດຂຶ້ນໃນສະໄໝຂອງເຮົາເທົ່ານັ້ນ ແຕ່ໄດ້ເກີດມາກ່ອນແລ້ວໃນສະໄໝ່ກ່ອນ. ອັກຄະສາວົກໂປໂລ ໄດ້ເຕືອນຜູ້ຄົນຂອງເພິ່ນ ໃນສະໄໝຂອງເພິ່ນວ່າ “ພວກເຂົາວາງຫລັກເກນຂອງຕົນຂຶ້ນເພື່ອວັດແທກຕົນເອງ, ແລະ ວັດແທກຕົນເອງຕາມຫລັກເກນທີ່ພວກເຂົາຕັ້ງຂຶ້ນນັ້ນ, ພວກເຂົາໂງ່ສ່ຳໃດນໍ.”13
ໂດຍທີ່ມີການໃຊ້ເທັກໂນໂລຈີ ໃນຫລາຍວິທີທີ່ຖືກຕ້ອງ ແລະ ໃຫ້ການດົນໃຈ, ຂໍໃຫ້ເຮົາໃຊ້ມັນເພື່ອສິດສອນ, ດົນໃຈ, ແລະ ເຊີດຊູຕົວເອງຂຶ້ນ ແລະ ຊຸກຍູ້ຄົນອື່ນໃຫ້ກາຍເປັນຄົນທີ່ດີທີ່ສຸດ—ແທນທີ່ເພື່ອສະແດງຮູບທີ່ບໍ່ເປັນຕົວແທ້ຂອງເຮົາ. ຂໍໃຫ້ເຮົາສິດສອນ ແລະ ສະແດງຄວາມຊອບທຳ ໃນການໃຊ້ເທັກໂນໂລຈີ ໃຫ້ກັບຄົນລຸ້ນໃໝ່ ແລະ ເຕືອນເຂົາໃຫ້ລະວັງສິ່ງອັນຕະລາຍທີ່ມາກັບມັນ ແລະ ການໃຊ້ມັນໃນທາງທີ່ທຳລາຍ. ການເບິ່ງພາບສື່ສານມວນຊົນ ຜ່ານແວ່ນຕາພຣະກິດຕິຄຸນ ຈະສາມາດຫລີກລ້ຽງຈາກສຸລິຍະຄາດທາງວິນຍານ ໃນຊີວິດຂອງເຮົາໄດ້.
ຄວາມທະນົງຕົວ
ບັດນີ້ ໃຫ້ເຮົາມາກ່າວກ່ຽວກັບສະດຸດທີ່ເກົ່າແກ່ແຫ່ງຄວາມທະນົງຕົວ. ຄວາມທະນົງຕົວ ແມ່ນກົງກັນຂ້າມກັບຄວາມຖ່ອມຕົວ ຊຶ່ງ “ເປັນຄວາມເຕັມໃຈທີ່ຈະຍອມເຮັດຕາມພຣະປະສົງຂອງພຣະຜູ້ເປັນເຈົ້າ.”14 ເມື່ອມີຄວາມທະນົງຕົວ, ເຮົາມັກຈະຍ້ອງຍໍຕົວເອງ ແທນທີ່ຈະຍ້ອງຍໍຄົນອື່ນ, ຮ່ວມທັງພຣະຜູ້ເປັນເຈົ້າ. ຄວາມທະນົງຕົວ ມັກຈະເປັນການແຂ່ງຂັນ; ເປັນການສະແຫວງຫາທີ່ຈະມີຫລາຍກວ່າຄົນອື່ນ ແລະ ຄິດວ່າເຮົາດີກວ່າຄົນອື່ນ. ຄວາມທະນົງຕົວ ຈະກໍ່ໃຫ້ເກີດຄວາມໃຈຮ້າຍ ແລະ ຄວາມກຽດຊັງ; ກໍ່ໃຫ້ເກີດຄວາມຄຸ້ນເຄືອງ ຫລື ບໍ່ຍອມໃຫ້ອະໄພ. ເຖິງຢ່າງໃດກໍຕາມ, ຄວາມທະນົງຕົວສາມາດຖືກກືນເຂົ້າໄປໃນຄຸນສົມບັດແຫ່ງຄວາມຖ່ອມຢ່າງພຣະຄຣິດໄດ້.
ຄວາມສຳພັນ, ແມ່ນແຕ່ກັບຄອບຄົວທີ່ໃກ້ຊິດ ແລະ ຄົນທີ່ເຮົາຮັກ, ໂດຍສະເພາະ ກັບຄອບຄົວທີ່ໃກ້ຊິດ ແລະ ຄົນທີ່ເຮົາຮັກ—ແມ່ນແຕ່ລະຫວ່າງສາມີ ແລະ ພັນລະຍາ—ໄດ້ຮັບການບຳລຸງລ້ຽງດ້ວຍຄວາມຖ່ອມຕົວ ແລະ ຖືກຂັດຂວາງດ້ວຍຄວາມທະນົງຕົວ.
ເມື່ອຫລາຍປີກ່ອນ ຫົວໜ້າທຸລະກິດຄົນໜຶ່ງ ໄດ້ໂທຫາຂ້າພະເຈົ້າ ເພື່ອເວົ້າເລື່ອງບໍລິສັດຂອງລາວ ຊຶ່ງໄດ້ຖືກຊື້ໂດຍບໍລິສັດອື່ນທີ່ແຂ່ງຂັນ. ລາວ ແລະ ພະນັກງານຫລາຍຄົນຢູ່ຫ້ອງການໃຫຍ່ ມີຄວາມເປັນຫ່ວງວ່າ ເຂົາເຈົ້າຈະຕົກງານ. ໂດຍທີ່ຮູ້ວ່າ ຂ້າພະເຈົ້າຮູ້ຈັກປະທານໃຫຍ່ຂອງບໍລິສັດທີ່ລາວຢາກໄປສະໝັກງານ, ລາວຈຶ່ງໄດ້ຂໍໃຫ້ຂ້າພະເຈົ້າແນະນຳຕົວລາວ ພ້ອມດ້ວຍໃຫ້ຄຳຢືນຢັນທີ່ດີກ່ຽວກັບຕົວລາວ, ແມ່ນແຕ່ຈັດເວລານັດໝາຍໃຫ້ລາວນຳອີກ. ແລ້ວກ່ອນວາງສາຍ ລາວໄດ້ເວົ້າວ່າ: “ທ່ານຮູ້ຈັກຄຳນີ້ບໍ? ເຂົາວ່າ ‘ອ່ອນໂຍນຫລາຍຕາຍຊ້ຳ!’”
ຂ້າພະເຈົ້າເຂົ້າໃຈວ່າ ລາວເວົ້າເປັນແບບຕະຫລົກ. ຂ້າພະເຈົ້າເຂົ້າໃຈຄັກ. ແຕ່ມັນມີຫລັກທຳທີ່ສຳຄັນຂໍ້ໜຶ່ງ ທີ່ຂ້າພະເຈົ້າຄິດວ່າ ເປັນປະໂຫຍດຕໍ່ລາວ. ຂ້າພະເຈົ້າໄດ້ຕອບໄປວ່າ, “ແທ້ຈິງແລ້ວ, ເຂົາບໍ່ໄດ້ເວົ້າແນວນັ້ນ. ຕາມຈິງແລ້ວ, ມັນກົງກັນຂ້າມ. ‘ຄົນອ່ອນໂຍນ … ຈະໄດ້ຮັບແຜ່ນດິນໂລກເປັນມູນມໍລະດົກ’15 ຄືຄຳທີ່ເຂົາວ່າ.”
ໃນປະສົບການຂອງຂ້າພະເຈົ້າ ໃນສາດສະໜາຈັກ ຕະຫລອດທັງໃນການງານຂອງຂ້າພະເຈົ້າ, ຄົນທີ່ຍິ່ງໃຫຍ່ ແລະ ມີປະສິດທິພາບຫລາຍທີ່ສຸດບາງຈຳນວນ ທີ່ຂ້າພະເຈົ້າເຄີຍຮູ້ມາ ແມ່ນຜູ້ຄົນທີ່ອ່ອນໂຍນ ແລະ ຖ່ອມຕົວ.
ຄວາມຖ່ອມຕົວ ແລະ ຄວາມອ່ອນໂຍນ ເຂົ້າກັນດີ. ຂໍໃຫ້ເຮົາຈົ່ງຈື່ຈຳວ່າ “ບຸກຄົນຈະບໍ່ເປັນທີ່ຍອມຮັບຕໍ່ພຣະພັກຂອງພຣະເຈົ້າ, ນອກຈາກເຂົາຈະມີໃຈອ່ອນໂຍນ ແລະ ຕ່ຳຕ້ອຍ.”16
ຂ້າພະເຈົ້າອະທິຖານວ່າ ເຮົາຈະພະຍາຍາມຫລີກລ້ຽງຈາກສຸລິຍະຄາດທາງວິນຍານແຫ່ງຄວາມທະນົງຕົວ ໂດຍການຮັບເອົາຄຸນນະທຳແຫ່ງຄວາມຖ່ອມຕົວໄວ້.
ສະຫລຸບ
ສຸດທ້າຍນີ້, ສຸລິຍະຄາດ ເປັນເຫດການທາງທຳມະຊາດທີ່ໜ້າອັດສະຈັນໃຈແທ້ໆ ຊຶ່ງຄວາມສວຍງາມ, ຄວາມອົບອຸ່ນ, ແລະ ແສງສະຫວ່າງຂອງດວງຕາເວັນ ສາມາດຖືກປິດບັງໄວ້ຈົນໝົດ ດ້ວຍສິ່ງທີ່ນ້ອຍກວ່າ, ເຮັດໃຫ້ເກີດຄວາມມືດ ແລະ ຄວາມເຍືອກເຢັນໄດ້.
ກໍມີເຫດການທາງວິນຍານທີ່ໜ້າອັດສະຈັນໃຈທີ່ຄ້າຍຄືກັນນັ້ນອີກ, ເມື່ອສິ່ງເລັກນ້ອຍ ແລະ ບໍ່ສຳຄັນເລື່ອນເຂົ້າມາໃກ້ໂພດ ແລະ ປິດບັງຄວາມສວຍງາມ, ຄວາມອົບອຸ່ນ, ແລະ ແສງສະຫວ່າງຈາກສະຫວັນແຫ່ງພຣະກິດຕິຄຸນຂອງພຣະເຢຊູຄຣິດ, ແລ້ວມັນຈະປ່ຽນເປັນຄວາມມືດທີ່ໜາວເຢັນໄດ້.
ແວ່ນຕາທີ່ໄດ້ປະດິດຂຶ້ນມາເພື່ອປ້ອງກັນຕາຕອນເບິ່ງສຸລິຍະຄາດເຕັມດວງ ສາມາດຊ່ວຍປ້ອງກັນບໍ່ໃຫ້ຕາຖືກທຳລາຍ ແລະ ບອດໄດ້.17 ແວ່ນຕາພຣະກິດຕິຄຸນ ປະກອບດ້ວຍຄວາມຮູ້ ແລະ ປະຈັກພະຍານເຖິງຫລັກທຳພຣະກິດຕິຄຸນ ແລະ ພິທີການຕ່າງໆ ທີ່ໃຫ້ມີທັດສະນະຂອງພຣະກິດຕິຄຸນ ຈະສາມາດໃຫ້ການປ້ອງກັນທາງວິນຍານ ແລະ ຄວາມແຈ່ມແຈ້ງຂຶ້ນຫລາຍກວ່າເກົ່າສຳລັບບາງຄົນ ຜູ້ທີ່ຢູ່ໃນເຂດອັນຕະລາຍຂອງສຸລິຍະຄາດ.
ຖ້າຫາກທ່ານພົບເຫັນສິ່ງໃດທີ່ມາປິດບັງຄວາມສຸກ ແລະ ຄວາມສະຫວ່າງຂອງພຣະກິດຕິຄຸນໃນຊີວິດ ຂອງທ່ານ, ຂ້າພະເຈົ້າຂໍເຊື້ອເຊີນທ່ານໃຫ້ວາງມັນໄວ້ໃນທັດສະນະຂອງພຣະກິດຕິຄຸນ. ຈົ່ງຫລຽວເບິ່ງຜ່ານແວ່ນຕາພຣະກິດຕິຄຸນ ແລະ ມີຄວາມລະມັດລະວັງ ເພື່ອບໍ່ໃຫ້ສິ່ງທີ່ບໍ່ສຳຄັນ ແລະ ບໍ່ມີປະໂຫຍດ ໃນຊີວິດ ມາປິດບັງພາບຂອງແຜນແຫ່ງຄວາມສຸກນິລັນດອນຂອງທ່ານໄດ້. ສະຫລຸບແລ້ວ, ຢ່າປ່ອຍໃຫ້ສິ່ງລົບກວນໃນຊີວິດ ປິດບັງແສງສະຫວ່າງຈາກສະຫວັນ.
ປະຈັກພະຍານ
ຂ້າພະເຈົ້າເປັນພະຍານວ່າ ເຖິງແມ່ນມີສິ່ງມາປິດບັງສາຍຕາຂອງເຮົາຈາກແສງສະຫວ່າງຂອງພຣະກິດຕິຄຸນ, ແຕ່ແສງສະຫວ່າງກໍຍັງຢູ່ທີ່ນັ້ນ. ແຫລ່ງທີ່ໃຫ້ຄວາມອົບອຸ່ນ, ຄວາມຈິງ, ຄວາມສະຫວ່າງ ຄືພຣະກິດຕິຄຸນຂອງພຣະເຢຊູຄຣິດ. ຂ້າພະເຈົ້າເປັນພະຍານເຖິງພຣະບິດາເທິງສະຫວັນທີ່ຊົງຮັກ; ເຖິງພຣະບຸດຂອງພຣະອົງ, ພຣະເຢຊູຄຣິດ; ແລະ ເຖິງບົດບາດຂອງພຣະບຸດຂອງພຣະອົງ ທີ່ເປັນພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ. ໃນພຣະນາມຂອງພຣະເຢຊູຄຣິດ, ອາແມນ.