Met ewe Ranin Manaman a Kouno?

Ewe ier a no, ua fori wisei non ewe fonu California, ua fiti emon presetenin steik ne churi Clark me Holly Fales me ar famini, non imwer we. Ua rong pwe a keran chok fis ngenir ew manaman. Nupwen aua tori imwer we, a weires an Clark epwe uta me kapong ngeni kem pun mi aea ew pisekin aninisin sekur, uwan, me poun kewe.

Mi nap seni ru maram akkom, Clark, noun ewe at Ty, me ekkoch anuon ra arapakan ngeni 30 [inik] ukukur me souemwen ra no won ew an steik pekin urumot, ra fetanta asachikin ewe Chuk Shasta ukukun 14,180 [engon me ruanu ngerou ipuku wanik ]tekian, ew me nein ekkewe tekian chuk non California. Non aruwen ranin ar we fetan, napengeni ekkewe chon tota ra tori asachikin—ew mettoch mi amwarar a pwonuta pokiten ekkewe maram ra mwoneta ngeni.

Clark I emon me nein ekkewe aramas ra akaewin tikeri asan non na ran. Mwirin an ekis asoso nepekin ewe chuk, a uta me poputa ne fetan. Nupwen a uta, a pwur me seneta me turutiw nepekin ewe chuk, a turutiw ukukun 40 [faik] fit(12 m) iwe mwirin a sokopenitiw won ewe pan mi ais ren pwan ukukun 300 [unupuku] fit(91 m). Nge a fokkun amwarar, pwe Clark mi manau, nge a chok fokkun feiengaw me ese tongeni mwokut.

Ewe manaman a fis ngeni Clark non ei anoninenin fansoun ra keran chok poputa. Ekkoch me nein ekkewe ra akkom tikeri “a seroch” pwe ew mwichen chon fetan won chuk fiti ekkoch chon emwenin won chuk me ekkewe mi angoch non pekin weweitan safei. Ra mwitir ne tumunu ren an chung me awora ngeni pisekin an epwe pwichipwich. A pwan “seroch” pwe ei mwich ew mwichen chon sotuni ew pekin porous fengen me ra fen tinau ew mwichen chon tumunu mettoch mi weiweita seni ew neni ekkewe cell phone rese tongeni och me ia. Ew kukkun enikapter a mwitir no ngeni ewe Chuk Shasta ew awa towanenon. Mwirin ru awa ar retin sotuni ne sotiw nge mi efeiengaw me ese tufich ngeni sepenin me enikapter repwe sotiw me pwan efeiengawen asapwan, ewe chok pilote a sotuni aunungatin me saingonon. Nupwen ewe enikapter a etipengesi an satiw, a “seroch” pwe ewe asapwan a siwin iwe ewe enikapter a sotiw non ukukun chok an ewe mwich epwe mwitir fiti metek ne etikanong Clark non ewe kukkun neni nukunupan an ewe pilot ewe sea.

Nupwen ra tesini Clark non ew pioing nenien ekkewe mi wesen feiengaw, ekkewe tes ra pwari pwe mi chommong chuun mi kup non uwan, sekurun, churaran, me poun; amatan mi pwang; me chommong kinas me kukkun kinas. A “seroch” pun emon chon reirein non inis a angang non ena ran; a kan chok nom non ei pioing fan ekkoch non ew ier. Mwirin ei dokter a apasa pwe ese mwo kukuna emon a kon feiengaw won chunapan me won wan nemokuran nge mi manau. A fateno pwe Clark epwe manau me epwe unusen mwokut fetan. Ewe chon reirei a apasa pwe I ese sinei usun Kot, nge porousen Clark we ese nonno ngeni met a fen kakaeo usun feiengawen non inis me a chok awewei pwe ew manaman.

Nupwen Clark me Holly ra wes ne aporoua usun ei porous, ua kuna pwe a weires ai upwe kapas. Esap pokiten ewe manaman—nge pokiten ew mi napanap. A watte ai memef—ew pwaratan ngun—pwe Holly me emon me emon ekkewe semirit ramen nioch me atoch ra mwot non ewe living rum unukun semer me iner kewe a wor ar nuku pwe ir mi tongeni atiwa met chok epwe fis non ena ran me ir repwe chok feioch. Clark me Holly me nour kewe ruemon watte, Ty me Porter, ir mi nom rech ikenai non ewe Conference Center.

Non ai ekieki usun met a fis ngeni ewe faminien Fales , ua fen ekiek chommong usun nonnomun pwan ekkoch. Nge ifa usun ekkewe Souneng mi uren nuku, ekkewe ra fen angei afeiochun pristut, ekkewe ra fen feioch ren an ekkoch iotek fan iter, ekkewe ra apwonueta ar pwon mi pin me ir mi uren apinukunuk nge ar manaman ese mwo fis? Non ewe napanap ra weweiti ew manaman. Non ewe napanap usun ekkoch ra angei manaman.

Nge ifa usun ekkewe ra riaffou seni watten riaffou—riaffoun inis, riaffoun non mokur, riaffoun memef—non chommong ier ika non unusen manauer? Nge ifa usun ekkewe ra fen mano nge ir mi chok kukkun?

Ru chok maram a ano, ru pea pupunu mi wor nour toropwen mumuta non temple, fiti nour unumon misineri me pwan nimmon ekkoch nefiner, ra fiti efoch kukkun sepenin pokiten ew kukkun sai. Ngang mi nuku pwe ir mi iotek pwe repwe tumun me mwen ewe sai me ennetin iotek nupwen war we sepenin a weri ennetin osukosuk me mwen epwe pwuretiw. Ese wor e manau. Nge ir ?

Mi wor popun an aramas mi och me atongeer kewe repwe eis ei kapaseis napengeni Mormon ra eis: “Met ewe ranin manaman a kouno?”¹

Ai mirit mi aukuk ese tongeni awewei pwata fan ekkoch mi wor eppet seni nang me ekkoch fansoun ese wor. Nge eni ese naf ach weweiti met wewen manaman.

Fan ekkoch sia awewei pwe manaman wewen pwe emon a chikar nge ese wor unusochun awewen me ren pekin sinenapen safei ika usun ach su seni feiengaw ren ach aneasochis ngeni ew memef m fatoch. Nge inamo, ach awewei ew manaman usun “ew mettoch mi fich a fis seni manamanen nang aramas rese weweiti”² a awora ew watten mirit usun mettoch esemuch non nonomuch. Ei awewe a pwan mut ngenikich ne ekieki auchean wisen nuku ren om angei ew manaman.

Moronai a aitikich, “Iwe esap pwan fen ew fansoun emon a efisi manaman tori mwirin ar nuku.”³ Ammon a afanafana, “Kot a awora ew napanap ren minne aramas, ren nuku, repwe anganga manaman mi amwarar.”⁴ Ewe Samon a pwar ngeni Joseph Smith pwe I epwe pwari manaman ngeni ir meinisin ekkewe mi nuku non Itan.”⁵

King Nebuchadnezzar a annuku pwe Shadrach, Meshach, me Abed-nego repwe pin ngeni ewe niosun anu muan a forata mi for seni kon, a anuokusur, “Ika pwe ouse fori, repwe oturukeminong non ew um mi ngetenget.” Iwe mwirin a turunufaser ren “Ami ekiek pwe mi wor emon God epwe tongeni amanaua kemi?”⁶

Ekkei unumon chon kuno mi tupwon ra apasa: “Ika pwe ewe Kot am aua angang ngeni epwe tongeni amanaua kem seni ewe um mi ngetenget . … Nge ika esap, ewe king, epwe chok sinei pwe am ausap pin ngeni an we god.”⁷

A wor rer unusen apinukunuk pwe Kot epwe tongeni amanauer, “nge ika esap,” mi wor unusen ar nuku non An kokkot.

Usun chok, Elter David  A. Bednar an eisini emon anuon ewe a tingor efiochun pristut. “Ika epwe mochenin Semach won Nang pwe kopwe mwokut ren mano non om chok serafo ngeni ewe fonufanen ngun om kopwe sopweno om angang, mi wor om nuku ne fang ngeni An mochen me kosap chikar?”⁸ Mi wor rech ewe nuku “sisap chikar” seni ach riaffoun fonufan pwe sipwe tongeni chikar fochofoch?

Ew kapaseis mi auchea sipwe ekipwichi “Ian sa wano ia ach nuku?” Met ach nuku a chok anonga ewe mochenin ngaseno seni metek me riaffou, ika mi nukuchar ne anonga won Kot ewe Sam me An ewe kokkot mi pin me non Jises ewe Kraist me An Achasefen? Nuku non ewe Sam me ewe Nau a mut ngeni kich sipwe weweiti me etiwa Ar mochen nupwen sia mwoneta ngeni fansoun esemuch.

Ikenai ua pwarata usun manaman. Ach noun Kot ew manaman.⁹ Ach angei ew inis non Nikinikin me napanapan ew manaman.¹⁰ Ewe niffangen emon Chon Amanau ew manaman.¹¹ Ewe Achasefan an Jises Kraist ew manaman.¹² Ewe tufichin manau esemuch ew manaman.¹³

Nupwen mi och ach ioteki me angang fan iten tumunun inisich me echikar fansoun manauach won fonufan, met sipwe fokkun anonga ach ekiek epwe won manamanen ngun mi wor fan iten noun Kot semirit meinisin. Ese nifinifin ach mwicheich, ese nifinifin kich chon ia, ese nifinifin met sia fen fori ika pwe sia aier, ese nifinifin met a fis ngeni kich—mi nonno ngeni kich meinisin mi ewe mumuta ngeni ekkei manaman. Sia manaueni ew manaman, me mi wor manaman mwach. Non iten Jises Kraist, amen.