“Чамд зориулсан ажил надад буй”

Ах, эгч нар аа, Бурханд бидний хүн нэг бүрээр хийлгэх ажил бий. Ерөнхийлөгч Спэнсэр В.Кимбалл эгч нарт хандан хэлсэн ч бүгдэд хамаатай байх нэгэн үнэнийг заасан. Тэрээр “[Дэлхийд] ирэхийн өмнө [бидэнд] тодорхой үүрэг даалгавар хүлээлгэн өгсөн. … Бид эдүгээ нарийн ширийн зүйлийг нь санадаггүй ч энэ нь тэр үед бидний зөвшөөрсөн зүйлийн агуу бодит үнэнийг өөрчлөхгүй”² хэмээн хэлсэн. Ямар эрхэм үнэн бэ! Бидний Тэнгэрлэг Эцэгт та биднээр хийлгэх тодорхой бөгөөд чухал зүйлс бий (Ефес 2:10-ыг үзнэ үү).

Эдгээр тэнгэрлэг үүрэг даалгавар нь давуу эрхтэй цөөхөн хүнд биш, харин хүйс, арьсны өнгө, үндэс угсаа, орлогын түвшин, нийгмийн байр суурь, Сүмийн дуудлагаас үл хамааран бид бүгдэд зориулагдсан билээ. Бидний хүн нэг бүр Бурханы ажлыг урагшлуулахад чухал үүрэг гүйцэтгэх ёстой (Мосе 1:39-ийг үзнэ үү).

Зарим хүн Тэнгэрлэг Эцэг биднийг чухал хувь нэмэр оруулахад ашиглах эсэхэд эргэлздэг. Гэхдээ Тэрээр үргэлж ер бусын зүйл хийхдээ энгийн хүмүүсийг ашигладаг байсныг санацгаа (1 Коринт 1:27–28; С ба Г 35:13; 124:1-ийг үзнэ үү). “[Бид] сонгогчид” бөгөөд “зөв шударга байдлыг тохиолгохоор авчрах” “хүч [бидэнд] буй” (С ба Г 58:27–28).³

Ерөнхийлөгч Рассэлл М.Нэлсон

Рассэлл М.Нэлсон “Их Эзэн таны бодож байгаагаас илүү их зүйлийг танд төлөвлөсөн байдаг. Таныг энэ цаг үед, энэ газрын төлөө хадгалж нөөцөлсөн. …

Их Эзэнд дэлхийг өөрчлөхөд нь та хэрэгтэй байна. Таны төлөө Түүний хүслийг хүлээн авч, дагахын хэрээр та боломжгүйг гүйцэлдүүлэх болно” ⁴ хэмээн тайлбарласан.

Тиймээс, Бурханы биднээр хийлгэхийг хүсэж байгаа ажлыг бид хэрхэн ойлгож, гүйцэтгэдэг вэ? Бидэнд туслах дөрвөн зарчмыг би та нартай хуваалцъя.

Нэгдүгээрт, бусдад анхаарал хандуул. Бид “сайныг үйлдэж явсан” (Үйлс 10:38, мөн 2 Нифай 26:24-ийг үзнэ үү) Христийг дагаж чадна.

Би бүрэн цагийн номлолоосоо эргэж ирснийхээ дараа өдөр бүр зорилготой байдаг байснаа санах болсон юм. Би гэрээнүүдээ сахиж, боловсрол эзэмшиж, гэр бүлтэй болж, орлоготой болох хэрэгтэй байлаа. Гэхдээ би Их Эзэнд надаар хийлгэх үүнээс илүү чухал эсвэл онцгой зүйл байгаа болов уу гэж бодох болсон юм. Хэдэн сарын турш тунгаан бодсоны эцэст би “хэрэв чи хүсэх аваас, чи энэ үед олон сайн зүйлийг хийх арга хэрэгсэл байх болно” (С ба Г 11:8) гэсэн шүлгийг уншив. Тэнгэрлэг үүрэг даалгаврын үндсэн зорилго бол “олон сайн зүйлийг хий[ж]” бусдыг адислах явдал гэдгийг ойлгоход Сүнс надад тусалсан юм.

Бид амьдралдаа юу сурах, ямар ажил хийх, хаана амьдрах гэх мэт шийдвэрт хандахдаа бусдад туслах талаас нь харж болно.

Нэгэн гэр бүл шинэ хот руу нүүжээ. Чинээлэг дүүрэгт байр хайхын оронд нийгмийн болон эдийн засгийн туслалцаа хэрэгтэй дүүрэгт очих хэрэгтэй гэсэн мэдрэмж тэдэнд төрсөн аж. Олон жилийн турш Их Эзэн тэднээр дамжуулан ажиллаж, олон хүнд тусламж дэмжлэг үзүүлж, тойрог, гадсыг нь байгуулсан юм.

Эмчийн мэргэжилтэй нэгэн хүн ердийн хувийн эмнэлэгтэй байсан ч долоо хоногийнхоо нэг өдөр эрүүл мэндийн даатгалгүй хүмүүст үнэгүй үйлчилгээ үзүүлэхээр шийджээ. Хэдийгээр тэр эхнэртэйгээ олон хүүхэд өсгөн хүмүүжүүлж байсан ч бусдыг адислах хүсэлтэй байсан нь хэдэн зуун өвчтөнд дэмжлэг үзүүлэх арга замыг тэдэнд өгөх боломжийг Их Эзэнд нээж өгсөн юм.

Хоёрдугаарт, сүнслэг бэлгүүдээ нээж олон, хөгжүүл. Тэнгэрлэг Эцэг биднээр хийлгэхээр бэлдсэн ажлаа олж тодорхойлон, хийж гүйцэтгэх, таашаал авахад туслах зорилгоор бидэнд эдгээр бэлгийг өгсөн.

Бидний зарим нь “Надад ямар нэгэн бэлэг байгаа болов уу?” гэж боддог. Хариулт нь мөн л “тийм!” “Хүн болгонд Бурханы Сүнсээр бэлэг өгөгддөг болой. Үүгээр бүгд ашиг тусыг олж болохын тулд …” (С ба Г 46:11–12; тодотгол нэмэгдсэн) юм.⁵ Хэд хэдэн сүнслэг бэлэг сударт тэмдэглэгдсэн байдаг ч (1 Коринт 12:1–11, 31; Моронай 10:8–18; С ба Г 46:8–26) өөр олон бэлэг бий.⁶ Зарим жишээ дурдахад, энэрэнгүй сэтгэлтэй байх, итгэж найддагаа илэрхийлэх, хүмүүстэй сайн харьцаатай байх, үр дүнтэй зохион байгуулах, итгэл үнэмшилтэй ярьж, бичих, тодорхой зааж, шаргуу хөдөлмөрлөх зэрэг юм.

Бид өөрсдийн бэлгийг хэрхэн таньж мэдэх вэ? Бид патриархын адислалаа уншин, биднийг сайн мэддэг хүмүүсээс асууж, төрөлх ур чадвараа өөрөө олж тодорхойлон, үүндээ баясаж чадна. Хамгийн чухал нь бид Бурханаас асууж болно (Иаков 1:5; С ба Г 112:10-ыг үзнэ үү). Тэрээр бидэнд өгсөн учраас тэдгээр бэлгийг мэднэ (С ба Г 46:26-г үзнэ үү).

Бид бэлгээ олж нээхийн зэрэгцээ хөгжүүлэх үүрэгтэй (Матай 25:14–30-ийг үзнэ үү). Есүс Христ хүртэл “эхлээд бүрэн байдлыг хүлээн авсан нь үгүй, харин тэрээр бүрэн байдлыг хүлээн авах хүртлээ ач ивээлээс ач ивээлд [үргэлжлүүлж] байлаа” (С ба Г 93:13).

Зураг

Бэн Симонсэний зурсан Аврагчийн зураг

Нэгэн залуу эрэгтэй шашны үнэт зүйлээ сурталчлахын тулд хэд хэдэн зураг бүтээжээ. Надад Аврагчийн зураг таалагдсан бөгөөд нэг хувийг нь би гэртээ өлгөсөн байгаа. Тэр ах уран зургийн авьяас бэлгээ хөгжүүлэн, ашигласан. Тэнгэрлэг Эцэг түүгээр дамжуулан тойргийн гишүүдэд сайн шавь болоход сүнслэгээр нөлөөлсөн юм.

Заримдаа бидэнд онцлог, чухал бэлэг байхгүй мэт санагддаг. Нэг өдөр урам хугарсан залуу эмэгтэй “Их Эзэн минь, хувь хүнийхээ хувьд миний үзүүлэх үйлчлэл юу вэ?” гэж асуужээ. Бурхан хариуд нь “Бусдад анхаарал хандуул” гэв. Харин энэ нь сүнслэг бэлэг байсан юм! Түүнээс хойш тэр эмэгтэй байнга мартагддаг байсан хүмүүст анхаарлаа хандуулах болсон бөгөөд Бурхан түүгээр дамжуулан ажиллаж, олон хүнийг адисалсан. Зарим сүнслэг бэлэг маань биднийг дэлхийн жишгээр нэр алдартай болгодоггүй ч тэдгээр нь Бурханд болон Түүний ажилд нэн чухал билээ.⁷

Гуравдугаарт, саад бэрхшээлийг ашигла. Зовлон зүдгүүр нь Тэнгэрлэг Эцэгийн биднээр хийлгэх гэсэн ажлыг олж нээн, өөрсдийгөө бэлдэхэд тусалдаг. Алма “их тарчлалын эцэст, Их Эзэн … намайг … өөрийн мутар дахь зэмсэг болгосон бөлгөө” (Мозая 23:10)⁸ хэмээн тайлбарласан. Аврагчийн гэтэлгэгч золиослол Түүнд бидэнд туслах боломжийг олгодгийн адил (Алма 7:11–12-ыг үзнэ үү) бид ч гэсэн хүнд хэцүү туршлагаасаа олж авсан мэдлэгээ бусдыг өргөн дэмжиж, хүчирхэгжүүлэн, адислахад ашиглах боломжтой.

Хүний нөөцийн нэгэн амжилттай явсан дарга ажлаасаа халагдсаныхаа дараа патриархын адислалаа уншаад, бусад мэргэжилтэй хүнд ажил олоход нь туслах компани нээх хэрэгтэй гэсэн сүнслэг өдөөлт хүлээн авсан байна. (Тэр ч байтугай манай гэр бүлийг номлолд үйлчлээд ирсний дараа тэр надад ажил олоход тусалсан.) Их Эзэн түүнд илүү их ач холбогдолтой ажлыг өгөхийн зэрэгцээ түүний зовлон шаналлыг бусдыг адислахад туслах хэрэгсэл болгон ашигласан юм.

Нэгэн залуу хосын хүүхэд амьгүй төржээ. Зүрх сэтгэл нь шархалсан тэд өөрсөдтэй нь адил зовлонг туулсан эцэг эхчүүдэд зөвлөгөө өгч, материаллаг тусламж үзүүлэх замаар охиндоо хүндэтгэл үзүүлэхээр шийдсэн юм. Зовлон бэрхшээлийн улмаас уг хосын бусдын зовлонг ойлгох чадвар хөгжсөн байсан учраас Их Эзэн тэднээр дамжуулан ажилласан.

Дөрөвдүгээрт, Бурханд итгэж найд. Бид Түүнээс итгэлтэйгээр, чин сэтгэлээсээ асуух юм бол Тэрээр бидний тэнгэрлэг үүрэг даалгаврыг илчлэх болно.⁹ Үүргээ олж мэдмэгц Тэрээр бидэнд уг ажлаа хийж гүйцэтгэхэд тусална. “Бүх зүйлүүд [Түүний] мэлмийн өмнө байдаг” (С ба Г 38:2 мөн Абрахам 2:8-ыг үзнэ үү) бөгөөд зөв цагт нь Тэрээр бидэнд хэрэгтэй үүд хаалгыг нээж өгнө (Илчлэлт 3:8-ыг үзнэ үү). Тэрээр Өөрийн Хүү, Есүс Христийг бидэнд илгээсэн бөгөөд өөрсдийн маань төрөлхийн ур чадвараас давсан хүч чадал шаардлагатай үед бид Түүнд найдаж болох юм (Филиппой 4:13; Алма 26:12-ыг үзнэ үү).

Орон нутгийн засаг захиргааны шийдвэрт санаа зовсон нэг ахад төрийн албанд нэрээ дэвшүүлэх хэрэгтэй гэсэн мэдрэмж төржээ. Компанит ажлын үйл явц хэцүү байсан ч тэр итгэлээ хөгжүүлж, өрсөлдөхөд хэрэгтэй нөөц боломжийг цуглуулжээ. Хэдийгээр тэр ялаагүй ч, нийгэмдээ тулгарсан чухал асуудлыг олны өмнө гаргаж тавихад шаардагдах удирдамж, хүч чадлыг түүнд Их Эзэн өгсөн гэсэн мэдрэмж төрсөн байна.

Хөгжлийн бэрхшээлтэй хүүхдүүдээ өсгөн хүмүүжүүлж буй нэгэн өрх толгойлсон эмэгтэй гэр бүлийнхнийхээ хэрэгцээг хангаж чадаж байгаа эсэхтээ эргэлздэг байв. Хэдийгээр хэцүү ч гэлээ тэр хамгийн чухал үүргээ амжилттай биелүүлэх хүчийг Их Эзэнээс авч байгаагаа мэдэрдэг.

Нэг талд Их Эзэн бидэнд бурханлаг үүргээ биелүүлэхэд тусалж байхад нөгөө талд дайсан бидний анхаарлыг утга учир бүхий амьдралаас холдуулж, ятгаж болиулах гэж оролддог.

Гэм нүгэл нь бидний хамгийн том саад байж болох бөгөөд энэ нь Ариун Сүнсийг мэдрэх мэдрэмжийг мохоон, сүнслэг хүчийг хүлээн авах боломжийг хязгаарладаг. Бид Тэнгэрлэг Эцэгийн биднээр хийлгэх гэж буй ажлыг хийхийн тулд цэвэр байхыг хичээх ёстой (3 Нифай 8:1-ийг үзнэ үү). Бурхан биднээр дамжуулан ажиллаж болох байдлаар бид амьдралаа авч явж байна уу?

Сатан бас бидний анхаарлыг чухал бус зүйлсээр сарниулах гэж хичээдэг. Их Эзэн Сүмийн эхэн үеийн удирдагчдад “миний зүйлүүд дээр мөн чиний дуудагдсан тэрхүү тохинуулал дээр гэхээсээ илүүгээр оюун чинь дэлхийн зүйлүүд дээр байсаар ирлээ” С ба Г 30:2) хэмээн анхааруулсан. Бид тэнгэрлэг үүрэг даалгавраас маань холдуулсан дэлхийн зүйлсийг хийж байна уу?

Түүнчлэн Сатан бидэнд чадваргүй гэх мэдрэмж төрүүлэн, урам зоригийг мохоодог. Тэр бидний ажлыг хэт их буюу сүрдмээр болгож харагдуулдаг. Гэхдээ бид Бурханд итгэж чадна! Тэр биднийг хайрладаг. Тэр биднийг амжилттай байлгахыг хүсдэг. Тэр “[Бидний] өмнө … явагч нь ЭЗЭН юм. Тэр [бидэнтэй] хамт байж, [биднийг] орхихгүй” (Дэд хууль 31:8; мөн Дуулал 32:8; Сургаалт үгс 3:5–6; Матай 19:26; С ба Г 78:18-ыг үзнэ үү).

Сатан бидний ажлыг бусдад оноосон үүрэгт ажлаас доогуур үнэ цэнтэй мэт харагдуулах гэж бас хуурдаг байж болох юм. Бурханаас ирсэн даалгавар болгон чухал бөгөөд “Их Эзэний [бидэнд] зарлигласан түүгээр бахархах” үедээ бид сэтгэл хангалуун байх болно (Aлма 29:9).

Бурханыг биднээр дамжуулан ажиллахын хэрээр дайсан бидэнд хийж бүтээснээ өөрийн хүчээр хийсэн гэсэн бодлыг төрүүлэн, уруу татдаг. Гэхдээ бид Эцэгийг алдаршуулах замаар өөрийгөө магтан сайшаахаас зайлсхийж, Аврагчийн даруу үлгэр жишээг дагаж чадна (Матай 5:16; Мосе 4:2-ыг үзнэ үү). Нэгэн сэтгүүлч амьдралынхаа туршид ядууст тусалсан үйл хэргийнх нь төлөө Тереза эхийг магтан сайшаахыг хүсэхэд тэр “Энэ бол [Бурханы] ажил. Би зүгээр л … Түүний мутар дахь … харандаа адил юм. Тэр бодохыг нь бодож, бичихийг нь бичдэг. Үүнийг хийхэд харандаа ямар ч хамаагүй шүү дээ. Харандаа зөвхөн өөрийгөө ашиглуулах боломжийг л олгодог юм”¹⁰ хэмээн хариулсан ажээ.

Хайрт ах, эгч нар аа, би та нарын хүн нэг бүрийг “биеийнхээ эрхтнүүдийг зөвт байдлын зэвсэг болгон Бурханд өргө” (Ром 6:13) хэмээн урьж байна. Өөрийгөө Түүнд өргөнө гэдэг нь Түүнд тус нэмэр болохыг хүсэж байгаагаа мэдэгдэж, Түүний удирдамжийг эрэлхийлэн, хүч чадлаас нь хүртэхийг хэлнэ.

Мэдээж, бид төгс үлгэр жишээ, Есүс Христ рүү харж болно. Дэлхийд ирэхээс өмнөх амьдралд Тэнгэрлэг Эцэгийг “Хэнийг илгээх вэ би?” хэмээн асуухад

Есүс “Би энд байна, намайг илгээгтүн” (Абрахам 3:27; мөн Исаиа 6:8-ыг үзнэ үү) хэмээн хариулсан.

Есүс Христ бидний Аврагч, Гэтэлгэгч байхаар урьдчилан томилогдсон үүргээ хүлээн авч, Өөрийгөө бэлдэж, үүргээ биелүүлсэн. Тэр Эцэгийн хүслийг (3 Нифай 27:13; Иохан 6:38; 6:38-ыг үзнэ үү) мөн тэнгэрлэг үүрэг даалгавраа ч гэсэн биелүүлсэн.

Бид Христийн үлгэр жишээг даган, өөрсдийгөө Бурханд өргөх хүсэлтэй байх юм бол Тэрээр ажлаа урагшлуулан, бусдыг адислахад биднийг ашиглана гэдгийг би гэрчилж байна. Есүс Христийн нэрээр, амен.