Pwe Ami Pwapwa Epwe Unusoch
Jises Kraist I ewe popun echikara meinisin, kinamwe, me fefeita esemuch.
Mwongei me pwii kana, uwa fokkun pwapwa ne nonnom remi. Iwe ina met uwa mochen kapas ngeni kemi usun non ei sosoran—an wor ach unusen pwapwa.
Non ekkei ran mi wor ew itenapen ew porous a mak, “Osukosuk a atai ewe muu [me] fonufan.”1 Seni taifun me no me watten pwichikaren fonu me pwasaka, seni watten ekei me chechin fonufan ngeni maun me semweningaw, usun unusen “fonufan [a] nom non osukosuk.”2
Minion aramas ra fen tou seni imwer, me chommong aramas ra fen osukosuk ren ekkewe fitikoko. Aninifengen non famini me mwichen aramas rapwan weires ren ar nuokus non netiper, tipemwaramwar, me mochen rese pwonuta ra wakichenong non osukosuk. A tongeni weires ach sipwe mefi ewe pwapwa Liai a aiti ngeni kich pwe ina popun manau.3Fan ekkoch sia eis: “Ian upwe kunnuno ia ren kinamwe? Ifan ai aurur … ?”4 Sia aureki, “Ifa usun ai upwe kuna pwapwa non ekkei osukosuken manauen fonufan”?
Eni ponuwan epwe mecheres, nge mi fen pung seni an Adam we fansoun . Pwapwa esemuch a pwa ren ach anonga ach ekiek won ach we Chon Amanau, Jises Kraist, me manaueni ewe kapas allim usun I mi pwomweni me aitikich. Ika a nap kaeo usun, me nuku non, me apiru Jises Kraist, epwe nap ach weweiti pwe I ewe popun echikara meinisin, kinamwe, me fefeita esemuch. A tingor ngeni kich meinisin sipwe feito Ren,5 ew tingor Preseten Henry B. Eyring a anapanapa pwe “ina ewe auchean tingor emon a tongeni etiwa.”6
Kaeo usun Jises Kraist
Ifa usun sipwe tongeni feito Ren? Non ewe April, Preseten Russell M. Nelson me Elter M. Russell Ballard ra pesei ngeni kich pwe sipwe kaeo seni “The Living Christ”7 pwe kinikinin ach kaeo usun ewe Chon Amanau. Chommong souneng ra etiwa ewe tingor me ra feioch. Non ekkewe chok ran, emon chienei a ngeni emon me emon noun kewe semirit kapin ewe toropwe fiti fengen me ekkoch sasing ra awewei ew me ew ekkewe porous. A pesengeni noun kewe ar repwe anisi nour kewe ar repwe weweiti me chechemeni. Mwirin, chienei we a fichi echo fition noun noun we emon nengin wonu-ier a achocho ngeni ne apasa, ewe Kinikin a chemeni non an pwapwa me tongeni. Ua apareni pwe ika emon wonu-ier a tongeni, upwe pwan tongeni!
Nupwen ua fen kaeo usun manauen Jises Kraist me an afanafan ren ai nikitu ne chemeni “The Living Christ” ai kinisiou me tong fan iten ach we Chon Amanau a fen napeno. Ew me ew kinikinin mak seni ena toropwe a wor afanafan me a fen awatteno ai weweiti usun wisan me an misin won fonufan. Met ua fen kaeo me mefi non ei fansoun kaeo me ekiek a apungano pwe Jises I ennetin “ewe saram, ewe manau, me ewe apinukunukun fonufan.”8 Ekkewe pukefel nom me kapasen nouch soufos ikenai ra mak ika kapas non ar mwareiti I a pwarata pwe “Aanan ina ewe aan a wenengeni pwapwa non ei manau me manau esemuch non ewe fonufan epwe feito.”9
Nuku non Jises Kraist
Nupwen oupwe kaeo usun manauen Kraist me an afanafan non sokopaten napanap, ami nuku non I epwe napeno. Oupwe sinei pwe I mi tongei emon me emon ami me unusen weweitikemi. Non an we manau won fonufan non 33 ier, a riaffou ren an ese ketiw; ninni; echik, kaka, me apwangapwang;10 anamon; aramas ra kapas mi ngaw ren ar turunufasei; me amuchunon, ew metekin mano ren poun aramas mi tipis.11 Non ewe Ataken Gethsemane me won ewe irapenges won Calvary, I a mefiachmetek meinisin, ach riaffou, sossot, semwen, me apwangapwang.12
Ese nifinifin met sia riaffouni, I ewe popunechikara. Ir ekkewe ra mefi sokopaten efeiengaw, netipeta, semwenitam ika riaffoun mwen, eitengaw me fen ekkoch ninni, ika feiengawen ngun pokiten tipis ika wewengaw ra tongeni unusochuno me ren ewe Chon Angasano ewe fonufan. Nge inamo, I esap tonong ika sise tingorei. Sipwe fokkun feito Ren me mut ngeni I epwe fori an manaman.
Non ew ran mi ningoch non spring ua sukano asamei we pwe upwe mefi ewe asapwan. Emon kukkun machang a changenong iwe mwirin a apareni pwe esap ikei ewe a mochen changeno ie. A nuokus ne changefetan non ewe rum, a chok soun changeiti ewe kinasen ewe asamwacho ren an mochen tou. Uwa achocho ne emwenieu ngeni ewe asam mi suk, nge a fokkun nuokus me mwitir changeno. Iwe a sotiw won katenin ewe asamwacho non an pekus. Ua angei ewe purum me apweteteno ne eitano nesopun we ngeni ikewe ewe machang a nom ie. Nupwen ua amwochu nesopun ewe purum unukun pechen, ewe machang a tota won. Ua apwetete ne fetan ngeni ewe asam mi suk me kamwochunuk ewe purum ren ai tongeni. Atun chok ai tori ewe asam, ewe machang a changeno.
Usun ewe machang, fan ekkoch sia nuokus ach sipwe nuku pwe sise weweiti an Kot ennetin tong me mochen epwe anisi kich. Nge nupwen sia kaeo usun an Semach won Nang we kokkot me an Jises Kraist misin, sia weweiti pwe Ar mochen pwe sipwe pwapwa esemuch me fefeita.13 Ra pwapwa ar repwe anisikich nupwen sia tingor, kutta, me fichifich. .14 Nupwen sia aea ach nuku me etekisona inisich ngeni Ar ponuweni ach tingor, sia ngaseno seni met mi aukatiw ach wewe me nuku, iwe epwe pwa ngenikich ewe aan.
Jises Kraist pwan I ewe popun kinamwe. A tingor ngeni kich “sipwe anongonong won [An] we pochokun”15 me a pwon ngeni kich ewe “kinamwe … ewe a ngeni kich ach wewe,”16 eu memef a wor nupwen Ngunun We a “kapasen kinamwe ngeni ngunuch”17 ese nifinifin sokopaten osukosuk unukuch. Ina mwo ika osukosuken non manauach, osukosuken non famini, ika osukosuken fonu, epwe wor kinamwe ika pwe a wor ach epinukunuk non Noun Kot we Anaemo ewe a wor an manaman ne angasano ach kewe riafou non manauach.
Snježana Podvinski I emon chon ew kukkun mwichen Souneng non Karlovac, Croatia, a anongonong won ewe Chon Amanau nupwen punuwan we me seman me inan ra mano non nefinen wonu maram non ewe ier a no. A netipechou, nge mi wor an kapasen pwarata pwe famini mi fochofoch, a nouni unusen noun moni ne sai ngeni ewe tempel, ikewe a riri ngeni punuwan we me seman me inan. A aporousa pwe non ekkena ran non ewe tempel ina met a ochu manauan. Pokiten an kapasen pwarata mi pochokun non Jises Kraist me An Achasefan, a mefi kinamwe me mefi chikar minne a pwa apochokuna ekkewe unukun.
Ach nuku non Jises Kraist a wato chommong niffang nap seni chikar me kinamwe. Usun Preseten Henry B. Eyring a apasa: “Ua men kinisou ren ekkewe chommong napanap ewe Samon a churiei fiti ewe Chon Ekinamwe nupwen a auchea ngeniei kinamwe. Nge Semach won Nang ese chok mochen ach kinamwe nge akkaewin ach fefeita.”18
Pokiten an Jises Kraist Achasefan, minne mi pachenong ekkewe niffangen ngaseno me manausefan, sia tongeni aier, siwin, me fefeita esemuch. Pokiten ewe manaman A ngeni kich nupwen sia aneasochis, sia tongeni murinono nap seni ach sipwe pwisin fori. Eni sisap unusen weweiti ifa usun, nge emon me enom kich sia mefi nuku non Kraist sipwe pwan angei watten mirit usun nonnomuch me ach popun, epwe anisi kich ne finata met sipwe fori ren ach weweiti.
Ina mwo ika ewe fonufan epwe achocho ne oturukichetiw ngeni kinikinin “man,”19 ach sinei pwe Kot I Semach epwe affata ngenikich pwe mi wor ach tufich seni nang me pwan mi tekia. Ina mwo ika ewe fonufan a ereni kich pwe ei manau ese wor popun ika auchean, ach sinei pwe noun Kot we Anamon a fen atufichi ngeni kich pwe sipwe ngaseno me manausefan epwe ngeni kich apinukunuk ren fefeita esemuch.
Pwomeni Jises Kraist
Nupwen a nap ach kaeo usun Jises Kraist, epwe watteno ach nuku non I iwe epwe mecheres ach mochen tapweno mwirin an nenien appiru. Epwe nap ach mochen apwonueta An kewe annuk. A wor ach mochen ne angasa an ekkoch riaffou usun I a fori, me sia mochen ir repwe mefi ewe kinamwe me pwapwa sia fen kuna.
Pwata a kon manaman ach sipwe achocho ne fori usun I a fori? Pokiten nupwen sia wanong non foffor met sia nuku, ewe Ngun mi Fel epwe pwarata usun ennet esemuch.20 Jises a auroura Noun kewe chon kuno repwe aneasochisi an kewe annuk pokiten I mi sinei pwe nupwen sia tapweno mwirin An nenien appiru, sipwe poputa ne mefi pwapwa, me nupwen sia soposopono won An we aan, sipwe tikeri ew unusochun pwapwa. A awewei, “Ekkei mettoch ua fen apasa ngeni kemi, pwe ai pwapwa epwe nonnom remi, iwe ami pwapwa epwe unusoch.”21
Met ach kapasen pwarata ra kauuta won ewe nongonongen Jises Kraist me An we kapas allim? Nupwen osukosuken manau repwe achou kich, sia nuokus ne kutta ew puken aurour ika eu maken won internet fan iten aninis? Ach awora fansoun ne aueta me apochokunano ach mirit me kapasen pwarata usun Jises Kraist epwe wor niwinin mi murino non fansoun sossot me osukosuk. Ach aneani ekkewe pukefel iteiten ran me ekipwichi kapasen soufos mi manau; iotek mi auchea; ekiekoch ne angei ewe sacrament iteiten wik; angang ngeni ekkoch usun ewe Chon Amanau—ekkei mwokutukut repwe winiti nongonongen manau mi pwapwa.
Met a ngonuk pwapwa? Om kuna famini nesopun ewe ran? Ewe menemenoch re nom awesi angang mi och? Ewe saram non mesen emon nupwen ka anisir mwarei chour? Kopwe awora och fansoun om kopwe ekiek won om kewe feioch, iwe mwirin kutta ekkoch aanen om kopwe aea ngeni ekkoch. Nupwen ka soposopono ne aninis ngeni ekkoch me chunata pwium me fefinom non aparum ewe ika me non unusen ei fonufan ikewe ie a chommong sokkun osukosuk ia, kopwe mefi watten kinamwe me chikar me fefeita.
Feito Ren. Ua pwarata pwe nupwen ka anonga manauom won Jises Kraist, kopwe kuna pwapwa non om nonom , ese nifinifin. Ennetin, “I, ewe chok Emon,”22 ewe ponuwan. Awora fansoun me fori fansounom kopwe sinei Jises Kraist ren om achocho ne kaeo, awatteno om nuku non I, me achocho ne winiti usun I. ika pwe sia fori ekkei, iwe kich sipwe pwan mwokut ne apasa, fiti kukkun Laynie “Sipwe kinisou ngeni Kot ren an niffang Noun we ese wor met mi nonno ngeni.”23 Non ewe it mi pin me feioch iten Jises Kraist, amen.