Netipen ewe Fefin mi Mano Punuan

Ua men fokkun feioch ai we angang ngeni ekkewe Souneng seni ewe Pacific non ai we ierin serafo. Ewe nuku, tong, me fangono ren ekkei Souneng ra fokkun angang ren unusen netiper a ur netipei ren pochokun, me kinisou, me pwapwa. Porouser kei achok pwan usun porousom ika porousemi.

Ua ekkieki pwe ekkei Souneng ra nonnofengen me ewe fefin mi mano punuan I ewe Chon Amanau a kuna nupwen I “a mot…. A nennengeni ekkewe aramas ra kan isetiw nour kewe moni: Chommong ekkewe mi pisekisek ra isetiw chommong moni.

“Iwe emon fefin mi woungaw mi mano punuan a feinno o isetiw ruofou foun moni. …

“Me A korato noun kewe chon kaeo, iwe a apasa ngenir, Upwe apasa ngeni kemi pwe ei fefin mi woungaw mi mano punuan, a fakkun watte an asor a isetiw non ewe neenien asor nap senir meinisin.

“Pun.. ekkewe ekkoch ra isetiw minne mi somono seni ar pisekisek: nge ewe fefin mi woungaw a isetiw meinisin minne a wor ren, a fangeno meinisin minne epwe manau seni.”¹

Ina mwo ika noun kewe ruofou foun moni mi chok kukkun, ngeni ewe Chon Amanau a ekkieki pwe an we niffang a fokkun watte, pun a fangono mettoch meinisin. Non ena otun, ewe Chon Amanau a wesewesen sinei ewe fefin mi mano punuan, pun an niffang a pwarata netipan ngeni I. A fangono mettoch meinisin seni unusen netipan me an nuku pwe mi sinei pwe metekewe an “mochen” epwe ponueta.

Ua kuna pwan usun ei manau ren ekkewe Souneng seni Pacific. Non ew kukkun sopw me won ewe fonu, ., emon mwan mi chinnap me punuan ra angei ewe tingor seni ekkewe misineri pwe repwe eisini Kot ika ekkewe nesen ra aitir mi ennet. Non ei fanosun rapwan ekieki ussun ekkewe moktukunun ekkei tingor a namwot repwe feri ika ewe penu ra angei a emwenir ar repwe etiwa ewe kapas allim mi niwinsefan. Ra echikipin me iotek ar repwe sinei ika ewe Mwichefen me Puken Mormon mi ennet. Ponuen ar kewe iotek a fis ngenir non eu napanap mi murino fatochun apochokun: “Ewer! Mi Pung!”

Ra finata ar repwe papatais pun ra angei ei pwarata. Ei finata epwe aweiresi manuer. Ar finata ne etiwa ewe kapas allim me paptais a aweiresi manauer non sokkopaten ann. Ra tou seni ar kewe angang, me nikitano nonomur nein aramas, chiechier mi auchea a wesino, aninis, tong, me sufonun famini ra wesino. Iei ra chok fetan ngeni Fan iteitan Raninfel, ra ekkesiwin ngeni ar fiti chiechier kewe ekkewe ra fetan won ewe efoch an mi ngaw.

Non ekkei fansoun mi weires, ekkoch ra eisini ei mwan mi murino ika met a mefi usun met ra finata ar repwene choni ewe Mwichefen. Ponuan me ren amen mecheres me pochokun a apasa “ mi ennet, ika met? Am finata amen unusen fatoch.”

Ekkei ruemon minafon Souneng ra fokkun usun chok netipen ewe fefin mi mano punuan. Ra, usun chok ewe fefin mi mano punuan, “fangono mettoch meinisin” pwer repwe tongeni fangono, pwe ir mi sinei pwe fangono ren met ar “mochen.” Repwe angei feiochun ren ar nuku non netiper me nikitu non ar nuku nupwen ar kewe fansoun riafou, ar chourek mi pwaseno. Ra fokkun rokopwanino me angei ar aninis seni ekkewe souneng me rapwan fokkun unusen pochokun ren wiser me non ewe Mwichefen.

Mwirin ar fangeno ar mettoch “menisin”, ewe ran mi auchea ngenir a fis nupwen ra riri fengen ren famini fochofoch non ewe tempel. Ei a nonnofengen ussun an fori ngeni ekkewe aramas ra siwin me ra nom fan emwenien Alma, “ewe Samon a apochokunareno pwe repwe tongeni engino ngeni achour kewe ren mecheres, iwe ra fangeta fiti pwapwa me fiti tipepos ngeni mochenin ewe Samon meinisin.”² Ina usun non netipen ewe fefin mi mano punuan a pwan pwa me non ekkei pupunu mi murino.

Ua pwan mochen porous ussun chek pwan eu fansoun nupwen ewe fansoun a pwapwano usun non netipen ewe fefin mi mano punuan. Non Samoa, aua angang ren mwichen sopw ne angei mwumwuta pwe ekkewe misinari repwe tongeni afanafana ewe kapas allim. Ekkoch ier a no, ua fos ngeni emon Samon seni eu sopw ikewe ie ekkewe misinari rese tongeni no afanafana ewe kapas allim non chommong chommong ier. Ai we fos ngeni ewe mwan a fis mwirin ei Samon mi tekia a suki ei sopw ngeni ewe Mwichefen, a mwumwuta ekkewe misinari ngeni ekkewe aramas ra mochen kaeo ussun ewe kapas allim me ekkewe annuk .

Mwirin chommong ier, ua mochen upwe fori eu minafon ekesiwin, ua mochen kaeo met a fis pwe ei Samon mi auchea a feri ei mettoch. Nupwen ua eisini ewe Samon, a penueni, “Emon mwan a tongeni nonnom non rochopwak non chok fansoun mochomoch, nge epwe wor eu fanosun epwe mochen feito ngeni ewe saram.”

Ei Samon mi auchea, a suki ewe sopw, a pwarata usun netipan ewe fefin mi mano punuan- eu netip a pwetete nupwen ewe tong me ewe saramen ennet mi pwa. Ei souemwen a mochen epwe fori och mettoch an epwe siwini ekkewe oreni, me a mochen siwini ekkoch sokun manau, me uta pechekun pwe ekkoch repwe tongeni kuna feioch. Ei emon souemwen netipan a affani ussun pwapwan noun kewe aramas nap seni oreni, nonomunfonu, me pochokun. A nikitano ekkei ekiek pokiten an mochen fori met feri met Preseten Thomas S. Monson a aitikich: Nupwen sia tapweno mwirin ewe nenien appiru an ewe Chon Amanau, sia angei ewe tufich ne winiti eu saram non manauan ekkoch aramas.”³

Saigon, upwe porous ussun pwan eu fansoun nein ekkewe Souneng ra nom non Pacific a men unusen auchea ngeni ei. Ekkoch ier ano, ngang emon chon aninis non eu mwichen pisop non eu wart minafo non American Samoa. Mi wor 99 souneng, ekkoch chon atake, chon angang non cannery, chon angangen koverment, me ar kewe famini. Nupwen ewe Aewin Presetensi ra esinesin non 1977 pwe eu tempel epwene kaueta non Samoa, aramas meinisin ra kinisou me pwapwa. Nupwen chon American Samoa ra mochen feino ngeni ewe tempel ra feino Hawaii ika New Zealand. Ei sai mi watte niwinin me napengeni ese tufich ngeni ekkewe souneng..

Non ei fansoun, chon mwichefen ra pesepes ne watiw asor ar repwe anisi ne aueta ekkewe tempel. Ren ei popun, am we mwichen pisop ai wa tingorei chon ewe wart repwe iotek faniten met repwe tongeni fangono. A kawor ewe ran ar repwe chufengen famini me watiw ar kewe asor. Mwirin, nupwen ese chiwen wor aramas ra suki ekkewe asor, am we mwichen pisop mi netipetekison me a kuu netipei ewe amwararen fangono an ekkewe souneng ren an nukun me ar mochen ren unusen netiper.

Pun ua sinei iteitan famini me ar kewe mwokutukutun, ua mefi pochokun me mwar ren met mi fis, sufon, me tipetekison. Ekkei aramas non ar sokkopaten ann ra fangeno roufou moni ussun chek ewe fefin mi mano punuan ra fangono ukun met ra “mochen” me ren pwapwa ra aninis non ewe pwon ren kautan ewe tempel non Samoa. Ekkei famini ra epinano mettoch meinisin ra tongeni ngeni ewe Samon, ren ar nuku ewe Samon epwe anisir. Ar kewe asor ra pwarata usun netipan ewe fefin mi mano punuan. Ekkei aramas meinisin ra ngeni ren unusen netiper me ra ngeni ren pwapwa pun ewe netipan ewe fefin mi mano punuan a anisir repwe tongeni kuna ren ewe mesen nuku ekkewe feioch mi tekia ra tufich ren ar kewe famini me pwan tufich ngeni ekkewe aramas meinisin non Samoa me American Samoa. Ua sinei pwe ar kewe asor mi pin a sin me ketiw me ren ewe Samon.

Netipan ewe fefin mi mano punuan a fangeno ruofou moni mi eu netip epwe ngeni mettoch menisin ren an oturesi seni ar nikitu, weires, esit, me amam; me ren ar mwarei sokkopaten chourek. Netipen ewe fefin mi mano punuan a kuna, mefi me sinei ewe saramen ennet me epwe fangeno mettoch menisin me etiwa ena ennet. A pwan anisi aramas meinisin pwe repwe pwan kuna ena saram me angei ena eukukun pwapwa ese much. Saingon, netipen ewe fefin mi mano punuan mi wewen eu mochen ne fangeno mettoch meinisin ne aueta ewe muun Kot won ewe fonufan.

A namwot sipwe fiti ekkewe Souneng meinisin ne feri met mi namwot ne manaueni usun netipan ewe fefin mi mano punuan, me ennetin pwapwaiti ekkewe feioch repwe anisikich ren met sia “mochen.” Ua iotek fan iten emon me emon kich mi eu tingor pwe sipwe manaueni usun manauen ewe fefin mi mano punuan ne mwarei ach kewe rchourek, feri fangeno mi namwot, me angei ewe mochen ne ngeni me feri. Ua pwon pwe ewe Samon epwe apwonueta mete kewe oua mochen. Netipen ewe fefin mi mano punuan mi masou ren kinisou pwe ewe Chon Amanau pwe, “I a mefi riaffou me metek”⁴ pwe esap namwot ne un seni ewe “kap mi kipwin.”⁵ Nge ina mwo mi wor ach kewe apwangapwang, me riaffou, pokiten ekkei , A sopweno ne ngeni kich poun kewe, ekkewe mi pos fanitach. Epwe anisikich ika sa tongeni me mochen ne feito ngeni ewe saramen An we kapas allim , etiwa I, me mut ngeni epwe anisi kich ren met ach mochen .

Ua pwarata ai kapasen pwarata ussun ewe tong mi nap sa mefi pun sa tapweno mwirin me kaeo ussun ewe Samon Jises Kraist. Ua tongei me etiwa Preseten Thomas S. Monson I emon soufosen Kot won ei fonufan. Ewe Puken Mormon mi pwan eu kapasen pwarata ussun Jises Kraist ngeni ei fonufan, me ua tingor ami meinisin oupwe anneani me kaeo ussun an porous ngeniikemi. Ekkewe meinisin repwe etiwa ewe tingor an ewe Samon ne feito ngeni I repwe kuna kinamwe, tong me saram. Jises Kraist I ach Nenien Appiru mi nap me ach Chon Amanau. Pokiten chok Jises Ckraist, me ewe manamanen an we Achasefan ese much, sia tongeni angei manau ese much. Ua pwarata ussun ei non Itan mi Pin, I Jises Kraist, amen.