Ekkewe Osupwang Mwach
Ekkoch me nein ekkewe mochenin aninis sia tongeni fori ra pwisin nonnom non ach famini, nein chienach, non ach wart, me non neniach we.
Non ekkei ran, sia fen kuna chommong sokkun osukosuk non Mexico, Merika, Asia, Caribbean, me Africa. A pwarano usun ngoroun aramas mi aramasoch ra fen fori mettoch ne anisi ekkewe ra nom non feiengaw ika osukosuk me ekkewe a wor ar mano. Ua fokkun pwapwa ai ua kuna fopun non Texas me Florida, ar ra fiti ekkoch, ra fen ufour ewe sipirungu Helping Hands [Aninis ren Pau] me ra aninis ne nimeti ekkewe imw mi nimengaw mwirin ekkewe taifun. Chommong ngeroun aramas ra pwan mochen no ikewe mi wor osukosuk ika pwe rese towaweno. Nge, oua fen fangafangoch ne akukkunano riaffou. Ami fangoch me kirekiroch ra amefi ekkoch me ra napanapen Kraist.
Ikenai ua mochen fos won ew kinikinin angang ua mefi pwe mi auchea ngeni kich meinisin—ese nifinifin ian sia nom ia. Kich meinisin ekkewe sia fen kuna porousen ekkei ran me sia mochen aninis nge sise sinei met sipwe fori, ponuan we mi fen nonom chock mwach.
Ewe Chon Amanau a aitikich, “Pun ika emon a mochen senani manauan, iwe epwe pout seni, nge ika emon a pout seni manauan fan itei, iwe epwe manau.”1 Preseten Thomas S. Monson a apasa usun ei uwekisin: “Ua nuku ewe Chon Amanau a ureni kich pwe ika sisap fangeno inisich non ewe angang ngeni ekkoch, iwe a chok kukkun popun manauch. Ekkewe ra chok ekieki pwisin inisir repwe kisino me poutsenir manauer, nupwen ekkewe ra fangeno manauer ne angang ngeni ekkoch repwe marino me pisekisekino—iwe repwe kuna manau.”2
Sia manau non ei fansoun nupwen sia ekiekin ekkewe kukkun screen sia komoch non pouch kewe napseni ach ekiekin ekkewe mi pwenni kich. Sia fori text are tweet won computer napseni ach nengeni mesan emon o emenimen ngenir are sise pwisin fos ngenir. Sia kan ekiekin fitemon aramas mi sani are tapweno kich won computer napseni ach afarapachei chiechiach kewe o pwari ach tong ngenir me ach ekieki usur. Ennetin ekkewe phone me computer mi kan amwarar ne anisi kich ne achoufetanei ewe kapas allim an Jises Kraist me fos ngeni chon ach famini me chienach kewe mi touau seni kich, ika sisap ekiekin ifa usun sia aea ekkei mettoch, sipwe siwini ach ekieki ne ekiekin pwisin kich o sipwe nemenano pwe popun ach manaueni ewe kapas allim pwe sipwe anisi ekkoch.
A watte ai tong me nuku non ami ekkewe ierin enuwon me fopun me serafo. Ua fen kuna me mefi usun ami mochen ne angang ngeni ekkoch me siwini forun fonufan. Ua nuku pwe napengeni chon ewe Mwichefen ra ekieki pwe anisi ekkoch ina watten kinikinin ar pwon mi pin me wiser ren chon kuno. Nge ua pwan ekieki pwe fan ekkoch mi mecheres ach sisap kuna ekkoch watten tufichin angang ngeni ekkoch pokiten sia osukosuk ika pokiten sia kukutta watten aanen ach sipwe siwini ewe fonufan iwe sise kuna pwe ekkoch me nein ekkewe mochenin aninis sia tongeni fori ra pwisin nonnom non ach famini, me nein chienach kewe, non ach kewe wart, me non neniach kewe. A ku netipach nupwen sia kuna ewe riaffou me watten osupwang an ekkewe ra towaweno, nge sise fen kuna pwe mi wor emon a momot rech a mochen ach aninis me chiechi ngeni kich.
Sister Linda K. Burton a urenikich porousen emon presetenin steik ren Fin Anisi ewe, a fiti ekkoch ne angang, ne ioii panangket fan iten aramas mi woungaw non ekkewe ier 1990. “I me noun nengin ra uwei efoch taraku mi ureno ren ekkana panangket seni London ngeni Kosovo. Fansoun ar sai ngeni imwer a mefi ew memef seni ewe Ngun minne a ku netipan. Iei ewe memef: ‘Met ami oua fen fori a ew mettoch mi och. Iei feino neimw, fetano epekin ewe aan, me angang ngeni chon orum!’”3
Met ochun ach sipwe angasano ei fonufan ika sipwe nikitano ekkewe osupwang an ekkewe mi kon arap ngeni kich me ekkewe sia kon tonger? Ifa auchean ach sipwe pwakini ewe fonufan, ika ekkewe aramas unukuch ra osukosuk nge sise apareni? Semach won Nang a fen enenia ekkewe ra mochen ach aninis ar repwe arap ngeni kich, pun mi sinei pwe kich ekkewe sia tongeni anisir.
Emon me emon kich sia tongeni kuna aanen ach sipwe awora angang non napanapen Kraist. Nei we Chon Aninis, Sister Carol F. McConkie, a keran ureniei usun noun noun we nengin 10 ierin itan Sarah, nupwen a afani pwe inan we a semwen, a pwisin finata pwe epwe aninis. A fonguni pwin we kukkun, a anisi ne aufoufa, purosei ngiin, fori mokuran, me fori mwongon nesosor pwe inan we epwe asoso. A fori ei fofforun angang nge ese wor emon e ureni pokiten a kuna ewe osukosuk me a mochen aninis. A afeiochu inan we, me ai nuku pwe a pwan mefi pwapwa an sinei pwe a apwasata choun emon mi tongei me, nupwen an fori ei, a apochokunano nefinan ngeni pwin we. Preseten James E. Faust a apasa: “Angang ngeni ekkoch a tongeni poputa non ier kukkun. … Ese auchea an epwe kon watte, me mi murino me non ewe famini.”4
Ami mi apareni met wewen ngeni sememi me inemi me chon ami famini nupwen oua kutta aanen ami oupwe angang non imwemi? Ami ekkewe ierin fopun me anuon, ami apochokuna me angang ngeni chon ami famini epwe nom asachikin tettenin met oupwe fori nupwen oua kutta aanen ami oupwe siwini ewe fonufan. Ami pwari kirekiroch me aurek fan iten pwium me mwongeom me sam me in a afisata ew memefin tipew me epwe wanong ewe Ngun non ewe imw. Ami siwini ewe fonufan epwe poputa ren ami apochokuna ami famini.
Sipwe pwan ekiekin ne angang ngeni ekkewe chon ach kewe wart. Fan ekkoch nouch kewe ra eisini kich ewe kapas eis, “Pwata upwe fiti Mutual? Use angei feioch ren ai ua fiti.”
Ika pwe a och ai fansoun emirit ren wisei wisen in, upwe apasa, “Pwata oua ekiekin met oupwe angei seni ami fiti Mutual?”
Chiechiei serafo, ua tongeni pwon ngeni kemi pwe mi wor emon mi mefi akkanamon non mwichen Mwichefen meinisin oua fiti, a fen nom non osukosuk me a mochen epwe wor chienan, ika a mefi pwe i esap chon ewe mwich. Mi wor remi och mettoch mi auchea ami oupwe ngeni ew me ew mwich ika mwokutukut, iwe ewe Samon a mochen pwe oupwe nenengeni chiechiemi iwe mwirin oupwe angang ngenir usun met A fori.
Elter D. Todd Christofferson a aitikich, “Ew watten popun mi wor an ewe Samon ew mwichefen pwe epwe forata ew nenien Souneng ar repwe aninis fengen won ewe “aan mi aukukkun me chokisikis minne a wenengeni manau esemuch.’” A sopweno ne apasa, “Ei mwichefen ese aureki pwisin I; nge, kich meinisin sia kokko ngeni ach sipwe angang. Kich mesan, poun, mokuran, pechen, me ekkewe ekkoch kinikinin inisin Kraist.”5
Mi ennet pun sia fiti mwichen Mwichefen iteiten wiik ne fori ekkewe annuk mi pin, kaeo annuk me angei memef, nge pwan ew popun ach fiti mi fokkun auchea pwe, ach famini non ewe wart me non wisach chon kunon ewe Chon Amanau Jises Kraist, sia tumunu fengenikich, pesei emon me emon, me kutta aanen ach sipwe angang me apochokuna fengeni kich. Sisap chok chon angei met a kawor non fan; mi auchea kich sipwe fangeno me awora ngeni ekkoch. Fopun me anuon, nupwen oua fiti Mutual, ousap angei noumi fon me katon met chienemi ra fori nge oupwe nenefetan, me eisinikemi “Ion a mochen upwe anisi ikenai?” Meni ami oupwe namwot ne anisi me ku netipen emon chienom ika oupwe anisi emon chiechiemi kewe mi wor an osukosuk.
Tingorei Semom won Nang epwe pwar ngonuk ekkewe ir mi nom unukum ra mochen om aninis me epwe anisuk om kopwe sinei met mi murino kopwe anisir won. Chemeni pwe ewe Chon Amanau a kan angang ngeni emon me emon fan ew.
Noun noum Ethan a 17 ierin. A chung netipei non ei summer nupwen a ureniei pwe, a memef ren an inan nenien appiru, a iotek iteiten ran an epwe tufichin angang ngeni emon. Nupwen aua nonnom ren an famini, ua kuna ifa usun an Ethan foffor ngeni pwin me fefinan ren tipepos, tong, me kirekiroch o a anisi seman me inan kewe me a kutta aanen an epwe anisi ekkoch. Ua engino ren an apareni usun ekkewe aramas unukun me usun an mochen angang ngenir. I a ew nenien appiru ngeniei. Ach fori usun met Ethan a fori—tingorei ewe Samon an epwe anisi kich ne kuna aanen ach sipwe anisi ekkoch—epwe mut ngeni ewe Ngun epwe pwar ngenikich usun ekkewe ra mochen aninis unukuch, pwe sipwe kuna ewe “emon” a mochen ach aninis non ena ran, me ach sipwe sinei ifa usun sipwe angang ngenir.
Apachangeni om angang ngeni om famini me chon ami kewe wart, oupwe pwan kutta ekkoch tufichin angang ngeni chon winiorumi me neniemi. Nupwen fan ekkoch sipwe kokko ngeni ach sipwe aninis mwirin watten osukosuk, iteiten ran sia pesepes ne kutta tufich non neniach kewe ne chunata me anisi ekkewe ir mi nom non osukosuk. Ua keran chok kaeo seni emon Presetenin Area, a angang non ew fonu minne mi chommong osukosukan, pwe ewe aan mi murino ne anisi ekkewe ir mi nom non osupwang non ekkoch kinikinin ewe fonufan pwe sipwe kisasew ne moni ach asoren echikifen, awora moni ngeni an ewe Mwichefen Monien Aninis, me kutta aanen ami oupwe angang ngeni ekkewe chon non neniemi we ian chok oua nonnom ia. Ekieki ifa usun unusen fonufan epwe feioch ika kich meinisin sipwe tapweno mwirin ei aurour!
Mwongei me pwii kana, me akkaewin ekkewe serafo nupwen oua achocho ne winiti usun ewe Chon Amanau Jises Kraist me apwonueta ami pwon mi pin, oupwe soposopono ne feioch ren mochenin angasa riaffou me anisi ekkewe ir mi osupwang. Chemeni pwe meni ekkoch me nein ekkewe mi fokkun osupwang repwe nom mwemi. Poputani ami angang non pwisin imwemi me non ami famini. Ekkei ekkewe nefin mi tongeni fochofoch. Ina mwo—ika—nonnomun ami famini ese kon unusoch, oua tongeni kutta aanen oupwe angang, chunata, me apochokuna. Poputa ian oua nom ia, tongei meinisin, me mwoneta ngeni ewe famini ka mochen non ekkan ran mwach.
Iotek fan iten aninis om kopwe esina ekkewe famini non om we wart mi mochen tong me pesepes. Nap seni ami fiti fan ren ami ekiekin “Met upwe angei seni ei mwich?” ekieki akkom, “Ion mi mochen ai aninis ikenai? Met upwe awora ngenir?”
Nupwen ka efeiochu om pwisin famini me chon om we wart, kutta aanen om kopwe efeiochu ekkewe ra nom non neniom we. Ika pwe mi wor om fansoun ren angang mi tam ika ka tongeni awora ekkoch chok awa non ew maram, om achocho epwe efeiochu manauen ekkoch me epwe pwan afeiochuk non napanap kose tongeni weweiti.
Preseten Spencer W. Kimball a aitikich: “Kot a afani kich, me a tumunu kich. Nge napengeni a kan seni pwan emon aramas an a ponuweni ach mochen.”6Emon me emon kich sipwe esinna ewe tufich me feioch ren ach aninis ne pwonueta ewe angang an Semach won Nang nupwen sia ponuweni mochenin Noun kewe ina ai iotek non iten Jises Kraist, amen.