Ewe Pristut me an ewe Chon Amanau Manamanen Achasefan

Sipwe anchangei fengeni efoch rocket ren an tota won nenian ewe pwe epwe monata an epwe changeta. Iei, sipwe anchangei pwe a kek. Kasin, non foruchon kekek mi siwin ngeni etuet mi pwichikar mi kusutiw, mi etufichi pwe epwe nafoch pechekunun an ewe rocket epwe changeta nang. Saingon, sipwe anchangei osan kewe mi nom ungen ewe rocket. Auchean osan mi fateno nupwen a tori nenian me a foruchu an angang. Ese namwot sipwe chon sineinapei pekin rocket pwe sipwe afanni, pwe ew watten satelite mi chok nusmwan an epwe chok nom won pwun. Wisan efoch rocket an epwe uwei osan.

Non ei pwinin ua mochen sipwe awewei ewe pristut sia kamwoch ngeni efoch rocket me ewe tufichin ach sipwe feioch ren manamanen ewe achasefan an ewe Chon Amanau ngeni ekkewe osan ewe rocket mi uwei.

Fanitan An asoren achasefan, Jises Kraist mi kamwoch ewe manamanen me mwumwutan an epwe amanaua aramas meinisin. Pwe sipwe tufichin angei An we manamanen achasefan, I mi ineti och An manaman me mwumwuta ngeni mwan won fonufan. Itan ei manaman mi ineti ewe pristut. Mi apunguno chon pristut repwe anisi Samach won Nang me Jises Kraist non Ar angang—ne ewora ewe ngasanon me manau ese much an noun Kot kewe meinisin. Mi fori ei pun mi awora ngeni Noun kewe ewe tufichin angei feiochun an ewe Chon Amanau manamanen achasefan.

Ewe manamanen ewe Achasefan an Jises Kraist mi aucheanap pun ese wor emon neich mi tongeni niwin ngeni imwach me Nang ika ese wor aninis. Non manauach, kich mi mwanino iteitan me ataieno an Kot kewe annuk. Sia nimengaw ren tipis me sise tongeni nom ren Kot. Mi namwot ngeni kich an ewe Chon Amanau manamanen achasefan pwe sipwe museno ren Samach won Nang. Jises Kraist a epichi ekkewe senin manon inis, mi awora manaweta ngeni meinisin. A awora omusomusen tipis, anongonong won ach anneasochis ngeni ekkewe annuk me fofor mi pin non An we kapas allim. Pokiten I, ewe tufichin manaw mi fefeita. Ewe tufichin ach sipwe feioch ren an ewe Chon Amanau manamanen achasefan ina osan ewe afor a kon auchea.

Pwe an Samach won Nang kewe popun repwe pwonuweta, mi namwot pwe noun Kot meinisin repwe tufichin angei an Kraist manamanen achasefan.¹ Ewe pristut mi awora ekkei tufich. Ina ewe rocket. Pristut a aucheanap pwun ekkewe namwoten fofor me pwon mi pin won fonufan mi chok fis ren an mwumwuta. Ika pwe ewe pristut ese awora feiochun an ewe Chon Amanau manamanen achasefan, iwe epwe met popun? Epwe chok meseikin pakutangen new ier? Netipen Kot pwe ewe pristut esap chok iten ew kinikinin sukkun non raninifel ika chok tufichin anisi fitemon. I a mochen pwe epwe pwan uwei osan.

Kisikisinon pechekunen non efoch rocket mi tongeni anamwotongawa an sai. Apachan mi ngaweno me apwangapwanganon mechan mi tongeni atai efoch rocket. Pwe sipwe tumunu ewe pristut seni an epwe ngaweno me apwangapwangeno, Kot mi tumunu epinepinin me aean.² Epinepinen pristut mi nom fan tumun kiien pristut, ir pungun presetensi ngeni aramas.³ Aean pristut mi pwan nom fan tumun kiien pristut me pwon mi pin minne ewe chon pristut a pwonnei. mi nom fan nemenian pwon mi pin. An emon sekeningen pristut i mi angei pwusin nge i ese pwusin aea;⁴ ewe pristut ese chok etiw won asapwan ne pwusin ennetata an mwumwuta.

Ekkewe Pristut an Aaron me Melkisetek emon mi angei me ren pwon mi pin.⁵ Kot mi fini pungun me ewe mwan mi etiwa. Wewen, chon pristut mi pwon mi pin pwe repwe anisi Kot non An angang. Nepoputan ei kinikinin fansoun, Jises Krast a awewei pwe ewe pwon mi pin ren ewe pristut mi epinipin ngeni kich fan asengesich, me esap fan asengesich chok, nge fan asengesin unusen fonufan, pun ir rese feito rei.”⁶

Ei a atikich pwe popun ewe pristut pwe epwe emwenato pwan ekoch repwe feito ren Kraist ren ach anisngenir ewe kapas allim mi niwinsefanito. Ewe pristut mi nom rech pwe sipwe tongeni anisi noun Samach won Nang kewe pwe repwe asoso seni ar weiresin tipis me winiti usun chok I. Ren ewe pristut, ewe manamanen nikinikin kot mi pwapwanong non manauan meinisin mi fori me apwonueta ekkewe pwon mi pinen ewe kapas allim o angei ekkewe fofor mi pin mi fitir. ⁷ Iei ewe napanap aramas mi eto ren Kraist, mi nimenimochuno, me punguno ngeni Kot. An Kraist manamanaen achasefan mi tufich ngenikich me ren ewe pristut, ewe mi uwei osan ewe.

Pwon mi pin ren Kot mi sufon me pin. Emon mwan epwe mwonota ren, kaeo usun, me tonongei ekkei pwon mi pin ren netipan an epwe asamwonu. Ew pwon mi pin mi winiti an emon pwusin tipepwos. Usun kapasen ewe soun mak Robert Bolt, emon mwan mi chok fori pwon mi pin nupwen i mi mochen an epwe wesen nukuchar ngeni ew pwon. A afatochu nefinen ewe ennetin ewe pwon me an pwusin nimenimoch. Nupwen emon a fori ew pwon mi pin, i mi pwusin kamwoch manauan usun och konik mi nom non poun. Me ika a sukano eutun poun, iwe esap chiwen tufichin kuna sefani. Emon mi atai pwon mi pin ese chiwen wor met epwe tongeni etipew ren ar apwonnei.⁸

Emon chon ewe Pristut seni Aaron a pwon an epwe su seni mingau, anisi aramas ar repwe pungoch ngeni kot, me repwe ammonata ne angei ewe Pristut seni Melkisetek.⁹ Ekkei sekening mi pin mi apwonuweta ren an afanafan, paptais, apechekuna chon ewe Mwichefen, me tingor ngeni ekkoch repwe etiwa ewe kapas allim. Iei an angangen “rocket.” Me niwinin, Kot mi pwon epwe ngeni apinukunuk, omusomus, tumunun chon nang, me kiien ewe kapas allimen aier me paptais.¹⁰

Emon chon ewe Pristut seni Melkisetek a angei ewe pwon mi pin an epwe apwonueta angangen ewe Pristut seni Aaron me apwonueta wisan non ewe Pristut seni Melkisetek.¹¹ A fori ei ren an anneasochisi ekkewe annuk mi fiti ewe pwon mi pin. Ekkei annuk mi kapechenong an epwe “tiniken ngeni ekkewe kapasen manau ese much” seni meinisin kapasen Kot mi tou seni awan,¹² apasa kapasen pwarata usun Jises Kraist me An angang non fansoun soponon¹³, esap namanam tekia,¹⁴ me epwe winiti chienen ewe Chon Amanau, me nuku non I usun chok chienan.¹⁵

Me niwinin, Kot mi pwon pwe emon chon ewe Pristut seni Melkisetek epwe angei kiien weweiti monomonun Kot. I epwe unusochuno pwe epwe tongeni uta fan mesan Kot. I epwe tufichin apwonuweta wisan non ewe angangen angaseno. Jises Kraist epwe amwonata ew an me mwen ewe chon angei ewe pristut me I epwe nonom ren. Ewe Ngun mi Fel epwe nom non netipan ewe chon pristut, me ekkewe chon nang repwe penni. Inisin epwe pochokuneta me sefeno. I epwe angei feiochun mwirimwirin Abraham me, fiti punuwan, repwe fiti Jises Kraist non an ning me non ewe muun Kot.¹⁶ Ekkei “pwon mi napanap o auchea.”¹⁷ Ese wor pwon mi nap seniir.

Ngeni iteitan mi angei ewe Pristut seni Melkisetek, Kot mi ennetata An pwon mi pin ren ew etipeew.¹⁸ Ei etipeew mi chok fis ngeni ewe Pristut seni Melkisetek,¹⁹ me I ewe Kot ewe a pwon ngeni ei etipeew, esapw ewe chon pristut.²⁰ Fan itan ei napanap mi sokono mi fiti An manaman me mwumwuta mi pin, Kot mi aea ew etipeew, fiti An kapas mi kan wenechar, pwe epwe afata ngenikich usun ewe wenecharen me fatochun napanapen An pwon

Niwiningaw mi nap mi fis ren an epwe atai ewe pwon mi pinin pristut me an epwe kunnu senir.²¹ An emon epwe chipwang are tinikop non ew sekiningen pristut mi usun ngawenon ekkewe pisek minen rocket. Mi etumunungawa ewe pwon mi pinen pristut pun mi tongeni wene ngeni feiengaw. Anneasonap ngeni an Kot annuk mi atai ewe pwon mi pin. Ren emon mi chok akatai pwon mi pin me ese aier, ekkewe feiochun ewe pwon mi pwan su seni.

Ua pwan weweochuno nefinan ewe rocketin “pristut” me osanewe minen “tufichin feioch seni an Kraist manamanen achasefan” fitu ier a no. Non ew wiikent, mei wor ru ai sekening. Ew upwe fori ewe aewin steik non ew muu, me ewe pwan ew upwe pwan interfiuni emon anuwon me, ika meinisin mi tetenoch, asofosefani an kewe feiochun pristut me tempel. Ei mwan a 30 [inik] ierin a choni ewe Mwichefen nupwen i emon anuan. A foruchu an angangen misineri. Nge nupwen a niwin ngeni imwan, a pout seni ewe an, me a pout seni an ewe choni ewe Mwichefen. Mwirin fitu ier, “a pwusin kuna,”²² me ren aninisin chon emwenin pristut mi tongei me chon ewe Mwichefel mi umoumoch, a aier me a paptaissefaninong ngeni ewe Mwichefen.

Mwurin, a tingor pwe epwe angeisefanni an feiochun pristut me tempel. Aua fini kunokun am aupwe mwich won Ammon me 10:00 [kunok engon] nesesor non ewe fan. Nupwen ua war ne churi ekkewe fitemon akkomwan, i a fen nom. A men atapwana an epwe angeisefanni ewe pristut, me ese tongeni witiwit.

Non amwe interfiw, ua pwar ngeni ewe taropwe mi awewe pwe Preseten Thomas S. Monnson mi pwusin nengeni an tingor me a apunguno ewe interfiw. Ewe mwan napengeni ese kekechiw, iei a kechiw. Ua ereni pwe ewe ranin ewe interfiw esap auchea non manauan. A ekkis osukosuk. Ua ereni pwe mwirin ua eniwini an kewe feioch, an uruon chon Mwichefen epwe chok mak ranin an paptais, epinano ngeni ewe Ngun mi Fel, epinepinen pristut, me endowment akkomw won. A kechiw sefan.

Ua tingorei an epwe annea seni ewe Doctrine and Covenants:

Ewe Samon a apasa pwe ion mi aier seni an kewe tipis, i epwe musuno, me I, ewe Samon esap chiwen chechemenir.

Ren ei sia tongeni sinei pwe ika emon mwan mi aier seni tipisin—nengeni, i epwe pwariir me nikitireno.”²³

A sur chenun mesan fan unungat. Mwurin ua iseta pei won mokuran me non ewe iten Jises Kraist, seni ewe mwumwutan ewe Pristut seni Melkisetek, me ren ewe mwumwutan ewe Presetenin ewe Mwichefen, ua asofosefanni an feiochun pristut me tempel.

Aiwa kan wesen uruno ren pwapwa. A sinei pwe a wor an mwumwuta sefan an epwe kamwoch me aea ewe pristut an Kot. A sinei pwe an feiochun tempel mi tufichin manaman sefan. A men terepepep me a fokkun saramaram. Ua fokkun ingeiti me mefi ukukun an Samach won Nang pwan ingeiti.

Mwurin, ewe steik a tetenoch. Chommong Souleng mi pwapwa me nukuchar mi fiti, me ewe minafon Presetensin Steik mi epinipinino. Nge, merei, ewe amwaraean eteteni ei aewin steik non ew muu ese aukuk ai pwapwa ne asofosefanni feiochun ei mwan.

Ua poputa ne esinna pwe popun ateteni ew steik, are aean ewe pristut an Kot non napanap meinisin, pwe sipwe anisi Samach won Nang me Jises Kraist non Ar angang—ne awora ewe tufichin ngaseno me manau ese much ngeni meinisin noun Kot kewe. Usun chok popun ewe rocket an epwe uwei osan, ewe pristut mi uwei ewe kapas allimen Jises Kraist, mi etufichi meinisin ar repwe fori pwon mi pin me angei ekkewe fofor mi pin mi fitir. “Ewe achasefanin ewe chan Kraist”²⁴ mi tongeni angang non manauach ren ach sia mefi mwongungun ewe Ngun mi Fel me angei ekkewe feioch Kot mi pwon ngenikich.

Fiti ami anneasochisi ekkewe annuk me fofor mi pinen ewe kapas allim non manauemi, ua tingorekemi pwe oupwe apwonueta pwon mi pinen pristut. Angei an Kot etipew me An pwon. Ferechu wisemi non ewe pristut ne anisi Samach won Nang me Jises Kraist. Aea ewe pristut pwe epwe anisikemi ne uwei ewe tufichin feioch ren an ewe Chon Amanau manamanen achasefan ngeni pwan emon! Nupwen oupwe fori ei, feioch mi napanap repwe torikemi me ami famini. Ua pwarata pwe ewe Chon Angasano mi manau me emweni ei angang, non itan Jises Kraist, amen.