Qhov Tseeb ntawm Txhua Yam

Hmo no peb tuaj nrog kev cia siab thiab kev ntseeg hais tias, tus Vaj Ntsuj Plig Dawb Huv, uas qhia qhov tseeb, yuav muab dag zog rau peb thiab foom koob hmoov rau peb.¹ Kuv xav hais lus txog peb txoj kev nrhiav qhov tseeb.

Thaum kuv yog ib tug tub hluas, kuv muaj ntau lo lus nug txog lub Koom Txoos. Ib txhia mas kuv yeej xav paub tiag tiag. Ib txhia yog los ntawm lwm tus txoj kev ua xyem xyav.

Kuv pheej sib tham txog kuv tej lus nug nrog kuv niam. Kuv xav tias nws twb paub hais tias kuv tej lus nug yog tej yam uas kuv xav paub hauv kuv lub siab tiag tiag. Kuv xav tias nws poob siab me ntsis thaum kuv nug tej yam uas kuv tsis xav paub tiag thiab xav sib cav txog xwb. Tiam sis, nws yeej tsis cem kuv vim kuv muaj tej lus nug. Nws mloog kuv thiab sim teb. Thaum nws xav tias nws twb teb tag nrho nws teb tau thiab kuv tseem muaj lus nug, nws tau hais ib yam xws li no hais tias: “David, nov yog ib lo lus nug zoo. Thaum koj nrhiav thiab nyeem thiab thov Vajtswv kom txais lus teb, nyaj koj yuav tsum ua tej uas koj paub tias koj yuav tsum ua thiab tsis txhob ua tej yam uas koj paub tias koj yuav tsum tsis txhob ua.” Nov yog tus txheej txheem rau kuv txoj kev nrhiav qhov tseeb. Dhau los ntawm kev kawm vaj lug kub, kev thov Vajtswv, thiab kev ua raws cov lus txib, kuv kawm tias muaj tej lus teb rau tag nrho kuv tej lus nug tseem ceeb. Kuv kuj kawm tias muaj tej lus nug uas yuav tsum muaj kev ntseeg, ua siab ntev, thiab txais kev tshwm sim.²

Kuv niam muab kev lav ris kom muaj kev ntseeg thiab nrhiav lus teb rau kuv. Nws paub hais tias tej lus teb tseem ceeb yuav los thaum kuv nrhiav qhov tseeb raws li Leej Txiv Saum Ntuj Ceeb Tsheej tau qhia. Nws paub tias kuv yuav tsum nrhiav tau qhov tseeb. Nws paub tias kuv yuav tsum xav paub tiag tiag thiab txaus siab ua raws li tej yam uas kuv twb paub muaj tseeb lawm. Nws paub tias kuv yuav tsum kawm thiab thov thiab kuv yuav tsum ua siab ntev ntxiv thaum kuv nrhiav lus teb los ntawm tus Tswv. Kev txaus siab ua siab ntev yeej yog ib feem ntawm peb txoj kev nrhiav qhov tseeb thiab ib feem ntawm tus Tswv tus txheej txheem qhia qhov tseeb.³

Thaum sij hawm dhau mus ua rau kuv paub tias kuv niam qhia kuv Leej Txiv Saum Ntuj Ceeb Tsheej tus txheej txheem nrhiav qhov tseeb. Kuv txoj kev ntseeg loj tuaj, kuv pib txais lus teb, thiab kuv mus ua ib tug tub txib.

Twb txog ib lub sij hawm, thaum kuv yog ib tug tub txib tsis ntev, uas kuv paub tias kuv yuav tsum paub lub Koom Txoos puas muaj tseeb thiab Yauxej Xamiv puas yog Vajtswv ib tug yaj saub. Ua rau kuv xav txog qhov uas Thawj Tswj Hwm Thomas S. Monson hais meej nyob hauv lub tuam rooj sab laj tas los: “Yog tias nej tsis muaj ib zaj lus tim khawv ruaj khov txog tej no, cia li ua tej yam uas yuav tsum ua kom thiaj li muaj. Tseem ceeb heev kom nej muaj ib zaj lus tim khawv rau nej tus kheej hauv lub caij muaj kev kub ntxhov no, vim lwm tus neeg zaj lus tim khawv yuav pab nej me ntsis xwb.”⁴ Kuv paub tias kuv yuav tsum ua li cas. Kuv yuav tsum nyeem Phau Ntawv Maumoos nrog ib lub siab dawb paug, xav paub tiag tiag, thiab thov Vajtswv seb puas muaj tseeb.

Cia li mloog peb Leej Txiv Saum Ntuj Ceeb Tsheej cov lus cog tseg uas Nws hais dhau los ntawm Maulaunais: “Thiab thaum nej yuav tau txais tej yam no, kuv yuav ntuas nej kom nej yuav thov Vajtswv, Leej Txiv tus uas nyob mus ib txhis, los ntawm Khetos lub npe, saib tej yam no puas muaj tseeb; thiab yog nej yuav thov nrog lub siab dawb paug, nrog txoj kev thov tiag tiag, muaj txoj kev ntseeg Khetos, nws yuav ua kom nej paub qhov tseeb ntawm tej ntawd, los ntawm lub hwj chim ntawm tus Vaj Ntsuj Plig Dawb Huv.”⁵

Xwv kom txais tej yam uas nyob hauv Phau Ntawv Maumoos, kuv yuav tsum nyeem. Kuv nyeem ntawm qhov pib thiab tau nyeem txhua hnub. Ib txhia txais kev ua tim khawv sai sai. Tiam sis lwm tus mas, yuav tsum siv sij hawm ntev zog thiab thov Vajtswv ntxiv thiab tej zaum yuav tsum nyeem phau ntawv ob peb zaug. Kuv twb tau nyeem phau ntawv tag nrho ua ntej kuv tau txais kev ua tim khawv uas tau cog lus lawm. Tiam sis, Vajtswv twb muab qhov tseeb tshwm sim rau kuv los ntawm tus Vaj Ntsuj Plig Dawb Huv lub hwj chim.

Nyob hauv kuv phau ntawv ceev xwm txheej txog kev ua tub txib, kuv piav txog kuv txoj kev xyiv fab vim kuv paub qhov tseeb lawm thiab kuv txoj kev cog lus thiab kev muaj siab xav ua raws li qhov tseeb uas kuv twb tau txais lawm. Kuv tau sau hais tias: “Kuv twb cog lus rau kuv Leej Txiv Saum Ntuj Ceeb Tsheej thiab rau kuv tus kheej hais tias kuv yuav ua zoo npaum li kuv ua tau, ua li 100 feem pua kom tas kuv lub neej, txawm yog Nws hais kom kuv ua dab tsi, kuv yuav ua li ntawd, tiam sis nim no kuv yuav tsum ua tub txib kom tas thiab kuv yuav ua ib tug tub txib zoo heev, kuv thiaj yuav tsis khuv xim, tsis yog rau kuv, tiam sis rau tus Tswv. Kuv hlub tus Tswv, thiab kuv nyiam ua hauj lwm no, thiab kuv thov kom kuv txoj kev xav li no yuav tsis ncaim kuv mus lawm.”

Ua rau kuv paub tias yus yuav tsum siv zog tsis tu tsis tseg hloov siab lees txim thiab coj raws li cov lus txib kom muaj kev xav li ntawd tas mus li. Thawj Tswj Hwm Monson hais tias, “Nej yuav tsum pab txhawb nqa nej zaj lus tim khawv los ntawm kev mloog Vajtswv cov lus txib thiab los ntawm kev niaj hnub thov Vajtswv thiab kawm vaj lug kub.”⁶

Tau ntau xyoo kuv tau nug cov tub txib thiab cov tub hluas ntxhais hluas nyob thoob plaws lub ntiaj teb no seb lawv tau pib li cas kom paub qhov tseeb thiab muaj ib zaj lus tim khawv. Yuav luag txhua tus teb hais tias lawv pib txais tau ib zaj lus tim khawv thaum lawv txiav txim siab nyeem Phau Ntawv Maumoos txij ntawm qhov pib mus thiab tau thov Vajtswv seb puas muaj tseeb. Thaum lawv ua li no, lawv twb xaiv “ua tej yam” thiab tsis “raug tej yam”⁷ los ntawm lwm tus txoj kev ua xyem xyav.

Yog peb xav paub qhov tseeb, peb yuav tsum ua neej raws li txoj moo zoo⁸ thiab “sim ua li”⁹ txoj lus qhia. Peb txais kev ceeb toom kom tsis txhob xyeej tus Tswv tus Ntsuj Plig.¹⁰ Kev hloov siab lees txim, nrog rau kev txiav txim ua raws li cov lus txib, yog ib yam tseem ceeb ntawm ib tug neeg txoj kev nrhiav qhov tseeb.¹¹ Muaj tseeb tiag, tej zaum peb yuav tsum txaus siab “muab tag nrho” peb tej kev txhaum tso tseg kom paub qhov tseeb.¹²

Tus Tswv txib peb kom “nrhiav kev txawj ntse, los ntawm kev kawm ntawv thiab los ntawm kev ntseeg” thiab “nrhiav hauv tej phau ntawv zoo tshaj plaws tej lus tswv yim.”¹³ Peb txoj kev nrhiav qhov tseeb yuav tsum tsom ntsoov rau “tej phau ntawv zoo tshaj plaws” thiab tej lus zoo tshaj plaws. Tej lus zoo tshaj plaws yeej nyob hauv vaj lug kub thiab tej lus ntawm cov yaj saub uas muaj txoj sia nyob.

Thawj Tswj Hwm Monson twb hais kom peb txhua tus “ua tej yam uas yuav tsum ua” kom txais tau thiab txhawb nqa ib zaj lus tim khawv.¹⁴ Yuav tsum ua dab tsi kom txhawb nqa thiab ua rau nej zaj lus tim khawv loj tuaj? Peb txhua tus muaj kev lav ris kom txais tau thiab txhawb nqa ib zaj lus tim khawv uas muaj zog.

Kev ua siab ntev ua raws li peb tej kev khi lus thaum peb “ua tej yam uas [peb] yuav tsum ua” kom txais tau lus teb los ntawm tus Tswv yog ib feem ntawm Vajtswv tus txheej txheem kawm qhov tseeb. Qhov tseem ceeb yog thaum tej yam nyuaj heev, tej zaum peb yuav tsum “zoo siab hlo thiab ua siab ntev ywj rau tus Tswv lub siab nyiam tag nrho.”¹⁵ Kev ua siab ntev ua raws li kev khi lus ua rau peb haj yam txo hwj chim, xav paub qhov tseeb ntxiv, thiab cia tus Vaj Ntsuj Plig Dawb Huv yuav “los coj [peb] kev raws li laj lim tswv yim xwv kom [peb] yuav tau koob hmoov, kev vam meej, thiab kev tsom kwm.”¹⁶

Kuv tus poj niam, Mary, thiab kuv paub ib tug uas wb hlub heev uas tau ntau xyoo nws tsis paub tseeb txog tej yam hauv lub Koom Txoos. Nws nyiam txoj moo zoo, thiab nws nyiam lub Koom Txoos tiam sis nws tseem muaj lus nug. Nws ua kev sib khi hauv lub tuam tsev, muaj siab ntseeg lub Koom Txoos, ua raws li tej uas Vajtswv hu nws ua, thiab yog ib tug niam tsev zoo heev. Tau ntau xyoo nws twb sim ua tej yam nws paub tias yog kev zoo thiab tsis ua tej yam uas nws paub tias yog kev txhaum. Nws twb ua raws li nws tej kev khi lus thiab tseem nrhiav qhov yog. Tej lub sij hawm nws zoo siab vim nws tso siab rau lwm tus txoj kev ntseeg.

Tsis ntev tas los nws tus npisov thov kom nrog nws thiab nws tus txiv tham. Nws thov kom nkawd txais kev txib ua hauj lwm hauv lub tuam tsev sawv cev rau cov uas xav tau cov kab ke ntawm lub tuam tsev. Nkawd xav tsis thoob txog txoj kev hu no, tiam sis nkawd lees txais thiab pib ua hauj lwm hauv tus Tswv lub tsev. Tsis ntev tas los nkawd tus tub tau nrhiav tsev neeg zaj keeb kwm thiab nrhiav tau ib lub npe uas lawv tsis tau ua nws cov kab ke. Nyob nyob ces nkawd sawv tus no thiab nws tsev neeg cev ua cov kab ke hauv lub tuam tsev. Thaum nkawd txhos caug rau ntawm lub thaj thiab ua kab ke sib khi, tus poj niam uas zoo thiab ua siab ntev uas tau nrhiav ntev ntev lawm los twb muaj dab tsi tshoov nws sab ntsuj plig uas ua rau nws paub tias lub tuam tsev thiab cov kab ke uas ua nyob haud muaj tseeb tiag tiag. Nws hu nws niam thiab qhia nws txog qhov no thiab hais tias txawm yog nws tseem muaj lus nug, nws paub tias lub tuam tsev muaj tseeb, thiab cov kab ke hauv lub tuam tsev muaj tseeb, thiab lub Koom Txoos muaj tseeb. Nws niam los kua muag vim zoo siab uas muaj ib Leej Txiv Saum Ntuj Ceeb Tsheej uas hlub thiab muaj siab ntev thiab ib tug ntxhais uas ua siab ntev nrhiav qhov yog.

Kev ua siab ntev ua raws li yus tej kev khi lus ua rau peb txais tau cov koob hmoov ntawm lub ntuj ceeb tsheej hauv peb lub neej.¹⁷

Qhov uas tus Tswv cog lus tias “los ntawm lub hwj chim ntawm tus Vaj Ntsuj Plig Dawb Huv nej yuav paub qhov tseeb ntawm tag nrho txhua yam” nplij kuv lub siab ntau heev.¹⁸ Txawm peb tsis paub tag nrho, peb paub tau qhov tseeb. Peb paub tau Phau Ntawv Maumoos muaj tseeb. Muaj tseeb tiag, ib yam li Thawj Tswj Hwm Russell M. Nelson qhia tav su no, peb “xav tob tob hauv ‘qhov chaw tob tshaj plaws’ hauv peb tej siab tej ntsws [saib Amas 13:27], hais tias Phau Ntawv Maumoos yog Vajtswv txoj lus tiag tiag.” Thiab peb yuav tsum “xav li ntawd tob tob heev npaum li peb yuav tsis xav ua neej ib hnub twg yog tias tsis muaj Phau Ntawv Maumoos.”¹⁹

Peb paub tau hais tias Vajtswv yog peb Leej Txiv, uas hlub peb, thiab Nws Leej Tub, Yexus Khetos, yog peb tus Cawm Seej thiab Txhiv Dim. Peb paub tau hais tias kev ua mej zeej hauv Nws lub Koom Txoos yog ib yam zoo heev thiab kev txais lub cim nco txog txhua lub lim tiam yuav pab peb thiab peb tsev neeg nyab xeeb. Peb yuav paub hais tias los ntawm cov kab ke hauv lub tuam tsev, peb tsev neeg yuav nyob ua ke mus ib txhis. Peb yuav paub tias Yexus Khetos txoj Kev Theej Txhoj thiab cov koob hmoov uas yog kev hloov siab lees txim thiab kev zam txim los muaj tiag tiag. Peb yuav paub tias peb tus yaj saub, Thawj Tswj Hwm Thomas S. Monson, yog tus Tswv tus yaj saub thiab nws cov pab cuam thiab cov hauv Pawg Kaum Ob tug Thwj Tim yog cov thwj tim, cov yaj saub, cov pom tau, thiab cov txais kev tshwm sim.

Kuv paub tag nrho tej yam no muaj tseeb thiab kuv ua tim khawv los ntawm Yexus Khetos lub npe, amees.