Npaj Mus Ntsib Vajtswv
Qhov uas peb ua raws li tej yam uas Vajtswv txib peb ua kom ua ncaj ncees, koom siab koom ntsws, thiab ua kom sib npaug zos yuav ua rau peb npaj mus ntsib Vajtswv.
Eliza R. Snow, uas hais lus txog kev muab lub Tuam Tsev Kirtland fij tseg (uas nws tau koom), hais tias: “Yus rov qab qhia tau txog txoj kev muab fij tseg ntawd, tiam sis tsis muaj ib tug neeg twg uas piav tau seb hnub ntawd tau muaj tej kev tshwm sim los saum ntuj ceeb tsheej los zoo li cas.” Ib txhia neeg tau pom cov tim tswv, es sawv daws twb hnov tej yam uas los saum ntuj los, thiab txhua tus lub siab muaj kev xyiv fab uas yus piav tsis tau txog thiab tau muaj yeeb koob puv npo.”1
Tej kev tshwm sim uas los saum ntuj los nyob hauv lub Tuam Tsev Kirtland yog lub hauv paus rau lub hom phiaj ntawm Yexus Khetos lub Koom Txoos uas tau muab txum tim rov qab los kom ua rau peb Leej Txiv Saum Ntuj Ceeb Tsheej cov me nyuam txais kev cawm seej thiab kev tsa nto.2 Thaum peb npaj mus ntsib Vajtswv, peb yuav paub peb ntiag tug hauj lwm uas Vajtswv txib peb ua yog peb xav txog cov yuam sij dawb huv uas tau muab txum tim rov qab los nyob hauv lub Tuam Tsev Kirtland.
Nyob hauv zaj lus thov Vajtswv muab lub tuam tsev fij tseg, tus Yaj Saub Yauxej Xamiv txo hwj chim thov tus Tswv kom “txais lub tsev no … uas yog koj cov tub qhe tej tes, vim koj tau txib kom peb ua.”3
Ib lub lim tiam tom qab ntawd, txog Hnub Caiv Easter, tus Tswv tau tshwm sim nyob hauv kev ua yog toog thiab tau txais Nws lub tuam tsev. Muaj li no thaum lub Plaub Hlis Ntuj 3, 1836, yuav luag 182 xyoos tas los thaum txog Hnub Caiv Easter no. Kuj yog lub caij rau Kev Cai Hla Dhau—yog ib lub sij hawm thaum Easter thiab Kev Cai Hla Dhau yog tib lub sij hawm. Tom qab kev ua yog toog tas lawm, peb tug yaj saub nyob puag thaum ub, Mauxes, Eli-as, thiab Eliyas, tau tshwm sim thiab muab cov yuam sij uas yuav tsum muaj kom ua raws li tus Tswv lub hom phiaj muab Nws lub Koom Txoos txum tim rov qab los hauv lub caij nyoog tso txoj cai no. Kev yooj yim hais txog lub hom phiaj no hais tias yog kev muab Ixayees sib sau ua ke, muab lawv sib khi ua ke hauv lawv tsev neeg, thiab npaj neeg ntiaj teb lub siab rau tus Tswv txoj Kev Los Zaum ob.4
Qhov uas Eliyas thiab Mauxes nkwad tshwm sim yeej “mus sib raws … cov Neeg Yudais kab lig kev cai, uas hais tias Mauxes thiab Eliyas yuav los ua ke thaum ‘txog hnub kawg.’”5 Nyob hauv peb cov lus qhuab qhia, qhov uas nkawd tshwm sim yog kev muab cov yuam sij txum tim rov qab los uas tseem ceeb heev, cov yuam sij uas “rau hnub nyoog kawg thiab rau zaum kawg, uas yog lub caij nyoog tso txoj cai uas muaj txhij txhua.”6
Lub Tuam Tsev Kirtland tsis tshua loj thiab nyob hauv ib qho chaw uas neeg tsis coob paub. Tiam sis hais txog qhov uas lub tuam tsev no tseem ceeb npaum li cas rau tib neeg los nws yeej muaj nqi mus ib txhis. Cov yaj saub puag thaum ub tau muab cov yuam sij pov thawj hwj txum tim rov qab los kom ua tau cov kab ke cawm seej ntawm Yexus Khetos txoj moo zoo. Ua li no mas ua rau cov mej zeej uas rau siab ntseeg xyiv fab kawg nkaus.
Cov yuam sij no muab “lub hwj chim los saum ntuj los”7 kom ua tau tej ntiag tug hauj lwm uas Vajtswv txib ua uas yog lub hom phiaj tseem ceeb tshaj plaws ntawm lub Koom Txoos.8 Hnub Easter ntawd nyob hauv lub Tuam Tsev Kirtland, tau muab peb tus yuam sij txum tim rov qab los.
Thib ib, Mauxes tau tshwm los thiab tau muab cov yuam sij rau txoj kev sau Ixayees los ua ke los ntawm plaub ceg qaum ntuj, uas yog cov tub txib txoj hauj lwm.9
Thib ob, Eli-as tshwm los thiab muab cov yuam sij rau lub caij nyoog tso txoj cai ntawm Anplaham txoj moo zoo, uas yog kev muab Anplaham txoj kev khi lus txum tim rov qab los.10 Thawj Tswj Hwm Russell M. Nelson tau qhia hais tias lub hom phiaj ntawm cov yuam sij rau kev khi lus yog kom npaj cov mej zeej lub siab mus rau Vajtswv lub nceeg vaj. Nws hais tias, “peb paub tias peb yog leej twg thiab Vajtswv xav kom peb ua dab tsi.”11
Thib peb, Eliyas tau tshwm los thiab muab cov yuam sij rau lub hwj chim sib khi nyob hauv lub caij nyoog tso txoj cai no, uas yog kev nrhiav tsev neeg zaj keeb kwm thiab cov kab ke hauv lub tuam tsev uas ua rau cov ciaj thiab cov tuag txais kev cawm seej.12
Muaj peb pawg sab laj saib xyuas nyob hauv lub Koom Txoos lub hauv paus raws li Thawj Pawg Thawj Tswj Hwm thiab Pawg Kaum Ob tug Thwj Tim txoj kev tswj hwm, uas saib xyuas tej ntiag tug hauj lwm uas Vajtswv txib ua raws li cov yuam sij uas tau muab txum tim rov qab los hauv lub Tuam Tsev Kirtland. Peb pawg no yog Pawg Sab Laj Saib Xyuas Kev Ua Tub Txib, Pawg Sab Laj Saib Xyuas lub Pov Thawj Hwj thiab Tsev Neeg, thiab Pawg Sab Laj Saib Xyuas lub Tuam Tsev thiab Tsev Neeg Zaj Keeb Kwm.
Hnub No Peb Ua tej Ntiag Tug Hauj Lwm uas Vajtswv Txib Ua Zoo Npaum Li Cas?
Qhov thib ib, hais txog Mauxes txoj kev muab cov yuam sij rau kev sib sau Ixayees txum tim rov qab los, hnub no muaj yuav luag 70,000 tus tub txib uas nyob thoob plaws lub ntiaj teb uas tshaj tawm tus Tswv txoj moo zoo kom muab cov uas Nws tau xaiv sib sau ua ke. Nov yog kev pib kom muaj raws li tej hauj lwm tseem ceeb thiab zoo kawg nkaus uas Nifais pom yuav muaj nyob hauv Lwm Haiv Neeg thiab tsev neeg Ixayees. Nifais tau pom peb lub caij nyoog thaum Vajtswv Haiv Neeg Ntseeg yuav nyob thoob plaws lub ntiaj teb, tiam sis lawv yuav muaj tsawg tus vim tib neeg coob phem. Tiam sis, nws pom tias Haiv Neeg Ntseeg yuav “muab txoj kev ncaj ncees thiab Vajtswv lub hwj chim uas muaj yeeb koob heev los ua ntaj riam thaiv lawv.”13 Thaum peb xav txog zaj keeb kwm ntawm lub Koom Txoos uas tau txum tim rov qab los, tej hauj lwm xa cov tub txib yeej zoo kawg nkaus. Peb tab tom pom muaj raws li Nifais txoj kev ua yog toog. Txawm yog peb muaj tsawg tus los, peb tseem yuav siv zog thiab pab cov uas xav tau tus Cawm Seej zaj lus.
Qhov thib ob, Eli-as tau tshwm sim los thiab tau muab lub caij nyoog ntawm Anplaham txoj moo zoo rau wb, hais tias los ntawm peb thiab peb cov noob txhua tiam neeg tom qab wb yuav tau koob hmoov. Nyob hauv rooj sab laj no, cov uas hais lus twb qhia ntau yam kom pab Haiv Neeg Ntseeg ua neeg zoo tag nrho thiab npaj lawv lub siab kom mus rau Vajtswv lub nceeg vaj.14 Tej yam uas tau tshaj tawm hauv tuas pov thawj hwj hais txog pawg txwj laug thiab pawg pov thawj hlob yuav ua rau peb muaj lub hwj chim thiab txoj cai pov thawj hwj ntxiv. Kev mus qhia tom tsev thiab mus saib xyuas tom tsev, uas nim no peb hu ua “kev txhawb pab,” zoo li tau qhia zoo hauv tuas no, yuav npaj Haiv Neeg Ntseeg hauv Hnub Nyoog Kawg mus ntsib Vajtswv.
Qhov thib peb, Eliyas tau muab cov yuam sij ntawm lub caij nyoog tso txoj cai no rau kev sib khi. Rau peb cov uas ua neej tam sim no, qhov uas tib neeg ua hauj lwm hauv lub tuam tsev thiab nrhiav tsev neeg zaj keeb kwm los yeej ua rau peb xav tsis thoob. Peb yuav ua npaum li no thiab yuav ua sai dua ntxiv mus txog thaum tus Cawm Seej txoj Kev Los Zaum Ob yog hais tias tsis muaj li ntawd, ces tag nrho cov neeg ntiaj teb yuav “raug puas tsuaj huv tib si mus thaum nws los.”15
Ob peb xyoos tas los no Vajtswv tau foom koob hmoov kom tej txuj ci technology uas siv kom nrhiav tsev neeg zaj keeb kwm yuav zoo dua li qub lawm. Ntshe peb tsis muaj tswv yim yog peb lam ua ntiag tug hauj lwm uas Vajtswv txib peb ua thiab xav tias Niam Tais Jane los yog lwm tus txheeb ze uas rau siab mam li ua rau peb xwb. Cia kuv qhia Thawj Tswj Hwm Joesph Fielding Smith tej lus rau nej hais tias: “Nej tsis muaj leej twg uas zam tau kev lav ris no. Vajtswv txib kom tus thwj tim ua zoo ib yam li nws txib tus txwj laug los yog tus muam uas txo hwj chim tshaj plaws. Yus nyob qhov twg, los yog muaj npe, los yog ua hauj lwm ntev li cas hauv lub Koom Txoos los … yus yeej tsis muaj cai muab yus cov neeg uas tuag lawm txoj kev cawm seej tso tseg.”16
Nim no peb muaj cov tuam tsev nyob thoob plaws lub ntiaj teb no thiab pob nyiaj pab cov neeg mus rau lub tuam tsev kom pab cov neeg uas nyob deb ntawm ib lub tuam tsev.
Tsim nyog uas peb txhua tus yuav tshuaj ntsuam peb txoj kev siv zog ua tej hauj lwm ua tub txib, ua hauv lub tuam tsev thiab nrhiav tsev neeg zaj keeb kwm, thiab npaj mus ntsib Vajtswv.
Kev Ncaj Ncees, Kev Koom Siab Koom Ntsws, thiab Kev Sib Npaug Zos rau tus Tswv Pom Txhawb Nqa tej Ntiag Tug Hauj Lwm Dawb Ceev No
Hais txog kev ncaj ncees, lub neej no yog lub sij hawm rau peb txhua tus npaj mus ntsib Vajtswv.17 Mjuaj ntau zaj hauv Phau Ntawv Maumoos uas qhia txog tej xwm txheej tu siab heev thaum tib neeg los yog tej pawg tsis ua raws li Vajtswv cov lus txib.18
Nyob hauv kuv lub neej, tej teeb meem thiab tej kev txhawj ntawm neeg ntiaj teb twb hloov los ntawm ib sab mus rau lwm sab—txij ntawm kev nrhiav tej uas tsis tseem ceeb mus txog kev coj tsis dawb huv loj heev. Qhov uas kev coj tsis dawb huv uas ib tug yuam ua raug nthuav tawm thiab tib neeg tsis pom zoo yeej yog ib qho txaus qhuas.19 Kev coj tsis dawb huv uas ib tug yuam ua yeej txhaum Vajtswv txoj kev cai thiab lub sawm fem txoj kev cai. Cov uas to taub Vajtswv txoj hau kev kuj yuav tsum tawm tsam kev coj tsis dawb huv uas txhua tus pom zoo, uas kuj yog kev txhaum. Txoj kev tshaj tawm rau lub ntiaj teb ceeb toom tias “cov neeg uas txhaum tej kev khi lus ntawm kev coj dawb huv, cov uas tsim txom lawv tus khub los yog lawv cov me nyuam [los sis, txhua leej txhua tus] … muaj ib hnub twg uas lawv yuav lav ris txog tej no rau ntawm Vajtswv lub xub ntiag.”20
Thaum peb saib ib puag ncig, peb pom tej kev ua puas tsuaj uas los ntawm kev phem thiab kev muaj yees txhua lub sij hawm. Yog tias peb txhua tus muaj kev txhawj xeeb txog peb tus Cawm Seej txoj kev txiav txim kawg, peb yuav tsum xav hloov siab lees txim. Kuv ntshai hais tias neeg coob xav tias lawv tsis lav ris rau Vajtswv, thiab tsis nyeem vaj lug kub los yog cov yaj saub tej lus kom coj lawv kev. Yog tias peb cov hauv lub sawm fem no yuav xav txog tej xwm txheej uas los ntawm kev txhaum, ces cov pej xeem yuav tawm tsam kev saib duab liab qab thiab kev xav tias cov poj niam zoo li tej khoom xwb.21Raws li Amas qhia nws tus tub Khali-atoos nyob hauv Phau Ntawv Maumoos, “Kev phem yeej ib txwm tsis yog kev zoo siab.”22
Hais txog kev koom siab koom ntsws, tus Cawm Seej tshaj tawm tias, “Yog nej tsis ua ib lub siab ces nej tsis yog kuv li.”23 Peb paub tias tus uas muaj siab xav sib cav sib ceg twb yog los ntawm tus dab phem.24
Nyob hauv peb lub caij nyoog, tib neeg tsis quav ntsej txog tej lus txib hauv cov vaj lug kub kom peb koom siab koom ntsws, thiab neeg feem coob xav kom nyias ua nyias pawg neeg,25 feem ntau sib faib raws li muaj koob muaj npe, poj niam los txiv neej, haiv neeg twg, thiab muaj nyiaj txiag. Nyob hauv ntau lub teb chaws, tib neeg tsis sib raug zoo txog kev ua neej. Nyob hauv tus Tswv lub Koom Txoos, peb tsuas coj raws li tib kab lig kev cai uas yog kev qhia txog kab lig kev cai ntawm Yexus Khetos txoj moo zoo. Kev koom siab koom ntsws uas peb xav tau yog kev koom siab nrog tus Cawm Seej thiab Nws tej lus qhia.26
Thaum peb xav txog tej lub hom phiaj tseem ceeb tshaj ntawm lub Koom Txoos, tej no yeej yog raws li kev ua kom sib npaug zos rau tus Tswv pom 27 thiab kev coj raws li kab lig kev cai ntawm Yexus Khetos txoj moo zoo. Hais txog kev ua tub txib txoj hauj lwm mas, qhov tseem ceeb kom ib tug tsim nyog ua kev cai raus dej yog kev txo yus lub hwj chim rau Vajtswv thiab los muaj ib lub siab mob thiab lub siab xav ua zoo xwb.28 Qhov uas yus kawm ntawv, muaj nyiaj, yog haiv neeg twg, los tuaj lub teb chaws twg tuaj los tsis suav tej ntawd.
Tsis tas li ntawd, cov tub txib ntxhais txiv txo hwj chim ua hauj lwm hauv qhov chaw uas Vajtswv hu lawv mus. Lawv tsis sim pab lwm tus raws li neeg ntiaj teb tej kev xav los yog npaj kom ua tau hauj lwm rau yav tom ntej. Lawv ua hauj lwm kawg siab kawg ntsws kawg dag kawg zog nyob qhov chaw Vajtswv txib lawv mus. Lawv tsis xaiv lawv cov khub ua tub txib, thiab lawv rau siab ua kom muaj cwj pwm zoo li Khetos,29 uas yog lub ntsiab ntawm Yexus Khetos kab lig kev cai.
Cov vaj lug kub qhia peb txog peb tej kev txheeb ze tseem ceeb tshaj plaws. Tus Cawm Seej qhia tias lo lus txib thib ib yog “hlub tus Tswv uas yog nej tus Vajtswv.” Thiab los lus txib thib ob yog “hlub nej tej kwv tij zej zog ib yam li nej hlub nej lub cev.”30
Tus Cawm Seej piav ntxiv hais tias txhua leej txhua tus yog peb tus kwv tij zej zog.31 Phau Ntawv Maumoos qhia meej hais tias yuav tsum tsis txhob muaj tej pawg neeg, tej xeem neeg, los yog tej theem neeg.32 Peb yuav tsum koom siab koom ntsws thiab ua kom sib npaug zos rau Vajtswv pom.
Cov kab ke dawb ceev thiab tej ntiag tug hauj lwm uas Vajtswv txib ua raws li lub ntsiab no. Kuv xav tias tej uas muaj los rau nej hauv lub tuam tsev yeej zoo ib yam li muaj los rau kuv. Thaum kuv muab kuv txoj kev ua hauj lwm txhua hnub nyob hauv San Francisco tso tseg thiab tuaj txog lub Tuam Tsev Oakland, ua rau kuv muaj kev hlub thiab kev kaj siab lug loj heev. Ib feem ntawm qhov uas kuv hnov li ntawd yog qhov uas kuv nyob ze dua Vajtswv thiab Nws tej lub hom phiaj. Kuv tsom ntsoov rau cov kab ke cawm seej, tiam sis ib feem ntawm kuv txoj kev xav zoo li ntawd yog kev sib npaug zos thiab kev koom siab koom ntsws uas nyob thoob plaws lub tuam tsev. Txhua leej txhua tus hnav khaub ncaws dawb. Tsis pom ib yam dab tsi uas qhia tias ib tug neeg muaj nyiaj, muaj npe, los yog tau kawm txawj kawm ntse; peb txhua tus yog cov kwv tij thiab cov muam uas txo peb lub hwj chim rau Vajtswv.
Nyob hauv chav ua kev sib khi uas dawb ceev, txhua leej txhua tus txoj kab ke sib yuav mus ib txhis li yeej zoo ib yam. Kuv nyiam qhov uas ib khub uas pluag tshaj plaws thiab khub uas muaj nyiaj ntau tshaj ua tib txoj kab ke. Lawv hnav cov thav ntxwv zoo ib yam thiab ua kev khi lus zoo ib yam thaum txhos caug rau ntawm tib lub thaj. Lawv kuj txais tau cov koob hmoov pov thawj hwj uas nyob mus ib txhis zoo ib yam. Muaj li no nyob hauv ib lub tuam tsev uas Haiv Neeg Ntseeg them ib feem kaum kom ua tau tus Tswv lub tsev dawb ceev.
Qhov uas peb ua raws li tej ntiag tug hauj lwm uas Vajtswv txib peb ua kom ua ncaj ncees, koom siab koom ntsws, thiab ua kom sib npaug zos rau tus Tswv pom, yuav ua rau peb txais kev zoo siab thiab kev kaj siab lug hauv lub ntiaj teb thiab npaj peb txais txoj sia nyob mus ib txhis hauv lub ntuj tom ntej.33 Tej no npaj peb mus ntsib Vajtswv.34
Txawm nej muaj xwm txheej zoo li cas tam sim no los, peb thov kom nej txhua tus yuav nrog nej tus npisov tham thiab ua neeg tsim nyog txais ib daim ntawv tso cai nkag tuam tsev.35
Peb zoo siab uas cov mej zeej coob ntxiv npaj mus rau hauv lub tuam tsev. Qhov uas muaj pes tsawg tus neeg laus uas tuav ib daim ntawv tso cai nkag tuam tsev los tau nce zuj zus tau ntau xyoo. Tau ob xyoos no qhov uas muaj pes tsawg tus tub hluas ntxhais hluas uas tsim nyog muaj ib daim ntawv tso cai uas siv qee zaus xwb los twb nce siab heev. Paub meej tias cov mej zeej uas rau siab ntseeg lub Koom Txoos yeej muaj zog tshaj yav tas los.
Kuv xaus lus hais tias, thov paub tseeb hais tias cov thawj coj hlob ntawm lub Koom Txoos uas tswj hwm tej hom phiaj ntawm lub Koom Txoos uas Vajtswv pom zoo yeej txais tau Vajtswv txoj kev pab. Tej lub sij hawm tej lus qhia no yog los ntawm tus Ntsuj Plig thiab tej lub sij hawm yog los kiag ntawm tus Cawm Seej. Lawv tau ob hom kev qhia ntawm sab ntsuj plig no. Kuv zoo siab uas kuv tau txais kev pab li no. Tiam sis tus Tswv qhia peb raws li Nws lub sij hawm, ib nqe lus ntxiv rau ib nqe lus thiab ib ntsiab cai ntxiv rau ib ntsiab cai,36 thaum “tus Tswv uas paub txhua yam txhob txwm xaiv qhia peb.”37 Kev qhia kom coj lub Koom Txoos tag nrho yuav los rau Nws tus yaj saub ib leeg xwb.
Peb txhua tus tau muaj cib fim txhawb nqa pom zoo Thawj Tswj Hwm Russell M. Nelson ua peb tus yaj saub thiab tus Thawj Tswj Hwm ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg nyob hauv lub rooj sab laj no. Pawg Kaum Ob tug Thwj Tim, txhua leej txhua tus, twb tau txais tej yam ntawm sab ntsuj plig thaum peb tau tso tes saum Thawj Tswj Hwm Nelson taub hau thiab Thawj Tswj Hwm Dallin H. Oaks, uas yog tus hais lus, tau tsa nws los ua tus Thawj Tswj Hwm ntawm lub Koom Txoos. Kuv ua tim khawv tias Vajtswv tau tsa nws ua ntej thiab nws tau npaj tas nws lub neej kom ua tus Tswv tus yaj saub rau peb lub caij nyoog no. Los ntawm Yexus Khetos lub npe, amees.