Tawagi ang Inyong mga Home Teacher

Daghang mga tuig ang milabay sa dihang ang among upat ka anak gagmay pa, ang akong bana mibalhin og trabaho sa laing estado samtang ako nagpabilin hangtud ang duha ka mas magulang nga mga bata makahuman sa eskwela nianang tuiga. Bag-ohay lang kaming gihatagan og bag-o nga mga home teacher, kinsa nakabisita lang og kaduha sa wala pa mabalhin ang akong bana.

Usa ka gabii sa pagpakatulog sa mga bata, nakadungog ko nga ang among batang anak nga babaye naghilak sa iyang kwarto. Sa dihang ako kining gikuha, nakabantay ko nga siya init kaayo. Naghunahuna ko nga dad-on siya sa ospital, apan sa daling pagribyu sa among bag-ong palisiya sa insurance nakita nga kini mo-cover lamang sa mga lumulupyo sa Idaho—ang estado asa nagtrabaho karon ang akong bana. Kaming tanan mga lumulupyo pa gihapon sa estado sa Washington.

Mas nakuyawan ko sa dihang gikuhaan nako og temperatura ang akong anak nga babaye—105 degrees Fahrenheit (41 degrees C). Diha-diha dayon ako nag-ampo ug naghangyo pag-ayo og tabang. Usa ka tubag miabut nga wala gayud nako gikonsiderar: “Tawagi ang imong mga home teacher.”

Nagkalawom na ang kagabhion, ug nasayud ko nga ang duha ka lalaki, sila si Brother Halverson ug Bird, siguradong nangatulog na. Apan ako mikuha sa telepono ug gitawagan si Brother Bird, dali-daling nagsulti kaniya unsa ang problema. Sulod sa lima ka minuto, sa alas 11 sa gabii, ang akong mga home teacher diha na sa atubangang pultahan—nga naka-amerkana ug nakakurbata.

Niining higayona ang mga aping ug mga mata sa among baby namula na, ug ang iyang buhok nabasa tungod sa singot. Siya nag-agulo tungod sa kasakit, apan sila si Brother Bird ug Halverson kalma lamang samtang sila mikuha kaniya. Dayon, gipandong ang ilang mga kamot sa iyang ulo, sila mihatag kaniya og panalangin ug miingon ngadto kaniya nga sa ngalan sa Manluluwas siya mamaayo.

Sa pagbukas sa akong mga mata human sa panalangin, hapit dili ko makatuo sa akong nakita. Ang akong anak nga babaye nag-agik-ik ug nagkisi-kisi na nga gustong manaog para magdula. Ang iyang hilanat nawala!

“Nabati nako nga siya nahuwasan samtang kami nagpanalangin kaniya,” miingon si Brother Bird kanako samtang kaming tanan nagtan-aw sa akong anak nga natingala. Sa wala madugay sila mibiya, human niadto nagmata ako sulod sa pipila ka oras uban sa usa ka baby kinsa ganahang magmata ug magdula. Wala ko magtagad niini bisan gamay.

Daghang mga tuig ang milabay sukad niadtong gabhiona sa dihang duha ka anghel sa pagpangalagad, sa porma nga mga home teacher, mipanalangin sa akong anak. Sa wala madugay kami mibalhin sa Idaho ug wala na makakontak kanila, apan ako kanunay nga mapasalamaton sa duha ka mabinationg home teacher kinsa miabut sa eksaktong takna alang sa paghimo sa buhat sa Ginoo.