Ang Labing Maayo nga Brigham Young

Si Kathy naminaw samtang si Mr. Sodeberg mipasabut kon giunsa sa mga tawo sa paglalin ngadto sa Estados Unidos. Naghinamhinam siya mahitungod sa iyang bag-ong klase sa history. Nagpakli-pakli sa mga pahina sa iyang bag-ong libro sa history, si Kathy mihunong sa litrato ni Brigham Young. Sa una wala gayud siya makaamgo sa kaimportante ni Brigham Young sa kasaysayan sa Estados Unidos.

Si Mr. Sodeberg nahuman sa iyang pagtudlo. “Adunay homework matag adlaw,” miingon siya. “Ang inyong unang assignment ipasa ugma.”

Sa balay nanghupaw si Kathy samtang nagtan-aw siya sa tanang mga pangutana nga gihatag ni Mr. Sodeberg.

“Lisud nga adlaw sa eskwelahan?” si Mama nangutana.

“Homework matag adlaw,” miingon si Kathy. Iyang nahinumduman ang litrato sa iyang libro sa history. “Ma, si Brigham Young naa sa akong libro. Unsa man ang nakapahimo niyang importante sa kasaysayan sa U.S.?”

“Siya ang nangulo sa paglalin sa liboan ka mga Santos sa Ulahing mga Adlaw ngadto sa Salt Lake Valley. Dayon siya mi-organisar kanila ngadto sa mga pamuy-anan,” miingon si Mama. “Nagkinahanglan kadto og grabe nga pagplano. Usa kadto ka mahinungdanon nga bahin sa nasud sa paglalin paingon sa kasadpan.”

Pagka sunod adlaw si Mr. Sodeberg mipahibalo, “Sunod semana mopasundayag kita og usa ka teyatro sa mga magbabasa. Matag usa kaninyo modrama sa usa ka karakter sa paglalin paingon sa kasadpan. Ang inyong mga ginikanan ug ang uban nga mga estudyante pagadapiton aron motambong sa pasundayag.”

Si Mr. Sodeberg misugod sa pag-assign og mga karakter ug nanghatag og mga script. Sa dihang nangutana siya kon kinsa ang gusto sa parte ni Brigham Young, si Kathy daling miisa sa iyang kamot.

“Ang homework karong gabhiona mao ang pagsugod og sag-ulo sa inyong parte,” miingon si Mr. Sodeberg. “Kinahanglan gayud nga perpekto ninyo kining ma-recite. Ang inyong grado magdepende niini.”

Gibalik og basa ni Kathy ang iyang parte samtang siya ug ang iyang higala nga si Laura mibiya sa klase. Usa ka lain kaayo nga pagbati ang miabut kaniya. “Sayop kaayo kini,” miingon siya ngadto kang Laura. “Makapahimo kini ni Brigham Young nga dili matinuoron paminawon.”

“Lahi lang ang imong pagtan-aw sa mga butang tungod sa inyong simbahan,” miingon si Laura.

“Dili ko makahimo sa pagsulti niining mga butanga,” miingon si Kathy.

“Kinahanglan nga perpekto nimo kining ma-recite,” si Laura mipahinumdom kaniya.

Ang mga luha miagas sa mga aping ni Kathy samtang nagdagan siya paingon sa balay ug kalit nga misulod sa atubangan nga pultahan.

“Dugang nga homework?” Si Mama nangutana.

“Grabe pa,” miingon si Kathy, gihatag ang iyang script. “Basaha kini.”

Gibasa ni Mama ang script ug nagpanglingo sa iyang ulo. “Kini nga tigsulat wala kaayo makaila ni Brigham Young.”

“Unsay akong buhaton?” si Kathy nangutana.

“Una mangita kita og costume nga Brigham Young,” miingon si Mama.

Gisulayan ni Kathy og sul-ob ang taas ug itom nga coat ni Lolo ug gilukot ang bukton sa puting sinina sa iyang igsoong lalaki. Si Mr. Grandi sa tapad nga balay mipakita ni Kathy kon unsaon sa paglakaw gamit ang iyang usa pa ka sungkod nga kahoy.

Si Mama nakakita og usa ka taas nga itom nga kalo sa aparador ug gibutang kini sa ulo ni Kathy. “Imong gihimong mapagarbuhon si Brigham Young,” miingon si Mama. “Karon kinahanglan ka og bag-o nga script.”

Si Kathy nangita og impormasyon mahitungod ni Brigham Young sa mga basahon sa kasaysayan sa Simbahan ug sa Web site sa Simbahan. Dayon ang script gisulat og usab.

“Ang tinuod nga istorya mahitungod ni Brigham Young,” miingon si Kathy.

Sa adlaw sa pasundayag, ang klase ni Kathy nagpundok sa auditorium. Ang mga ginikanan ug uban nga mga estudyante naghulat diha sa ilang mga lingkuranan. Gisugdan ni Mr. Sodeberg ang programa; dayon mibarug siya sa luyo sa stage samtang ang mga estudyante mi-recite sa ilang mga parte.

Si Alex walay sayop nga mi-recite sa iyang script, apan nabali-bali ni Randall ang iyang mga pulong. Gipausab siya ni Mr. Sodeberg. Gikuptan og maayo ni Kathy ang iyang sungkod. Sa dihang iyaha na nga turno, gi-recite ni Kathy ang tinuod nga istorya mahitungod ni Brigham Young.

“Giusab ba nimo ang imong script?” Nangutana si Laura human sa pasundayag.

“Oo. Gisulti nako ang tinuod,” miingon si Kathy.

“Nagpaingon ngari si Mr. Sodeberg,” miingon si Laura.

“Maayong pagkabuhat, mga inday,” miingon si Mr. Sodeberg. “Kathy,” siya mipadayon, “ikaw ang labing maayo nga Brigham Young nga akong nakita sukad.”