Kinahanglan Ka nga Mag-seminary

“Lisa, kinahanglan ka nga mag-seminary,” si Ashley kaswal nga mihisgut. Sa among atubangan mao ang mga folder nga nagpakita sa mga lista sa pilionon nga klase alang sa sunod nga tuig sa pag-eskwela, sa among pagsugod sa high school.

Blangko ko nga mitan-aw sa akong higala, sa katapusan naningkamot sa pagpahiyum. Dili ko ganahan nga mosulti kaniya, apan ang seminary mao ang butang nga layo ra kaayo sa akong hunahuna. Nianang higayuna dili kaayo ko aktibo nga miyembro sa Simbahan, nga mao ang akong kahimtang hapit sa tibuok nakong kinabuhi. Sulod sa pipila ka mga katuigan, nagdako ko nga nahibalo og gamay sa ebanghelyo apan wala makadawat og lig-ong pagpamatuod mahitungod sa kamatuoran niini.

Dihang mipauli ko human sa klase nianang adlawa, ang panglantaw mahitungod sa seminary nakapaintriga kanako. Si Ashley, ingon man usab ang akong uban nga mga higala, ang tanan mora og naghinamhinam kaayo nga mahimong kabahin niini. Ako adunay tinguha sa pagbuhat unsa ang gibuhat sa akong mga higala, bisan kon wala ako makasabut sa unsay ilang gibuhat o kon nganong gibuhat nila kini. Human nako hisguti ang akong plano ngadto sa akong mga ginikanan ug nakuha ang ilang pagtugot, nakahukom ko nga mag-seminary sa akong unang tuig sa high school.

Wala ko masayud kon unsay bug-at nga resulta nianang simple nga buhat nga mahimo sa akong kinabuhi. Ang akong unang tuig sa seminary nakapausab sa akong kinabuhi sa dihang nagsugod ko sa pagtan-aw sa akong kaugalingon ug sa uban isip mga anak sa Dios, gihigugma ug gipangga. Misugod ko sa pag-adto sa simbahan matag Dominggo, bisan pa man sa pagkadili aktibo sa akong pamilya.

Nahuman na ko karon sa high school, apan kanunay gayud ako nga mapasalamaton alang sa seminary. Atol nianang orasa sa matag adlaw, natubag ang akong mga pag-ampo ug ang akong pagpamatuod nalig-on. Ang seminary nagtabang kanako sa pagpangandam alang sa kaminyoon sa templo ug nagdasig kanako nga maningkamot aron mahimong mas maayo pa nga tawo.

Nasayud ko nga ang Dios nagpangga sa matag usa kanato. Nasayud ko nga ang seminary usa ka panalangin nga nagtabang kanako nga matukod diha sa lig-on nga sukaranan ni Jesukristo. Ako moawhag kaninyo sa pag-enroll sa seminary. Mobag-o usab kini sa inyong kinabuhi.