Ang Mga Kasulatan Mga Pulong sa Dios

Diha sa Basahon ni Mormon, si Lehi misulti sa iyang pamilya mahitungod sa iyang damgo, mahitungod sa kahoy sa kinabuhi. Sa damgo, gusto ni Lehi nga ang iyang pamilya mokaon sa bunga sa kahoy, diin “madanihon kaayo labaw sa tanan nga bunga” (1 Nephi 8:15). Nakita niya ang daghang mga tawo nga naglakaw sa dalan paingon ngadto sa kahoy sa kinabuhi, apan ang uban nangawala diha sa mga gabon sa kangitngit ug nasaag sa agianan. Ang uban migunit sa gunitanan nga puthaw diha sa agianan paingon sa kahoy. Sila mipadayon paingon sa unahan, nanggunit og maayo sa gunitanan hangtud nga miabut sila sa kahoy ug mikaon sa bunga, nga naghatag kanila og hingpit nga kalipay. (Tan-awa sa 1 Nephi 8.)

Ang anak nga lalaki ni Lehi nga si Nephi nag-ampo aron masayud sa gipasabut sa mga butang nga nakita sa iyang amahan. Si Nephi gipakita sa sama nga damgo nga nakita sa iyang amahan. Ang Espiritu mitudlo ni Nephi nga ang kahoy sa kinabuhi nagpasabut sa gugma sa Dios. Gipakita kang Nephi si Jesukristo, ang Anak sa Dios, nagtudlo ug nanalangin sa mga tawo sa yuta. Si Nephi gitudloan usab nga ang gunitanan nga puthaw nagpasabut sa pulong sa Dios. (Tan-awa sa 1 Nephi 11.)

Ang mga kasulatan mga pulong sa Dios. Ang pagbasa sa mga kasulatan susama sa paggunit ngadto sa gunitanan nga puthaw. Atong masayran kon unsay gusto ni Jesus nga atong buhaton ug isulti. Makabaton kita og gahum sa pagpakigbatok sa tintasyon ug makapadayon kita ngadto sa kahoy sa kinabuhi ug bation ang gugma sa Dios.