Kami Nagtuo!
Elaine S. Dalton (tunga), presidente; Mary N. Cook (wala), unang magtatambag; ug Ann M. Dibb (tuo), ikaduhang magtatambag.
Kami nagtuo nga ang usa ka mahiyason nga batan-ong babaye, giniyahan sa Espiritu, makausab sa kalibutan. Isip kinatibuk-ang kapangulohan sa Young Women, among naobserbahan ang batan-ong mga babaye nga nagbuhat sa unsay ilang gituohan nga sakto, nagbarug isip saksi, nagsunod sa mga baruganan sa ebanghelyo, ug tinuoray nga naghimo og kalainan. Talagasaon ang mahimo sa usa ka batan-ong babaye kon siya mahiyason, maminaw sa ligdong, hinay nga tingog sa Espiritu Santo, ug dayon mobuhat!
Sa dihang gisulat ni Joseph Smith ang ikatrese nga artikulo sa hugot nga pagtuo, iyang gipahayag ang tanang butang nga atong mahimo ug kinahanglan gayud nga tinguhaon ug mamahimong sama sa mga tumutuo. Nasayud si Joseph Smith nga kinahanglan gayud kitang motuo sa mga sumbanan ug mga mithi ug maninguha sa pagpangita niini nga mga butang aron makabaton sa gahum ug kalig-on sa Espiritu Santo. Nasayud siya nga kita kinahanglan nga mosunod sa Manluluwas diha sa pulong ug sa buhat. Nasayud siya nga ang pagbuhat niini moandam kanato nga mahimong takus sa mga panalangin sa templo.
Tuohi ang Inyong Kaugalingon
Unsaon man ninyo kini sa pagbuhat? Unsaon man ninyo sa pagdala sa uban sa pagsunod sa ehemplo sa Manluluwas, pagpuyo og usa ka mahiyason nga kinabuhi, ug pagpangandam sa templo? Una, tuohi ang inyong kaugalingon! Ang inyong kaisug ug kalig-on makatabang kaninyo nga mahimong usa ka lider, ug ang inyong pasalig mohimo og dakong kalainan niining tuiga. Ang inyong mga ideya, mga paglambo, ug mga buhat makahulma sa kalibutan karon ug sa umaabut.
Tungod sa kalibutan sa teknolohiya nga inyong gipuy-an, kamo adunay abilidad sa pagpakatap sa yuta niadtong mga butang nga mahiyason, matahum, ug dalaygon. Anaa sa tumoy sa inyong mga tudlo ang abilidad sa pagpamatuod sa ebanghelyo ni Jesukristo ngadto sa tibuok kalibutan. Wala gayud mahitabo kaniadto nga adunay usa ka henerasyon nga may sama nga abilidad, panalangin, ug oportunidad.
Tulo ka mga Butang Dugangan og Usa—Matag Adlaw!
Kami nagtuo diha kaninyo. Karon ang panahon sa paghiusa ug pagsugod sa usa ka pagbag-o nga mohatag kaninyo og gahum ug mopanalangin sa uban. Kami nagdapit kaninyo sa pagpadayon sa pagbuhat og tulo ka mga butang matag adlaw—pun-an og usa.
-
Pag-ampo matag buntag ug matag gabii.
-
Pagbasa sa Basahon ni Mormon labing minus lima ka minutos matag adlaw.
-
Pahiyum!
-
Agig dugang, kami nagdapit kaninyo sa pagsunod ug pagtuman sa mga sumbanan diha sa Alang sa Kalig-on sa mga Kabatan-onan. Himoang pamilyar kini nga mga sumbanan. Ipakigbahin kini sa uban. Ug magmahimong ehemplo sa mga tumutuo.
Niining tuiga, tuo. Tuo nga kamo anak nga babaye sa Langitnong Amahan, kinsa naghigugma kaninyo ug motabang kaninyo. Tuo sa Manluluwas nga si Jesukristo. Siya ang inyong kahayag. Siya ang inyong paglaum. Siya ang inyong ehemplo ug Manunubos. Tuohi ang inyong kaugalingon! Tuo diha sa gahum sa tanang batan-ong mga babaye nga nagsunod sa mga sumbanan. Dungan tanan kita makapangita niadtong mga butang nga mahiyason, matahum, ug dalaygon. Kitang tanan makahimo og kalainan sa atong kalibutan.
Kami nagtuo nga kamo ang henerasyon kansang pagtuo ug mga binuhatan mousab sa kalibutan. Kami nagtuo diha kaninyo!