Kami Naminaw sa Espiritu

Usa ka buntag ang akong kompanyon nga misyonaryo ug ako mihukom nga mag-tracting sa usa ka gamay nga komunidad sa among na-assign nga area sa habagatang Pilipinas. Samtang kami busy sa pagtuktok sa mga pultahan, usa ka lalaki ang miduol kanamo ug nangutana unsa ang among gibuhat. Kami makaingon nga siya nakainom.

Naghunahuna nga siya dili gayud interesado sa among mensahe, amo siyang gihatagan og pamphlet kabahin sa katuyoan sa kinabuhi. Amo dayon siyang giingnan nga kon siya mobasa sa pamphlet ug dili mag-inom nianang gabhiona, kami moadto sa iyang balay aron sa pagpasabut sa katuyoan sa kinabuhi. Siya mitando ug miingon nga siya magpaabut kanamo. Kami dayon nagdali sa pag-adto sa naka-eskedyul nga sabot sa pagtudlo.

Wala gayud kami intensyon sa pagbalik aron sa pagtudlo kaniya niadtong gabhiona, apan human niadto kada adlaw kon kami moagi sa iyang balay, mibati ako og pag-aghat nga mohunong. Ako dayong ibale-wala ang pagbati, bisan pa niana, ug hatagan og rason ang akong desisyon pinaagi sa pagsulti sa akong kaugalingon nga siya tingali hubog kaayo sa pagpaminaw.

Human sa pipila ka adlaw ang pag-aghat nahimong kusog kaayo nga wala nako makabalibad niini. Samtang kami mituktok sa iyang pultahan, kami gisugat sa usa ka nakugang nga babaye kinsa nangutana kanamo nganong wala kami dayon mobalik, sigun sa among gisaad. Siya miingon nga ang iyang bana nagpaabut kanamo nianang gabhiona ug sa unang higayon sa ilang kinabuhi sa kaminyoon, wala siya moinom.

Kami naulawan ug nangayo gayud og pasaylo. Kami mihimo og sabut sa pagbalik nianang gabhiona sa pagtudlo kaniya ug sa iyang bana. Sa wala madugay si Brother Gumabay (ang pangalan giusab) mihinulsol sa tanan niyang kalibutanong mga bisyo, nabunyagan, ug nahimong usa ka haligi sa komunidad.

Human sa pipila ka adlaw sa iyang bunyag, nabalhin ako sa laing area ug wala nay kontak sa pamilya. Ang ako lang mahimo mao ang maglaum ug mag-ampo nga sila magpabiling aktibo sa Simbahan.

Sa wala madugay akong nahibaloan nga ang gamay nga komunidad diin ang pamilyang Gumabay nagpuyo aduna nay branch ug dayon usa ka ward. Si Brother Gumabay gitawag nga mahimong bishop niadto nga ward. Nahibaloan usab nako nga kadaghanan sa iyang mga paryente nagpamiyembro sa Simbahan.

Sa dihang ako mibalik sa pagbisita sa akong daang mga area sa misyon, nahibaloan nako nga daghang mga tawo ang nagpamiyembro sa Simbahan didto tungod sa maayong ehemplo ni Bishop Gumabay, kinsa mibutang sa iyang kinabuhi sa mga kamot sa Ginoo ug mibutang Kaniya sa timon sa iyang pamilya ug sa matag adlaw nga mga kalihokan.

Ako mapasalamaton kaayo nga kami naminaw sa mga pag-aghat sa Espiritu sa pagbisita sa panimalay sa Gumabay. Pinaagi niining kasinatian nakasabut ako unsa ang gipasabut sa Ginoo sa dihang Siya miingon, “Ang mga maayo rag lawas wala magkinahanglan og mananambal, kondili ang mga masakiton” (Mateo 9:12).