Ganahan kaayo ko sa Liahona. Kini ang kompas sa akong kinabuhi; kini naggiya kanako ngadto sa husto nga agianan ug paingon sa mas maayo nga mga butang. Nakatabang kini kanako nga motubo nga lig-on ug makalikay sa mga pagtintal nga sagad nakong giatubang. Nakaamuma kini sa akong kinabuhi sa matag adlaw. Salamat kaninyo sa paghimo niini aron ang katawhan sa tibuok kalibutan makabaton niini nga kompas ug giya, diin nagpahimutang kanato diha sa dalan sa hugot nga pagtuo.

Kanunay ako nga mohatag og subskripsyon sa Liahona ngadto sa akong mga higala ug mga empleyado ingon nga mga gasa alang sa Pasko isip usa ka paagi sa pagtudlo sa ebanghelyo ngadto kanila. Kadtong anaa sa trabaho sa kasagaran moduol kanako ug mokomentaryo sa mga artikulo nga ilang nabasa. Ilang gigamit ang Liahona isip usa ka magtatambag, ug sila moingon nga kon sila adunay mga problema sa ilang mga pamilya magbasa sila og dungan sa Liahona. Nagbutang usab ko og kopya sa magasin diha sa lawak hulatanan sa among opisina. Usa kini ka talagsaon nga instrumento sa misyonaryo.

Kami mga taga-Colombia kinsa namuyo sa Logan, Utah, USA, ug mapasalamaton kami nga nakadawat sa Liahona sa pinulongan nga Kinatsila. Isip mga ginikanan, kami naningkamot nga makat-on ang among tulo ka anak nga mga babaye sa pagsunod sa ebanghelyo ug pagpalambo og gugma sa templo. Salamat sa pagmantala sa Liahona matag bulan, tungod kay sa mga mensahe niini ang among pamilya nakakaplag og kapanguhaan sa espirituhanong kalig-on.