Ang mga miyembro sa tibuok kontinente sa Africa migahin sa Sabado, Agosto 21, 2010, sa pagpalambo sa ilang mga komunidad isip kabahin sa 2010 nga All-Africa Helping Hands Day.

Niining tuiga, ang Stake sa Aba Nigeria midapit sa pipila ka mga grupo sa kabatan-on nga nagbasi sa komunidad aron makigtambayayong kanila, nga nakapahiusa og labaw sa 1,000 ka mga tawo. Sa District sa Umuahia Nigeria, labaw sa 100 ka mga miyembro gikan sa unom ka mga branch ang nangguna, namul-ong sa mga bulak, ug nanglimpyo sa mga kanal ug nataran sa Broadcasting Corporation sa Estado sa Abia.

Sa Accra, Ghana, ang mga branch gitahasan sa paglimpyo sa nagkalain-laing mga dapit, lakip ang mga ospital, mga eskwelahan sa mga bata, ug mga estasyon sa polis. Pipila ka mga miyembro ang gitahasan sa pagtabon sa mga lungag o sa paghinlo sa mga imbornal nga nasampongan.

Bisan asa ang mga miyembro nagsul-ob sa ilang Helping Hands nga mga saliko, mapasalamaton nga mga komunidad midawat sa ilang panabang. Ang pangulo sa Abia State Polytechnic misulti sa mga boluntaryo, “Sa panahon diin ang matag usa nangayo kon unsa ang mahimo sa gobyerno alang kanila, kini usa ka madawat nga kalamboan nga makabaton og organisasyon nga padayong naghatag og serbisyo sa katawhan.”

Ang Indonesian nga hubad sa triple combination anaa na karon, makahimong posible alang sa mga tigpamulong nga Indonesian sa pag-angkon og Basahon ni Mormon, Doktrina ug mga Pakigsaad, ug Perlas nga Labing Bililhon nga gihiusa sa pagbugkos diha sa ilang kaugalingong pinulongan. Ang bag-ong edisyon sa Basahon ni Mormon sa pinulongang Indonesian anaa usab.

Ang Indonesian nga triple anaa usab sa internet. Ang online nga hubad naglakip og mga footnotes, mga mapa, ug mga litrato ug nagtugot sa mga tigbasa nga makatimaan sa mga kasulatan ug makapahigayon og mga pagsiksik sa importanting pulong. Kini mahimong ma-access sa scriptures.lds.org/ind.

Adunay labaw sa 6,000 ka mga miyembro sa Simbahan nga Indonesian ang sinultihan sa tibuok kalibutan, kasagaran kanila naa sa Indonesia, Malaysia, ug sa Estados Unidos. Ang Indonesia mao ang ikaupat nga labing daghan og lumulupyo nga nasud sa kalibutan.

Ang Unang Kapangulohan nag-awhag sa mga miyembro sa pag-angkon og ilang kaugalingong mga kasulatan ug sa paggamit niini sa regular nga pagtuon, sa mga miting sa Simbahan, ug alang sa mga buluhaton sa Simbahan.

Ang Musika ug sa Pulong nga Gipamulong, ang sinemana nga sibya sa Mormon Tabernacle Choir nanominar sa Radio Hall of Fame sa Estados Unidos. Ang sibya mapili human ang hunta sa mga opisyales monominar og mga programa ug ang katawhan mobutar sa ilang paborito nga mga programa ug mga personalidad.

Ang Musika ug sa Pulong nga Gipamulong midaug sa National Pioneer nga kategoriya, diin nagpasidungog sa mga magsisibya kinsa nakahatag sa dili moubos og 10 ka tuig sa pagserbisyo sa industriya sa radyo ug nahimong mga lider sa pagpauswag o sa pagpalambo sa programa sa radyo diha sa nasudnon nga lebel.

Ang Musika ug sa Pulong nga Gipamulong mao ang pinakataas nga sibya sa radyo sa Estados Unidos. Ang unang pagsibya nahinabo niadtong Hulyo 15, 1929.

Ang programa gidala sa labaw pa kaysa 2,000 ka mga estasyon sa radyo, mga estasyon sa telebisyon, ug mga sistema sa cable. Anaa usab kini online sa musicandthespokenword.org. Gikan sa home page, i-klik ang Listen Live ug sunda ang link alang sa online streaming.