Bonnie H. Cordon

Wan skripja we Sista Bonnie H. Cordon i laekem tumas i stap long Doctrine and Covenants 123:17: “Bae yumi mekem wetem glad hat, evri samting we i stap long paoa blong yumi; mo afta, bae yumi stanap kwaet, wetem bigfala tras evriwan, blong luk fasin we God i sevem man, mo blong Lod i soemaot han blong hem.”

Long hem, ves ia i kavremap ol lesen we hem i bin lanem truaot long laef blong hem. “Yumi save mekem ol had samting, be yumi save mekem olgeta wetem glad,” Sista Cordon i talem; oli sastenem hem long 31 Maj 2018, olsem niufala Yang Woman Jeneral Presiden.

Save ia, i kam long hem long taem we hem i smol gel, long wan fam long Saot Is Aedaho, mo afta bakegen taem hem i traehad blong lanem wan niu lanwis olsem wan misinari long Potugal. Hem i wan mesej tu we hem i stap ripitim plante long ol misinari taem hem i bin stap wetem hasban blong hem taem hem i bin prisaed long Brasil Kuribita Misin. Mo hem i wan mesej we hem i stap plan naoia blong serem wetem ol yang woman raon long wol.

Ol yang woman blong tedei, hem i talem, oli askem olgeta blong oli girap mo oli muvum wok blong Lod i go fored. “Yumi save mekem,” hem i ademap.

Bonnie Hillam Cordon, i bon long namba 11 Maj 1964, mo papa mo mama blong hem i Harol mo Carol Rasmussen Hilliam; hem i bon long Aedaho Fols, Aedaho, YSA. Afta long misin blong hem, hem i kasem wan digri long saed blong edukesen long Brigham Yang Yunivesiti, mo hem i mitim Derek Lane Cordon. Tufala i mared long 25 Epril long Sol Lek Tempol. Tufala i gat fo pikinini mo fo apuboe.

Hem i givim laef taem seves insaed long Jos, mo sam long ol wok ia i neseri lida, mo seminari tija. Bifo hem i kasem koling blong hem, tu yia i pas, blong stap olsem Kaonsela long Praemeri Jeneral Presidensi, Sista Cordon i laekem blong givim seves olsem stek presiden blong Ol Yang Woman. “Iven afta we mi rilis long koling ia, mi neva stop blong prea from ol yang woman,” hem i talem.

Wan mesej we hem i wantem tumas blong serem wetem ol yang woman truaot long wol, i we, hem i lavem olgeta, mo moa impoten long hemia, we God i lavem olgeta.