Ol Niufala Polisi, Fasin blong Wok mo Prodak

Yut mo tempol wok. Fas Presidensi i anaonsem samfala jenis long tempol polisi we i givim janis long ol yang man mo ol yang woman long tempol wok mo helpem ol Praemeri pikinini blong rere long moa gud wei blong givim seves long ol tempol.

Stopem, faenemaot, mo fesem abius. Wok i gogohed blong givim kaonsel long ol lida long ol wei blong stopem bifo taem, blong faenemaot, mo blong fesem fasin blong abius; long 26 Maj 2018, Fas Presidensi i bin sendem wan leta mo wan moa pepa i go long ol lida blong Jos long Yunaeted Stet mo Kanada. Pepa ia i tekem ol gaedlaen blong ol wei we ol bisop mo ol stek presidensi oli sapos blong givim kaonsel long olgeta we oli kam viktim blong abius long saed blong seks, mo olsem wanem oli mas lidim ol intaviu wetem ol memba blong Jos.

Ol jenis long kamp blong Ol Yang Woman. Ol jenis long kamp program blong Ol Yang Woman blong Jos i tekem wan niufala kamp gaed we bambae oli putumaot long ol manis we oli stap kam, mo hemia i karemaot setifiket mo i lukluk moa long ol yut lida.

Gaed ia i blong yusum raon long wol wetem ol yang woman we oli stap laef long evri eria blong wol. Niufala Young Women Camp Guide i stap naoia long Inglis, (mo afta bae i kamaot long 23 lanwis) mo bae i stap olsem wan risos blong ol presidensi blong Ol Yang Woman, ol kamp speselis, mo ol yut kamp lida; oli save faenem long youngwomen.lds.org.

Sendem Miusik i go. Ol niufala jenis long fasin blong sendem ol miusik i go, naoia, i mekem se i kwik mo i isi blong ol memba oli sendem ol tabu misuik we oli raetem i go long Jos. Oli save sendem miusik i go long apps.lds.org/artcomp.

“Hao Blong” vidio janel. Jos i statem wan niu janel long YouTube, we oli singaotem “How To” we i givim ol simpol, gudfala help blong fesem ol ril jalenj blong laef. Oli putum se hem i “wan stop janel blong faenem help we yu nidim taem yu nidim;” naoia, janel ia i gat moa long 600 vidio we oli putum i stap long naen kategori, mo wanwan i gat fulap lis blong vidio blong plei folem ol defdefren topik, mo i stap long Inglis lanwis, mo sam i stap long Spanis, mo sam long Potugis. Jekem long HowTo.lds.org.

Skripja translesen. Jos i bin anaonsem samfala translesen projek blong 34 moa lanwis, wetem wan niu fasin blong wok we bae i letem ol pipol oli save stadi long sam raf pat blong translesen bifo oli pablisim ol faenol translesen, we i minim se ol memba bambae oli save luk moa isi ol skripja long lanwis blong olgeta.