Helpem Misinari Wok

Long ol las sikis manis, Jos i bin tekem step blong helpem misinari wok.

Ol Standet kwestin. Fas Presidensi i presentem wan set blong ol standet kwestin blong ol bisop mo ol stek presiden oli yusum taem oli stap intaviu ol fiuja fultaem misinari. Oli leftemap tingting blong ol lida, ol papa mo mama, mo ol yut blong oli kam blong savegud olgeta kwestin ia.

Ol standet we oli stap kamaot tru long ol kwestin ia, oli no jenisim o ademap samting long wanem i nid blong mekem long wan fultaem misinari seves, be blong luklukbak long olgeta oltaem, bambae i helpem ol fiuja misinari mo papa mo mama blong lanem ol prinsipol, mo blong faenemaot ol ples we i nid blong kam antap blong rere long wanem we i stap.

Yusum teknoloji. Namba blong ol misin we oli yusum ol mobael tul i go antap, aot long 87 i kasem 162, mo oli stap riplesem ol tablet wetem ol smatfon. Olgeta fon ia, oli helpem ol misinari blong save stadi, faenem pipol, mo tij.

Teknoloji, oli yusum tu blong givim, tru long intanet, ol samting blong ol pipol oli ridim blong ansarem ol kwestin blong relijin we oli gat. Jos i stat blong yusum ol onlaen tijing senta sikis yia i pas, mo tedei, i gat 20 onlaen tijing senta we oli wok raon long wol.

From teknoloji, ol memba oli save givim nem blong ol fren blong olgeta long ol misinari, mo naoia oli save toktok wetem ol misinari we oli stap tijim ol fren blong olgeta. Oli save toktok raon long ol nid wetem ol misinari, mo oli save tekpat long ol lesen tru long intanet. Faenemaot olsem wanem long lds.org/referrals.

Lukluk long ol nid we oli stap naoia. Stat long Julae 2018, Jos bae i stretem ol baondri blong 19 misin, mo bambae oli krietem 5 niu misin. Hemia bae i stretem namba blong ol misin, hem i aot long 421 i go daon long 407. Ol niufala misin bae oli Brasil Rio de Janero Saot, Kot Divoa Yamusukro, Naejeria Ibadan, Filipin Kabanatuan, mo Simbabwe Bulawayo. Ol ditel abaot ol misin we bae oli joen bae i kam i no longtaem, long ol leta we oli kam long ol misin presiden i go long ol papa mo mama blong ol misinari blong ol misin ia we bae i gat jenis.

Stat long taem ia we oli bin jenisim yia blong misinari seves, we oli anaonsem long 2012, Jos i bin krietem 76 niu misin blong save folem hae namba blong ol misinari we i stap long 58000 i go kasem 88000 misinari. Fas wef blong ol misinari i bin kam daon naoia, olsem we oli bin tingting long hem, mo naoia i gat samples 68000 misinari we oli stap givim seves. Hemia i minim se, naoia i stap, bae i no nid blong gat tumas misin. Be, hem i minim tu se bae oli lukluk gud long hao nao oli sendem ol misinari long ol eria we i gat nid from raon long wol.

Ol Misinari Trening Senta. Provo Misinari Trening Senta long Yuta, YSA, mo MTS long Filipin, tufala i kam bigwan moa mo oli bin dediketem olgeta, mo niufala misinari trening senta long Gana, oli bin dediketem finis. Spen mo Jile trening senta, bambae i klos long Jenuware 2019, mo ol misinari we oli sapos blong go long wan long tufala senta ia blong kasem trening, naoia bae oli go long wan long ol 13 trening senta we i stap raon long wol.