Elda Jack N. Gerard

Taem hem i wan smol boe, Elda Jack N. Gerard i wekap evri dei samples long 5 klok moning blong help blong kea long ol kao blong famli. Ol kao ia, oli kao blong givim melek. Hem i groap long wan smol fam komuniti kolosap long Mad Lek, Aedaho, YSA; hemia i no tijim hem blong wokhad mo blong tekem responsabiliti, be tu, i tijim hem blong luksave praes blong wanwan olsem wan pikinini blong God.

“Evriwan i gat wan rol blong plei, mo evriwan i stap ia from wan stamba tingting, i nomata long posisen blong hem long laef, o sapos hem i tolfala mo sotfala,” Elda Gerard i talem; oli bin sastenem hem long 31 Maj 2018 olsem wan Jeneral Atoriti Seventi. Lesen ia i bin wan presen blong hem truaot long laef blong hem.

Long saed blong wok blong hem, hem i bin bigfala lida blong plante ples—olsem Nasonal Maening Asosiesen, Amerika Kemistri Kaonsel, mo i no longtaem i pas, Amerika Petrol Institiut—olgeta ples ia oli bin givim hem sam janis blong save ol pipol we oli gat ol defren kaen laef.

Elda Gerard i bon long 1957, mo papa mo mama blong hem i James mo Cecil Gasser Gerard. Afta we hem i finisim misin blong hem long Sidni Ostrelia Misin, Elda Gerard i go long Yunivesiti blong Aedaho, mo i kasem wan ples blong praktis, mo afta, wan fultaem posisen olsem wan wokman blong wan man blong politik blong Aedaho.

Taem hem i bin stap wok long Wasington D.K., hem i bin mitim Claudette Neff, we i bin stap wok olsem wan asisten blong ol wokman long wan senata blong Yuta. “Hem i saenem laet blong gospel,” Elda Gerard i talem long saed blong miting blong olgeta. Tufala i bin mared long namba 4 Epril 1984 insaed long Sol Lek Tempol. Tufala i gat eit pikinini mo fo apupikinini.

Elda Gerard i kasem digri blong hem long Politik saens mo wan juris dokta digri long Joj Wasington Yunivesiti.

Elda Gerard i bin stap olsem wan bisop, stek presiden, Eria Seventi, Gospel Doktrin tija, mo Sandei Skul presiden.

Elda Gerard i talem se hem mo waef blong hem, tufala i bin wantem blong mekem tingting blong Lod. “Olsem ol man long wol ia we yumi gat wiknes, yumi mas putum tingting blong yumi long wanem we Lod i wantem yumi blong mekem, mo yumi putum tingting blong yumi i stap daon, mo yumi gat ona … blong givim evri taem mo paoa blong yumi long wok blong Lod.”