Elda Robert C. Gay

Taem hem i bin stap olsem misin presiden long Gana, Elda Robert C. Gay i kasem filing, wan dei, blong stop mo helpem wan boe we i stap krae. Long fas taem, hem i no wantem save long filing ia, be afta, hem i sendem wan memba blong Jos blong faenem boe ia mo tekem hem i kam long hem.

Elda Gay, we oli bin sastenem hem olsem wan memba blong Presidensi blong Olgeta Seventi long 31 Maj 2018, i bin lanem se boe ia i stap salem fis we oli mekem i drae, blong man we i stap lukaot long hem. Long dei ia, boe ia i lusum mane blong hem, from i bin gat wan hol long poket traoses blong hem.

“Sapos hem i gobak mo hem i no gat mane, bae man ia i talem se hem i giaman, maet bae i kilim hem, mo afta, bae i sakemaot hem long rod,” Elda Gay i talem. “Mifala i mekem hem i stap kwaet, givim mane we hem i lusum, mo tekem hem i gobak long man we i stap lukaot long hem.”

Olsem we hem i bin eksplenem long Oktoba 2012 jeneral konfrens, eksperiens ia i tijim Elda Gay long tufala trutok: “Faswan, mi save fogud long tetaem ia se God i savegud wanwan long yumi, mo i no save lego yumi; mo sekenwan, mi save se yumi mas oltaem folem voes blong Spirit insaed long yumi, mo go kwiktaem, nomata se i tekem yumi i go wea, i nomata ol fraet blong yumi, o sapos wan samting i no stret long yumi.”

Elda Gay, oli bin sastenem hem olsem wan Jeneral Atoriti Seventi long 31 Maj 2012. Long taem we oli bin singaotem hem long Presidensi blong Olgeta Seventi, hem i bin stap olsem Presiden blong Esia Not Eria. Bifo long hemia, hem i bin givim seves long hedkwota blong Jos olsem jeaman blong Indipenden Laef Seves/Pepetuol Edukesen Fand Komiti, mo hem i responsibol blong ol indipenden laef seves raon long wol.

Bifo hem i karem koling blong hem long Olgeta Seventi, hem i bin jif eksekutiv ofisa blong wan invesmen kampani we hem i help blong stanemap. Hem i help blong stanemap tu, mo stap olsem daerekta blong plante yumaniterian oganaesesen raon long wol, mo i bin wok long ol invesmen banking long Wall Street, i bin wok olsem wan manejmen konsalten, mo i bin wok olsem wan tija blong ekonomi long Harvard Yunivesiti.

Elda Gay i kasem digri blong hem long saed blong ekonomi we i lukluk moa long ol statistik long Yunivesiti blong Yuta, mo i kasem wan PHD long bisnis ekonomi long Harvard Yunivesiti.

Elda Gay i bin go long fultaem misin long Spen, i bin wan hae pris grup lida, wod Yang Man presiden, hae kaonsela, kaonsela long wan bisoprik, mo wan Eria Seventi.

Hem i bin bon long Los Anjeles, Yuta, YSA, long 1 Septemba 1951. Hem i maredem Lynette Nielsen long Epril 1974. Tufala i papa mo mama blong seven pikinini.