Elda Terence M. Vinson

Elda Terence M. Vinson i bilivim se Sevya i neva stap longwe tumas. “Hem i stap kolosap oltaem, speseli long ol tabu ples mo long ol taem blong nid,” hem i bin testifae olsem long Oktoba 2013 jeneral konfrens. “Samtaem, bae mi sek long hem, mi filim olsem se Hem i stap kilkilim solda blong mi blong mi save se Hem i lavem mi.”

Long wan taem, taem Elda Vinson i bin stap wokbaot wetem Elda Jeffrey R. Holland blong Kworom blong Olgeta Twelef Aposol, Elda Holland i sakem han blong hem raon long solda blong Elda Vinson, mo talem long hem se hem i lavem hem. Elda Vinson i talem: “Mi biliv se sapos yumi gat spesel janis ia blong wokbaot long bodi blong mit mo bun wetem Sevya, bae Hem tu, bae i sakem han blong hem raon long solda blong yumi, olsem nomo.”

Elda Vinson, we oli bin sastenem hem olsem wan memba blong Presidensi blong Olgeta Seventi long 31 Maj 2018, i talem se lav blong God i “filing ia we i swit bitim evri nara filing.”

Elda Vinson, we bae i statem niufala koling blong hem long namba 1 Ogis 2018, oli bin sastenem hem olsem wan Jeneral Atoriti Seventi blong Jos long namba 6 Epril 2013. Long tetaem ia, hem i bin stap givim seves olsem wan memba blong namba Eit Kworom blong Olgeta Seventi long Pasifik Eria. Naoia, hem i stap olsem Presiden blong Afrika Saot Wes Eria.

Elda Vinson i kasem wan digri long matematik, mo statistik, wan diploma long edukesen mo tijing, mo wan Masta digri long saed blong faenens. Long wok blong hem, hem i bin tij, trenem man, mo givim ol lesen long ol yunivesiti. Hem i bin wok olsem faenens advaesa mo ol fand maneja.

Taem hem i bin stap stadi long Jos taem hem i yang adalt, Elda Vinson i bin kasem wan strong filing long saed blong spirit. Hem i bin filim klia se hem i mas joenem Jos blong save progres mo faenem ol ansa blong ol kwestin we oli stap. Hem i bin kasem baptaes, mo konfemesen long wik afta.

Stat long taem ia i go, “mi bin save wanem Lod i wantem mi blong mekem mo mi faenem se evri kwestin blong mi, i bin gat wan ansa long hem.”

Stat long baptaes blong hem long 1974, Elda Vinson i bin stap olsem wan kaonsela long wan bisoprik, wan bisop, wan hae kaonsela, kaonsela insaed long wan stek presidensi, rijen ripresentativ, kaonsela long wan misin presidensi, tempol odinens wokman, mo wan Eria Seventi.

Hem i bin bon long Sidni, Ostrelia, long 12 Maj 1951. Hem i maredem Anne Carden long Mei 1974. Tufala i papa mo mama blong sikis pikinini.