Hat blong wan Profet
I Kam long Elda Gary E. Stevenson
Blong Kworom blong Olgeta Twelef Aposol
Yumi save glad se profet blong Lod i stap finis mo wok blong Lod i stap hapen long wan fasin we Hem i givim we i tabu.
Mi bin prea plante se bae Tabu Spirit i stap wetem wanwan long yumi long miting blong heven ia tedei. Wanem we yumi evriwan i bin witnesem tugeta i bin gud tumas we namba 17 profet blong dispensesen ia, oli bin sastenem hem long tabu asembli.
Taem mi stap lukaotem help blong save wanem Lod i wantem mi blong tokbaot tedei, tingting blong mi i go long wan storian we i jes pas wetem niufala Fas Presidensi. Long storian ia, wan long ol kaonsela i serem ol toktok ia: “Mi rili hop se ol memba blong Jos oli andastanem se wanem we i jes tekem ples taem oli singaotem niu profet blong yumi, Presiden Rasel M. Nelson, mo mining blong tabu asembli we bae i hapen long jeneral konfrens, i impoten mo i tabu tumas.” Hem i gohed blong talem, “Hem i bin 10 yia, mo plante, speseli ol yut blong Jos, oli no tingbaot o oli no bin eksperiensem hemia bifo.”
From hemia mi tingbaot ol eksperiens we mi bin gat. Fas profet we mi tingbaot, hem i Presiden David O. McKay. Mi bin gat 14 yia taem hem i ded. Mi tingbaot wan filing blong lusum wan man taem hem i ded, mo ol wota blong ae blong mama blong mi, mo harem nogud we ful famli i bin filim. Mi tingbaot olsem wanem ol toktok ia “Plis blesem Presiden David O. McKay” i kamaot long maot blong mi isi nomo long ol prea blong mi, we, sapos mi no bin stap tingting strong long prea blong mi, iven afta long ded blong hem, mi bae stap talem ol toktok ia nomo. Mi bin stap tingting sapos hat mo maen blong mi bae i gat semfala filing mo biliv long ol profet afta long hem. Be olsem ol papa mo mama we oli lavem ol pikinini blong olgeta, mi bin faenem wan lav blong, mi konek wetem, mo mi gat wan testemoni abaot Presiden Joseph Fielding Smith,, we i folem Presiden Mckay, mo blong wanwan profet we oli kam afta: Harold B. Lee, Spencer W. Kimball, Ezra Taft Benson, Howard W. Hunter, Gordon B. Hinckley, Thomas S. Monson, mo tedei Presiden Russell M. Nelson. Mi sastenem fulwan wanwan profet wetem han i go antap—mo hat we fulap long glad.
Taem wan long ol profet blong yumi we yumi lavem i ded i go, hem i nomol blong filim se yumi harem nogud mo lusum wan man. Be bigfala harem nogud ia i go daon tru long bigfala glad mo hop we i kam taem yumi eksperiensem wan long ol bigfala blesing blong Gospel ia we i kambak: koling mo sastening blong wan profet we i stap laef long wol ia.
From samting ia, mi bae mi toktok long tabu rod ia we yumi stap folem ova long pas 90 dei. Mi bae tokabaot ol fo defren pat: faswan, ded blong profet blong yumi mo taem we oli karemaot fas presidensi; nambatu, taem yumi wet blong oli oganaesem niu fas presidensi; nambatri, koling blong niu profet; mo nambafo, sastening blong niufala profet mo Fas Presidensi long tabu asembli.
Ded blong wan Profet
Long 2 Jenuware 2018, profet we yumi lavem, Thomas S. Monson i pas i go narasaed long vel. Hem bae i stap foreva insaed long hat blong yumi, Presiden Henry B. Eyring i serem ol filing long ded blong Presiden Monson we i talem gud ol filing blong yumi: “Ol fasin blong laef blong hem we i defren be i olsem blong Sevya, bae i rimaenem yumi blong givhan long ol pua, sik—iven evriwan long ol man—long ful wol.”1
Presiden Spencer W. Kimballi bin talem se:
“Taem wan sta i foldaon i go draon biaen long solwota, narawan i kamaot, mo ded i tekem laef i kam.
“Wok blong Lod i no gat en. Iven taem wan lida we i gat paoa i ded,i nogat wan smol taem we Jos i no gat wan lida, tangkyu long God we i bin givim kingdom blong hem blong i gohed we i no save finis. Olsem we i stap hapen finis … bifo long dispensesen ia, wan pipol wetem tingting ia stap daon i berem profet, i waepem wota blong ae i drae, mo oli tanem fes i go long fiuja.”2
Taem ia we Fas Presidensi i Oganaes
Stat long dei we profet i ded mo kasem taem we Fas presidensi i oganaes bakegen oli singaot “Taem we Fas Presidensi i oganaes.” Long ol dei ia, Kworom blong Olgeta Twelef, anda long lidasip blong kworom presiden, tugeta oli holem ol ki blong lukaotem lidasip blong Jos. Presiden Joseph F. Smithi bin tijim se, “I oltaem gat wan hed long Jos, mo sapos Presidensi blong Jos i kamaot folem wan ded o narafala samting, be nekis hed blong Jos hem i Olgeta Twelef Aposol kasem taem wan presidensi i oganaes bakegen.”3
Taem bitwin ded blong wan profet mo niu wan, hem i stat taem we Presiden Monson i ded long 2 Jenuware mo i en 12 dei afta long Sandei 14 Jenuware. Long Sabat moning ia, Kworom blong Olgeta Twelef i mit long rum antap long Sol Lek Tempol long wan Spirit blong livim kaekae mo prea, anda long prisaeding daereksen blong Presiden Rasel M. Nelson, hed blong ol Aposol mo Presiden blong Kworom blong Olgeta Twelef.
Koling blong wan Niufala Profet
Long tabu miting ia we bae yumi no fogetem, folem paten we i oganaes gud blong yuniti mo fasin blong agri i stap, ol Brata oli sidaon folem yia blong olgeta olsem aposol, long 13 jea long haf sekol mo leftemap han blong olgeta blong sastenem oganaesesen blong Fas Presidensi, mo afta, sastenem Presiden Russell Marion Nelson olsem Presiden blong Jos blong Jisas Kraes blong Ol Lata-dei Sent. Sastening ia i gohed wetem Kworom blong Olgeta Twelef we oli kam tugeta long wan sekol mo putum ol han antap long hed blong Presiden Nelson blong odenem mo setem hem apat, wetem nekis hed blong Aposol we i givim blesing.
Presiden Nelson i singaotem ol kaonsela blong hem, Presiden Dallin Harris Oaks, Presiden Henry Bennion Eyring wetem Presiden Oaks olsem Presiden blong Kworom blong olgeta Twelef Aposol mo Presiden Melvin Russell Ballard olsem Akting Presiden blong Kworom blong Olgeta Twelef Aposol. Folem ol semfala sastening vot, wanwan long ol Brata ia, Presiden Nelson i setem olgeta apat i go long ol wanwan ofis blong olgeta. Hem i wan eksperiens we i tabu tumas, we i fulap wetem Spirit.Mi givim long yu wan tru witnes se wanem we God i wantem, we yumi stap prea from plante, i gat plante paoa we i soem klia long ol aktiviti mo ol program blong dei ia.
Wetem odinesen blong Presiden Nelson mo oganaesesen blong Fas Presidensi bakegen, taem blong wet long Fas Presidensi i oganaes i kam long en, mo niufala Fas Presidensi i stat blong wok we i no gat wan seken nating blong stopem wok blong lidim kingdom blong Lod long wol ia.
Tabu Asembli
Long moning ia, tabu rod iai kasem top mak blong hem folem tok blong skripja insaed long Ol Doktrin mo Kavenan: “From we evri samting, oli mas mekem long oda, mo wetem ful sapot insaed long jos, tru long prea blong fet,”4 mo “tri Prisaeding Hae Pris” … tru long tras, fet, mo prea blong Jos, bae oli stap olsem wan kworom we i Presidensi blong Jos.”5
Elda David B. Haight i bin tokbaot long wan las kam tugeta olsem hemia we yumi stap tekpat long hem tedei ia.
“Yumi ol witnes mo ol man we yumi tekpat long wan tabu kam tugeta ia—wan tabu asembli blong wok folem ol samting we oli blong heven. Semmak olsem long taem bifo, i bin gat plante taem blong livim kaekae mo prea we ol Sent oli mekem raon wol blong oli save fulap wetem Spirit blong Lod, we ansa blong hem yumi luk … long kam tugeta ia blong moning tedei.
“Wan tabu asembli, olsem we toktok ia i talem, i tokbaot wan taem we i tabu, i klia mo i gat respek, wan taem we Ol Sent oli kam tugeta anda long daereksen blong Fas Presidensi.”6
Ol brata mo sista. Yumi save glad—iven singaot “Hosana!”—se voes blong Lod, wan profet blong God i stap, mo we Lod i glad se wok blong Hem i bin go long wan fasin we Hem i givim we i tabu.
Presiden Russell M. Nelson
Tabu rod ia, we God i odenem, i lidim i go long wan nara tabu profet we God i singaotem. Olsem we Presiden Monson wan long ol haeman we i bin stap laef long wol ia, Presiden Nelson tu i semmak. Lod i bin rere mo tijim gud hem blong lidim yumi long taem ia. Hem i wan bigfala blesing long yumi naoia we yumi gat dia Presiden Russell M. Nelson olsem profet we i gat lav mo strong tingting—namba 17 Presiden blong Jos long lasfala dispensesen ia.
Presiden Nelson i wan man we i spesel. Mi bin gat janis ia blong givim seves insaed long Kworom blong Olgeta Twelef wetem hem olsem kworom presiden blong kolosap ova 2 yia. Mi bin travel wetem hem mo sapraes long strong paoa blong hem, from man i mas muv kwiktaem blong stap folem spid blong hem. Long totol, hem i visitim 133 kantri long ful laef blong hem.
Hem i givhan long evriwan, yangfala mo olfala. Luk olsem se hem i save evriwan mo gat wan spesel presen blongtingbaot ol nem. Evriwan we i save hem, i filim se oli ol fevret blong hem. Mo i semmak long wanwan long yumi—from ril lav mo filing blong sapot we hem i gat blong evriwan.
Stamba wok blong mi wetem Presiden Nelson hem i long ol eklesiastik rol, be yet, mi bin kam blong save gud profesenol laef we Presiden Nelson i bin gat bifo oli bin singaotem hem olsem wan Jeneral Atoriti. Olsem we plante long yufala i save, Presiden Nelson i wan man we plante man i save gud hem olsem wan dokta blong hat mo, eli long medikol wok blong hem, i wan paeonia long saed blong developem masin blong hat mo lang. Hem i bin wok tu insaed long wan stadi tim we oli sapotem fas operesen blong hat long 1951 we oli wokem long man wetem masin blong hat mo lang. Presiden Nelson i operetem hat blong Presiden Spensa W. Kimbol i no longtaem bifo Presiden Kimbol i kam profet.
Hem i intresting blong luk se taem Presiden Nelson i kasem koling i go long Olgeta Twelef 34 yia i pas hem i endem wok blong hem long medikol dokta blong mekem hat i kam strong mo riperem hat, hem i statem wan seves olsem wan Aposol blong mekem i kam strong mo riperem hat blong plante ten taosen raon long wol, we oli bin leftemap mo kasem hiling tru long ol toktok mo fasin blong waes, seves, mo lav blong hem.
Wan Hat Olsem Hemia blong Kraes
Taem mi pikjarem wan hat blong Kraes long evri dei praktis, mi luk Presiden Nelson. Mi no bin mitim wan man we i soem fasin ia long wan level wemoa hae bitim hem. I bin wan gudfala tijing long mi blong stap long posisen ia blong luk miwan ol wok we Presiden Nelson i mekem wetem hat olsem hemia blong Kraes.
Samfala wik afta long koling blong mi i go long Twelef long Oktoba 2015, mi bin gat janis blong kam blong savegud wok blong Presiden Nelson bifo. Oli bin invaetem mi blong go long wan lafet we hem i kasem wan praes long saed blong operetem hat. Taem mi go insaed long ples ia, mi sapraes blong luk bigfala namba blong ol impoten man we oli stap long taem ia blong givim ona mo luksavewok we Presiden Nelson i bin mekem plante yia i pas olsem wan medikol dokta mo man blong operetem man.
Long naet ia, plante impoten man oli bin stanap mo talem respek mo tangkyu blong olgeta long bigfala kontribusen blong Presiden Nelson long wok blong ol dokta. Olgeta prisenta we oli toktok, oli tokbaot bigwan ol bigfala wok blong Presiden Nelson, be mi mi no save toktok taem mi statem wan storian wetem wan man we i bin sidaon long saed blong mi. Hem i no save mi, be hem i save Presiden Nelson olsem Dokta Nelson, olsem wan daerekta blong skul blong ol dokta blong operetem bodi long ples we hat mo lang i stap, hemia long medikol skul long 1955.
Man ia hem i wan studen blong Presiden Nelson bifo. Hem i serem plante memori. Interesting samting we hem i talem abaot wei we Presiden Nelson i tij, hem i se plante man i save long hem from wei ia. Hem i eksplenem se plante long ol tijing blong operesen blong hat i stap hapen insaed long operesen rum. Long ples ia nao, ol studen dokta oli luk mo mekem operesen wetem supavaesa blong skul ia, olsem wan klasrum blong mekem eksperiens. Hem i serem se filing blong operesen rum anda long defdefren dokta blong skul ia i no oganaes, kompetisen i hae, i fulap wetem presa, mo i selfis tu. Man ia i tokbaot se hem i wan had ples, samtaem i mekem yu fil daon long yuwan. From samting ia, ol studen dokta oli filim se skul blong olgeta, plante taem, i no kam gud nomo.
Hem i eksplenem wan spesel filing we hem i faenem insaed long operesen rum blong Presiden Nelson. I gat pis, i kwaet, mo i gat respek. Ol studen dokta, hem i tritim olgeta wetem bigfala respek. Be, afta we hem i soem ol step blong operesen, Dokta Nelson i wantem hae standet blong wok long wanwan studen dokta. Man ia i gohed blong talem olsem wanem bes sikman we oli oraet mo ol bes dokta blong operetem man oli kamaot long operesen rum blong Dokta Nelson.
Hemia i no wan sapraes long mi nating. Hemia wanem we mi bin luk miwan, mo bin gat blesing long hem tru long Kworom blong Olgeta Twelef. Mi filim se mi bin, long wan wei, wan long ol “studen dokta” blong hem.
Presiden Nelson i gat wan spesel wei blong tijim ol narafala mo stretem man long wan gudfala wei we i fulap wetem respek mo fasin blong leftemap tingting blong man. Hem i ripresentem hat blong Kraes mo wan eksampol blong yumi evriwan. Tru long hem, yumi lanem se long evri situesen we yumi faenem yumi long hem, fasin mo hat blong yumi i save stap wan wetem ol prinsipol blong gospel blong Jisas Kraes.
Yumi naoia i gat bigfala blesing ia blong sastenem profet blong yumi, Presiden Rasel M. Nelson. Truaot long laef blong hem, hem i wok strong long ol wok blong hem olsem wan studen, papa, profesa, hasban, dokta, prishud lida, bubuman, mo Aposol. Hem i bin mekem ol wok blong hem bifo—mo i stap gohed blong mekem—wetem hat blong wan profet.
Ol brata mo sista. Wanem we yumi bin witnesem mo tekpat long hem tedei, olsem wan tabu asembli, i lidim mi blong witnesem se Presiden Russell M. Nelson, i voes we i laef, blong Lod, i go long evri man. Mi ademap testemoni abaot God Papa, Jisas Kraes, mo rol blong Hem olsem Sevya mo Ridima. Long nem blong Jisas Kraes, amen.