Ol Profet Oli Toktok Tru long Paoa blong Tabu Spirit

Ol dia brata mo sista blong mi. Long weaples yufala i stap long hem, mi wantem talem tru mo bigfala tangkyu blong mi long sastening vot blong yufala yestedei. Nomata mi filim se mi no save toktok gud mo mi toktok slo olsem Moses, mi faenem hop long toktok we Lod i talem long hem:

“!Yu luk! ?Hu i mekem maot blong man? ?Hu i mekem man i no save toktok? ?Hu i mekem sora blong man i fas? ?Hu i save mekem man i save lukluk mo hu i mekem man i blaen? Mi mi Hae God. Mi nomo mi save mekem ol samting ia.

“! Yu go naoia! Bambae mi mi givhan long yu long toktok blong yu, mo bambae mi talem long yu wanem we yu yu mas talemaot” (Eksodas 4:11–12; luk tu long ves 10).

Tingting blong mi i kwaet tu from lav mo sapot blong waef blong mi we mi lavem. Hem i bin wan eksampol blong gud fasin, lav mo gat ful tingting long Lod, hemia long mi, mo famli blong mi. Mi lavem hem wetem evri pis blong hat blong mi, mo mi talem tangkyu from gudfala tingting mo paoa we hem i gat long mifala.

Ol brata mo sista. Mi wantem testifae long yufala se Presiden Russel M. Nelson i profet blong God long wol ia. Mi no luk wan we i moa kaen mo i gat moa lav bitim hem. Nomata we mi harem se mi no naf long tabu koling ia, ol toktok blong hem mo ol ae blong lav blong hem taem hem i givim responsabiliti ia long mi, i mekem se mi filim se lav blong Sevya i kavremap mi. Tangkyu tumas Presiden Nelson. Mi sastenem yu mo mi lavem yu.

?Hemia i no wan blesing blong gat ol profet, ol sia mo ol reveleta long wol ia long ol las dei ia we yumi stap laef long hem, we oli stap luklukgud blong save tingting blong Lod mo folem toktok ia? Hem i gud long tingting mo hat blong save se yumi no stap yumiwan long wol, nomata ol jalenj we yumi stap fesem long laef. Blong gat ol profet, i wan saen blong lav we God i gat long ol pikinini blong Hem. Oli mekem ol pipol blong Hem oli save ol promes, mo huia stret i God mo Jisas Kraes. Mi bin lanem hemia tru long eksperiens blong mi.

Eitin yia i pas, waef blong mi mo mi i kasem wan fon kol i kam long Presiden Jemes E. Faost, we tetaem ia, i Seken Kaonsela long Fas Presidensi. Hem i ringim mifala blong stap olsem misin presiden mo kompanion long Potugal. Hem i talem mitufala se mitufala i gat sikis wik nomo bifo mitufala i statem misin. Nomata we mitufala i filim se mitufala i no rere gud mo no naf, mitufala i akseptem koling ia. Bigfala wari blong mitufala long tetaem ia i blong kasem ol visa we i nid blong givim seves long kantri ia, from se, folem eksperiens blong bifo, mitufala i save se rod ia i tekem sikis kasem eit manis blong i finis.

Presiden Faost i askem nao sapos mitufala i gat fet se Lod bae i mekem wan merikel, mo bae mitufala i save mekem visa i hariap moa. Ansa blong mitufala i wan bigfala Yes, mo mitufala i stap blong mekem ol pepa wok stret afta. Mitufala i rere long ol pepa we i nid blong visa, tekem ol trifala yang pikinini blong mitufala, mo go long konsulet ofis kwiktaem. Wan naes ledi i welkamem mitufala. Hem i lukluk tru long ol pepa blong mitufala, mo luklukgud wanem bae mitufala i go mekem long Potugal, hem i tanem hem long mifala, mo i askem: “?Bae yutufala i rili go helpem ol pipol long kantri blong mi? Mitufala i talem wan strong Yes, mo eksplenem se bambae mitufala i go ripresentem Jisas Kraes mo testifae abaot Hem mo tabu misin blong Hem long wol. Mitufala i gobak fo wik afta, kasem visa blong mitufala, mo foldaon long misin graon long sikis wik taem, olsem we wan profet blong Lod i bin askem mitufala blong mekem.

Ol brata mo sista. Wetem ful dip hat blong mi, mi testifae se ol profet oli toktok tru long paoa blong Tabu Spirit Oli testifae abaot Kraes mo tabu misin blong Hem long wol ia. Oli ripresentem maen mo hat blong Lod, mo oli singaotem olgeta blong ripresentem Hem mo tijim yumi wanem yumi mas mekem blong gobak stap wetem God mo Pikinini blong Hem, Jisas Kraes. Semmak, yumi gat blesing taem yumi stap helpem ol narawan insaed long ol wod mo stek. Taem yumi folem olgeta, laef blong yumi bae i hapi moa mo i no fasfas tumas, ol samting we oli had mo ol problem bae oli kam isi blong tekem, mo yumi krietem wan klos blong faet blong spirit raon long yumi we bae i protektem yumi long ol atak blong enemi long taem blong yumi.

Long Ista dei ia, mi testifae long tabu fasin se Jisas Kraes i girap bakegen, Hem i stap laef mo i stap daerektem Jos blong Hem long wol tru long ol profet, sia, mo reveleta blong Hem. Mi testifae se Hem i Sevya mo Ridima blong wol, mo we, tru long Hem, bae yumi gat laef mo kam olsem wan god long ples we dia God i stap long hem. Mi lavem Hem; mi laekem Hem. Mi wantem folem Hem mo mekem tingting blong Hem mo kam moa olsem Hem. Mi talem ol samting ia long tabu nem blong Lod blong yumi, Jisas Kraes, amen.