Tufa’a 71
E heheura’a tei hōro’ahia mai ia Iosepha Semita te peropheta, ’e ia Sidney Rigdon, i Hiram, i Ohio, i te 1 nō Tītema 1831. ’Ua rave fa’ahou te peropheta i te ’ohipa nō te ’īriti i te Bibilia ’e ’o Sidney Rigdon ho’i tōna pāpa’i parau ; ’e ’ua nā reira noa rāua i te rave i taua ’ohipa ra ē tae noa atu i te taime i fāri’ihia ai teie nei heheura’a, ’e i taua taime ra ’ua tu’uhia teie ’ohipa i te hiti ’ia hōro’ahia ia rāua ’ia rave fa’aoti i tē hōro’ahia mai i roto i teie heheura’a. ’Ua tītauhia te mau taea’e ’ia haere atu e poro haere nō te fa’aiti i te mau mana’o au ’ore i tupu nō ni’a i te ’Ēkālesia nā roto i te nene’ira’ahia te tahi mau rata papa’ihia e Ezra Booth, ’o tei tāiva i te ’Ēkālesia.
1–4, ’Ua tonohia Iosepha Semita e Sidney Rigdon nō te poro i te ’evanelia ; 5–11, E ha’afifihia te mau ’enemi o te feiā mo’a.
1 Inaha, tē nā ’ō mai nei te Fatu ia ’ōrua e tō’u nei nā tāvini e Iosepha Semita, tamaiti, ’e Sidney Rigdon, ’ua tae mau ā te taime e ti’a ai ’e e au ho’i iā’u nei ’ia hāmama ’ōrua i tō ’ōrua vaha i te poro-haere-ra’a i tā’u nei ’evanelia, te mau mea ho’i nō te bāsileia, i te tātarara’a atu i te mau parau ’aro nō te reira nā roto i te mau pāpa’ira’a mo’a, mai te au i te reira tufa’a o te Vārua ’e te mana ho’i ’o tē hōro’ahia atu ia ’ōrua, mai te au i tā’u i hina’aro.
2 ’Oia mau tē parau atu nei au ia ’ōrua na, ’a poro haere i tō te ao nei i roto i te mau retioni ē ’ati noa a’e, ’e i roto i te ’ēkālesia ato’a, nō te hō’ē tau, ē tae noa atu ho’i i te taime e fa’a’itehia mai ai ia ’ōrua na.
3 ’Oia mau ïa e misiōni ta’a ’ē ho’i teie nō te hō’ē tau poto tā’u e hōro’a atu nei ia ’ōrua na.
4 Nō reira, ’a rave i te ’ohipa i roto i tā’u nei ’ō vine. ’A pi’i māite i tō te fenua nei, ’e ’a fa’a’ite i te parau, ’e ’a fa’aineine ho’i i te ’ē’a nō te mau fa’auera’a ’e te mau heheura’a ’o tē tae mai ra.
5 I teienei, inaha, ’o teie ho’i te pa’ari ; ’o ’oia ’o tē tai’o ra, ’ia ta’a ho’i iāna ’e ’ia fāri’i ato’a ;
6 Nō te mea ’o ’oia ’o tē fāri’i mai ra, e hōro’ahia ïa ’ia rahi atu ā, ’oia ïa te mana.
7 Nō reira, ’a ha’amāmū i tō ’ōrua mau ’enemi ; ’a parau atu ia rātou ’ia ’fārerei mai ia ’ōrua i te vāhi ta’ata ’e i te vāhi ta’ata ’ore ho’i ; ’e mai te mea e ha’apa’o maita’i ’ōrua, e fa’a’itehia mai tō rātou ra ha’amā.
8 Nō reira, ’a tu’u atu ia rātou ’ia fa’a’ite mai i tā rātou ra mau parau tumu pūai roa ’ei pāto’ira’a i te Fatu.
9 ’Oia mau ïa, tē nā reira mai nei te Fatu ia ’ōrua—’aore hō’ē mauiha’a tama’i ’o tē tu’uhia mai nō te pāto’i ia ’ōrua e manuia.
10 ’E mai te mea e fa’ateitei mai te hō’ē ta’ata i tōna reo nō te pāto’i ia ’ōrua, e ha’afifihia ’oia i te taime i ha’apa’ohia e au ra.
11 Nō reira a ha’apa’o i tā’u mau fa’auera’a ; e parau mau ïa ’e te ti’a ho’i. ’Oia ïa. ’Āmene.