Tufa’a 74
E heheura’a tei hōro’ahia mai ia Iosepha Semita te peropheta i te mata’eina’a nō Wayne, i New York, i te matahiti 1830. ’Aita ā te ’Ēkālesia i fa’ati’ahia, ’ua hiti mai te mau uira’a nō ni’a i te fa’anahora’a tano nō te bāpetizora’a, ’e nō reira, ’ua ’imi te peropheta i te mau pāhonora’a nō ni’a i te reira tumu parau. Tē fa’ati’a nei te ’ā’amu nō Iosepha Semita ē, ’ua riro teie heheura’a ’ei ha’amāramaramara’a i te 1 Korinetia 7:14, te ’īrava tei fa’a’ohipa-pinepine-hia nō te turu i te parau nō te bāpetizora’a i te mau tamari’i ri’i.
1–5, ’Ua a’o Paulo i tō te ’Ēkālesia i tōna mau mahana ’eiaha e ha’apa’o i te ture a Mose ; 6–7, E mea mo’a te mau tamari’i ri’i ’e ’ua ha’amo’ahia rātou nā roto i te Tāra’ehara.
1 ’Ua ha’amo’ahia ho’i te tāne ti’aturi ’ore ’e te vahine, ’e ’ua ha’amo’ahia ho’i te vahine ti’aturi ’ore ’e te tāne ; ’āhiri ’aita rā, ’ua vi’ivi’i ïa tā ’outou mau tamari’i, i teienei rā, ’ua mo’a rātou.
2 I teienei, i te mau mahana nō te mau ’āpōsetolo, ’ua ha’apa’ohia te ture nō te peritome i rotopū i te mau ’āti Iuda ato’a ’o tei ’ore i ti’aturi i te ’evanelia a Iesu Mesia.
3 ’E i muri a’era, ’ua tupu te hō’ē mārōra’a rahi roa i rotopū i te ta’ata nō ni’a i te ture nō te peritome, nō te mea ’ua hina’aro te tāne ti’aturi ’ore ’ia peritomehia tāna mau tamari’i ’e ’ia pe’e ho’i i te ture a Mose ra, ’e ’ua hope ho’i te reira ture.
4 ’E i muri a’era, ’ua ha’apa’o te mau tamari’i ’o tei pa’ari i raro a’e i te ture a Mose, i te mau peu tumu a tō rātou ra mau metua ’e ’aore ho’i rātou i ti’aturi i te ’evanelia a te Mesia, ’e nā roto i te reira ’ua riro rātou ’ei mea vi’ivi’i.
5 Nō reira, ’o teie ho’i te tumu te ’āpōsetolo i pāpa’i atu ai i te ’ēkālesia, ma te hōro’a atu i te hō’ē fa’auera’a ia rātou, e ’ere nā te Fatu, nāna iho rā, ’eiaha te ta’ata ti’aturi ’ia fa’aipoipo i te ta’ata ti’aturi ’ore ; maori rā ’ua fa’a’orehia te ture a Mose i rotopū ia rātou,
6 ’Ia vai peritome-’ore-hia tā rātou mau tamari’i ; ’e ’ia fa’a’orehia ho’i te peu tumu, ’o tei parau ē, e mea vi’ivi’i te mau tamari’i ri’i ; nō te mea ’ua ha’apa’ohia ho’i te reira i rotopū i te mau ’āti Iuda ;
7 ’Āre’a rā e mea mo’a te mau tamari’i ri’i, i ha’amo’ahia na ho’i rātou nā roto i te tāra’ehara a Iesu Mesia ; ’e ’o te aura’a teie nō te mau pāpa’ira’a mo’a.