Tufa’a 31
E heheura’a tei hōro’ahia mai nā roto ia Iosepha Semita te peropheta, ia Thomas B. Marsh, i te ’āva’e Tetepa 1830. ’Ua tupu teie ’ohipa i muri noa iho i te ’āmuira’a a te ’Ēkālesia (’a hi’o i te upo’o parau nō te tufa’a 30). ’Ua bāpetizohia ’o Thomas B. Marsh i te pae mātāmua nō te ’āva’e, ’e ’ua fa’atōro’ahia ’oia ’ei peresibutero i roto i te ’Ēkālesia nā mua a’e teie heheura’a i hōro’ahia mai ai.
1–6, ’Ua pi’ihia Thomas B. Marsh nō te poro i te ’evanelia ’e ’ua fa’a’ite-pāpū-hia ’oia ē e maita’i iho ā tōna ’utuāfare ; 7–13, ’Ua a’ohia ’oia ’ia fa’a’oroma’i, ’ia pure tāmau noa, ’e ’ia pe’e i te Fa’aa’o.
1 E Thomas, tā’u tamaiti, e ao tō ’oe nō tō ’oe fa’aro’o i tā’u nei ’ohipa.
2 Inaha, e rave rahi tō ’oe ra mau ’ati nō tō ’oe ’utuāfare ; noa atu rā i te reira, e ha’amaita’i au ia ’oe e tō ’oe ’utuāfare, ’oia ïa, tā ’oe ato’a mau tamari’i ri’i ; ’e e tae mai te mahana rātou e ti’aturi ai, ’e e ’ite ai ho’i i te parau mau, ’e e riro rātou ’ei hō’ē ia ’oe i roto i tā’u nei ’ēkālesia.
3 ’A poupou tō ’oe ’ā’au ’e ’a ’oa’oa, nō te mea ’ua tae i te hora nō tā ’oe na ’ohipa ; ’e e ha’amatarahia tō ’oe na arero, ’e e fa’a’ite atu ’oe i te parau maita’i nō te ’oa’oa rahi i teie nei u’i.
4 E fa’a’ite atu ’oe i te mau mea ’o tei heheuhia mai i tō’u tāvini ra ia Iosepha Semita, tamaiti. E ha’amata ’oe i te a’o mai teie taime atu, ’oia ïa, ’ia ’ō’oti i roto i te ’āua ’o tei teatea roa ’e ’ua ineine ’ia tūtu’ihia i te auahi ra.
5 Nō reira, ’a māo’a na i tā ’oe mauha’a ’ō’oti ma tō ’ā’au ato’a, ’e ’ua fa’a’orehia tā ’oe mau hara, ’e e teiaha ho’i ’oe i te mau ruru i ni’a i tō ’oe na tua, nō te mea ’ua au ho’i i te ta’ata rave ’ohipa tāna ra utu’a. Nō reira, e ora noa ā tō ’oe ra ’utuāfare.
6 Inaha, tē parau atu nei au ia ’oe na, ’a haere ’ē atu ’oe mai roto atu ia rātou ra nō te hō’ē taime poto noa, ’e ’a fa’a’ite atu i tā’u parau ; ’e e fa’aineine au i te tahi vāhi nō rātou.
7 ’Oia ïa, e ha’amarū vau i te ’ā’au o te mau ta’ata, ’e e fāri’i mai rātou ia ’oe. ’E e fa’ati’a vau i te hō’ē ’ēkālesia nā roto i tō ’oe na rima ;
8 ’E nā ’oe e fa’aitoito ia rātou ’e e fa’aineine ho’i ia rātou nō te taime rātou e ha’aputuputuhia atu ai.
9 ’A fa’a’oroma’i i roto i te mau ’ati, ’eiaha e fa’a’ino atu i tei fa’a’ino mai. ’A fa’atere i tō ’oe ’utuāfare nā roto i te marū, ’e ’a fa’aitoito noa ma te ’āueue ’ore.
10 Inaha, tē parau atu nei au ia ’oe na, e riro ’oe mai te hō’ē taote rapa’au ma’i i tō te ’ēkālesia, ’eiaha rā i tō te ao nei, nō te mea ’aita rātou e fāri’i mai ia ’oe.
11 ’A haere i tō ’oe haerera’a i te mau vāhi tā’u i hina’aro, ’e e hōro’ahia atu ia ’oe e te Fa’aa’o te ’ohipa tā ’oe e rave ’e te vāhi ho’i tā ’oe e haere.
12 ’A pure noa, ’o te ō ’oe i roto i te fa’ahemara’a, ’e ’o te ’ere ’oe i tā ’oe ra utu’a maita’i.
13 ’A ha’apa’o maita’i noa ē tae noa atu i te hope’a, ’e inaha, tei pīha’i iho vau ia ’oe na. E ’ere nā te ta’ata teie nei mau parau, nā’u nei rā, ’oia ’o Iesu Mesia, tō ’oe Tāra’ehara, nā roto i te hina’aro o te Metua. ’Āmene.