Tufa’a 15
E heheura’a tei hōro’ahia mai nā roto ia Iosepha Semita te peropheta, ia John Whitmer, i Fayette, i New York, i te ’āva’e Tiunu 1829 (Hi’o i te upo’o parau nō te tufa’a 14). Tē fa’a’ite pāpū mai ra teie nei parau ē, nā John Whitmer ana’e teie nei parau poro’i, nō te mea tē fa’a’ite mai ra te Fatu i tei ’itehia e John Whitmer ’e ’oia ana’e iho—’Ua riro John Whitmer i muri iho ’ei hō’ē o nā ’ite to’ova’u nō te Buka a Moromona.
1–2, ’Ua fa’atoro mai te Fatu i tōna rima i ni’a i te mau ta’ata ato’a ; 3–6, Te porora’a i te ’evanelia ’e te fa’aorara’a i te mau vārua ’o te hō’ē ïa mea faufa’a rahi roa a’e.
1 ’A ha’apa’o mai na, e tō’u tāvini e John, ’e ’a fa’aro’o mai na i te mau parau a Iesu Mesia, tō ’oe Fatu ’e tō ’oe ho’i Tāra’ehara.
2 Inaha ho’i, tē parau ’ū’ana atu nei au ia ’oe ’e ma te mana ho’i, nō te mea tei ni’a a’e tō’u rima i te ao pā’āto’a nei.
3 ’E e fa’a’ite atu vau ia ’oe i te mau mea ’aore i ’itea i te hō’ē ta’ata maori rā ia tāua ana’e—
4 ’Ua ani pinepine mai ho’i ’oe iā’u nei ’ia ’ite ’oe i te mea ’o tē riro ’ei mea faufa’a rahi roa ia ’oe na.
5 Inaha, e ao tō ’oe nō teie nei mea, ’e nō te paraura’a atu i tā’u mau parau tā’u i hōro’a atu ia ’oe mai te au i tā’u mau fa’auera’a.
6 ’E i teienei, inaha, tē parau atu nei au ia ’oe na, ’e te mea faufa’a rahi roa a’e ia ’oe na, ’o te paraura’a ïa i te parau tātarahapa i teie nei feiā, ’ia fa’afāriu mai ’oe i te mau vārua iā’u nei, ’ia ti’a ia ’oe ’ia fa’aea i pīha’i iho ia rātou i roto i te bāsileia o tō’u Metua. ’Āmene.