“Kuv Muab Kuv txoj Kev Kaj Siab Tso rau Nej”

Kuv cov muam, Vajtswv tus Ntsuj Plig twb tau foom koob hmoov rau peb hmo no. Cov lus uas cov muam thawj coj hais uas muaj hwj chim tshoov peb lub siab thiab cov nkauj txhawb nqa peb txoj kev ntseeg thiab ua rau peb xav ua raws li peb tej kev khi lus uas peb khi nrog peb Leej Txiv Saum Ntuj Ceeb Tsheej uas hlub peb. Ua rau peb haj yam hlub tus Tswv Yexus Khetos thiab ris Nws txiaj rau lub txiaj ntsim uas yog Nws txoj kev theej txhoj.

Kuv zaj lus hmo no yeej yooj yim hais. Peb txhua tus twb nyob kaj siab lug hmo no. Peb txhua tus xav muaj kev kaj siab lug rau peb tus kheej, peb tsev neeg, thiab nrog cov neeg nyob ib puag ncig peb. Tus Tswv cog lug tias Nws cov thwj tim yuav nyob kaj siab lug thaum txog lub sij hawm Nws yuav ncaim lawv. Nws twb cog lus zoo ib yam rau peb. Tiam sis Nws hais tias Nws yuav muab kev kaj siab rau lawv raws li Nws txoj kev, tsis yog li neeg ntiaj teb muab. Nws piav txog Nws txoj kev muab kev kaj siab lug:

“Tus [Nplij Siab] uas yog tus Vaj Ntsuj Plig tus Dawb Huv uas kuv thov kom Leej Txiv txib los, nws yuav qhia txhua yam rau nej thiab pab kom nej nco txhua yam uas kuv tau qhia rau nej lawm.

“Kuv muab kuv txoj kev kaj siab tso rau nej; txoj kev kaj siab uas kuv muab pub rau nej, kuv tsis muab rau nej li neeg ntiaj teb muab. Nej tsis txhob txhawj, tsis txhob nyuaj siab thiab tsis txhob ntshai” (Yauhas 14:26–27).

Mauxiyas cov tub xav tau lub txiaj ntsim kev kaj siab lug ntawd thaum lawv tab tom yuav mus qhia cov Neeg Lamas. Thaum lawv xav txog qhov uas lawv txoj hauj lwm tseem ceeb npaum li cas ua rau lawv ntxhov siab, lawv thiaj li thov txais kev nplij siab. Thiab “tus Tswv tau los saib xyuas lawv nrog nws tus Ntsuj Plig, thiab tau hais rau lawv tias: Cia li txhob txhawj. Thiab lawv tau tsis txhawj” (Amas 17:10; kuj saib Amas 26:27).

Tej lub sij hawm, ua rau nej xav nyob kaj siab lug thaum nej tsis paub yav tom ntej yuav zoo li cas thiab zoo li nej muaj tej teeb meem loj heev. Mauxiyas cov tub kawm zaj lus uas tus Tswv qhia rau Maulaunais. Yog ib zaj lus rau peb txhua tus: “Thiab yog tib neeg los cuag kuv kuv yuav ua kom lawv paub txog lawv tej kev tsis muaj zog. Kuv muab txoj kev tsis muaj zog rau tib neeg kom lawv yuav txo hwj chim; thiab kuv txoj kev hlub tshua yeej muaj txaus rau tag nrho txhua tus tib neeg uas txo lawv tej hwj chim rau kuv; vim yog lawv txo lawv tej hwj chim rau kuv, thiab muaj txoj kev ntseeg nyob hauv kuv, ces kuv yuav ua kom tej uas tsis muaj zog rais los mus muaj zog rau lawv” (Ethaws 12:27).

Maulaunais hais tias thaum nws hnov tej lus no ua rau nws muaj kev nplij siab (Ethaws 12:29). Tej lus no yeej nplij tau peb txhua tus lub siab. Cov uas tsis pom lawv tej kev qaug zog tsis vam meej. Qhov uas nej paub nej tej kev qaug zog yog ib txoj koob hmoov yog nej txo hwj chim thiab tig mus rau tus Cawm Seej. Tsis yog tus Ntsuj Plig nplij nej lub siab xwb, tiam sis Nws kuj yog tus uas hloov nej lub siab lub ntsws dhau los ntawm txoj Kev Theej Txhoj. Ces nej tej kev qaug zog yuav hloov los muaj zog.

Tej lub sij hawm Dab Ntxwg Nyoog yuav twv nej txoj kev ntseeg; muaj li no rau tag nrho Yexus Khetos cov thwj tim. Nej txoj kev tiv thaiv kom yeej tej kev tawm tsam no yog kev muaj tus Vaj Ntsuj Plig Dawb Huv ua nej tus khub. Tus Ntsuj Plig yuav ua rau nej nyob kaj siab lug. Nws yuav yaum nej muaj kev ntseeg mus tom ntej. Thiab Nws yuav ua rau nej nco txog tej lub sij hawm thaum nej tau hnov Yexus Khetos txoj kev kaj thiab txoj kev hlub.

Kev nco ntsoov tej zaum yog lub txiaj ntsim muaj nqi tshaj plaws uas tus Ntsuj Plig pub tau rau nej. Nws yuav kom “nej nco txhua yam uas [tus Tswv] tau qhia rau nej lawm” (Yauhas 14:26). Tej zaum Nws ua rau nej nco txog ib zaug thaum Vajtswv teb nej tej lus thov, txog ib txoj kab ke pov thawj hwj, txog kev pom zoo thaum nej ua tim khawv, los yog thaum nej paub tias Vajtswv tau pab nej lub neej. Tej zaum nej xav tau dag zog thaum yav tom ntej, tus Ntsuj Plig yuav ua rau nej nco txog tej kev xav uas nej muaj hauv txoj kev sib ntsib no. Kuv thov kom yuav muaj li no.

Ib yam uas tus Ntsuj Plig ua rau kuv nco txog yog ib lub sij hawm uas peb muaj kev sib ntsib txais lub cim nco txog thaum tsaus ntuj nyob hauv ib lub me nyuam tsev rau khoom nyob hauv Innsbruck, Austria ntau xyoo tas los. Lub me nyuam tsev nyob nram qab txoj kev nqaj hlau. Tsuas muaj kaum ob tug neeg nyob ntawd, lawv puav leej zaum saum lub rooj uas yog ntoo ua. Feem ntau yog poj niam, ib txhia hluas thiab ib txhia laus. Kuv pom ib txhia los kua muag thaum muab lub cim nco txog pub rau pawg ntseeg me me ntawd. Kuv twb hnov tus Cawm Seej txoj kev hlub rau Haiv Neeg Ntseeg ntawd, thiab lawv twb hnov ib yam thiab. Tiam sis qhov txuj ci tseem ceeb uas kuv nco ntsoov tshaj yog qhov kaj uas puv lub me nyuam tsev ntawd, uas ua rau peb nyob kaj siab lug. Yog thaum tsaus ntuj thiab tsis muaj qhov rais, tiam sis zoo li muaj qhov kaj ci ntsa iab npaum li lub hnub ci thaum tav su.

Tus Vaj Ntsuj Plig Dawb Huv txoj kev kaj ci ntsa iab nplua mias hmo ntawd. Thiab cov Neeg ntseeg uas muaj lub siab txo hwj chim yog cov uas tau pub tus Ntsuj Plig los, cov uas tau los cuag tus Tswv thov kev zam txim rau lawv tej kev txhaum thiab cog lus tias lawv yuav nco ntsoov Nws. Yeej tsis nyuaj nco txog Nws thaum ntawd, thiab qhov uas kuv nco txog lub sij hawm dawb ceev ntawd ua yooj yim rau kuv nco txog Nws thiab Nws txoj Kev Theej Txhoj ntau xyoo tom qab ntawd. Hnub ntawd tau muaj raws li kev cog lus nyob hauv zaj lus foom koob hmoov rau lub cim nco txog hais tias tus Ntsuj Plig yuav nrog peb nyob peb thiaj li nyob kaj siab lug.

Ib yam li nej, kuv ua Vajtswv tsaug rau tej lub sij hawm uas tus Tswv xa tus Ntsuj Plig tuaj xyuas kuv thaum kuv xav tau kev kaj siab. Tiam sis peb Leej Txiv Saum Ntuj Ceeb Tsheej tsis txhawj txog peb txoj kev nplij siab xwb, Nws kuj xav txog peb txoj kev vam meej. “Tus Nplij Siab” yog ib txoj kev piav txog tus Vaj Ntsuj Plig Dawb Huv nyob hauv vaj lug kub. Thiab muaj ntxiv uas hais tias: “Thiab nim no, kuv hais tseeb tseeb rau koj tias, koj cia li tso siab rau tus Ntsuj Plig uas coj mus ua qhov zoo” (Q&K 11:12). Feem ntau, qhov zoo uas Nws yuav coj nej mus ua yog kev pab lwm tus txais kev nplij siab los ntawm Vajtswv.

Raws li Nws laj lim tswv yim, tus Tswv tau muab nej koom ua ke rau hauv tej lub koom haum thiab hoob kawm nyob hauv Nws lub Koom Txoos. Nws tau ua li no kom nej muaj hwj chim ntxiv ua qhov zoo. Nyob hauv tej lub koom haum no, nej muaj hauj lwm uas Vajtswv txib nej ua pab lwm tus. Piv txwv hais tias, yog nej yog ib tug ntxhais hluas, tej zaum tus npisov los yog Koom Haum Ntxhais Hluas tus thawj coj yuav thov nej pab ib tug Laurel uas “tsis tshua muaj siab ntseeg.” Tej zaum nej paub nws zoo dua li tus npisov los yog lub Koom Haum Ntxhais Hluas tus thawj coj. Tej zaum nej paub tias nws ntxhov siab nyob hauv tsev los sis nyob hauv tsev kawm ntawv los yog nyob ob qhov chaw ntawd. Nej cov thawj coj tej zaum tsis paub vim li cas lawv txais kev tshoov siab thov nej mus pab nws, tiam sis tus Tswv yeej paub, thiab Nws coj txoj hauj lwm no los ntawm Nws tus Ntsuj Plig tej kev tshoov siab.

Yog nej yuav ua tau nej yuav tsum muaj qhov txuj ci tseem ceeb kom hloov nej lub siab thiab tus ntxhais hluas lub siab—thiab yuav tsum muaj tus Vaj Ntsuj Plig Dawb Huv kom muaj li ntawd. Tus Ntsuj Plig yuav pub nej saib tus Laurel uas tsis tshua muaj siab ntseeg zoo li tus Tswv saib nws. Tus Tswv paub tus ntxhais no thiab nej lub siab, thiab Nws paub txog cov uas tau npaj hloov lawv lub siab lawm. Nws yuav xa Nws tus Ntsuj Plig tuaj xyuas nej kom nej txo hwj chim, zam txim, thiab muaj kev hlub.

Tus Ntsuj Plig yuav tshoov nej lub siab kom paub hais lus, ua tej yam, thiab ua siab ntev txaus kom nej caw ib tug yaj rov qab los rau pab yaj. Thiab nws yuav tshoov pab yaj ntawm hoob Laurel lub siab kom hlub thiab tos txais tus yaj uas poob zoo, es thaum nws rov qab los nws yuav xav hais tias nws twb rov qab los tsev lawm.

Nej lub hwj chim ua qhov zoo thaum nej uas yog Vajtswv cov ntxhais nyob ua ke, feem ntau, yeej nyob ntawm kev koom siab thiab kev hlub uas nej muaj. Nov yog ib lub txiaj ntsim uas kaj siab lug ntxiv uas los ntawm tus Vaj Ntsuj Plig Dawb Huv.

Amas to taub qhov no. Yog li ntawd nws thov nws cov neeg hais tias “yuav tsum tsis txhob muaj kev sib cav sib ceg ib leeg rau ib leeg, tiam sis lawv yuav tsum ntsia tom ntej nrog tib lub qhov muag, muaj tib txoj kev ntseeg thiab tib txoj kev ua kev cai raus dej, muab lawv tej siab los koom ua ke hauv txoj kev ua pab ua pawg thiab hauv txoj kev ib leeg hlub ib leeg” (Mauxiyas 18:21).

Peb yuav tsum koom siab koom ntsws kom muaj tus Ntsuj Plig nyob hauv peb hoob kawm thiab peb tsev neeg. Tiam sis nej paub, ib yam li kuv paub, hais tias kev koom siab yeej nyuaj heev. Peb yuav tsum muaj tus Vaj Ntsuj Plig Dawb Huv ua peb tus khub kom peb pom kev thiab kom tsis txhob npau taws.

Kuv nco txog ib lub sij hawm thaum kuv ib tug tub uas muaj xya los yog yim xyoo dhia saum nws lub txaj ntshe nws yuav ua rau lub txaj dam. Kuv ntxhov siab kiag, kuv txawm mus sai sai kom kuv lub tsev tsis muaj teeb meem. Kuv tuav nws ob lub xub pwg me me thiab muab nws nqa siab kom nws qhov muag ntsia tau kuv.

Tus Ntsuj Plig tso tej lus rau hauv kuv lub siab. Zoo li yog ib lub suab yau yau, tiam sis lub suab ntawd chob kuv lub siab hais tias: “Koj tuav ib tug neeg zoo heev.” Kuv maj mam muab nws rov qab mus rau saum lub txaj thiab thov txim.

Tam sim no nws twb hloov los ua tus txiv neej zoo heev uas tus Vaj Ntsuj Plig Dawb Huv qhia kuv txog 40 xyoo tas los. Kuv yeej zoo siab ua Vajtswv tsaug vim tus Tswv cawm kuv dim tej kev xav phem thaum Nws xa tus Vaj Ntsuj Plig Dawb Huv los ua rau kuv pom tias kuv tus tub yog Vajtswv ib tug me nyuam.

Peb yuav muaj kev koom siab koom ntsws nyob hauv peb tsev neeg thiab lub Koom Txoos thaum peb cia tus Vaj Ntsuj Plig Dawb Huv tshoov peb lub siab thaum ib leeg saib ib leeg—thiab thaum peb ib leeg xav txog ib leeg. Tus Ntsuj Plig siv Khetos txoj kev hlub dawb paug saib tib neeg. Cia li mloog Maumoos tej lus uas nws siv kom piav txog kev siab hlub. Cia li xav txog thaum nej tau hnov li no hauv nej lub siab:

“Txoj kev siab hlub tiv taus ntev, thiab siab zoo, thiab tsis xav tau luag tug, thiab tsis khav theeb, tsis xav rau nws tus kheej xwb, tsis chim sai, tsis xav phem, thiab tsis nyiam kev tsis ncaj ncees tiam sis nyiam qhov tseeb, tiv tag nrho txhua yam, ntseeg txhua yam, cia siab rau txhua yam, nyiaj tag nrho txhua yam.

“Yog li ntawd, kuv cov kwv tij [thiab cov muam] uas kuv hlub es, yog nej tsis muaj txoj kev siab hlub ces, nej twb tsis muaj nuj nqis dab tsi, vim txoj kev siab hlub yeej tsis plam ib zaug li. Yog li ntawd, cia li npuab rau txoj kev siab hlub, uas yog yam uas zoo tshaj plaws tag nrho, vim txhua yam yeej yuav plam—

“Tiam sis txoj kev siab hlub yog txoj kev hlub dawb paug ntawm Khetos, thiab nws yuav nyob tas mus li; thiab tus uas raug nrhiav pom muaj nws nyob hauv hnub kawg, tus ntawd yuav tau zoo.

“Yog li ntawd, kuv cov kwv tij [thiab cov muam] uas kuv hlub es, cia li thov Leej Txiv tag nrho lub zog ntawm lub siab, xwv kom nej yuav muaj txoj kev hlub no puv npo, txoj uas nws tau muab rau tag nrho cov uas raws qab tiag ntawm nws Leej Tub, Yexus Khetos; xwv kom nej yuav rais tau los mus ua Vajtswv tej [ntxhais]; kom thaum nws yuav tshwm los peb yuav zoo li nws, vim peb yuav pom nws zoo li uas nws yog; kom peb yuav muaj txoj kev cia siab no; kom peb yuav raug ua kom dawb huv tib yam li nws twb dawb huv” (Maulaunais 7:45–48).

Nov yog nej Leej Txiv Saum Ntuj Ceeb Tsheej lub hom phiaj rau nej, Nws cov ntxhais uas muaj nqis heev. Tej zaum ua rau nej xav tias tshuav ntev heev ua ntej yuav muaj raws li lub hom phiaj no, tiam sis raws li Nws pom, tshuav tsis ntev heev. Yog li ntawd Nws xa Nws tus Ntsuj Plig tuaj xyuas nej kom nplij nej lub siab, txhawb nqa nej, thiab tshoov nej lub siab kom mus tom ntej.

Kuv ua tim khawv tseeb rau nej hais tias Leej Txiv paub nej—paub tej yam nej xav tau thiab paub nej lub npe—hlub nej, thiab mloog nej tej lus thov. Nws Leej Tub caw nej los cuag Nws. Thiab Nkawd xa tus Vaj Ntsuj Plig Dawb Huv los nrog nej thaum nej sawv Nkawd cev ua hauj lwm pab lwm tus.

Vim yog los ntawm Yexus Khetos txoj Kev Theej Txhoj, qhov uas tus Vaj Ntsuj Plig Dawb Huv ua nej tus khub yuav ua rau nej sab ntsuj plig hloov ua dawb huv. Nej yuav nyob kaj siab lug ib yam li tus Cawm Seej cog lus rau Nws cov thwj tim. Nrog kev kaj siab lug ntawd nej yuav muaj kev cia siab thiab kev ci ntsa iab thiab kev hlub los ntawm Leej Txiv thiab Nws Leej Tub, uas coj Nws lub nceeg vaj hauv lub ntiaj teb no dhau ntawm kev tshwm sim rau Nws tus yaj saub. Kuv ua tim khawv li no los ntawm Yexus Khetos lub npe, amees.