ຂໍໃຫ້ເຮົາດຳເນີນໄປໜ້າ
ຄວາມປາດຖະໜາຂອງທ່ານ ທີ່ຈະເຊື່ອຟັງ ຈະເພີ່ມພູນ ເມື່ອທ່ານຈື່ຈຳ ແລະ ໄຕ່ຕອງກ່ຽວກັບສິ່ງທີ່ທ່ານໄດ້ຮູ້ສຶກ ໃນລະຫວ່າງສອງມື້ນີ້.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ເມື່ອເຮົາມາເຖິງທ້າຍກອງປະຊຸມແຫ່ງປະຫວັດສາດນີ້, ຂ້າພະເຈົ້າຂໍຮ່ວມກັບທ່ານ ໃນການຂອບພຣະໄທພຣະຜູ້ເປັນເຈົ້າ ສຳລັບການຊີ້ນຳ ແລະ ອິດທິພົນທີ່ດົນໃຈ ຈາກພຣະອົງ. ສຽງເພງກໍມ່ວນອອນຊອນ. ບໍ່ພຽງແຕ່ຂ່າວສານໄດ້ໃຫ້ຄວາມຮູ້ເທົ່ານັ້ນ, ແຕ່ມັນຍັງປ່ຽນແປງຊີວິດນຳອີກ!
ໃນການຊຸມນຸມທີ່ສັກສິດ ເຮົາໄດ້ສະໜັບສະໜູນຝ່າຍປະທານສູງສຸດ. ຊາຍທີ່ດີເລີດສອງຄົນ ກໍໄດ້ຖືກເອີ້ນສູ່ກຸ່ມອັກຄະສາວົກສິບສອງ. ແລະ ເຈົ້າໜ້າທີ່ຊັ້ນຜູ້ໃຫຍ່ສາວົກເຈັດສິບ ຈຳນວນ ແປດທ່ານ ໄດ້ຖືກເອີ້ນ.
ບັດນີ້ ເພງທີ່ເຮົາມັກ ໄດ້ສະຫລຸບການຕັດສິນໃຈໃໝ່, ການທ້າທາຍ, ແລະ ການມອບໝາຍຂອງເຮົາ ທີ່ຈະດຳເນີນໄປໜ້າ ທີ່ວ່າ:
ຂໍໃຫ້ເຮົາເດີນໄປໃນງານຂອງພຣະຜູ້ເປັນເຈົ້າ,
ເມື່ອເຮົາສິ້ນໄປ ເຮົາຈະໄດ້ຮັບລາງວັນ;
ໃຫ້ເຮົາໝັ່ນແກວ່ງດາບ ປາບປາມເພື່ອຄວາມດີ,
ດາບນີ້ຄືດາບສັດຈະ.
ຢ່າຢ້ານເຖິງແມ່ນສັດຕູເຍາະເຍີ້ຍ;
ກ້າຫານ, ຊານໄຊ ພຣະຜູ້ເປັນເຈົ້າຄຽງຂ້າງ.
ຫູຢ່າເບົາເຊື່ອ ເມື່ອຄົນຊົ່ວເວົ້າບອກເຮົາ,
ແຕ່ພຣະຜູ້ເປັນເຈົ້າເທົ່ານັ້ນ ເຮົາຈະເຊື່ອຟັງ.1
ຂ້າພະເຈົ້າຂໍແນະນຳທ່ານ ໃຫ້ສຶກສາຂ່າວສານຂອງກອງປະຊຸມໃຫຍ່ນີ້ເລື້ອຍໆ—ທົບທວນມັນເລື້ອຍໆ—ລະຫວ່າງຫົກເດືອນຂ້າງໜ້າ. ດ້ວຍຄວາມສຳນຶກທີ່ດີ ໃຫ້ຊອກຫາວິທີເອົາຂ່າວສານເຫລົ່ານີ້ ໄປປະກອບເຂົ້າກັບການສັງສັນໃນຄອບຄົວ, ການສິດສອນພຣະກິດຄຸນ, ການເວົ້າລົມນຳຄອບຄົວ ແລະ ໝູ່ເພື່ອນ, ແມ່ນແຕ່ການສົນທະນາຂອງທ່ານ ກັບຄົນທີ່ບໍ່ເຊື່ອຖືແບບເຮົາ. ຫລາຍຄົນທີ່ດີ ຈະຮັບເອົາຄວາມຈິງ ທີ່ໄດ້ສອນຢູ່ໃນກອງປະຊຸມໃຫຍ່ນີ້ ເມື່ອມັນຖືກມອບໃຫ້ດ້ວຍຄວາມຮັກ. ແລະ ຄວາມປາດຖະໜາຂອງທ່ານ ທີ່ຈະເຊື່ອຟັງ ຈະເພີ່ມພູນ ເມື່ອທ່ານຈື່ຈຳ ແລະ ໄຕ່ຕອງກ່ຽວກັບສິ່ງທີ່ທ່ານໄດ້ຮູ້ສຶກ ໃນລະຫວ່າງສອງມື້ນີ້.
ກອງປະຊຸມໃຫຍ່ສາມັນເທື່ອນີ້ ເປັນການເລີ່ມຕົ້ນຍຸກໃໝ່ແຫ່ງການປະຕິບັດສາດສະໜາກິດ. ພຣະຜູ້ເປັນເຈົ້າໄດ້ທຳການປ່ຽນແປງທີ່ສຳຄັນ ໃນວິທີທີ່ເຮົາຈະໄດ້ດູແລກັນແລະກັນ. ອ້າຍເອື້ອຍນ້ອງທັງຫລາຍ—ທັງເຖົ້າແກ່ ແລະໜຸ່ມນ້ອຍ—ຈະຮັບໃຊ້ກັນແລະກັນ ໃນວິທີໃໝ່ ແລະ ສັກສິດກວ່າ. ກຸ່ມແອວເດີ ຈະໄດ້ຮັບຄວາມເຂັ້ມແຂງ ເພື່ອເປັນພອນໃຫ້ແກ່ຊີວິດຂອງຊາຍ, ຍິງ, ແລະ ເດັກນ້ອຍ ຕະຫລອດທົ່ວໂລກ. ເອື້ອຍນ້ອງສະມາຄົມສະຕີສົງເຄາະ ຈະສືບຕໍ່ປະຕິບັດສາດສະໜາກິດ ໃນວິທີທີ່ດີເລີດ ແລະ ດ້ວຍຄວາມຮັກ, ໃຫ້ໂອກາດເອື້ອຍນ້ອງຄົນໜຸ່ມມາເຂົ້າຮ່ວມນຳເຂົາເຈົ້າ ດັ່ງທີ່ໄດ້ມອບໝາຍໃຫ້ຢ່າງຖືກຕ້ອງ.
ຂ່າວສານຂອງຂ້າພະເຈົ້າຕໍ່ໂລກແມ່ນລຽບງ່າຍ ແລະ ຈິງໃຈ ທີ່ວ່າ: ພວກເຮົາຂໍເຊື້ອເຊີນລູກໆຂອງພຣະເຈົ້າທຸກຄົນ ທັງສອງຟາກມ່ານ ໃຫ້ມາຫາພຣະຜູ້ຊ່ວຍໃຫ້ລອດ, ຮັບເອົາພອນຂອງພຣະວິຫານທີ່ສັກສິດ, ມີຄວາມສຸກທີ່ຍືນຍາວ, ແລະ ເໝາະສົມສຳລັບຊີວິດນິລັນດອນ.2
ຄວາມສູງສົ່ງໃນທີ່ສຸດ ຮຽກຮ້ອງຄວາມຊື່ສັດແທ້ໆ ຕໍ່ພັນທະສັນຍາຂອງເຮົາໃນເວລານີ້ ທີ່ເຮົາໄດ້ຮັບໃນບ້ານຂອງພຣະຜູ້ເປັນເຈົ້າ. ໃນເວລານີ້, ເຮົາມີພຣະວິຫານທີ່ເປີດບໍລິການ ຢູ່ 159 ແຫ່ງ, ແລະ ມີຫລາຍແຫ່ງຕື່ມອີກ ທີ່ກຳລັງຖືກກໍ່ສ້າງ. ພວກເຮົາຢາກໃຫ້ມີພຣະວິຫານຢູ່ໃກ້ສະມາຊິກຂອງສາດສະໜາຈັກ ໃນທຸກແຫ່ງຫົນ. ບັດນີ້ ພວກເຮົາຈຶ່ງຂໍປະກາດ ການກໍ່ສ້າງພຣະວິຫານ ອີກເຈັດແຫ່ງ. ພຣະວິຫານເຫລົ່ານັ້ນ ຈະຕັ້ງຢູ່ໃນສະຖານທີ່ດັ່ງຕໍ່ໄປນີ້: ເມືອງຊອລ໌ຕາ, ປະເທດອາກຊັງຕິນ; ເມືອງເບັນກາລູຣູ, ປະເທດອິນເດຍ; ເມືອງມານາກູ, ປະເທດນິກາຣາກວາ; ເມືອງຄາກາຢານ ເດີ ໂອໂຣ, ປະເທດຟີລິບປິນ; ເມືອງເລຕັນ, ລັດຢູທາ; ເມືອງຣິຈະມອນ, ລັດເວີຈີເນຍ; ແລະ ໃນເມືອງໃຫຍ່ໜຶ່ງອີກ ທີ່ຢູ່ໃນຂັ້ນພິຈາລະນາ ໃນປະເທດຣັດເຊຍ.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ການກໍ່ສ້າງພຣະວິຫານເຫລົ່ານີ້ ອາດບໍ່ປ່ຽນແປງຊີວິດຂອງທ່ານ, ແຕ່ເວລາທີ່ທ່ານໃຊ້ຢູ່ໃນພຣະວິຫານ ຈະປ່ຽນຊີວິດຂອງທ່ານ ຢ່າງແນ່ນອນ. ໃນຄວາມຮູ້ສຶກນັ້ນ, ຂ້າພະເຈົ້າຂໍອວຍພອນທ່ານ ໃຫ້ຮູ້ຈັກສິ່ງທີ່ທ່ານຄວນເຊົາເຮັດ ເພື່ອວ່າທ່ານຈະມີເວລາຫລາຍຂຶ້ນ ສຳລັບພຣະວິຫານ. ຂ້າພະເຈົ້າຂໍອວຍພອນທ່ານ ໃຫ້ມີຄວາມປອງດອງ ແລະ ຄວາມຮັກ ຢູ່ໃນບ້ານເຮືອນຂອງທ່ານຫລາຍຂຶ້ນ ແລະ ມີຄວາມປາດຖະໜາທີ່ຈະດູແລ ຄວາມສຳພັນແຫ່ງນິລັນດອນຂອງຄອບຄົວໄວ້. ຂ້າພະເຈົ້າຂໍອວຍພອນທ່ານ ໃຫ້ມີສັດທາຫລາຍກວ່າເກົ່າ ໃນອົງພຣະເຢຊູຄຣິດເຈົ້າ ແລະ ມີຄວາມສາມາດຫລາຍຂຶ້ນ ທີ່ຈະຕິດຕາມພຣະອົງ ໃນຖານະສານຸສິດຂອງພຣະອົງ.
ຂ້າພະເຈົ້າຂໍອວຍພອນທ່ານ ໃຫ້ເປັ່ງສຽງສະແດງປະຈັກພະຍານ, ດັ່ງທີ່ຂ້າພະເຈົ້າເຮັດຢູ່ດຽວນີ້, ວ່າເຮົາມີພາກສ່ວນໃນວຽກງານຂອງພຣະເຈົ້າ ອົງຊົງລິດອຳນາດຍິ່ງໃຫຍ່! ພຣະເຢຊູ ຄືພຣະຄຣິດ. ນີ້ແມ່ນສາດສະໜາຈັກຂອງພຣະອົງ, ຊຶ່ງພຣະອົງຊີ້ນຳ ຜ່ານທາງຜູ້ຮັບໃຊ້ທີ່ຖືກເຈີມໄວ້ຂອງພຣະອົງ. ຂ້າພະເຈົ້າຂໍເປັນພະຍານ, ດ້ວຍການສະແດງຄວາມຮັກຕໍ່ທ່ານທັງຫລາຍ, ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.