ສາດສະດາກ່າວໂດຍອຳນາດຂອງພຣະວິນຍານສັກສິດ
ການມີສາດສະດາ ເປັນສັນຍາລັກເຖິງຄວາມຮັກຂອງພຣະເຈົ້າ ທີ່ມີຕໍ່ລູກໆຂອງພຣະອົງ. ພວກເພິ່ນເຮັດໃຫ້ຄຳສັນຍາ ແລະ ລັກສະນະທີ່ແທ້ຈິງຂອງພຣະເຈົ້າ ແລະ ພຣະເຢຊູຄຣິດ ເປັນທີ່ຮູ້ຈັກ.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ບໍ່ວ່າທ່ານຈະຢູ່ໃສກໍຕາມ, ຂ້າພະເຈົ້າຂໍສະແດງຄວາມຈິງໃຈ ແລະ ຄວາມຂອບໃຈຢ່າງເລິກຊຶ້ງ ສຳລັບການສະໜັບສະໜູນຂ້າພະເຈົ້າ ໃນມື້ວານນີ້. ເຖິງແມ່ນ ຂ້າພະເຈົ້າຈະຮູ້ສຶກວ່າ ຕົວເອງເວົ້າຈາບໍ່ຄ່ອງແຄ່ວ ແລະ ເວົ້າຊ້າກໍຕາມ ຄືກັນກັບໂມເຊ, ແຕ່ຂ້າພະເຈົ້າໄດ້ປອບໃຈຕົວເອງ ດ້ວຍພຣະຄຳທີ່ພຣະຜູ້ເປັນເຈົ້າໄດ້ກ່າວກັບເພິ່ນວ່າ:
“ໃຜສ້າງປາກມະນຸດ? ໃຜເຮັດໃຫ້ມະນຸດປາກກືກ, ຫູໜວກ, ເຮັດໃຫ້ຕາບອດ ແລະ ຕາດີ? ແມ່ນເຮົາເອງ ພຣະຜູ້ເປັນເຈົ້າ ບໍ່ແມ່ນບໍ?
“ເຈົ້າຈົ່ງໄປ ເຮົາຈະຊ່ວຍເຈົ້າກ່າວ, ແລະ ຈະບອກສິ່ງທີ່ເຈົ້າຈະກ່າວ” (ອົບພະຍົບ 4:11–12; ເບິ່ງ ຂໍ້ທີ 10 ນຳອີກ).
ຂ້າພະເຈົ້າໄດ້ຮັບການປອບໃຈນຳອີກ ໃນຄວາມຮັກ ແລະ ການສະໜັບສະໜູນ ຈາກພັນລະຍາ ທີ່ຮັກຂອງຂ້າພະເຈົ້າ. ນາງໄດ້ເປັນຕົວຢ່າງເຖິງຄວາມດີ, ຄວາມຮັກ, ແລະ ອຸທິດຕົນທັງໝົດ ຕໍ່ພຣະຜູ້ເປັນເຈົ້າ ແລະ ຕໍ່ຂ້າພະເຈົ້າ ແລະ ຄອບຄົວຂອງຂ້າພະເຈົ້າ. ຂ້າພະເຈົ້າຮັກນາງຈົນສຸດຫົວໃຈ, ແລະ ຂ້າພະເຈົ້າມີຄວາມກະຕັນຍູສຳລັບອິດທິພົນໃນທາງດີ ທີ່ນາງມີຕໍ່ພວກເຮົາ.
ອ້າຍເອື້ອຍນ້ອງທັງຫລາຍ, ຂ້າພະເຈົ້າຢາກເປັນພະຍານຕໍ່ທ່ານວ່າ ປະທານຣະໂຊ ເອັມ ແນວສັນ ເປັນສາດສະດາຂອງພຣະເຈົ້າ ຢູ່ເທິງແຜ່ນດິນໂລກ. ຂ້າພະເຈົ້າບໍ່ເຄີຍເຫັນຄົນໃດ ທີ່ມີເມດຕາ ແລະ ມີຄວາມຮັກຫລາຍເທົ່າກັບເພິ່ນ. ເຖິງແມ່ນຂ້າພະເຈົ້າຮູ້ສຶກບໍ່ພຽບພ້ອມສຳລັບການເອີ້ນທີ່ສັກສິດນີ້ກໍຕາມ, ແຕ່ຖ້ອຍຄຳ ແລະ ແວວຕາທີ່ອ່ອນໂຍນຂອງເພິ່ນ ຕອນເພິ່ນສະເໜີມອບໜ້າທີ່ຮັບຜິດຊອບນີ້ ໃຫ້ຂ້າພະເຈົ້າ ໄດ້ເຮັດໃຫ້ຂ້າພະເຈົ້າຮູ້ສຶກເຕັມໄປດ້ວຍຄວາມຮັກຂອງພຣະຜູ້ຊ່ວຍໃຫ້ລອດ. ຂໍຂອບໃຈ, ປະທານແນວສັນ. ຂ້າພະເຈົ້າສະໜັບສະໜູນທ່ານ ແລະ ຮັກແພງທ່ານ.
ຊ່າງເປັນພອນຫລາຍຂະໜາດໃດ ທີ່ເຮົາມີສາດສະດາ, ຜູ້ພະຍາກອນ, ແລະ ຜູ້ເປີດເຜີຍ ຢູ່ເທິງແຜ່ນດິນໂລກ ໃນວັນເວລານີ້ ທີ່ເຮົາມີຊີວິດຢູ່, ຜູ້ສະແຫວງຫາທີ່ຈະຮູ້ຈັກພຣະປະສົງຂອງພຣະຜູ້ເປັນເຈົ້າ ແລະ ເຮັດຕາມນັ້ນ? ມັນເປັນການປອບໂຍນ ທີ່ຮູ້ວ່າ ເຮົາບໍ່ໄດ້ຢູ່ຕາມລຳພັງ ຢູ່ໃນໂລກນີ້, ກັບການທ້າທາຍທີ່ເຮົາປະເຊີນ ໃນຊີວິດ. ການມີສາດສະດາ ເປັນສັນຍາລັກເຖິງຄວາມຮັກຂອງພຣະເຈົ້າ ທີ່ມີຕໍ່ລູກໆຂອງພຣະອົງ. ພວກເພິ່ນເຮັດໃຫ້ຄຳສັນຍາ ແລະ ລັກສະນະທີ່ແທ້ຈິງຂອງພຣະເຈົ້າ ແລະ ພຣະເຢຊູຄຣິດ ເປັນທີ່ຮູ້ຈັກ. ຂ້າພະເຈົ້າໄດ້ຮຽນຮູ້ສິ່ງນັ້ນ ຜ່ານທາງປະສົບການສ່ວນຕົວຂອງຂ້າພະເຈົ້າ.
ເມື່ອສິບແປດປີກ່ອນ, ພັນລະຍາ ແລະ ຂ້າພະເຈົ້າ ໄດ້ຮັບໂທລະສັບຈາກປະທານເຈມສ໌ ອີ ຟາວ, ທີ່ປຶກສາທີສອງ ໃນຝ່າຍປະທານສູງສຸດ. ເພິ່ນໄດ້ເອີ້ນຂ້າພະເຈົ້າໃຫ້ຮັບໃຊ້ເປັນປະທານເຜີຍແຜ່ ໃນປະເທດປອກຕຸຍການ. ເພິ່ນໄດ້ບອກຂ້າພະເຈົ້າວ່າ ພວກເຮົາມີເວລາຫົກອາທິດ ກ່ອນເລີ່ມຕົ້ນໄປເຜີຍແຜ່. ເຖິງແມ່ນວ່າ ພວກເຮົາຮູ້ສຶກບໍ່ຕຽມພ້ອມ ແລະ ບໍ່ພຽບພ້ອມກໍຕາມ, ແຕ່ພວກເຮົາກໍໄດ້ຮັບເອົາການເອີ້ນນັ້ນ. ຄວາມເປັນຫ່ວງທີ່ສຳຄັນຫລາຍທີ່ສຸດໃນເວລານັ້ນ ແມ່ນການໄປຂໍເອົາໃບ ວີຊ້າ ທີ່ຕ້ອງມີ ກ່ອນຈະຮັບໃຊ້ໄດ້ ຢູ່ໃນປະເທດນັ້ນ ເພາະ, ອີງຕາມປະສົບການທີ່ຜ່ານມາ, ພວກເຮົາຮູ້ວ່າ ການຂໍເອົາໃບ ວີຊ້າ ຕ້ອງໃຊ້ເວລາເຖິງ ຫົກ ຫລື ແປດ ເດືອນ ຈຶ່ງໄດ້.
ແລ້ວປະທານຟາວ ໄດ້ຖາມວ່າ ພວກເຮົາມີສັດທາບໍ່ ວ່າພຣະຜູ້ເປັນເຈົ້າຈະສະແດງການມະຫັດສະຈັນ ແລະ ວ່າພວກເຮົາຈະສາມາດແກ້ໄຂບັນຫາເລື່ອງ ວີຊ້າ ໃຫ້ແລ້ວໄວ. ພວກເຮົາໄດ້ຕອບຢ່າງໜັກແໜ້ນວ່າ “ມີ,” ແລະ ພວກເຮົາກໍໄດ້ເລີ່ມຕົ້ນແລ່ນວຽກທັນທີ. ພວກເຮົາໄດ້ຕຽມເອກະສານຂໍໃບ ວີຊ້າ, ໄດ້ພາລູກສາມຄົນທີ່ຍັງນ້ອຍຢູ່, ໄປຫາສະຖານທູດທັນທີ. ພະນັກງານຍິງທີ່ໃຈດີຄົນໜຶ່ງ ໄດ້ສຳພາດພວກເຮົາ. ໃນການກວດສອບເບິ່ງເອກະສານ ແລະ ຮູ້ເຖິງຈຸດປະສົງຂອງພວກເຮົາ ທີ່ຈະໄປປະເທດປອກຕຸຍການ, ນາງໄດ້ຫັນມາ ແລະ ຖາມພວກເຮົາວ່າ, “ພວກເຈົ້າຊິໄປຊ່ວຍເຫລືອຜູ້ຄົນໃນປະເທດຂອງຂ້ອຍ ແທ້ໆບໍ?” ພວກເຮົາໄດ້ຕອບຢ່າງຈິງຈັງວ່າ ແມ່ນແລ້ວ ແລະ ໄດ້ອະທິບາຍວ່າ ພວກເຮົາຈະເປັນຕົວແທນຂອງພຣະເຢຊູຄຣິດ ແລະ ເປັນພະຍານເຖິງພຣະອົງ ແລະ ເຮັດພາລະກິດທີ່ສູງສົ່ງຂອງພຣະອົງ ຢູ່ໃນໂລກ. ພວກເຮົາໄດ້ກັບຄືນໄປ ສີ່ອາທິດຈາກນັ້ນ, ໄດ້ຮັບໃບ ວີຊ້າ, ໄດ້ໄປເຖິງສະໜາມເຜີຍແຜ່ ພາຍໃນຫົກອາທິດ, ດັ່ງທີ່ສາດສະດາຂອງພຣະຜູ້ເປັນເຈົ້າ ໄດ້ຂໍໃຫ້ພວກເຮົາເຮັດ.
ອ້າຍເອື້ອຍນ້ອງທັງຫລາຍ, ຂ້າພະເຈົ້າຂໍເປັນພະຍານ ຈາກສ່ວນເລິກທີ່ສຸດຂອງຫົວໃຈ, ວ່າ ສາດສະດາກ່າວໂດຍອຳນາດຂອງພຣະວິນຍານສັກສິດ. ພວກເພິ່ນເປັນພະຍານເຖິງພຣະຄຣິດ ແລະ ເຖິງພາລະກິດທີ່ສູງສົ່ງຂອງພຣະອົງ ຢູ່ເທິງແຜ່ນດິນໂລກ. ພວກເພິ່ນເປັນຕົວແທນຂອງພຣະດຳລັດ ແລະ ພຣະໄທຂອງພຣະຜູ້ເປັນເຈົ້າ ແລະ ໄດ້ຖືກເອີ້ນໃຫ້ເປັນຕົວແທນຂອງພຣະອົງ ແລະ ສອນເຮົາເຖິງສິ່ງທີ່ເຮົາຕ້ອງເຮັດ ເພື່ອຈະໄດ້ກັບຄືນໄປຢູ່ໃນທີ່ປະທັບຂອງພຣະເຈົ້າ ແລະ ພຣະບຸດຂອງພຣະອົງ, ພຣະເຢຊູຄຣິດ. ເຮົາໄດ້ຮັບພອນ ເມື່ອເຮົາໃຊ້ສັດທາຂອງເຮົາ ແລະ ເຮັດຕາມຄຳສອນຂອງພວກເພິ່ນ. ໂດຍການເຮັດຕາມພວກເພິ່ນ, ຊີວິດຂອງເຮົາຈະມີຄວາມສຸກຫລາຍຂຶ້ນ ແລະ ມີຄວາມສັບສົນໜ້ອຍລົງ, ຄວາມຫຍຸ້ງຍາກ ແລະ ບັນຫາ ກໍຈະງ່າຍທີ່ຈະແບກຫາບ, ແລະ ເຮົາຈະສ້າງສິ່ງປ້ອງກັນທາງວິນຍານໃຫ້ຕົວເອງ ທີ່ຈະປົກປ້ອງເຮົາຈາກການໂຈມຕີຂອງສັດຕູ ໃນວັນເວລາຂອງເຮົາ.
ໃນວັນອິດສະເຕີມື້ນີ້ ຂ້າພະເຈົ້າເປັນພະຍານຢ່າງໜັກແໜ້ນວ່າ ພຣະເຢຊູຄຣິດ ຊົງຟື້ນ, ພຣະອົງຊົງພຣະຊົນຢູ່, ແລະ ວ່າພຣະອົງຊີ້ນຳສາດສະໜາຈັກຂອງພຣະອົງ ຢູ່ເທິງແຜ່ນດິນໂລກ ຜ່ານທາງສາດສະດາ, ຜູ້ພະຍາກອນ, ແລະ ຜູ້ເປີດເຜີຍ ຂອງພຣະອົງ. ຂ້າພະເຈົ້າເປັນພະຍານວ່າ ພຣະອົງເປັນພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງໂລກ ແລະ ວ່າຜ່ານທາງພຣະອົງ ເຮົາຈະສາມາດໄດ້ຮັບຄວາມລອດ ແລະ ຄວາມສູງສົ່ງ ໃນທີ່ປະທັບຂອງພຣະເຈົ້າ ທີ່ຮັກແພງຂອງເຮົາ. ຂ້າພະເຈົ້າຮັກພຣະອົງ; ຂ້າພະເຈົ້າເຄົາລົບພຣະອົງ. ຂ້າພະເຈົ້າຢາກຕິດຕາມພຣະອົງ ແລະ ເຮັດຕາມພຣະປະສົງຂອງພຣະອົງ ແລະ ກາຍເປັນເໝືອນດັ່ງພຣະອົງຫລາຍຂຶ້ນ. ຂ້າພະເຈົ້າກ່າວສິ່ງເຫລົ່ານີ້ ດ້ວຍຄວາມຖ່ອມຕົວ ໃນພຣະນາມອັນສັກສິດຂອງພຣະເຢຊູຄຣິດເຈົ້າ, ອາແມນ.