Txoj Kev Xyiv Fab ntawm cov Ntseeg
Kev xyiv fab los ntawm kev ua raws li Khetos cov lus txib, thaum Nws pab peb kov yeej kev tu siab thiab kev qaug zog, thiab los ntawm kev pab lwm tus zoo li Nws tau pab.
Tus yaj saub hauv Phau Ntawv Maumoos, Enos, uas yog Lihais tus xeeb ntxwv, sau txog ib zaug thaum nws yog ib tug tub hluas. Nyob nws ib leeg tus tsiaj hauv hav zoov, Enos pib xav txog nws txiv, Yakhauj, tej lus qhia. Nws hais tias, “Tej lus uas ntau lub sij hawm kuv tau hnov kuv txiv hais txog txoj sia nyob mus ib txhis, thiab txoj kev xyiv fab ntawm cov ntseeg, nkag mus tob rau hauv kuv lub siab.”1 Vim nws sab ntsuj plig ntshaw xav paub, Enos tau txhos caug thov Vajtswv, ib zaj lus thov tas ib hnub mus txog thaum hmo ntuj, ib zaj lus thov uas ua rau nws txais tej kev tshwm sim tseem ceeb, kev nplij siab, thiab tej lus cog tseg.
Muaj ntau yam uas peb kawm tau los ntawm Enos zaj no, tiam sis hnub no ua rau kuv xav txog Enos txoj kev nco txog nws txiv tej lus hais ntau txog “txoj kev xyiv fab ntawm cov ntseeg.”
Yog nyob hauv ib lub rooj sab laj peb xyoos tas los uas Thawj Tswj Hwm Russell M. Nelson hais txog kev xyiv fab.2 Nws tau hais tej yam no:
“Peb txoj kev xyiv fab yeej tsis nyob ntawm seb peb raug dab tsi hauv peb lub neej tiam sis kev xyiv fab nyob ntawm seb peb tsom ntsoov rau dab tsi hauv peb lub neej.
“Thaum peb tsom ntsoov rau Vajtswv txoj kev cawm seej thiab Yexus Khetos thiab Nws txoj moo zoo … peb yuav muaj kev xyiv fab txawm peb raug dab tsi los xij nyob hauv peb lub neej. Kev xyiv fab yeej los ntawm Nws thiab muaj kev xyiv fab vim muaj Nws. … Haiv Neeg Ntseeg hauv Hnub Nyoog Kawg xav tias Yexus Khetos yog kev xyiv fab!”3
Haiv Neeg Ntseeg yog cov uas tau ua kev khi lus los ntawm kev ua kev cai raus dej thiab sim coj raws li Khetos ua Nws cov thwj tim.4 Yog li ntawd, “txoj kev xyiv fab ntawm cov ntseeg” yog kev xyiv fab los ntawm kev ua neeg zoo li Khetos.
Kuv xav hais txog kev xyiv fab uas los ntawm kev ua raws li Nws cov lus txib, kev xyiv fab uas los ntawm Nws thaum Nws pab peb kov yeej kev tu siab thiab kev qaug zog, thiab kev xyiv fab los ntawm kev pab lwm tus zoo li Nws tau pab.
Kev Xyiv Fab Los ntawm Kev Ua Raws Li Khetos cov Lus Txib
Peb nyob hauv ib lub caij nyoog thaum neeg coob xav tias tus Tswv tej lus txib tsis tseem ceeb los sis lawv tsis ua raws li xwb. Feem ntau, tib neeg uas tsis ua raws li Vajtswv tej lus txib xws li kev cai coj dawb huv, kev ua siab ncaj, thaib kev hwm Hnub Caiv kom dawb huv mas zoo li lawv vam meej thiab muaj tej yam zoo hauv lawv lub neej, muaj tej lub sij hawm zoo li lawv muaj ntau dua li cov neeg uas mloog lus. Ib txhia pib xav tias puas tsim nyog siv zog thiab ua kev txi kom ua tau raws li cov lus txib no. Cov neeg Ixayees puag thaum ub twb yw yws hais tias:
“Ua hauj lwm rau Vajtswv twb tsis muaj nuj nqis dab tsi, thiab muaj nuj nqis dab tsi uas peb ua raws li nws cov kab ke thiab peb taug kev yam tu siab rau ntawm Ib Tsoom Tub Rog tus Tswv xub ntiag?
“Thiab nim no peb hais tias cov neeg muab hlob yog cov neeg zoo siab; muaj tseeb tiag, lawv cov uas ua hauj lwm phem yog cov neeg vam meej; muaj tseeb tiag, lawv cov uas sim Vajtswv siab twb dim tiag.”5
Tus Tswv hais tias peb yuav tsum tos txog “hnub ntawd thaum kuv ua kuv tej saw nyiaj saw kub. … Thaum ntawd nej yuav … paub tau cov neeg ncaj ncees thiab cov neeg phem, paub tus uas ua hauj lwm rau Vajtswv thiab tus uas tsis ua hauj lwm rau nws.”6 Cov neeg phem tej zaum yuav “muaj kev xyiv fab los ntawm tej yam uas lawv ua tau ib nyuag ntu,” tiam sis yeej nyob ib ntu xwb.7 Txoj kev xyiv fab ntawm cov Ntseeg yeej kav ntev.
Vajtswv pom tej yam nrog lub zeem muag tseeb, thiab Nws qhia txog Nws lub zeem muag los ntawm Nws cov lus txib, coj peb mus tsis txhob raug tej lub qhov hmuv thiab qhov zawj ntawm lub neej no thiab coj mus rau kev xyiv fab mus ib txhis. Tus Yaj Saub Yauxej Xamiv piav hais tias: “Thaum Nws cov lus txib qhia peb tias ces yog los ntawm lub zeem muag pom mus ib txhis li; vim Vajtswv saib peb zoo li peb yuav nyob mus ib txhis li; Vajtswv nyob mus ib txhis li thiab tsis saib tej yam zoo li peb saib.”8
Kuv yeej tsis tau ntsib leej twg uas twb nrhiav tau txoj moo zoo thaum lawv laus thiab tsis xav muaj thaum lawv tseem hluas. Lawv hais tias, “Kuv yeej yuav tsis xaiv tej yam tsis zoo thiab tsis ua yuam kev.” Tus Tswv cov lus txib yeej pab peb xaiv tej yam zoo dua thiab tej yam zoo siab dua. Peb yuav tsum xyiv fab thiab ua Nws tsaug vim Nws qhia txoj kev zoo dua ntxiv no rau peb.
Thaum nws yog ib tug ntxhais hluas, Muam Kalombo Rosette Kamwanya los ntawm lub teb chaws D.R. Congo, tam sim no nws yog ib tug ntxhais txib nyob hauv Qhov Chaw Tshaj Tawm txoj Moo Zoo Côte d’Ivoire Abidjan West, nws tau yoo mov thiab thov Vajtswv tau peb hnub kom paub tias Vajtswv xav coj nws mus qhov twg. Thaum hmo ntuj, nws tau ua yog toog pom ob lub tsev, ib lub tsev koom txoos thiab ib lub uas tam sim no nws paub tias yog ib lub tuam tsev. Nws pib nrhiav thiab nws nrhiav tau lub tsev koom txoos uas nws pom hauv nws zaj npau suav. Daim qhia hais tias, “Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.” Muam Kamwanya tau ua kev cai raus dej ces nws niam thiab nws rau tus nus ua ib yam li ntawd. Muam Kamwanya hais tias, “Thaum kuv txais txoj moo zoo, kuv xav tias kuv zoo li ib tug noog raug kaw uas tau tso dim lawm. Kuv lub siab muaj kev xyiv fab puv npo. … Kuv twb paub tias Vajtswv hlub kuv tiag.”9
Qhov uas peb ua raws li tus Tswv cov lus txib ua rau peb haj yam hnov tau Nws txoj kev hlub yam li yooj yim. Txoj kev ti thiab nqaim ntawm cov lus txib coj peb mus ncaj qha rau tus ntoo uas cawm txoj sia, thiab tus ntoo thiab cov txiv, qab tshaj plaws thiab “yam uas neeg xav tau tshaj txhua txhia yam,”10 piv txog Vajtswv txoj kev hlub thiab puv yus sab ntsuj plig nrog “kev xyiv fab loj heev.”11 Tus Cawj Seej hais tias:
“Yog nej ua raws li kuv tej lus, nej yuav muaj lub siab hlub ib yam li kuv ua raws li kuv Txiv tej lus thiab kuv muaj lub siab hlub ib yam li nws.
“Kuv hais tej no rau nej kom nej zoo siab ib yam li kuv zoo siab, thiab nej yuav zoo siab kawg nkaus li.”12
Kev Xyiv Fab Los ntawm Kev Kov Yeej Vim Muaj Khetos
Txwam peb rau siab ntseeg ua raws li cov lus txib, muaj kev sim siab thiab kev tu siab uas cuam tshuam peb txoj kev xyiv fab. Tiam sis thaum peb sim kov yeej tej teeb meem no nrog tus Cawm Seej txoj kev pab, ces yuav pab thaiv kev xyiv fab uas peb muaj tam sim no thiab kev xyiv fab yuav muaj yav tom ntej. Khetos tau qhia Nws cov thwj tim tias, “Neeg ntiaj teb yuav tsim txom nej: tiam sis cia li zoo siab, rau qhov kuv twb kov yeej lub ntiaj teb no lawm.”13 Thaum peb tig mus rau Nws, mloog Nws lus, khi lus nrog Nws, ces kev sim siab thiab kev tu siab thiaj li hloov ua kev xyiv fab. Kuv hais ib zaj piv txwv txog qhov no xwb.
Xyoo 1989, Jack Rushton yog tus thawj tswj hwm ntawm Ceg Txheem Ntseeg Irvine California nyob hauv Teb Chaws Amelikas. Thaum nws tsev neeg ua si tom ntug hiav txwv California, Jack caij txiag dej thaum ib nthw dej tshoob nws mus raug ib lub pob zeb hauv qab thu dej, ua rau nws caj dab dam thiab ua rau nws txha nqaj qaum mob heev. Jack twb hais tias, “Thaum kuv raug kiag, kuv paub kuv tuag tes tuag taw lawm.”14 Nws hais lus tsis taus thiab ua tsis taus pa nws tus kheej lawm.15
Tsev neeg, phooj ywg, thiab ceg txheem ntseeg cov mej zeej tau pab Tij Laug Rushton thiab nws tus poj niam, Jo Anne, thiab ntxiv rau lwm yam, tau kho ib feem ntawm nkawd lub tsev kom siv tau Jack lub rooj log. Jo Anne yog Jack tus thawj saib xyuas tau 23 xyoos tom qab ntawd. Hais txog tej zaj hauv Phau Ntawv Maumoos thaum tus Tswv tuaj xyuas Nws cov neeg thaum lawv raug txom nyem thiab ua rau lawv tej nra sib lawm,16 Jo Anne hais tias, “Kuv yeej xav tsis thoob thaum kuv xav txog qhov uas kuv zoo siab npaum li cas thaum kuv tu kuv tus txiv.”17
Kev kho nws lub tshuab ua pa ua rau Jack rov qab hais taus lus, thiab ib xyoos tom qab ntawd, tau hu Jack ua tus xib hwb hauv Kev Kawm Txoj Moo Zoo cov Lus Qhuab Qhia thiab ib tug yawg suab rau ceg txheem ntseeg. Thaum nws muab txoj koob hmoov yawg suab, lwm tus uas tuav lub pov thawj hwj yuav tso Tij Laug Rushton txhais tes saum tus neeg uas txais koob hmoov lub taub hau thiab yuav txhawb nws txhais tes thiab caj npab thaum foom koob hmoov rau tus ntawd. Jack tau tas sim neej no thaum Hnub Christmas xyoo 2012, tom qab nws ua hauj lwm pab tau 22 xyoos lawm.
Muaj ib zaug thaum xam phaj Jack, nws hais tias: “Teeb meem yuav los rau peb txhua tus lub neej; yog ib feem ntawm kev ua neej hauv lub ntiaj teb no. Thiab ib txhia neeg xav tias kev teev ntuj los sis kev ntseeg Vajtswv yuav pov hwj yus kom txhob raug tej yam phem. Kuv tsis xav tias yog li ntawd. Kuv xav tias yog peb txoj kev ntseeg muaj zog, ces thaum peb raug tej yam phem, uas peb yeej yuav raug, ces peb yuav txawj kov yeej tej ntawd. … Kuv txoj kev ntseeg yeej tsis tau ploj hlo li, tiam sis kuv twb muaj tej lub sij hawm thaum kuv nyuaj siab. Kuv xav tias yog thawj zaug uas kuv raug kev sim siab txog qhov kawg, thiab tsis muaj dab tsi pab taus kuv, yog li ntawd kuv twb tig mus rau tus Tswv, thiab txij thaum ntawd los, kuv xyiv fab kawg nkaus.”18
Hnub nyoog no muaj kev tsim txom hauv social media thiab tab meeg cov uas xav ua raws li tus Tswv tej kev cai txog kev hnav khaub ncaws, kev muaj kev lom zem, thiab kev coj dawb huv. Yeej yog cov tub hluas ntxhais hluas hauv Haiv Neeg Ntseeg, thiab cov poj niam thiab cov niam tsev, uas kwv tus ntoo khaub lig ntawm kev thuam thiab kev tsim txom no. Yeej tsis yooj yim kom kov yeej tej kev tsim txom li no, tiam sis cia li nco ntsoov Petus tej lus: “Yog leej twg thuam nej vim nej yog cov uas ntseeg Yexus Khetos, nej cia li zoo siab; qhov uas lawv thuam nej ntawd qhia rau sawv daws paub hais tias Vajtswv twb txib Vaj Ntsuj Plig los nrog nej nyob lawm, Vajtswv tus Ntsuj Plig ntawd yog tus uas muaj tshwj chim ci ntsa iab.”19
Nyob hauv lub Vaj Edees, Adas thiab Evas tsis muaj txim hlo li, “tsis muaj kev xyiv fab, vim nkawd tsis paub kev nyuaj siab.”20 Nim no, vim peb yog neeg lav ris, peb muaj kev xyiv fab los ntawm kev kov yeej kev nyuaj siab txawm yog los ntawm kev txhaum, kev sim siab, kev qaug zog, los sis lwm yam uas tab kaum peb txoj kev zoo siab. Nov yog kev xyiv fab uas los ntawm txoj kev ua cov thwj tim; kev xyiv fab los ntawm “kev zam txim rau [yus] tej kev txhaum, thiab [kev] muaj kev kaj siab lug hauv nruab siab”21; kev xyiv fab uas los ntawm qhov uas yus sab ntsuj plig loj tuaj los ntawm Khetos txoj kev tshav ntuj.22
Kev Xyiv Fab Los ntawm Kev Pab Lwm Tus Li Khetos Pab
Tus Cawm Seej muaj kev xyiv fab thaum ua rau peb txais tau kev tsis txawj tuag thiab txoj sia nyob mus ib txhis.23 Thaum hais txog tus Cawm Seej txoj Kev Theej Txhoj, Thawj Tswj Hwm Russell M. Nelson hais tias:
“Yexus Khetos yog tus uas coj yam ntxwv rau peb, ‘thaum luag muab nws ntsia rau saum ntoo khaub lig, nws zoo siab nyiaj tej kev txom nyem ntawd’ [Henplais 12:2]. Cia li xav txog qhov ntawd! Xwv kom Nws nyiaj tau txoj kev mob tshaj plaws uas tsis tau muaj leej twg hnov dua, peb tus Cawm Seej tsom ntsoov rau kev xyiv fab!
“Thiab kev xyiv fab ntawd yog dab tsi? Yog kev xyiv fab los ntawm kev ntxuav, kho, thiab txhawb nqa peb; kev xyiv fab los ntawm kev them tus nqi rau txhua tus neeg tej kev txhaum uas yuav hloov siab lees txim; kev xyiv fab uas ua rau peb muaj ib txoj kev rov qab mus tsev—neeg huv thiab neeg tsim nyog—thiab nrog tsev neeg thiab niam thiab txiv nyob saum ntuj ceeb tsheej.”24
Ib yam li ntawd, “txoj kev xyiv fab ntawd” yog kev xyiv fab uas los ntawm txoj kev pab tus Cawm Seej ua Nws txoj hauj lwm txhiv dim. Vim peb yog Anplaham cov me nyuam thiab cov tub ki,25 peb koom tes foom koob hmoov rau tag nrho tej tsev neeg ntawm lub ntiaj teb “twb yog tej koob hmoov ntawm txoj Moo Zoo, uas yog tej koob hmoov ntawm txoj kev cawm seej, uas yog txoj sia nyob mus ib txhis.”26
Ua rau peb nco txog Amas tej lus:
“Qhov no yog kuv txoj kev zoo siab, hais tias tej zaum kuv yuav ua tau zoo li ib rab cuab yeej nyob hauv Vajtswv txhais tes mus coj ib txhia neeg los rau txoj kev hloov siab lees txim; thiab qhov no yog kuv txoj kev xyiv fab.
“Thiab saib seb, thaum kuv pom kuv cov kwv tij coob leej hloov siab lees txim tiag tiag, thiab los cuag tus Tswv lawv tus Vajtswv, thaum ntawd kuv tus ntsuj plig muaj kev xyiv fab puv npo. …
“Tiam sis kuv tsis yog xyiv fab rau kuv tus kheej txoj kev vam meej xwb, tiam sis kuv txoj kev xyiv fab puv ntau ntxiv vim yog txoj kev vam meej ntawm kuv cov kwv tij, cov uas tau mus rau pem thaj av Nifais. …
“Nim no, thaum kuv xav txog txoj kev vam meej ntawm kuv cov kwv tij no kuv tus ntsuj plig raug coj mus deb, zoo li nws twb ncaim ntawm lub cev mus, ua piv txwv, kuv txoj kev xyiv fab loj heev.”27
Cov txiv ntoo los ntawm peb ib leeg txoj kev pab ib leeg hauv lub Koom Txoos yog ib feem ntawm “txoj kev xyiv fab ntawd.” Txawm yog muaj sij hawm thaum peb poob siab los yog txhawj xeeb, peb muaj peev xwm ua siab ntev txhawb pab lwm tus yog tias peb tsom ntsoov rau kev xyiv fab los ntawm kev ua rau Vajtswv zoo siab thiab coj txoj kev kaj, kev nplij siab, thiab kev zoo siab rau Nws cov me nyuam, peb cov kwv tij thiab cov muam.
Thaum nyob hauv Haiti lub hli tas los rau kev muab lub Tuam Tsev Port-au-Prince fij tseg, Txwj Laug David thiab Muam Susan Bednar tau ntsib ib tug muam hluas uas nws tus txiv tau tuag ob peb hnub ua ntej thaum muaj xwm txheej tu siab heev. Nkawd nrog nws quaj. Tiam sis thaum hnub Sunday tus poj niam zoo twb los pab coj neeg mus kev hauv kev sib ntsib muab lub tuam tsev fij tseg nrog kev luag nyav rau txhua tus uas nkag hauv lub tuam tsev.
Kuv ntseeg tias “txoj kev xyiv fab ntawm cov ntseeg” yuav los vim peb paub tias tus Cawm Seej thov Leej Txiv pab lawv,28 “thiab tsis muaj leej twg to taub txog txoj kev xyiv fab uas muaj puv npo rau peb tej ntsuj plig nyob rau lub sij hawm uas peb tau hnov [Yexus] thov Leej Txiv rau peb.”29 Nrog Thawj Tswj Hwm Russell M. Nelson, kuv ua tim khawv tias kev xyiv fab yog ib lub txiaj ntsim rau cov Ntseeg uas rau siab ntseeg “cov uas tau nyiaj neeg ntiaj teb tej ntoo khaub lig”30 thiab cov uas “ua tib zoo sim ua neej ncaj ncees, raws li Yexus Khetos qhia.”31 Kuv thov kom nej yuav muaj kev xyiv fab puv npo, los ntawm Yexus Khetos lub npe, amees.