Cov Neeg Tim Khawv, tej Pawg Pov Thawj Hwj Aloos, thiab Koom Haum Ntxhais Hluas tej Pawg
Tej yam uas peb tshaj tawm tias yuav hloov no los yeej yog xav kom peb cov tub hluas ntxhais hluas kawm txuj ci los ua neeg dawb ceev.
Cov kwv tij thiab cov muam, kuv yeej zoo siab koom nrog nej hauv lub tuam rooj sab laj no. Lub lim tiam no, twb tshaj tawm rau cov mej zeej ntawm lub Koom Txoos txog tej kev hloov rau tsab cai txog qhov uas yuav pub leej twg ua tim khawv rau cov kab ke kev cai raus dej thiab kev cai sib khi. Kuv xav hais peb lub ntsiab ntawd.
-
Tus uas yuav pub ua tim khawv txog txoj kev cai raus dej sawv cev rau ib tug neeg tuag yog ib tug twg uas muaj ib daim ntawv tso cai nkag tuam tsev, tsis hais ib daim tso cai uas siv qee zaum xwb.
-
Ib tug mej zeej twg uas txais vaj txiaj ntsim thiab muaj ib daim ntawv tso cai nkag tuam tsev muaj cai ua ib tug tim khawv rau cov kab ke ua kev cai sib khi, tsis hais rau cov uas ciaj thiab ua sawv cev los yog.
-
Ib tug mej zeej twg hauv lub Koom Txoos uas tau ua kev cai raus dej lawm yeej ua tau ib tug neeg tim khawv rau kev cai raus dej ntawm ib tug neeg ciaj. Txoj kev hloov no yog hais txog tag nrho tej txoj kev ua kev cai raus dej uas tsis ua hauv lub tuam tsev.
Tej kev hloov tsab cai no yeej yog kev hloov txheej txheem xwb. Cov lus qhuab qhia thiab kev khi lus los tsis tau hloov li. Tej no yeej yog ua rau tag nrho cov kab ke. Tej kev hloov no yeej yuav pab tsev neeg koom tes ua cov kab ke no.
Tam sim no kuv kuj xav hais rau nej txog tej yam uas yuav hloov rau nej cov tub hluas ntxhais hluas thiab lawv cov thawj coj.
Nej nco qab tias kuv tau caw cov tub hluas ntxhais hluas ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg kom sau los ua tus Tswv cov tub rog hluas koom tes ua lub hom phiaj tseem ceeb tshaj plaws hauv lub ntiaj teb no—txoj kev muab Ixayees sau los ua ke.1 Kuv tau caw peb cov tub hluas ntxhais hluas li no vim lawv muaj txiaj ntsim ncav tes pab lwm tus thiab qhia txog tej yam uas lawv ntseeg kom lwm tus ntseeg lawv. Lub hom phiaj ntawm kev muab lawv sau los ua ke yeej yog ib yam tseem ceeb rau kev pab npaj neeg ntiaj teb rau tus Tswv txoj Kev Los Zaum Ob.
Nyob hauv txhua pawg ntseeg, tus Tswv cov tub rog hluas tus npisov yog tus thawj coj,Vajtswv tus tub qhe uas rau siab heev. Nws thawj txoj kev lav ris yog kev saib xyuas cov tub hluas ntxhais hluas ntawm nws pawg ntseeg. Tus npisov thiab nws ob tug pab cuam coj txoj hauj lwm ntawm tej pawg lub Pov Thawj Hwj Aloos thiab Koom Haum Ntxhais Hluas tej pawg hauv pawg ntseeg.
Tej yam uas peb tshaj tawm tias yuav hloov no los yeej yog xav kom peb cov tub hluas ntxhais hluas kawm txuj ci los ua neeg dawb ceev. Peb kuj xav txhawb dag zog ntawm tej pawg lub Pov Thawj Hwj Aloos thiab Koom Haum Ntxhais Hluas tej pawg kom txhawb nqa cov npisov thiab cov thawj coj thaum lawv pab tiam neeg uas tab tom loj hlob tuaj no.
Tam sim no Txwj Laug Quentin L. Cook yuav hais txog tej yam uas yuav hloov rau cov tub hluas. Thiab hmo no, nyob hauv tuas poj niam, Muam Bonnie H. Cordon, Koom Haum Ntxhais Hluas tus Tuam Thawj Tswj Hwm, yuav hais txog tej yam uas yuav hloov rau cov ntxhais hluas.
Thawj Pawg Thawj Tswj Hwm thiab Pawg Kaum Ob tug Thwj Tim koom tes pom zoo rau tej yam no kom txhawb peb cov tub hluas ntxhais hluas lub zog. Auj, peb hlub lawv heev thiab thov Vajtswv pab lawv! Lawv yeej yog Ixayees txoj kev cia siab, Xi-oos cov tub rog, cov me nyuam ntawm hnub uas tau cog lus tseg.2 Peb yeej ntseeg peb cov tub hluas ntxhais hluas tag nrho thiab peb ris lawv txiaj, Los ntawm Yexus Khetos lub npe dawb ceev, amees.